Hupti ang Tinamdan ni Kristo
Hupti ang Tinamdan ni Kristo
‘Batoni sa inyong taliwala ang samang tinamdan sa pangisip nga nabatonan ni Kristo Jesus.’—ROMA 15:5.
1. Nganong angay natong sundogon ang tinamdan ni Kristo?
“UMARI kanako,” miingon si Jesu-Kristo. “Magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.” (Mat. 11:28, 29) Kining mainit nga pagdapit nagpadayag sa mahigugmaong tinamdan ni Jesus. Walay laing tawo nga mas maayong ehemplo kay kaniya. Bisan tuod siya ang gamhanang Anak sa Diyos, si Jesus nagpakitag empatiya ug kalumo, ilabina sa mga nanginahanglan.
2. Unsang mga bahin sa tinamdan ni Jesus ang atong hisgotan?
2 Niini ug sa sunod nga duha ka artikulo, atong hisgotan kon sa unsang paagi maugmad ug mahuptan ang tinamdan ni Jesus ug masundog “ang [iyang] panghunahuna.” (1 Cor. 2:16) Atong hatagag pagtagad ang lima ka bahin niini: Ang kalumo ug pagkamapaubsanon ni Jesus, ang iyang kalulot, pagkamasinugtanon sa Diyos, kaisog, ug ang iyang gugma nga way-paglubad.
Pagkat-on Gikan sa Kalumo ni Jesus
3. (a) Unsang leksiyon bahin sa pagkamapainubsanon ang gitudlo ni Jesus sa iyang mga tinun-an? (b) Unsay reaksiyon ni Jesus sa kahuyangan sa iyang mga tinun-an?
3 Si Jesus, ang hingpit nga Anak sa Diyos, kinabubut-ong mianhi sa yuta aron sa pag-alagad taliwala sa dili-hingpit ug makasasalang katawhan. Ang pipila kanila mipatay kaniya sa ulahi. Bisan pa niana, kanunayng nahuptan ni Jesus ang iyang kalipay ug pagpugong-sa-kaugalingon. (1 Ped. 2:21-23) Ang ‘pagtutok’ sa ehemplo ni Jesus makatabang kanato sa paghimog sama niana sa dihang atong makita ang kasaypanan ug kahuyangan sa uban. (Heb. 12:2) Gidapit ni Jesus ang iyang mga tinun-an nga ‘isangon ang iyang yugo’ ug sa ingon sila makakat-on gikan kaniya. (Mat. 11:29) Unsa may ilang makat-onan? Ang usa mao nga si Jesus malumo, ug siya mapailobon sa iyang mga tinun-an bisan pa sa ilang mga kasaypanan. Sa gabii una siya mamatay, gihugasan ni Jesus ang ilang mga tiil, sa ingon nagtudlo kanilag leksiyon sa ‘pagkamapainubsanon sa kasingkasing’ nga dili gayod nila makalimtan. (Basaha ang Juan 13:14-17.) Sa ulahi, sa dihang si Pedro, Santiago, ug Juan wala ‘makapadayon sa pagbantay,’ iyang gisabot ang ilang kahimtang. “Simon, natulog ka ba?” siya nangutana. “Magpadayon kamo sa pagbantay ug sa pag-ampo, aron dili kamo mahidangat sa tentasyon. Hinuon, maikagon ang espiritu, apan maluya ang unod.”—Mar. 14:32-38.
4, 5. Sa unsang paagi ang ehemplo ni Jesus makatabang kanato sa pag-atubang sa kasaypanan sa uban?
4 Unsay atong reaksiyon kon ang usa ka igsoon sa pagtuo hilig makigkompetensiya, daling mahiubos, o dili dayon modawat ug tambag gikan sa mga ansiyano o sa “matinumanon ug maalamong ulipon”? (Mat. 24:45-47) Tingali dali ra kitang makapasaylo sa dili-maayong taras sa mga tawo sa kalibotan, apan basin malisdan kita sa pagpasaylo sa kahuyangon sa atong mga igsoon. Kon dali ra kitang mapikal sa kasaypanan sa uban, angay natong suknaon ang atong kaugalingon, ‘Sa unsang paagi akong mabanaag “ang panghunahuna ni Kristo”?’ Hinumdomi nga si Jesus wala masuko sa iyang mga tinun-an, bisan sa dihang sila nagpakitag espirituwal nga kahuyangon.
