Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Posible ayhan nga banhawon ang bata nga napatay antes pa ini nabun-ag?

Ang kabuhi nagasugod sa pagpanamkon. Mabanhaw ni Jehova ang mga tawo bisan sa ano man nga kahimtangan sang ila kabuhi sila napatay, bangod “ang tanan nga butang posible sa Dios.” (Mar. 10:27) Apang ang Biblia wala nagasiling sing direkta kon bala banhawon sang Dios ang mga bata nga napatay antes pa ini nabun-ag.—4/15, pahina 12, 13.

• Ano ang aton matun-an kon panilagan naton ang mga subay, coney, apan, kag tuko?

Ining apat ka tinuga nagailustrar sang kaalam. Gani, ginapadaku nila ang kaalam sang Dios. (Hulu. 30:24-28)—4/15, pahina 16-19.

• Ano ang importante nga hitabo para sa mga Saksi ni Jehova sang nagligad nga 100 ka tuig sugod sang 1909?

Sang 1909, ang ulo nga talatapan sang Watch Tower Bible and Tract Society, ang legal nga korporasyon sang mga Saksi ni Jehova sa pagbalhag, ginsaylo halin sa Pittsburgh, Pennsylvania pakadto sa Brooklyn, New York, diin padayon ini sa pagbalhag.—5/1, pahina 22-24.

• Ngaa nagasiling ang Biblia nga maayo ang paghipos?

Ginapakita sang Biblia nga ang paghipos pagpakita sing pagtahod, makabulig sa pagpamalandong kag pagpakita sing kaalam kag paghantop. (Sal. 37:7; 63:6; Hulu. 11:12)—5/15, pahina 3-5.

• Ano nga panimuot ang ara kanday John Wycliffe, William Tyndale, Robert Morrison, kag Adoniram Judson?

Sila tanan naghigugma sa Pulong sang Dios kag nag-translate sini sa lenguahe nga maintiendihan sang ordinaryo nga mga tawo. Sanday Wycliffe kag Tyndale nag-translate sang Biblia sa Ingles, si Morrison sa Chinese, kag si Judson sa Burmese (Myanmar).—6/1, pahina 8-11.

• Pila ka hari sa Juda ang nangin makugi gid sa balay sang Dios?

Disinuebe ka hari ang naggahom sa nabagatnan nga ginharian sang Juda, kag apat sa ila ang nangin makugi gid nga amo sanday Asa, Jehosapat, Ezequias, kag Josias.—6/15, pahina 7-11.

• Ang tanan bala nga hinaplas nga Cristiano sa duta nagapakigbahin sa pag-aman sang espirituwal nga pagkaon?

Indi. Ang tanan nga hinaplas sang espiritu sang Dios bahin sang matutom kag mainandamon nga ulipon, apang ang Nagadumala nga Hubon amo ang nagatatap sa pag-aman sang espirituwal nga pagkaon.—6/15, pahina 22-24.

• Ngaa nagustuhan gid sang Romano nga mga soldado ang nasulod nga panapton ni Jesus?

Wala ginpartida sang mga soldado ang panapton ni Jesus sang ginlansang sia. Sa masami, ang nasulod nga panapton nahuman sa duha ka tela nga ginatahi, apang ang panapton ni Jesus wala sing tinahian amo nga malahalon gid ini.—7/1, pahina 22.

• Ngaa masiling nga gugma ang rason kon ngaa tuhay gid ang pagpakig-angot ni Jesus sa mga tawo sangsa relihioso nga mga lider?

Sa baylo nga higugmaon ang ordinaryo nga mga tawo, ginsikway sila sang relihioso nga mga lider. Dugang pa, wala nila ginhigugma ang Dios. Ginhigugma ni Jesus ang iya Amay kag naluoy gid sia sa mga tawo. (Mat. 9:36) Mapinalanggaon sia, maluluy-on, kag may simpatiya sa ila.—7/15, pahina 15.

• Ano nga mga hangkat sa pag-uyat sing kuarta ang mahimo atubangon sang mag-asawa, kag ano ang makabulig sa ila nga magmadinalag-on?

Ang rason sang pagbinaisay sa kuarta amo masami ang kahadlok ukon kakulang sing pagsalig, kag tuhay nga gindak-an sang mag-asawa. Amo ini ang apat ka sekreto para mangin madinalag-on: Tun-i nga istoryahan sing matawhay ang mga butang parte sa kuarta, dapat kasugtan kon paano tamdon ang kinitaan, magsulat sing badyet sang pamilya, kag magdesisyon kon ano ang inyo mga obligasyon.—8/1, pahina 10-12.