Pagkakaplag ug Natagong mga Bahandi

NAKAKAPLAG ka na ba sukad ug natago nga bahandi? Nahitabo kana niadtong Marso 27, 2005, kang Ivo Laud, usa sa mga Saksi ni Jehova sa Estonia. Gitabangan niya si Alma Vardja, nga usa ka tigulang nga Saksi, sa pagguba sa iyang karaang kamalig. Sa dihang ilang gitangtang ang bungbong sa gawas, ilang namatikdan ang usa ka tabla nga nagtabon sa usa ka bahin sa haligi. Pagkuha nila sa tabla, ilang nakita ang usa ka luna nga 4 pulgadas ang gilapdon, 50 pulgadas ang gitas-on, ug 4 pulgadas ang giladmon, nga gitabonan ug susama niana nga matang sa tabla. (1) Usa kadto ka tagoanag bahandi! Unsa man ang bahandi? Kinsay nagtago niana?

Diha sa maong luna ilang nakaplagan ang pipila ka pakete nga giputos pag-ayo ug baga nga papel.  (2) Ang mga pakete nasudlag basahon sa mga Saksi ni Jehova, kasagaran mga tun-anang artikulo sa Bantayanang Torre, nga ang uban sukad pa sa 1947. (3) Gikinamot kana pagsulat sa pinulongang Estonian. Mailhan diha sa pipila ka pakete kon kinsay nagtago niana. Naundan kadto sa mga rekord sa pagsukitsukit sa bana ni Alma nga si Villem Vardja. Diha usay impormasyon bahin sa gidugayon sa iyang pagkabilanggo. Nganong nabilanggo man siya?

Si Villem Vardja may katungdanan sa kongregasyon sa Tartu ug sa ulahi sa kongregasyon sa Otepää, sa Estonia, nga sakop sa kanhing Soviet Socialist Republics. Dayag nga nakakat-on siya sa kamatuoran sa Bibliya sa wala pa ang Gubat sa Kalibotan II. Pipila ka tuig sa ulahi, sa Disyembre 24, 1948, ang gobyernong Komunista nagpadakop kang Brader Vardja tungod sa iyang relihiyosong kalihokan. Siya gisukitsukit ug gidagmalan sa mga sekreta aron iyang itug-an ang ngalan sa ubang mga Saksi. Wala siya hatagig higayon nga modepensa sa iyang kaugalingon sa korte. Human niana, siya gisentensiyahan ug napulo ka tuig nga pagkabilanggo sa Rusya.

Si Villem Vardja nagmatinumanon kang Jehova hangtod sa iyang kamatayon sa Marso 6, 1990. Walay kalibotan ang iyang asawa nga naglungtad diay ang maong mga basahon. Lagmit gusto niyang protektahan ang iyang asawa engkasog sukitsukiton kini. Nganong kinahanglan man niyang itago ang mga basahon? Tungod kini kay ang Soviet State Security Committee, ang KGB, sagad mokalit ug inspeksiyon sa balay sa mga Saksi, nga mangitag relihiyosong mga basahon. Lagmit gitagoan kadto ni Brader Vardja aron maseguro nga duna gihapoy suplay sa espirituwal nga pagkaon engkasog maembargo sa KGB ang ubang mga publikasyon. Sayosayo niana, nakaplagan usab ang ubang tagoanag basahon sa ting-init sa 1990. Ang usa niana nakaplagan didto sa Tartu, sa habagatang Estonia. Gitagoan usab kadto ni Villem Vardja.

Nganong gitawag man natog bahandi kining maong mga basahon? Tungod kay kining gihagoan pagsulat ug gitagoan pag-ayo nga mga basahon nagpakita sa pagpabili sa mga Saksi sa espirituwal nga pagkaon nga ilang nabatonan niadtong panahona. (Mat. 24:45) Gipabilhan ba nimo ang espirituwal nga mga tagana nga imong madawat sa inyong dapit? Lakip niana ang magasing Ang Bantayanang Torre sa Estonian ug kapin sa 170 pa ka pinulongan.