5 Tagda ang kahimtang ni apostol Pedro. Sa dihang gidapit ni Jesus si Pedro sa pagkawas sa sakayan ug sa pag-adto kaniya, sa makadiyot si Pedro milakaw gayod ibabaw sa tubig. Dayon pagkakita niya sa unos, siya nag-anam pag-unlod. Nasuko ba si Jesus kaniya ug miingon: “Mirisi! Leksiyon na nà nimo”? Wala! “Gituy-od dihadiha ang iyang kamot, si Jesus mikupot kaniya ug miingon kaniya: ‘Ikaw nga diyutay ug pagtuo, nganong gidaog ka man sa pagduhaduha?’” (Mat. 14:28-31) Kon ang atong igsoon nagpakitag kakulang sa pagtuo, ituy-od ba usab nato ang atong kamot, ingnon ta, ug tabangan siya nga makabatog dugang pagtuo? Usa kana sa mga leksiyon nga atong makat-onan sa kalumo nga gipakita ni Jesus kang Pedro.
6. Unsay gitudlo ni Jesus sa iyang mga apostoles bahin sa tinguha nga mahimong prominente?
6 Si Pedro nalangkit usab sa kanunayng panaglalis sa mga apostoles kon kinsay labing dako sa ilang taliwala. Si Santiago ug Juan gustog prominenteng posisyon sa iyang Gingharian, ang usa sa tuong kamot ni Jesus ug ang usa sa wala. Sa dihang nahibaloan kini ni Pedro ug sa ubang mga apostoles, sila nasuko. Nasayod si Jesus nga lagmit nakuha nila kini nga tinamdan sa katilingban diin sila nagdako. Siya miingon kanila: “Kamo nahibalo nga ang mga magmamando sa mga nasod mahariharion ibabaw kanila ug ang mga kadagkoan naggamit sa awtoridad ibabaw kanila. Dili kini ang paagi sa inyong taliwala; kondili si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga buot mahimong una sa inyong taliwala kinahanglang mahimong inyong ulipon.” Dayon gihisgotan ni Jesus ang iyang ehemplo: “Maingon nga ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.”—Mat. 20:20-28.
7. Sa unsang paagi ang matag usa kanato makapatunhay sa panaghiusa diha sa kongregasyon?
7 Ang pagpalandong sa pagkamapaubsanon ni Jesus makatabang kanato sa ‘paggawi nga mas ubos’ taliwala sa atong mga igsoon. (Luc. 9:46-48) Ang pagbuhat niana magpatunhay sa panaghiusa. Si Jehova, sama sa amahan sa usa ka dakong pamilya, nagtinguha nga ang iyang mga anak “mag-uban pagpuyo diha sa panaghiusa.” (Sal. 133:1) Si Jesus miampo sa iyang Amahan mahitungod sa tanang matuod nga mga Kristohanon: “Ako nahiusa kanila ug ikaw nahiusa kanako, aron nga sila hingpit nga mahiusa, aron ang kalibotan makahibalo nga ikaw nagpadala kanako ug nga ikaw nahigugma kanila ingon nga ikaw nahigugma kanako.” (Juan 17:23) Busa, ang atong panaghiusa magpaila usab kanato ingong mga sumusunod ni Kristo. Aron matagamtam kana, kinahanglang lantawon nato ang kahuyangan sa uban sama sa paglantaw ni Jesus niana. Si Jesus mapinasayloon, ug siya nagtudlo nga kon kita magmapinasayloon, kita usab pasayloon.—Basaha ang Mateo 6:14, 15.
