Nyene Edu Ukere N̄kpọ Christ
Nyene Edu Ukere N̄kpọ Christ
“Ẹnyene edu ukere n̄kpọ oro Christ Jesus ekenyenede ke otu mbufo.”—ROME 15:5.
1. Ntak emi ikpenyenede edu ukere n̄kpọ Christ?
JESUS CHRIST ọkọdọhọ ete: “Ẹtiene mi . . . Ẹkpebe mi, koro ami mmenyene ifụre ifụre ido nnyụn̄ nsụhọde esịt, ndien mbufo ẹyekụt nduọkodudu ẹnọ ukpọn̄ mbufo.” (Matt. 11:28, 29) Ikọ Jesus emi enen̄ede owụt ima ima edu ukere n̄kpọ esie. Jesus edi mfọnn̄kan owo emi ikpetienede uwụtn̄kpọ esie. Okposụkedi emi Jesus ekedide Eyen Abasi onyụn̄ enen̄erede enyene odudu, enye ama esitua mme owo mbọm onyụn̄ ekere aban̄a mmọ, akpan akpan mme ubuene.
2. Ewe edu Jesus ke idineme?
2 Ke ibuotikọ emi ye iba oro ẹtienede, iyekpep nte ikemede ndinyene edu ukere n̄kpọ Christ, nnyụn̄ n̄ka iso nnyene ‘ekikere esie.’ (1 Cor. 2:16) Idinen̄ede ineme iban̄a mme edu Jesus ition emi: Ifụre ifụre ido ye nsụhọdeidem, mfọnido, nsụkibuot, uko, ye ima.
Kpebe Ifụre Ifụre Ido Christ
3. (a) Didie ke Jesus ekekpep mbet esie ndisụhọde idem? (b) Didie ke Jesus akanam n̄kpọ ke ini idem ekememde mbet esie?
3 Jesus emi edide mfọnmma Eyen Abasi ama enyịme ndididu ke isọn̄ ye mme anana-mfọnmma owo, emi ẹdiwotde enye. Kpa ye oro, enye okosụk okokop idatesịt onyụn̄ afara ke idem. (1 Pet. 2:21-23) ‘Ndiwụk enyịn nse’ uwụtn̄kpọ Jesus ayanam ika iso ikop idatesịt inyụn̄ ifara ke idem ke ini unana mfọnmma mbon enwen afịnade nnyịn. (Heb. 12:2) Jesus ọkọdọhọ mme mbet esie ẹmen ọkpọnọ imọ ẹkọn̄ọ ke itọn̄, ẹnyụn̄ ẹkpebe imọ. (Matt. 11:29) Nso ke mmọ ẹkenyene ndikpep nto Jesus? Mmọ ẹma ẹsikụt ke Jesus enyene ifụre ifụre ido esinyụn̄ eme ime ye mmọ kpa ye oro mmọ ẹkesinamde ndudue. Ke okoneyo oro ekesierede usen emi ẹkewotde Jesus, enye ama eyet mmọ ukot man ekpep mmọ nsụhọdeidem ke usụn̄ emi mmọ mîdifreke. (Kot John 13:14-17.) Ekem ke ini idem ekememde Peter, James, ye John, Jesus ama ọfiọk nte eketiede mmọ ke idem, onyụn̄ obụp Peter ete: “Simon, nte afo edede?” Ndien enye ama ọdọhọ mmọ ete: “Ẹdu ke ukpeme ẹnyụn̄ ẹbọn̄ akam, mbak mbufo ẹdidụk ke idomo. Spirit, ke akpanikọ, enyịme, edi obụkidem ememem.”—Mark 14:32-38.
4, 5. Didie ke uwụtn̄kpọ Jesus ekeme ndin̄wam nnyịn idiọn̄ọ nte ikpesede unana mfọnmma mbon en̄wen?
4 Esinam didie n̄kpọ edieke eyenete anamde n̄kpọ ke ndomoidem, ọsọpde iyatesịt, mîdịghe isọpke inam item mbiowo m̀mê se “ofụn emi anamde akpanikọ onyụn̄ enyenede ọniọn̄” ọdọhọde? (Matt. 24:45-47) Esimem utom ndifen nnọ mbon ererimbot ke ini mmọ ẹduede nnyịn, edi edieke eyenete anamde nnyịn ukem n̄kpọ oro, ekeme ndinen̄ede nsọn̄ ndifen nnọ enye. Edieke nte owo anamde n̄kpọ esisọpde ayat fi esịt, bụp idemfo ete, ‘Didie ke n̄keme ndinen̄ede ‘nnyene ekikere Christ’?’ Ti ete ke Jesus ikayatke esịt ye mbet esie, idem ke ini mmọ ẹkekopde mmemidem ke n̄kan̄ eke spirit.
