Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Aluer wan kpe kwase ken uya nahan kpa, a va nder wan shon shin kuu?

Uma u or hiin shighe u kwase nan jir iyol la je. Yehova una fatyô u nderen or u nan kpe la, a lu wan u ken uya shin a lu organden kpaa, sha ci u “her Aôndo yô, akaa cii a fatyô.” (Mar. 10:27) Kpa, Bibilo ôr se jighilii ér Yehova una va nder ônov mba ve kpe ken uya la shin una nder ga ze.—4/15, peeji 12, 13.

• Se fatyô u zuan a iwasen sha u henen kwagh u iyôn man akuwa man ikyomon kua vendeve sha ci u nyi?

Akaa a uma a anyiin ne tile sha ityough ki kwaghfan u a dumbur yô. Nahan yô, akaa a uma ne kende a kwaghfan u Aôndo la sha. (Anz. 30:​24-28)—4/15, peeji 16-19.

• Hii nan ve Bibilo i er kwagh u shighe u huan ving i doo yumu?

Bibilo tese ér u huan ving la ka ikyav i tesen icivir shi wasen se u henen sha kwagh shi ka ikyav i tesen kwaghfan man mkav kpaa. (Ps. 37:7; 63:6; Anz. 11:12)—5/15, peeji 3-5.

• Ka ator a Yuda a me yange tese ishimatseen sha iyou i Aôndoo?

Ator puetaankarunyiin yange tema tor ken tartor u Yuda u u lu vegher u ken imbusutariyan la, man ator anyiin ken ator ne tese gbashima u doon tsung, ve yô lu Asa man Yehoshafati man Hesekia kua Yoshia.—6/15, peeji 7-11.

• Ka Mbakristu mba i shighe ve mkurem mbara cii ve nengen sha tom u nan ior kwaghyan u ken jijingi yee?

Ei. Mba i shigh ve mkurem mbara kohol cii mba wanakiriki u jighjigh man u fan kwagh, kpa ka mba ve lu Mbahemenev mba Shin Tine mbara tseegh ve nengen sha tom u nan kwaghyan u ken jijingi ye.—6/15, peeji 22-24.

• Se fatyô u kaan ser dooshima lu kwagh u vesen u na ve gbenda u Yesu eren kwagh a ior la kaha a gbenda u mbahemenev mba kwaghaôndo eren kwagh a ior la sha ci u nyi?

Ior yange ve doo mbahemenev mba kwaghaôndo mba sha ayange la ishima ga, kpa ve kenger ior dang. Aôndo kpa yange doo mbahemenev mba kwaghaôndo ishima sha mimi ga. Yesu yô soo Ter na shi mhôônom kôron un a ior kpaa. (Mat. 9:36) Yesu eren kwagh a ior kundu kundu shi zungwen ve mhôônom shi eren a ve doo doo kpaa.—7/15, peeji 15.

• Ka mbamzeyol mba nyi nom man kwase vea fatyô u tagher a mi sha kwagh u inyaregh ki vihini, man kanyi ia wase ve?

Ashighe agen nom man kwase ka ve zôhô sha kwagh u inyar, sha ci u ve na ayol a ve jighjigh ga. Shi ityôkyaa igen yô, ka mvese u ve vese hen tsombor môm ga la. Ka igbenda inyiin i a fatyô u sôron mzeyol ne je ne: Lam nen kundu kundu sha kwagh u inyar, gba nen zwa môm sha kwagh u inyaregh ki ne zough a mi la, nger nen gbenda u tsombor wen ua vihin inyaregh yô shi vande fan nen akaa a i lu u ne er man or u nana er a la—7/1, peeji 10-​12.