8. Unsay atong makat-onan sa panig-ingnan sa dugay nang mga alagad sa Diyos?
8 Daghan usab kitag makat-onan pinaagi sa pagsundog sa pagtuo niadtong nagsundog kang Kristo sulod sa daghang katuigan. Sama kang Jesus, sila sagad mosabot sa kahuyangan sa uban. Ilang nakat-onan nga ang pagpakita ug samag-Kristong kaluoy dili lamang motabang kanato sa ‘pagpas-an sa mga kaluyahon niadtong mga dili lig-on’ kondili sa pagpatunhay usab sa panaghiusa. Dugang pa, kini nagdasig sa kongregasyon sa pagpakita usab sa tinamdan ni Kristo. Gitinguha nila alang sa ilang mga igsoon ang gitinguha ni Pablo alang sa mga Kristohanon sa Roma: “Hinaot ang Diyos nga naghatag ug pag-antos ug paghupay magtugot kaninyo nga mabatonan sa inyong taliwala ang samang tinamdan sa pangisip nga nabatonan ni Kristo Jesus, aron nga uban ang panag-uyon kamo sa usa ka baba maghimaya sa Diyos ug Amahan sa atong Ginoong Jesu-Kristo.” (Roma 15:1, 5, 6) Oo, ang atong hiniusang pagsimba maghatag kadayeganan kang Jehova.
9. Nganong gikinahanglan nato ang balaang espiritu sa pagsundog sa ehemplo ni Jesus?
9 Gilangkit ni Jesus ang ‘pagkamapainubsanon sa kasingkasing’ ngadto sa kalumo, nga maoy bahin sa bunga sa balaang espiritu sa Diyos. Busa, gawas sa pagkat-on gikan sa ehemplo ni Jesus, atong gikinahanglan ang balaang espiritu ni Jehova, aron atong masundog sa hustong paagi ang maong ehemplo. Kinahanglang pangayoon nato diha sa pag-ampo ang balaang espiritu sa Diyos ug paningkamotan nga maugmad ang bunga niana—“gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Gal. 5:22, 23) Busa pinaagi sa pagsundog sa sumbanan nga gitagana ni Jesus maylabot sa pagkamapaubsanon ug kalumo, atong mapahimut-an ang atong langitnong Amahan.
Si Jesus Nagpakitag Kalulot sa Uban
10. Sa unsang paagi si Jesus nagpakitag kalulot?
10 Ang kalulot maoy bahin usab sa bunga sa balaang espiritu. Si Jesus kanunayng nagpakitag kalulot sa uban. Ang tanan nga sinserong nangita kang Jesus ‘gidawat nga maluloton.’ (Basaha ang Lucas 9:11.) Unsay atong makat-onan sa kalulot nga gipakita ni Jesus? Ang malulotong tawo mahigalaon, malumo, mabination, ug mapuangoron. Ingon niana si Jesus. Siya naluoy sa mga tawo “tungod kay sila pinanitan ug nagkatibuagsa sama sa mga karnero nga walay magbalantay.”—Mat. 9:35, 36.
11, 12. (a) Iasoy ang usa ka hitabo diin si Jesus nagpakitag kaluoy. (b) Unsay imong makat-onan sa ehemplo nga gihisgotan dinhi?
11 Si Jesus wala lamang maluoy sa mga tawo kondili naningkamot usab sa pagtabang kanila. Tagda ang usa ka pananglitan. Sulod sa 12 ka tuig, ang usa ka babaye gitalinug-an. Siya nahibalo nga ilalom sa Balaod ni Moises, siya giisip nga mahugaw maingon man si bisan kinsa nga mohikap kaniya. (Lev. 15:25-27) Bisan pa niana, tungod sa reputasyon ni Jesus ug sa iyang pagtratar sa mga tawo, lagmit nakombinsir siya nga ayohon siya ni Jesus. Siya nagsigeg ingon: “Kon makahikap lang ako sa iyang panggawas nga besti ako mamaayo.” Siya nakabatog kaisog sa paghikap sa besti ni Jesus ug dihadiha iyang nabatyagan nga siya naayo.
