Sena Kuli Nomwakabeleka? Sena Inga Mwabeleka Alimwi?

SENA kuli nomwakajisi mukuli uuli woonse wabweendelezi mumbungano ya Bunakristo? Ambweni mwakabeleka kamuli mukutausi naa mwaalu. Mulakonzya mwakali mucibeela cimwi camulimo waciindi coonse. Cakutadooneka mwakali kukkomano akukkalwa moyo mumikuli yanu, pele akaambo katwaambo tumwi mwakaileka mikuli eeyo.

Ambweni mwakauleka mukuli wanu kutegwa mulanganye banamukwasyi. Kulubazu lumwi, ambweni kucembaala naa kuciswa-ciswa nzezyakapa kuti mucileke. Ikusala kubweza ntaamu zili boobo tacili citondezyo cakuti muntu waalilwa pe. (1 Tim. 5:8) Mumwaanda wamyaka wakusaanguna, Filipo wakabeleka kali misyinali, pele kumbele wakaakukkala ku Kaisareya, ooko nkwaakali kulanganya mukwasyi wakwe. (Inc. 21:8, 9) Mubucembele bwakwe, Mwami Davida wamu Israyeli yansiku wakacita bubambe bwakuti mwanaakwe Solomoni abe nguwe uukkala acuuno cakwe cabwami. (1 Bam. 1:1, 32-35) Nokuba boobo, boonse bobilo Filipo alimwi a Davida bakacili kuyandwa akukkomaninwa a Jehova alimwi bacilemekwa kusikila sunu.

Nokuba boobo, mulakonzya mwakanyangwa buya mukuli wabweendelezi. Sena cakapa boobo mbukkale butali kabotu? Naa sena mapenzi aamumukwasyi ngaakapa boobo? (1 Tim. 3:2, 4, 10, 12) Mulakonzya mwakalimvwa kuti tiicakaleelede kubweza ntaamu yakumunyanga coolwe cakubeleka mulimo ooyu, eelyo mucinyemede kusikila sunu.

Mulakonzya Kweelela Kubeleka Alimwi

Sena muntu wanyangwa mukuli wabweendelezi ulakonzya kupegwa alimwi? Takali kanji pe. Nokuba boobo, ikutegwa mutalike kubeleka alimwi, mweelede kuyandisisya kubeleka canguzu kutegwa mweelele kupegwa mikuli. (1 Tim. 3:1) Pele ino nkaambo nzi ncomweelede kuyandisisya kucita boobu? Nkaambo kakaambo nkamunya kakamupa kuti mulyaabe kuli Leza, nkokuti luyando ndomujisi kuli Jehova akuli baabo ibamubelekela. Ikuti kamuyanda kutondezya luyando oolo kwiinda mukubeleka alimwi, eeci ciyoopa kuti Jehova alubelesye luzyibo ndomwakajana nomwakali kubeleka alimwi aciindi nomwakanyangidwe mukuli wanu.

Amuyeeye cisyomezyo Jehova ncaakapa bana Israyeli icisi eeco cakweelela nocakanyangwa coolwe cakuba acilongwe cibotu anguwe. Mboobu Jwi lyakwe mbolyaamba: “Ndime Jehova, nsisanduki pe, aboobo nywebo nubana ba-Jakobo tamunyonyooki.” (Malk. 3:6) Jehova wakali kubayanda bana Israyeli alimwi wakali kulombozya kubabelesya alimwi. Mbubonya buyo, ulayandisisya kumubelesya alimwi kumbele. Ino ncinzi ncomukonzya kucita mubukkale momubede lino? Ikubeleka zyintu zyakumuuya kuyeeme kapati akuba muyumu kumuuya ikutali aluzyibo ndwajisi muntu lwakucita zyintu pe. Aboobo, eelyo nomutajisi mikuli iiyungizyidwe mumbungano, amubikkile maano kukuyumya cilongwe canu a Jehova.

Ikutegwa “muyume” mulusyomo, mweelede ‘kuyandaula Jehova anguzu zyakwe.’ (1 Kor. 16:13; Int. 105:4) Inzila imwi mbomukonzya kucita boobu nkwiinda mumupailo waansi amoyo. Nomupandulula bukkale bwanu kuli Jehova, amumwaambile mbomulimvwide alimwi akulomba muuya wakwe. Kwiinda mukucita boobo, muyooba acilongwe a Jehova, eelyo eeci ciyoomuyumya. (Int. 62:8; Flp. 4:6, 13) Aimbi nzila mbomunga mwayumya cilongwe canu a Jehova, nkwiinda mukuba aciiyo cisitikide ca Jwi lya Leza. Mbomutajisi mikuli minji kwaciindi cili mbocibede, mulakonzya kucita zyintu zinji kujatikizya  ciiyo canu nobeni alimwi acamukwasyi, ambweni akubukulusya cilengwa icali kumuyumina kutobela.

