Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe e mafai ona e taliina fesili o loo mulimuli mai:

• Pe faamata o le a toetū se pepe ua oti a o leʻi fanau mai?

E amata le ola o se tagata i le taimi e afuafua ai. E mafai e Ieova ona toe faatūina se tagata po o le ā lava le matua o le ola o iai, auā e “mafaia e le Atua mea uma lava.” (Mare. 10:27) Peitaʻi, e lē o taʻu saʻo maia i le Tusi Paia, o le a ia toe faatutū mai pepe ua feoti i manava o o latou tinā a o leʻi fananau mai.—4/15, itulau e 12, 13.

• Aiseā e aogā ai lo tatou mātauina o loi, sefanai, sē akerise, ma moo?

O loo faaalia mai e nei meaola e fā le poto faalenatura o loo iā i latou. O lea la, o loo faailoa mai e nei mea le poto o le Atua. (Faata. 30:24-28)—4/15, itulau e 16-19.

• O le ā le mea e mataʻina i Molimau a Ieova na tupu i le 100 tausaga ua mavae i le 1909?

I le 1909, na siitia ai le ofisa ulu o le Watch Tower Bible and Tract Society, o se faalapotopotoga faaletulafono a Molimau a Ieova, mai Pittsburgh, Pennsylvania, e faatū i Brooklyn, Niu Ioka, lea o loo faaauau ona iai i le taimi nei.—5/1, itulau e 22-24.

• Aiseā e taʻuleleia ai e le Tusi Paia le faalologo?

O loo faailoa mai ai o le faalologo, o se faailoga o le faaaloalo, o se auala e manatunatu loloto ai, ma o se faamaoniga o le faautauta ma le tofā mamao. (Sala. 37:7; 63:6; Faata. 11:12)—5/15, itulau e 3-5.

• O le ā le mea e tutusa ai John Wycliffe, Viliamu Tiniteli, Robert Morrison, ma Adoniram Judson?

Na naunau uma i latou i le Afioga a le Atua, ma na latou faaliliuina i le gagana e mafai ona faitau ai tagata lautele. O John Wycliffe ma Viliamu Tiniteli, na la faaliliuina le Tusi Paia i le faa-Peretania, na faaliliu e Morrison i le faa-Saina, ae faaliliu e Judson i le faa-Burma (Myanmar).—6/1, itulau e 8-11.

• E toʻafia ni tupu Iutaia na faaalia se maelega mataʻina mo le fale o le Atua?

E toʻasefulu iva tupu na pulea le malo o Iuta i le itu i saute, ae toʻafā na mataʻina lo latou maelega mo le fale o le Atua, o Asa, Iosefatu, Esekia ma Iosia.—6/15, itulau e 7-11.

• Pe e faia se sao o Kerisiano faauuina uma o loo i le lalolagi, i le saunia o meaʻai faaleagaga?

E leai. O i latou uma ua faauuina e le agaga o le Atua, o se vaega o le vasega o le pologa faamaoni ma le faautauta, peitaʻi o i latou o loo faia aʻe ai le Vaega Pule, e latou te vaavaaia le saunia o meaʻai faaleagaga.—6/15, itulau e 22-24.

• Aiseā na manatu ai fitafita Roma i le ofu i totonu o Iesu o se mea e tautele?

E leʻi vaevaeina e fitafita na iai i le faasalaga o Iesu lona ofu. O lenā ituaiga ofu, e masani ona faia e ala i le suʻiina faatasi o fasi ʻie e lua, ae o le ofu o Iesu, e lalaga sauatoa lea ua sili atu ai ona tautele.—7/1, itulau e 22.

• Aiseā e faapea ai o le alofa, o le eseesega autū lea i le auala na feagai ai Iesu ma tagata, ma le auala na feagai ai taʻitaʻi lotu ma tagata?

Nai lo o le alolofa i tagata lautele, sa inosia e na taʻitaʻi lotu i latou. E lē gata i lea, sa latou lē alolofa i le Atua. Na alofa Iesu i lona Tamā ma ia faaalia le alofa mutimutivale mo tagata. (Mata. 9:36) Sa māfana, tigāalofa ma agalelei o ia iā i latou.—7/15, itulau e 15.

• Aiseā e avea ai o se luʻi i le faaipoipoga le faasoasoaina o tupe, ma o le ā e fesoasoani i ulugalii e taulau ai?

O le eseese o manatu e uiga i tupe, e masani lava ona tupu ona o le auala e talitonuina ai e le tasi le isi po o le popole, ma atonu foʻi e eseese le auala na tausia aʻe ai i laʻua. E fā auala e taulau ai: Ia iloa ona talatalanoa lelei e faatatau i tupe, ia malilie i le auala e faaaogā ai, tusi i lalo mea e faaaogā ai tupe a le aiga, ma filifili po o ai e faia.—8/1, itulau e 10-12.