Na o a Gopola?
Na o a Gopola?
Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:
• Na go na le kgonagalo ya gore ngwana yoo a hwago a sešo a belegwa a tsošwe?
Bophelo bo thoma ge ngwana a ingwa. Jehofa a ka tsoša batho go sa šetšwe gore ke ba banyenyane goba ba bagolo gakaakang, ka gobane “dilo tšohle di a kgonega go Modimo.” (Mar. 10:27) Beibele ga e bolele ka go lebanya ge e ba a tla tsoša bana bao ba hwago ba sešo ba belegwa.—4/15, matlakala 12, 13.
• Ke ka baka la’ng re ka holwa ke go ithuta go mohlwa goba ditšhoši, dipela, ditšie le dipharelankong?
Diphedi tše tše nne di bontšha bohlale bja tlhago. Ka gona, di godiša bohlale bja Modimo. (Die. 30:24-28)—4/15, matlakala 16-19.
• Ke tiragalo efe ya bohlokwa go Dihlatse tša Jehofa yeo e diregilego nywageng e 100 e fetilego?
Ka 1909 ntlo-kgolo ya Watch Tower Bible and Tract Society, e lego mokgatlo wa molao wo o dirišwago ke Dihlatse tša Jehofa go gatiša, o ile wa hudušwa Pittsburgh, Pennsylvania gomme wa išwa Brooklyn, New York moo o tšwelago pele o šoma o le gona.—5/1, matlakala 22-24.
• Ke ka baka la’ng Beibele e kgothaletša go homola?
Go homola ke leswao la tlhompho, go re thuša go naganišiša e bile ke bohlatse bja gore re na le kahlolo e botse le temogo. (Ps. 37:7; 63:6; Die. 11:12)—5/15, matlakala 3-5.
• Ke’ng seo John Wycliffe, William Tyndale, Robert Morrison le Adoniram Judson ba swanago ka sona?
Ka moka ga bona ba be ba rata Lentšu la Modimo gomme ba ile ba le fetolela malemeng ao batho ba tlwaelegilego ba bego ba kgona go a bala. Ba babedi ba mathomo ba ile ba fetolela ka Seisemane, Morrison a fetolela ka se-China gomme Judson a fetolela ka se-Burma (Myanmar).—6/1, matlakala 8-11.
• Ke dikgoši tše kae tša Juda tšeo di ilego tša bontšha phišego e makatšago bakeng sa ntlo ya Modimo?
Dikgoši tše 19 di ile tša buša mmušo wa ka borwa wa Juda gomme tše nne di be di lemogega ka phišego e bjalo—Asa, Josafate, Hiskia le Josia.—6/15, matlakala 7-11.
• Na Bakriste ka moka ba tloditšwego ba tšea karolo go neeng dijo tša moya?
Aowa. Bohle bao ba tloditšwego ka moya wa Modimo ke karolo ya sehlopha sa mohlanka yo a botegago le wa temogo, eupša ditho tša Sehlopha se Bušago ke tšona di okamelago modiro wa go aba dijo tša moya.—6/15, matlakala 22-24.
• Ke ka baka la’ng bahlabani ba Baroma ba be ba bona kobo ya Jesu ya ka gare e ipiletša?
Bahlabani bao ba bego ba le gona ge Jesu a bolawa ga se ba ka ba gagola kobo ya gagwe. Gantši kobo e bjalo e be e dirwa ka go rokaganya mašela a mabedi, eupša kobo ya Jesu e be e se na moroko, e lego seo se bego se dira gore e be ya bohlokwa.—7/1, letlakala 22.
• Ke ka baka la’ng go ka thwe phapano ya bohlokwa magareng ga tsela ya Jesu ya go swara batho le ya baetapele ba bodumedi e be e le lerato?
Go e na le go rata batho ba tlwaelegilego, baetapele bao ba be ba ba hloile. Go oketša moo, ba be ba sa rate Modimo. Jesu o be a rata Tatagwe e bile a šokela batho. (Mat. 9:36) O be a le borutho, a e-na le kwelobohloko e bile a le botho go bona.—7/15, letlakala 15.
• Ke ka baka la’ng banyalani ba ka thatafalelwa ke go diriša tšhelete gabotse, gona ke’ng seo se ka ba thušago go atlega?
Dingangišano mabapi le tša ditšhelete gantši di bakwa ke go se botane goba letšhogo le tsela yeo banyalani ba godišitšwego ka yona. Ditsela tše nne tša go atlega ke tše: Ithuteng go thekga ditho ge le bolela ka tšhelete, dumelelanang ka tsela ya go lebelela mogolo, ngwalang dithulaganyo tša lena fase, dumelelanang gore mang o tla dira eng.—8/1, matlakala 10-12.