Masimpe ngakuti, mucimwiiminina Jehova kamuli umwi wa Bakamboni bakwe. (Is. 43:10-12) Icoolwe citaliboteli umwi aumwi wesu ncakonzya kuba acalo nkuba “similimonyina Leza.” (1 Kor. 3:9) Ikuyungizya ciindi ncomutola lubazu mumulimo wamumuunda ninzila iitaliboteli yakuyumya cilongwe canu a Jehova alimwi abaabo mbomubeleka limwi mumulimo.

Mbomukonzya Kuliyumya Kujatikizya Mbomulimvwa

Ikusweekelwa coolwe cakubeleka mulimo waalubazu kulakonzya kumupa kumvwa nsoni naa kuusa. Mulakonzya kamujisi cilengwa cakupa twaambo ikutondezya kuti muliluzi. Nokuba boobo, ino kuti naa bakwesu beendelezya bakatuswiilila twaambo twanu pele kumane bakayeeya kuti tamweelede kuzumanana amukuli uuli woonse? Mulakonzya kuba amizeezo mibi kujatikizya bakwesu aabo, icikonzya kumupa kuti mutabeleki canguzu kutegwa mweelele kupegwa mikuli ambweni akumupa kuti cimuyumine kwiiya kuzyintu zyakamucitikila. Lino atulange-lange zyintu zyakacitikila Jobu, Manase alimwi a Josefa mbozikonzya kumugwasya umwi kuzunda mizeezo mibi.

Jobu wakali kubaiminina bamwi kuli Jehova alimwi wakali kubeleka kali mwaalu amubetesi muciinga cabantu bansiku. (Job. 1:5; 29:7-17, 21-25) Mpoonya, aciindi ciyandika kapati mubuumi bwakwe, Jobu wakasweekelwa lubono lwakwe, bana, alimwi akuciswa kapati. Akaambo kazyintu eezyi, tanaakacijisi mpuwo mbotu kuli bamwi. Jobu wakati: “Baniini kulindime balanditabuluzya.”—Job. 30:1.

Jobu wakalimvwa kuti wakaliluleme munzila zyoonse alimwi wakali kuyanda kupa twaambo kutondezya kuti wakaliluzi kuli Leza. (Jobu 13:15) Pele Jobu wakalilibambilide kulindila Jehova, eelyo wakalongezyegwa akaambo kakucita boobo. Wakabona kuti wakali kuyandika kululamikwa, ikapati kujatikizya mbwaakalimvwa kumusunko wakamucitikila. (Job. 40:6-8; 42:3, 6) Mpoonya kulicesya kwa Jobu kwakapa kuti Leza amulongezye kapati kumamanino.—Job. 42:10-13.

Ikuti naa cakapa kuti munyangwe mukuli ncibi ncomwakacita, mulakonzya kulibuzya naa Jehova alimwi abanyoko Banakristo bayoomulekelela ncobeni akuciluba ncomwakacita. Pele, amulange-lange kaambo kajatikizya Mwami Manase waku Juda. Manase ‘wakacita milimo mibi minji mumeso aa Jehova yakumukalazya.’ (1 Bam. 21:6) Nokuba boobo, Manase wakafwa kali muntu uusyomeka, iwakali kulela kali mwami. Ino eeci cakacitika buti?

Manase wakazyoolutambula lulayo. Naakamana kuunduluzya kucenjezyegwa nkwaakapegwa, Jehova wakamuletela bana Asuri kuti bamulwane, aabo bakamwaanga akumutola kucisi cili kulamfwu ku Babuloni. Ookuya, Manase ‘wakabika moyo wakwe kuli Jehova Leza wakwe, walibombya loko kubusyu bwa Leza wabamawisi. Elyo wakali kukomba kulinguwe.’ Ikweempwa kuzwa ansi amoyo kwakamupa kubweza ntaamu kululamika cibi ncaakacita, eelyo Manase wakalekelelwa.—2 Mak. 33:12, 13.

Mikuli njaanyangwa muntu kanji-kanji taipilusyigwi yoonse aciindi comwe. Pele mukuya kwaciindi, mulakonzya kupegwa mikuli imwi iili mbwiibede. Ikwiitambula eeyi alimwi akubeleka kwanu canguzu kanji-kanji kuyoopa kupegwa  mikuli iiyungizyidwe. Eeci tacaambi kuti bukkale bwanu bulakonzya kucinca cakufwambaana kweelana ambomuyanda. Kulakonzya kuba zyintu zityompya. Nokuba boobo, kulisungula alimwi akukakatila zileta micelo mibotu.

