Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, sulayi kon makatubag ka ba sa mosunod nga mga pangutana:

• Banhawon ba ang bata nga namatay sa wala pa mahimugso?

Ang kinabuhi magsugod panahon sa pagsamkon. Si Jehova makabanhaw sa mga indibiduwal sa bisan unsang yugto sa ilang kinabuhi tungod kay ang “tanang butang posible sa Diyos.” (Mar. 10:27) Apan ang Bibliya dili direktang nag-ingon kon iya bang banhawon o dili ang mga bata nga namatay sa wala pa mahimugso.—4/15, panid 12, 13.

• Unsay atong makat-onan gikan sa mga hulmigas, koneho sa kabatoan, dulon, ug tiki?

Makita kanila ang kinaiyanhong kaalam. Busa, naghimaya sila sa kaalam sa Diyos. (Prov. 30:24-28)—4/15, panid 16-19.

• Nganong ang tuig 1909 maoy halandomong tuig alang sa mga Saksi ni Jehova?

Niadtong 1909 ang hedkuwarter sa Watch Tower Bible and Tract Society, ang legal nga korporasyon nga gigamit sa mga Saksi ni Jehova sa pagpatik ug mga basahon, gibalhin gikan sa Pittsburgh, Pennsylvania, ngadto sa Brooklyn, New York, diin kini padayong gigamit hangtod karon.—5/1, panid 22-24.

• Nganong ang Bibliya naghisgot nga may pag-uyon bahin sa paghilom?

Kini nagpakita nga ang paghilom maoy ilhanan sa pagtahod, tabang sa pagpamalandong, ug pamatuod sa pagkamaalamon ug katakos sa pag-ila. (Sal. 37:7; 63:6; Prov. 11:12)—5/15, panid 3-5.

• Sa unsang paagi si John Wycliffe, William Tyndale, Robert Morrison, ug Adoniram Judson managsama?

Sila nahigugma sa Pulong sa Diyos ug gihubad nila kana sa pinulongan nga mabasa sa ordinaryong mga tawo. Si Wycliffe ug Tyndale naghubad niana ngadto sa Iningles, si Morrison ngadto sa Ininsek, ug si Judson ngadto sa Burmese (Myanmar).—6/1, panid 8-11.

• Pila sa mga hari sa Juda ang nagpasundayag ug talagsaong kasibot alang sa balay sa Diyos?

Sa 19 ka hari nga nagmando sa habagatang gingharian sa Juda, upat kanila ang nagpasundayag ug talagsaong kasibot—si Asa, Jehosapat, Ezequias, ug Josias.—6/15, panid 7-11.

• Ang tanan bang dinihogang Kristohanon sa yuta nakigbahin sa pagtaganag espirituwal nga pagkaon?

Wala. Ang tanan nga gidihogan sa espiritu sa Diyos maoy bahin sa matinumanon ug maalamong ulipon nga matang, apan kadto lamang naglangkob sa Nagamandong Lawas ang nagdumala sa pagtaganag espirituwal nga pagkaon.—6/15, panid 22-24.

• Nganong giilogan sa Romanong mga sundalo ang pang-ilalom nga besti ni Jesus?

Wala tabasa sa mga sundalo nga naglansang kang Jesus ang iyang pang-ilalom nga besti. Ang maong besti sagad himoon pinaagig pagtahi sa duha ka panapton, apan ang besti ni Jesus walay tinahian, nga maoy nakapamahal niini.—7/1, panid 22.

• Nganong ikaingon nga ang gugma mao ang nakapalahi sa paagi sa pagtudlo ni Jesus nianang sa mga lider sa relihiyon?

Imbes higugmaon ang ordinaryong mga tawo, ang maong mga lider nagtamay hinuon kanila. Dugang pa, sila walay gugma sa Diyos. Si Jesus nahigugma sa iyang Amahan ug naluoy sa mga tawo. (Mat. 9:36) Siya malumo, mabination, ug maluloton kanila.—7/15, panid 15.

• Nganong malisdan usahay ang mga magtiayon sa pagbadyet sa ilang salapi, ug unsay makatabang kanila nga molampos niana?

Ang kasagarang hinungdan sa panaglalis sa magtiayon bahin sa salapi adunay kalabotan sa pagsalig o kahadlok, ug ang magtiayon hayan lainlaig kagikan. Ang upat ka yawi aron magmalamposon mao: Magkat-on nga malinawong maghisgot bahin sa salapi, isipon ang kinitaan ingong salapi sa pamilya, magsulat ug badyet alang sa pamilya, ug magsabot kon kinsay mokupot sa badyet.—8/1, panid 10-12.