¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Purak manqhan jiwxapxi uka wawanakax jaktanipxaniti?

Chiqas wawax purak manqhan utjxi ukhatpachaw jakäwinïxi. Ukat Jehová Diosax sapa maynirux jaktayaspawa. Kunattix ‘Jupatakix janiw kunas chʼamäkiti’ (Mar. 10:27). Ukhamaxa, ¿janïr yuripkipan jiwapxi uka wawanakarux jaktaypachäniti? Chiqas uka tuqit Bibliax janiw qhanañchkiti (4/15, 12, 13 jananaka).

• Kʼisimiraru, damán sat animalaru, tʼiju tʼijunakaru ukat geco sat animalar uñjasaxa, ¿kunsa yatiqtanxa?

Uka pusi animalanakar uñjasaxa, Jehová Diosax kunja yatiñkankañanisa ukwa yatiqtanxa (Pro. 30:24-28). (4/15, 16-19 janakama.)

• 1909 maranxa, ¿kunsa Jehová Diosan Qhanañchirinakapax lurapxatayna?

1909 maranwa Watch Tower Bible and Tract Society oficinanakapax Pittsburgh (Pensilvania) markat Brooklyn (Nueva York) markaruw apataxäna, jichhakamas uka markankaskakiwa. Uka tuqnamwa Jehová Diosan Qhanañchirinakapax Bibliat apstʼat qillqatanak apsupxi (07–09, 22-24 janakama).

• Amuktʼañax wali wakiskiriwa sasaxa, ¿kunatsa Bibliax sispacha?

Amukïktan ukhaxa, respeto, yatiñanïtasa ukat amuytʼasirïtaswa uñachtʼaytanxa, ukatxa amuktʼañax lupʼiñatakiw yanaptʼarakistu (Sal. 37:7; 63:6; Pro. 11:12). (5/15, 3-5 janakama.)

• Judean apnaqirinakatxa, ¿qhawqhanis Jehová Diosan utapar taqi chuym munasitap uñachtʼayapxäna?

Tunka llätunkani Judea apnaqirinakatxa, Asampi Josafatampi Ezequiasampi ukat Josiasampikiw Diosan utapar taqi chuym munasitap uñachtʼayapxäna (6/15, 7-11 janakama).

• ¿Taqi ajllit cristianonakat tamanakar yatichapxi?

Janiwa. Taqi khitinakatï qullan ajayump ajllitapki ukanakaxa, Amuyasir Chiqap Uywata taypinkapxiwa, ukampis khitinakatï Uraqpachan Jilïr Irpirinakäpxi ukanakakiw Bibliat apstʼat yatichäwinak tamanakar churasiñapatak uñjasipki (6/15, 22-24 janakama).

• ¿Qʼaxu wayn tawaqurux kunjamsa jakäwipatak yanaptʼañäspa?

Jakäwipan qʼaxu wayn tawaqunakar yanaptʼañatakixa, jupa pachpa suma “amuyumpi” mä amtar puriñapatakix awk taykanakaw yanaptʼapxañapa (Rom. 12:1, 2). Awk taykatï Bibliarjama kunayman tuqit iwxtʼapxanixa, taqi kun phuqirïñapataki, suma amtanakar puriñapataki ukat jan waltʼäwinakar jan puriñapatakiw yanaptʼapxani (Fili. 4:5; Gál. 6:7; Col. 3:21). Chiqpachansa, Biblian utjki uka iwxtʼanakakiw familian kusisit jakasiñatakix yanaptʼistaspa (07–09, 10-12 janakama).

• ¿Kunatsa Jesusax ley yatichirinakat sipansa fariseonakat sipansa wali suma yatichirïnxa?

Kunattix kʼari yupaychäwi pʼiqtʼirinakax janiw Diosarusa ni jaqi masiparus munasipkänti, ukampis Jesusax Awkiparux wal munasïna ukat jaqinakatsa khuyaptʼayasirakïnwa (Mat. 9:36). Chiqas Jesusaxa, wali munasiri sinttʼasiri ukham suma jaqïnwa (7/15, 15 jana).

• Wajchanakar tʼaqhisiyirinakaruxa, ¿kunas pasani?

Jehová Diosax israelitanakar Ley churkäna ukanxa, akham sasaw satayna: “Janiw jan walinak lurasina tʼaqhisiyapxätati [...] wajchanakaru[xa], jumanakatix tʼaqhisiyapxäta ukaxa [...] nayax colerataxa, jumanakarux espadampkamaw jiwarayapxäma” sasa. Ukhamax janipun ak armañäniti: khitinakatï wajcha wawanakar tʼaqhisiyapxi ukanakaxa, ‘Diosan jachʼa colerapatx’ janiw qhispipkaniti (Éxo. 22:22-24; Sof. 2:2). (07–09, 31 jana.)