5 Da se iketịbede inọ apostle Peter ke uwụtn̄kpọ. Ke ini Jesus ọkọdọhọde enye ọwọrọ ke ubom edisan̄a ye imọ ke enyọn̄ mmọn̄, Peter ama ọwọrọ ke ubom, asan̄a ke enyọn̄ mmọn̄ ebịne Jesus. Ekem enye ama ọwọn̄ọde enyịn ese oyobio onyụn̄ ọtọn̄ọ ndiden̄. Ndi Jesus ama ayat esịt ọdọhọ enye ete: “Ndọ-ọ! Idịghe edi owo unana mbuọtidem. Ekeme ndidi ama ọbọhọ enye emi eyekpep n̄kpọ ndien”? Baba-o! Bible ọdọhọ ke “kpa idaha oro Jesus anyanade ubọk esie omụm enye onyụn̄ ọdọhọ ete: ‘Afo owo ekpri mbuọtidem, ntak emi eyịkde?’” (Matt. 14:28-31) Edieke etiede nte ke eyenete inyeneke mbuọtidem, ndi imekeme ndinyanade ubọk ke ndamban̄a usụn̄ mmụm enye, nnyụn̄ n̄n̄wam enye enen̄ede enyene mbuọtidem? Se ikpepde ito se Jesus akanamde ye Peter edi oro.
6. Nso ke Jesus ekekpep mme apostle esie aban̄a uyom ikpọ itie?
6 Peter ama esitiene afan̄a m̀mê anie okpon akan ke otu mmimọ. James ye John ẹkeyom nditie ke ubọk nnasia ye ke ubọk ufien Jesus ke Obio Ubọn̄ esie. Ke ini Peter ye mme apostle eken ẹkekopde n̄kpọ emi, esịt ama enen̄ede ayat mmọ. Jesus ama ọfiọk ke anaedi mmọ ẹkekpebe mbon eyo mmọ. Ntre, Jesus ama okot mmọ ọdọhọ ete: “Mbufo ẹmefiọk ẹte mme andikara mme idụt ẹsibre odudu ye mmọ, ikpọ owo ẹnyụn̄ ẹsọn̄ ubọk ẹkara mmọ. Idịghe ntem ke otu mbufo; edi owo ekededi eke oyomde ndikabade ndi akwa owo ke otu mbufo ana edi asan̄autom mbufo, owo ekededi eke onyụn̄ oyomde ndidi akpa ke otu mbufo ana edi ofụn mbufo.” Ekem Jesus ama owụt ke akpana mmọ ẹkpebe imọ emi ‘mîkedịghe isọn̄ man ẹnam n̄kpọ ẹnọ imọ, edi man inam n̄kpọ inọ owo inyụn̄ inọ ukpọn̄ imọ nte ufak ke ibuot ediwak owo.’—Matt. 20:20-28.
7. Didie ke ikeme nditiene nnam edidianakiet odu ke esop?
7 Ke ini itiede ikere nte Jesus okosụhọrede idem, emi ayanam ‘inịm idem ke n̄kpri-n̄kan’ ke nte inamde n̄kpọ ye nditọete nnyịn. (Luke 9:46-48) Onyụn̄ anam idiana kiet. Jehovah emi etiede nte ete emi enyenede akwa ubon, oyom kpukpru nditọ esie ẹdiana kiet. (Ps. 133:1) Jesus ama eben̄e Ete esie ete anam ata mme Christian ẹdiana kiet man ‘ererimbot ẹkpefiọk ke Enye okosio imọ ọdọn̄, ye nte ke Enye ama mmọ kpa nte Enye amade imọ.’ (John 17:23) Ke ntre, edidianakiet anam mme owo ẹdiọn̄ọ nnyịn nte ata mme anditiene Christ. Man ikeme ndidiana kiet, ana ise unana mfọnmma mbon en̄wen nte Christ ekesede. Jesus ama esifen ọnọ mbon en̄wen onyụn̄ ọdọhọ ke edieke nnyịn mîfenke inọ mbon en̄wen, ke Abasi idifenke inọ nnyịn n̄ko.—Kot Matthew 6:14, 15.