12 Namatikdan ni Jesus nga dihay mihikap niya, ug milingi siya aron mahibaloan kon kinsa kadto. Ang babaye, nga lagmit nahadlok nga kasab-an tungod kay iyang gilapas ang Balaod, mihapa nga nagkurog diha sa iyang tiilan ug mitug-an. Gikasab-an ba ni Jesus kining kabos ug nag-antos nga babaye? Wala gayod! Siya miingon: “Anak, ang imong pagtuo nakapaayo kanimo. Lakaw nga malinawon.” (Mar. 5:25-34) Seguradong nahupayan gayod siya sa pagkadungog niadtong malulotong mga pulong!
13. (a) Unsay kalainan sa tinamdan ni Jesus ug nianang sa mga Pariseo? (b) Giunsa pagtratar ni Jesus ang mga bata?
13 Dili sama sa tig-ag-kasingkasing nga mga Pariseo, wala gayod gamita ni Kristo ang iyang awtoridad sa paghatag ug dugang kabug-at sa uban. (Mat. 23:4) Sa kasukwahi, siya maluloton ug mapailobong nagtudlo sa uban bahin sa mga dalan ni Jehova. Si Jesus mapinanggaon sa iyang mga sumusunod, nga kanunayng nagpakitag gugma ug kalulot, usa ka tinuod nga higala. (Prov. 17:17; Juan 15:11-15) Bisan ang mga bata ganahang makig-uban kang Jesus, ug siya usab ganahang makig-uban nila. Bisan pag duna siyay gibuhat, mohunong siya aron makig-estorya sa mga bata. Usa niana ka higayon, ang iyang mga tinun-an, nga gusto gihapon nga mahimong prominente sama sa relihiyosong mga lider sa ilang palibot, nagpugong sa mga tawo sa pagdala sa ilang mga anak ngadto kang Jesus. Wala magustohi ni Jesus ang ilang gibuhat. Giingnan niya sila: “Pasagdi ang mga bata nga moduol kanako; ayaw sila pagpugngi, kay ang gingharian sa Diyos ilaha sa mga ingon kanila.” Dayon, naggamit sa mga bata sa pagtudlo kanilag hinungdanong leksiyon, siya miingon: “Sa pagkatinuod ako magaingon kaninyo, Bisan kinsa nga dili magadawat sa gingharian sa Diyos sama sa usa ka gamayng bata dili gayod makasulod niini.”—Mar. 10:13-15.
14. Unsang mga kaayohan ang mabatonan sa mga bata gumikan sa tiunayng interes nga gipakita kanila?
14 Hunahunaa sa makadiyot kon unsa kahay bation niadtong mga bataa inigkahamtong na nila, sila mahinumdom nga si Jesu-Kristo ‘nagkugos ug nagpanalangin kanila.’ (Mar. 10:16) Ang mga bata usab karon malipayng mahinumdom sa mga ansiyano ug sa uban nga nagpakita kanilag tiunayng interes. Labaw sa tanan, ang mga bata nga gipakitaan sa kongregasyon ug tiunay nga kahangawa sukad pa sa linghod nga panuigon makakat-on nga ang espiritu ni Jehova anaa sa iyang katawhan.
Pagpakitag Kalulot sa Dili-Malulotong Kalibotan
15. Nganong dili kita angayng matingala nga daghang tawo karon ang dili maluloton?
15 Daghang tawo karon ang mibati nga wala na silay panahon sa pagpakitag kalulot sa uban. Busa, kada adlaw sa eskuylahan, trabahoan, samtang nagbiyahe, ug diha sa ministeryo, ang katawhan ni Jehova kinahanglang makiglabot sa dili-malulotong mga tawo. Ang dili-malulotong tinamdan makapahigawad tingali kanato, apan dili kita angayng matingala niana. Gidasig ni Jehova si Pablo sa pagpasidaan kanato nga sa pagkinabuhi niining malisod nga “kataposang mga adlaw” ang matuod nga mga Kristohanon makaatubang ug mga tawo nga ‘mahigugmaon sa kaugalingon ug walay kinaiyanhong pagbati.’—2 Tim. 3:1-3.
