Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Mu like ku alaba lipuzo ze tatama:

• Kana mbututu ye timela i si ka pepwa kale ya kona ku zuswa kwa bafu?

Bupilo bu kalisanga mutu ha itwala. Jehova wa kona ku zusa mutu kaufela ku si na taba ni fa kuma, kakuli ku “Mulimu linto kaufela za konahala.” (Mare. 10:27) Kono Bibele ha i si ka talusa ka za haiba Mulimu u ka zusa bana ba ba shwa inge ba sa li mwa mba.—4/15, makepe 12, 13.

• Ki lika mañi ze lu kona ku ituta kwa butwa, tumbila, linziye, ni siku?

Libupiwa zee ne ze, li bonisa butali bwa ka taho. Kacwalo li bonahalisa butali bwa Mulimu. (Liprov. 30:24-28)—4/15, makepe 16-19.

• Ki kabakalañi Bibele ha i babaza ku kuza?

Bibele i bonisa kuli ku kuza ki sisupo sa likute, ku tusa mutu ku yeya, mi ku bonisa kuli mutu u na ni butali ni kutwisiso. (Samu 37:7; 63:6; Liprov. 11:12)—5/15, makepe 3-5.

• Ki malena ba bakai ba Juda ba ne ba tukufalezwi hahulu ndu ya Mulimu?

Ku na ni malena ba 19 ba ne ba busize mubuso wa Juda wa kwa mboela, mi ba bane ku bona ne ba bonisize hahulu tukufalelo ye tuna kwa ndu ya Mulimu. Malena bao ki bo Asa, Josafati, Ezekiasi, ni Josiasi.—6/15, makepe 7-11.

• Kana Bakreste ba ba tozizwe kaufela fa lifasi ba abana mwa musebezi wa ku lukisa lico za kwa moya?

Batili. Bakreste kaufela ba ba tozizwe ka moya wa Mulimu ba eza sitopa sa mutanga ya sepahala, ya na ni kutwisiso, kono ba Sitopa se si Etelela ki bona ba ba lukisa lico za kwa moya.—6/15, Makepe 22-24.

• Ki kabakalañi ha ku kona ku bulelwa kuli lilato la naa na ni Jesu ki lona le ne li mu shutanisa hahulu kwa baeteleli ba bulapeli?

Baeteleli ba bulapeli ne ba kenda batu-tu feela, ku fita kuli ba ba late. Mane ne ba sa lati Mulimu. Jesu naa lata Ndatahe mi naa utwela batu butuku. (Mat. 9:36) Neeli mutu ya silikani, ya utwela batu butuku, ni ya musa.—7/15, makepe 15.