8. Nso ke ikeme ndikpep nto mbon oro ẹma ẹkenam n̄kpọ Abasi ke ediwak isua?
8 Imekeme ndikpep ekese n̄ko edieke ikpebede mbuọtidem mbon oro ẹma ẹkekpebe Christ ke ediwak isua. Mme asan̄autom Abasi emi ẹsiyọ unana mfọnmma mbon en̄wen nte Jesus ọkọyọde. Mmọ ẹfiọk ke nditua owo mbọm nte Christ ekesituade ọnọ nnyịn ifet “ndibiom mmemidem mbon oro mîsọn̄ke idem,” onyụn̄ anam edidianakiet odu ke esop. N̄ko, emi esinam ofụri esop ẹnyene edu ukere n̄kpọ Christ. Se apostle Paul okoyomde mme Christian ke Rome ẹnyene ke mmọ ẹsiyom nditọete mmọ ẹnyene n̄ko. Paul ọkọdọhọ ete: “Abasi emi ọnọde ime ye ndọn̄esịt akpakam anam mbufo ẹnyene edu ukere n̄kpọ oro Christ Jesus ekenyenede ke otu mbufo, man mbufo ẹkpeda esịt kiet ye inua kiet ẹnọ Abasi ye Ete Ọbọn̄ nnyịn Jesus Christ ubọn̄.” (Rome 15:1, 5, 6) Ih, nnyịn ndidiana kiet ntuak ibuot esinam mme owo ẹtoro Jehovah.
9. Ntak emi iyomde edisana spirit man ikeme ndikpebe Jesus-e?
9 Ke Jesus ama akasiak ifụre ifụre ido emi edide ubak mbun̄wụm spirit Abasi, edu en̄wen emi enye akasiakde ekedi ‘edisụhọde esịt.’ Man ikeme ndikpebe uwụtn̄kpọ Jesus ketket, ana ikpep nte enye ekesinamde n̄kpọ inyụn̄ iyak edisana spirit Jehovah ada nnyịn usụn̄. Ana ibọn̄ akam iben̄e Abasi edisana spirit emi inyụn̄ idomo ndinyene mme edu oro ẹdide mbak mbun̄wụm spirit emi, oro edi, “ima, idatesịt, emem, anyanime, mfọnido, eti ido, mbuọtidem, ifụre ifụre ido, ye mfara ke idem.” (Gal. 5:22, 23) Jehovah, Ete nnyịn eke heaven oyokop inemesịt edieke isụhọrede idem inyụn̄ inyene ifụre ifụre ido nte Jesus.
Jesus Ama Esifọn Ido ye Mme Owo
10. Didie ke Jesus ọkọfọn ido ye mme owo?
10 Mfọnido edi ubak mbun̄wụm edisana spirit. Jesus ama esifọn ido ye mme owo kpukpru ini, onyụn̄ esinen̄ede adara kpukpru mbon oro ẹkeyomde enye ke ofụri esịt. (Kot Luke 9:11.) Nso ke ikpep ito mfọnido Jesus? Ikpep nte ke owo mfọnido esitie ufan ufan, emem emem, esinyụn̄ atua owo mbọm. Jesus okonyụn̄ etie ntre. Enye ama esitua mme owo mbọm ‘koro ẹkefiomode ẹnyụn̄ ẹsuande mmọ nte erọn̄ eke mînyeneke andikpeme.’—Matt. 9:35, 36.
11, 12. (a) Tịn̄ nte Jesus akatuade owo mbọm ini kiet. (b) Nso ke emi ekpep fi?
11 Jesus ama esikop owo mbọm onyụn̄ atua mmọ mbọm n̄ko. Da se iketịbede emi ke uwụtn̄kpọ. Mma kiet ama ọdọn̄ọ uwọrọiyịp ke ofụri isua 12. Mma emi ama ọfiọk ke Ibet Moses ọdọhọ ke imọ ye owo ekededi oro otụkde imọ imedehe, ke imọ n̄ko idotke nditie ye mmọ eken ntuak ibuot nnọ Abasi. (Lev. 15:25-27) Kpa ye oro, orụk owo emi Jesus ekedide ye nte enye ekesinamde n̄kpọ ama anam mma emi enịm ke Jesus idibịnke imọ, edi ke ọyọkọk udọn̄ọ imọ. Enye okosụk ọdọhọ ete: “Mma n̄kam ntotụk ekpedi ekụra esie nyokop nsọn̄idem.” Ntre, enye ama ọsọn̄ esịt aka okotụk Jesus, ndien idem ama ọsọn̄ enye ke ebe oro.
12 Jesus ama ọfiọk ke owo otụk imọ, onyụn̄ ọwọn̄ọde enyịn oyom owo emi otụkde enye. Ekeme ndidi mma emi ama ekere ke Jesus ọmọn̄ ayat esịt ye imọ ke ntak emi ibiatde Ibet, ntre ke nnyekidem, enye ama ọduọ ọtọn̄ọ edọn̄ ke iso Jesus onyụn̄ etịn̄ ofụri akpanikọ ọnọ enye. Ndi Jesus ama ayat esịt ye n̄wan oro udọn̄ọ ama okototụhọde mi? N̄wan̄ansa-o! Jesus akakam ọdọhọ enye sụn̄sụn̄ ete: “Eyenan̄wan, mbuọtidem fo amanam idem ọsọn̄ fi. Nyọn̄ ke emem.” (Mark 5:25-34) Kere nte esịt ekenemde enye ndikop Jesus etịn̄de ikọ ntre ye imọ!