16. Sa unsang paagi kita makapakita ug samag-Kristong kalulot diha sa kongregasyon?
16 Sa laing bahin, makapadasig ang kahimtang sulod sa matuod nga Kristohanong kongregasyon nga lahi kaayo nianang sa dili-malulotong kalibotan. Pinaagi sa pagsundog kang Jesus, ang matag usa kanato makatabang sa pagpatunhay sa maong kahimtang. Sa unsang paagi mahimo nato kana? Diha sa kongregasyon, daghan ang nanginahanglan sa atong tabang ug pagdasig tungod kay sila nag-antos sa sakit o sa uban pang kalisdanan. Niining “kataposang mga adlaw,” modaghan ang maong mga suliran, apan dili na kana bag-o. Sa panahon sa Bibliya, ang mga Kristohanon nag-antos sa susamang mga problema. Busa, ang tabang gikinahanglan karon sama kaniadto. Pananglitan, giawhag ni Pablo ang mga Kristohanon sa ‘paghupay sa magul-anong mga kalag, pagbulig sa mga maluya, pagpakitag hataas nga pailob sa tanan.’ (1 Tes. 5:14) Kini naglangkit sa pagpakita ug samag-Kristong kalulot.
17, 18. Unsa ang pipila ka paagi nga atong masundog ang pagkamaluloton ni Jesus?
17 Obligasyon sa mga Kristohanon nga ‘malulotong abiabihon ang ilang mga igsoon,’ trataron sila sama sa pagtratar ni Jesus kanila, nga magpakitag tiunayng kahangawa alang niadtong dugay na natong nakaila ug bisan niadtong wala pa nato mahimamat. (3 Juan 5-8) Maingon nga si Jesus nanguna sa pagpakitag kaluoy sa uban, angay usab kitang magbuhat niana, nga kanunayng makapadasig sa uban.—Isa. 32:2; Mat. 11:28-30.
18 Ang matag usa kanato makapakitag kalulot pinaagi sa paghunahuna sa kaayohan sa uban. Mangitag mga paagi sa pagpakita niana. Maningkamot sa pagbuhat niana! “Sa inigsoong gugma batoni ang malumong pagmahal alang sa usag usa,” nag-awhag si Pablo, nga midugang: “Manguna sa pagpakitag pasidungog sa usag usa.” (Roma 12:10) Nagpasabot kana nga atong sundogon ang ehemplo ni Kristo, nga magmainiton ug magmaluloton sa uban, nga magkat-on sa pagpakitag “gugmang walay pagkasalingkapaw.” (2 Cor. 6:6) Si Pablo naghubit nianang samag-Kristo nga gugma niining paagiha: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot.” (1 Cor. 13:4) Imbes maghambin ug kasuko sa atong mga igsoon, hinaot nga atong sundon ang tambag: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.”—Efe. 4:32.
19. Unsay maayong mga resulta sa pagpakita ug samag-Kristo nga kalulot?
19 Ang atong pagpaningkamot sa pag-ugmad ug pagpakita ug samag-Kristo nga kalulot sa tanang panahon ug kahimtang moresulta sa dagayang panalangin. Dili mababagan ang paglihok sa espiritu ni Jehova diha sa kongregasyon, nga magtabang sa tanan sa pag-ugmad sa bunga sa espiritu. Dugang pa, kon atong sundon ang sumbanan nga gibilin ni Jesus ug tabangan ang uban sa pagbuhat niana, ang atong malipayon ug nahiusa nga pagsimba makapalipay sa Diyos. Busa, maningkamot gayod kita sa pagsundog sa kalumo ug kalulot ni Jesus diha sa atong pagpakiglabot sa uban.
Makapatin-aw Ka Ba?
• Sa unsang paagi gipakita ni Jesus nga siya “malumog-buot ug mapainubsanon sa kasingkasing”?
• Sa unsang paagi si Jesus nagpakitag kalulot?
• Unsa ang pipila ka paagi nga kita makapakita ug samag-Kristo nga kalumo ug kalulot niining dili-hingpit nga kalibotan?
[Mga Pangutana sa Pagtuon]
[Hulagway sa panid 8]
Sa dihang mohuyang ang pagtuo sa usa ka igsoon, sama sa nahitabo kang Pedro, andam ba kitang motabang?
[Hulagway sa panid 10]
Sa unsang paagi makapakita kag kalulot diha sa kongregasyon?