Sena Mulayeeya?

Sena mwakakukkomanina kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Sena bubuke bulakonzyeka ikuti naa mwana uutanazyalwa wafwa?

Buumi butalika muntu naamitwa. Jehova ulakonzya kubabusya bantu aciimo cili coonse mubuumi bwabo nkaambo ‘zyintu zyoonse zilakonzyeka kuli Leza.’ (Mk. 10:27) Pele Bbaibbele talyaambi cigaminina naa uyoobabusya bana batakazyalwa ibakafwida mwida.—4/15, mapeeji 12, 13.

• Ino nkaambo nzi ncotukonzya kugwasyigwa kwiinda mukulangilila lumoma, cibila, cikwikwi, alimwi antombela?

Zyintu eezyi zyone zitondezya busongo. Aboobo, zitondezya busongo mbwajisi Leza. (Tus. 30:24-28)—4/15, mapeeji 16-19.

• Ino nkaambo nzi Bbaibbele ncolikulumbaizya kuumuna?

Ibbaibbele litondezya kuti kuumuna kulakonzya kuba citondezyo cakuti tujisi bulemu, kulakonzya kutugwasya ciindi notuzinzibala kuyeeya, alimwi kulakonzya kuba citondezyo cakuti tuli basongo alimwi tujisi bupampu. (Int. 37:7; 63:6; Tus. 11:12)—5/15, mapeeji 3-5.

• Ino bali bongaye bami bana Juda ibakatondezya busungu kapati kujatikizya ŋanda ya Leza?

Bami bali 19 mbabakalela mubwami bwakumusanza ibwa Juda, eelyo bone mbabakali abusungu buli boobo—Asa, Jehosafati, Hezekiya, alimwi a Josiya.—6/15, mapeeji 7-11.

• Sena Banakristo bananike boonse anyika balatola lubazu mukwaabila cakulya cakumuuya?

Peepe. Boonse ibananikidwe amuuya wa Leza mbacibeela caciinga camuzike musyomesi uucenjede, pele aabo ibali mu Kabunga Keendelezya mbabeendelezya bubambe bwakusanina kumuuya.—6/15, mapeeji 22-24.

• Ino nkaambo nzi basikalumamba bana Roma ncobakabona cisani ca Jesu kuba cintu ciyandisi?

Basikalumamba bakaliko Jesu naakali kujaigwa kunyina nobakacaabana cisani cakwe muzibeela-beela. Kanji-kanji, cisani caatala cili boobo cakali kubambwa kwiinda mukusuma milembo yobilo, pele cisani ca Jesu wakali buyo mulembo omwe mbuubede, calo cakapa kuti kacili ciyandisi kapati.—7/1, peeji 22.

• Ino nkaambo nzi ncotukonzya kwaamba kuti luyando nenzila mpati yiindanya Jesu mbwaakali kubalanganya bantu alimwi ayeeyo yabasololi babukombi?

Muciindi cakuba aluyando kubantu buyo, beendelezi aabo bakali kubasampaula. Kunze lyaboobo, tiibakajisi luyando kuli Leza. Jesu wakali aluyando kuli Usyi alimwi wakali kubafwida luzyalo bantu. (Mt. 9:36) Jesu wakali kusangalizya, silweetelelo, alimwi siluse kuli mbabo.—7/15, peeji 15.

• Ino nkaambo nzi kubelesya mali ncocikonzya kukatazya mulukwatano, alimwi ino ncinzi cikonzya kugwasya banabukwetene kutegwa bazwidilile?

Kutamvwana akaambo kamali kanji-kanji kujatikizya kutasyomana naa kuyoowa, alimwi banabukwetene balakonzya kabazwa kubukkale bwiindene-indene. Nzila zyone zikonzya kugwasya kuzwidilila: Amwiiye kubandika cakulikwaya kujatikizya mali, amuzuminizyanye mbomweelede kwaabona mali aajanwa, amulembe mbomweelede kwaabelesya mali aamukwasyi, alimwi amusale aumwi ncayelede kucita.—8/1, mapeeji 10-12.