Pakadiskobre nin Nakatagong mga Kayamanan

MAY nadiskobre na daw kamong nakatagong kayamanan sa sarong dai linalaoman na lugar? Nangyari iyan kan Marso 27, 2005 ki Ivo Laud, saro sa Mga Saksi ni Jehova sa Estonia. Tinatabangan nia kaidto si Alma Vardja, sarong may edad nang kapwa Saksi, na gabaon an sarong lumang kamalig. Mantang binabaklas ninda an pangluwas na lanob, may narisa sindang pidaso nin kahoy na nakatahob sa sarong parte nin harigi. Pagkabaklas sa kahoy, naheling ninda an sarong labot na mga 10 sentimetros an lakbang, 1.2 metros an laba, asin 10 sentimetros an rarom, na may nakatakop na saro pang pidaso nin kahoy. (1) Saro nanggad na tagoan nin mga kayamanan! Ano an mga kayamanan na iyan? Siisay an nagtago kaiyan duman?

Sa tagoan na iyan may nagkapirang pakete na  napapatos na marhay nin mahibog na papel. (2) An mga pakete may laog na literatura nin Mga Saksi ni Jehova, na kadaklan kaiyan mga artikulong pinag-adalan sa Torrengbantayan, kaiba an nagkapira na kaidto pang 1947. (3) Iyan maingat na surat-kamot sa lenguaheng Estoniano. An nagkapira sa mga pakete nagtatao nin ideya kun siisay an nagtago kan literatura duman. Iyan mga rekord nin pag-usisa sa agom ni Alma, si Villem Vardja. Kaiba man sa mga nadiskobre an impormasyon manongod sa mga taon na yaon sia sa bilanggoan. Taano ta ibinilanggo sia?

Si Villem Vardja responsableng naglingkod sa mga Saksi sa Kongregasyon na Tartu asin kan huri sa Kongregasyon na Otepää sa Estonia, saro sa dating Soviet Socialist Republics. Minalataw na nanodan nia an katotoohan sa Biblia kan panahon bago Guerra Mundial II. Pakalihis nin pirang taon, kan Disyembre 24, 1948, ipinaaresto kan Komunistang rehimen si Tugang na Vardja huli sa saiyang relihiosong aktibidad. Inusisa asin minaltrato sia kan mga secret police mantang pinipirit ninda sia na itao sa sainda an mga ngaran kan saiyang mga kapagtubod. Pagkatapos na sia dai tawan nin oportunidad na idepensa sa korte an saiyang sadiri, sia sinentensiahan nin sampulong taon na pagkabilanggo sa mga kampo sa Rusia.

Si Villem Vardja nagin maimbod ki Jehova sagkod na sia magadan kan Marso 6, 1990. Dai aram kan saiyang agom na may nakatago palan na literatura. Siertong gusto ni Villem na protehiran an saiyang agom kun magkaigwa nin pag-usisa. Taano ta kinaipuhan niang itago an literatura? Itinago nia iyan huli ta sa parate an Soviet State Security Committee, an KGB, bigla na sanang nagsisiyasat sa harong nin mga Saksi ni Jehova, na naghahanap nin relihiosong mga publikasyon. Posibleng marhay na itinago ni Tugang na Vardja an literatura tanganing masierto na an mga kapagtubod may makukuang suplay na espirituwal na kakanon kun makompiskar kan KGB an gabos na iba pang literatura. An iba pang tagoan nin literatura nakua bago kaidto, kan tig-init nin 1990. An saro nadiskobre sa Tartu, sa timog nin Estonia. Iyan man itinago ni Villem Vardja.

Taano ta inaapod niato an literaturang ini na mga kayamanan? Huli ta an mga kopyang ini na maingat nanggad na surat-kamot asin itinago nagpapaheling kun paano pinapahalagahan na marhay kan mga Saksi an espirituwal na kakanon na makukua kan panahon na idto. (Mat. 24:45) Pinapahalagahan daw nindo an espirituwal na mga probisyon na nakukua nindo ngonyan sa saindong sadiring lenguahe? Kaiba dian An Torrengbantayan sa lenguaheng Estoniano asin sa labi pang 170 lenguahe.