Ku Fumana Maluo A Patilwe

KANA mu kile mwa fumana maluo a patilwe mwa sibaka se ne mu si ka libelela? Bo Ivo Laud, ba ba li Lipaki za Jehova mwa Estonia, ba kile ba fumana maluo a cwalo ka la March 27, 2005. Ne ba tusa kaizeli wa musupali Alma Vardja ku lutulula muyaho wa kale mwa naa bulukelanga lika. Hamulaho wa ku zwisa limota la kwande, ba bona libala le ne li kwahezi lineku le liñwi la musumo. Ha se ba zwisize libala leo, ba fumana musima o kwahezwi ka libala o eza lisentimita ze 10 mwa bupala, limita ze 1.2 mwa butelele, ni lisentimita ze 10 mwa butungi. (1) Ao ne li mabulukelo a maluo aa patilwe! Ne li maluo mañi ao? Ki mañi ya naa a patile mwa musima wo?

Mwa mabulukelo ao ne ku na ni lika ze ne putezwi  hande mwa mapepa aa tiile. (2) Liputela zeo ne li lihatiso za Lipaki za Jehova, sihulu litaba za tuto za Tawala ya Mulibeleli, ze kopanyeleza ni za mwa 1947. (3) Ne li ñozwi hande ka mazoho mwa puo ye bulelwa mwa naha ya Estonia. Liputela ze ñwi ne li na ni lisupo ze ñwi ze ne bonisa mutu ya naa kile a li pata. Lisupo zeo ki litaba ze ne bulukilwe za mo ne ba tikitibezwi bo Villem Vardja, baana ba bo Alma. Ze ñwi hape ze ne fumanwi ne li litaba ka za lilimo ze ne ba kile ba pika tolongo. Ne ba tamezwiñi?

Bo Villem Vardja ne ba na ni buikalabelo mwahalaa Lipaki mwa Puteho ya Tartu mi hamulaho ni mwa Puteho ya Otepää mwa Estonia. Ku bonahala kuli ne ba itutile niti nakonyana pili Ndwa ya Lifasi ya Bubeli i si ka tumbuka kale. Lilimonyana feela hamulaho wa fo, ili ka la December 24, 1948, ba kopano ya Komyunizimu ba tama Muzwale Vardja bakeñisa misebezi ya hae ya bulapeli. Naa tikitibilwe ni ku nyandiswa ki batikitibi ha ne ba nze ba mu hapeleza kuli a punde mabizo a balumeli ba bañwi. Ha sa hanezwi ku itwanela mwa kuta, ba mu atulela ku pika lilimo ze 10 mwa litolongo za kwa Russia.

Bo Villem Vardja ne ba zwezipili ku sepahala ku fitela ba shwa ka March 6, 1990. Basali ba bona bo Alma Vardja ne ba si ka ziba se siñwi ka za lihatiso ze ne bulukilwe. Mwendi ne ba bata ku ba sileleza ha ne ba ka tikitibiwa. Ne ba pateziñi lihatiso zeo? Ne ba li patile bakeñisa kuli batikitibi ba KGB ne ba tahanga ka ku sa libelela ku to shwashwata mwa mandu a Lipaki za Jehova ku bata lihatiso za bona. Ku bonahala kuli Muzwale Vardja naa patile lihatiso zeo ka mulelo wa kuli haiba lihatiso kaufela ne li ka ngiwa ki ba KGB, balumeli ba bañwi ba si ke ba taelelwa ki lico za kwa moya. Mabulukelo a mañwi hape a lihatiso naa kile a fumanwa ka 1990. Le liñwi la mabulukelo ao ne li fumanehile mwa Tartu, kwa mboela wa Estonia. Libulukelo leo ni lona ne li patilwe ki bo Villem Vardja.

Ki kabakalañi lika zeo ha li bulelwa kuli ki maluo? Li bulelwa cwalo bakeñisa kuli likopi zeo ze ne ñozwi ka bukwala ka mazoho ni ku patiwa li bonisa kuli Lipaki ne ba itebuha hahulu lico za kwa moya ze ne fumaneha ka nako yeo. (Mat. 24:45) Kana mwa itebuha lihatiso ze mu amuhelanga? Ze ñwi za lihatiso zeo ki Tawala ya Mulibeleli mwa puo ya kwa Estonia ni mwa lipuo ze ñwi ze fitelela 170.