Amubone cikozyanyo ca Josefa mwana wa Jakobo. Naakali amyaka iili 17, Josefa wakasambalwa cakutalulama mubuzike abanabokwabo. (Matl. 37:2, 26-28) Masimpe eeci tacili ncaakali kulangila kucitilwa kubanabokwabo. Pele, wakalilibambilide kuba mubukkale oobu, eelyo kwiinda mukulongezyegwa a Jehova “wakajana coolwe muŋanda yasimalelo wakwe.” (Matl. 39:2) Kuzwa waawo, Josefa wakabikkwa muntolongo. Pele wakazumanana kusyomeka, alimwi Jehova wakali anguwe, cakuti mukuya kwaciindi wakabikkwa kulanganya ntolongo.—Matl. 39:21-23.

Josefa tanaakazyi kuti myaka yoonse njaakakkala muntolongo yakali kuyoobeleka mulimo umwi. Wakazumanana buyo kucita ncaakali kukonzya. Aboobo Jehova wakamubelesya kubamba nzila yakali kuyoosololela ku Lunyungu lwakasyomezyegwa. (Matl. 3:15; 45:5-8) Nokuba kuti kunyina akati kesu uukonzya kulangila kuba alubazu lupati mbuli ndwaakajisi Josefa, cibalo eeco cakasololelwa amuuya citondezya kuti janza lya Jehova lilijatikizyidwe mumikuli babelesi bakwe njobatambula. Amube balisungwide kubelesyegwa kufwumbwa ciindi kwiinda mukwiiya Josefa.

Ikwiiya Kuzyintu Zikatazya

Jobu, Manase alimwi a Josefa bakacitikilwa zyintu zityompya. Bantu aaba boonse botatwe bakabuzumina bukkale Jehova mbwaakazumizya, alimwi umwi aumwi wakaiya ziiyo zigwasya. Ino ncinzi ncomukonzya kwiiya?

Amubone ncali mukusola kumuyiisya Jehova. Naakatyompedwe kapati, Jobu watalika kuyeeya zyintu zijatikizya buyo nguwe alikke eelyo tanaakabona zyintu zipati zyakajatikizyidwe. Pele kwiinda mukululamikwa a Jehova caluyando, wakatalika kuyeeya bweelede, eelyo wakazumina kuti: “Ndakaamba cakutasongwaala.” (Job. 42:3) Ikuti naa mulimvwa kubijilwa akaambo kakunyangwa mikuli, ‘mutaliyeeyi cakulisumpula kwiinda mbukweelede, pele kamuyeeya cakulibatamika.’ (Rom. 12:3) Ambweni Jehova usola buyo kumululamika munzila njomutana kumvwisya.

Amutambule lulayo. Kumatalikilo Manase ulakonzya wakalimvwa kuti tanaakeelede kusinswa kapati boobo mbuli mbwaakasinswa. Pele, wakakutambula, wakeempwa, eelyo wakaileka nzila yakwe mbyaabi. Kufwumbwa mbomulimvwa kujatikizya lulayo ndomwakapegwa, ‘amulibombye mumeso aa Jehova, eelyo uyoomusumpula.’—1 Pet. 5:6; Jak. 4:10.

Amukkazyike moyo alimwi akulisungula. Zyintu zyakamucitikila Josefa nozyakamupa kusulaika akuyanda kupilusya cibi. Muciindi caboobo, wakaba aluzyibo alimwi aluzyalo. (Matl. 50:15-21) Ikuti naa mwakatyompezyegwa, amukkazyike moyo. Amube balisungwide kuyiisyigwa a Jehova.

Sena kuli nomwakajisi mukuli wabweendelezi mumbungano ya Bunakristo? Amumulekele Jehova kuti akamupe mikuli kumbele. Amuyumye cilongwe canu a Jehova. Kukkazyika moyo akulicesya azyeendelezye mbomulimvwa. Amulisungule kutambula kufwumbwa mukuli ngomukonzya kupegwa. Amusyome kuti “Jehova . . . takabakasyi cintu cibotu beenda cakululama.”—Int. 84:11.

Majwi aakwelelezya sikubala aali apeeji 30]

Amuyume mulusyomo kwiinda mumupailo uuzwa ansi amoyo

[Cifwanikiso icili apeeji 31]

Ikuyungizya ciindi ncomutola lubazu mumulimo wamumuunda ninzila iitaliboteli yakuyumya cilongwe canu a Jehova

[Cifwanikiso icili apeeji 32]

Amumulekele Jehova kuti akamupe mikuli kumbele