Ndikụt N̄kpọuto Oro Edịbede

NDI akanam omokụt n̄kpọuto ke ebiet emi mûkodorike enyịn ndikụt? Ivo Laud emi edide kiet ke otu Mme Ntiense Jehovah ama okụt utọ n̄kpọ emi ke Estonia ke March 27, 2005. Enye akan̄wam Alma Vardja, eyenete an̄wan oro ama ọkọsọn̄, ndiwụri akani ufọk ubonn̄kpọ esie. Ke ini mmọ ẹkesụk ẹwụride ibibene an̄wa, mmọ ẹma ẹkụt obukpọk ofụkde obubọk kiet. Ke ẹma ẹkemenede obukpọk oro, mmọ ẹma ẹkụt ndudu oro ẹkedade ibio eto ẹsịri. Ndudu oro okokpon sentimita 10, otụn̄ọ sentimita 10 n̄ko, onyụn̄ ọniọn̄ esisịt akan ruler 4. (1) Ẹkedịp n̄kpọuto mi. Nso ke enye ekedi? Anie ekedịp mmọ do?

Ẹma ẹsion̄o ediwak ndodobi babru oro ẹkenen̄erede ẹbọp ke ndudu oro. (2) N̄wed Mme Ntiense  Jehovah, akpan akpan mme ibuotikọ ukpepn̄kpọ Enyọn̄-Ukpeme, emi esịnede eke 1947, ke ẹkebọp ke ekwo emi. (3) Ẹma ẹnen̄ede ẹtịn̄ enyịn ẹda ubọk ẹwet mmọ ke Usem Estonia. Mme n̄kpọ oro ẹkewetde ẹsịn ke ekwo oro ama anam ẹfiọk owo oro ekedịpde mmọ do. Ẹma ẹkụt mme mbụme oro mme bodisi ẹkebụpde Villem Vardja ebe Alma ye ibat isua emi Villem Vardja okodude ke ufọk-n̄kpọkọbi. Ntak emi ẹkekọbide enye?

Villem Vardja ekedi asan̄autom esop ke Esop Tartu, ye ke Esop Otepää ke Estonia, emi ekesịnede ke Soviet Union. Enye ọkọbọ akpanikọ esisịt ini mbemiso ọyọhọ ekọn̄ ererimbot iba ọtọn̄ọ. Ke isua ifan̄ ama ekebe, ke December 24, 1948, Ukara Communist ẹma ẹmụm enye ke ntak utom ukwọrọikọ. Mme ndedịbe bodisi ẹma ẹdomo ndinyịk enye ọnọ mmimọ enyịn̄ Mme Ntiense eken, ẹbụp enye ediwak mbụme, ẹnyụn̄ ẹnọ enye ufen. Owo ikayakke enye etịn̄ ikọ anyan̄a idem ke esop, edi ẹbiere n̄kpọkọbi isua duop ẹnọ enye ke ufọk-n̄kpọkọbi Russia.

Villem Vardja ama anam akpanikọ ọnọ Jehovah tutu esịm usen emi enye akakpade ke March 6, 1990. N̄wan esie ikọfiọkke ke ebe imọ ama edịp n̄wed ke ufọk mmimọ. Ekeme ndidi ebe esie ikoyomke enye ọfiọk mbak edieke mme bodisi ẹbụpde enye. Ntak emi enye ekedịpde n̄wed emi-e? Enye ekedịp mmọ koro Mbon Ukpeme Soviet Union, emi ẹkekotde KGB, ẹma ẹsika ufọk Mme Ntiense Jehovah ini ekededi oro mmọ ẹmade ẹketan̄ n̄wed. Ekeme ndidi Brọda Vardja ekedịp n̄wed emi mbak edieke KGB ẹkade ẹketan̄ n̄wed ke ufọk nditọete eken, udia eke spirit okposụk odu ọnọ mmọ. Ke ini ndaeyo 1990, ẹma ẹkụt mme itie en̄wen oro ẹkedịpde n̄wed nnyịn eken. Kiet ke otu itie oro ekedi ke Tartu, ke usụk usụk Estonia. Kpa Villem Vardja ekedịp enye emi n̄ko.

Ntak emi idọhọde ke n̄wed emi ẹdi n̄kpọuto? Koro ndisụhọde ntie nda ubọk nsion̄o n̄kpọ ke n̄wed nnyịn n̄wet ndọn̄ ke n̄wed en̄wen, ntan̄ mmọ ntịm ndịp ekenen̄ede owụt nte Mme Ntiense Jehovah ẹmade udia eke spirit oro ẹkenọde ini oro. (Matt. 24:45) Ndi afo emesima udia eke spirit oro ẹnọde idahaemi ke edem mbufo? Kiet ke otu mmọ edi Enyọn̄-Ukpeme ke Usem Estonian ye ke mme usem eken oro awakde ebe 170.