Ojetopami peteĩ mbaʼe iporãmba jepéva

NDÉPA retopámava pláta yvyguy peteĩ reimoʼãʼỹhápe? Upéva oikovaʼekue Ivo Laud rehe, upe 27 de marzo de 2005. Haʼe ningo peteĩ testigo de Jehová oikóva Estóniape. Peteĩ árape oho oipytyvõ peteĩ ermána héravape Alma Vardja. Haʼe ningo ig̃uaig̃uíma ha upévare oipytyvõ chupe oity hag̃ua peteĩ óga vaikue. Oitývo hikuái peteĩ pare, ohecha oñemoĩ hague peteĩ távla pe orkón rehe. Ha oipeʼávo upe távla, otopa jey oñembojoʼa hague ótro távla michĩvévape. Upéva ningo ombotyhína pe orkón ikuaha, ipéva 10 sentímetro, ijyvate 1,2 métro ha de fóndo oreko 10 sentímetro. (1) Upépe ningo oñeñomíraʼe heta mbaʼe iporãva pláta yvyguýicha! Mbaʼe piko upe oñeñomivaʼekue? Ha mávapa omoĩraʼe upépe?

Upépe ningo oñeñomivaʼekue heta kuatiañeʼẽ ojelia porãva kuatia anambusúpe. (2) Umi kuatiañeʼẽ haʼehína  umi Ñemañaha artíkulo oñehesaʼỹijovaʼerã ha ojapovaʼekue testigos de Jehová (oĩ avei 1947-pe guaréva). (3) Umíva ojehaivaʼekue estóniope ha ojejapo a máno. Ha ojerrevisárõ guare umi kuatiañeʼẽ, ojetopa avei heta dokuménto, umíva rupive ojekuaa mávapa omoĩrakaʼe upépe. Umi dokuménto ningo omombeʼu oñembodeklara hague Alma ménape hérava Villem Vardja. Ojetopa avei dokuménto omombeʼúva mboy áñopa ohorakaʼe kárselpe. Péro mbaʼére piko ko karai ohorakaʼe kárselpe?

Villem omoakãvaʼekue pe kongregasión de Tartu ha upéi kongregasión de Otepää. Mokõivéva opyta Estóniape, ko tetã ningo oĩvaʼekue yma umi república socialista soviética apytépe. Villem ningo oiméne oservi ñepyrũrakaʼe Jehovápe pe segunda guerra mundial mboyvemi. Péro, upe 24 de diciembre de 1948 umi komunísta ogueraha chupe préso opredika haguére. Umi polisía ombodeklara chupe ha oipota omombeʼu chupekuéra ambue Testígo réra. Ndojehejái avei Villem-pe oñedefende peteĩ trivunálpe. Upéi oñemondo chupe diez áño ombaʼapo pohýi hag̃uáme Rúsiape.

Villem omano el 6 de marzo de 1990 ha upe araite peve ojerovia Jehováre. Péro hembireko ningo ndoikuaaivaʼekue umi rrevísta ha dokumentokuéra oñeñomi hague hógape. Oiméne Villem nomombeʼuirakaʼe mbaʼeve hembirekópe oprotehe hag̃ua chupe. Ikatu rupi oñembodeklara avei chupe. Ha mbaʼeha piko oñomirakaʼe umi rrevísta? Pórke umi polisía, pe Comité de Seguridad del Estado soviético (KGB) og̃uahẽntema umi ermáno rógape oheka hag̃ua ñane puvlikasionkuéra. Villem oiméne oñomirakaʼe umi rrevistakuéra ikatu hag̃uáicha akóinte umi ermáno omombarete ijerovia. Upéicha umi KGB ogueraha hetáramo jepe, ndofaltamoʼãi chupekuéra upéva. Áño 1990-pe, ára haku tiémpope ojetopave ambue lugár oñeñomi hague puvlikasionkuéra. Peteĩ Villem ojapovaʼekue avei ojetopa Tartu-pe, opytáva súr gotyo Estóniape.

Mbaʼére piko jaʼe pláta yvyguýicha iporãha umi kuatiañeʼẽ? Pórke umi rrevísta ojehaivaʼekue a máno ha oñeñomi porãitéva ohechauka mbaʼeichaitépa ermanokuéra omombaʼe Ñandejára Ñeʼẽ (Mat. 24:45). Ñandépa ñamombaʼe avei upéicha Ñandejára Ñeʼẽ? Ko rrevísta Ñemañaha ningo ojejapo estóniope ha 170 ári idiómape avei. Ha iporãta ñamombaʼéramo Ñandejára omeʼẽgui ñandéve ñamombarete hag̃ua ñande jerovia.