13. (a) Didie ke Jesus okokpụhọde ye mme Pharisee? (b) Jesus ekesinam n̄kpọ didie ye nditọwọn̄?
13 Christ iketiehe nte mme Pharisee oro ẹkesisọn̄de esịt ẹbiom mme owo ndodobi mbiomo. (Matt. 23:4) Utu ke oro, enye ama esikpep mme owo se Jehovah oyomde ke ime. Enye ama ama onyụn̄ ọfọn ido ye mme mbet esie. Enye ekedi ata ufan mmọ. (N̄ke 17:17; John 15:11-15) Idem nditọwọn̄ ẹma ẹsima enye, enye onyụn̄ ama mmọ n̄ko. Enye ikesinamke n̄kpọ tutu anana ini nditie ye mmọ. Ini kiet, mbet esie emi ẹkesụk ẹdade idem ke n̄kpọ nte mme adaiso ido ukpono eyo mmọ, ẹma ẹdomo ndikpan mme owo ndida nditọ mmọ nsọk Jesus. Jesus ikamaha se mmọ ẹkenamde, ntre enye ama ọdọhọ mmọ ete: “Ẹyak n̄kpri nditọ ẹtiene mi; ẹkûdomo ndikpan mmọ, koro obio ubọn̄ Abasi enyenede mmọ eke ẹtiede ntem.” Ndien enye ama ada nditọwọn̄ emi ekpep mmọ n̄kpọ onyụn̄ ọdọhọ ete: “Ke akpanikọ ke ndọhọ mbufo, Owo ekededi eke mîbọhọ obio ubọn̄ Abasi nte ekpri eyen ididụkke ke esịt.”—Mark 10:13-15.
14. Nso ufọn ke nditọwọn̄ emi mbiowo ye mmọ eken ẹsede enyịn ẹsinyene?
14 Kere nte eketiede nditọ oro ke idem ke mmọ ẹma ẹkekponi ẹma, ẹnyụn̄ ẹti nte Jesus Christ ‘ekemende mmimọ akama onyụn̄ ọdiọn̄ mmimọ.’ (Mark 10:16) Nditọ nnyịn ẹyekop inemesịt n̄ko ke ini mmọ ẹtide nte mbiowo ye mmọ eken ẹkenen̄erede ẹma ẹnyụn̄ ẹse mmimọ enyịn ke ini ikedide n̄kpri. Ke ini ẹnamde kpukpru emi ye nditọwọn̄, emi eyenen̄ede an̄wam mmọ ẹfiọk ke spirit Jehovah ada ikọt esie usụn̄.
Fọn Ido ke Ererimbot Unana Mfọnido
15. Ntak emi idiọkido mme owo mîkpaha nnyịn idem-e?
15 Ediwak owo mfịn ẹkere ke ndifọn ido idịghe akpan n̄kpọ. Idụhe usen oro owo mîsisọn̄ke ido ye ikọt Jehovah, edide ke ufọkn̄wed, ke itieutom, ke usụn̄ isan̄ ye ke an̄wautom. Okposụkedi emi mîsinemke nnyịn ndikụt mme owo ẹdude uwem ntem, emi isikpaha nnyịn idem. Spirit Abasi ama anam Paul asian ata mme Christian oro ẹdidude ke “akpatre usen” ke mmọ ẹdidụn̄ọ ye ‘mme ama-idem ye mbon oro mînyeneke ndammana ima.’—2 Tim. 3:1-3.
16. Didie ke ikeme ndifọn ido ye nditọete nnyịn ke esop nte Christ ọkọfọnde?
16 Edi esop Abasi itiehe ntre, mme owo ẹnen̄ede ẹfọn ido ke esop Abasi. Edieke ikpebede Jesus, kpukpru nnyịn iyadian ubọk inam esop Jehovah enem owo ndidu. Didie ke ikeme ndinam emi? Usụn̄ kiet edi ndin̄wam mbon oro udọn̄ọ ye mme afanikọn̄ eken ẹnọmọde ke mme esop nnyịn, nnyụn̄ nsịn udọn̄ nnọ mmọ. Okposụkedi emi “akpatre usen” emi anamde utọ afanikọn̄ emi esịm ediwak owo, enye idịghe obufa n̄kpọ. Mme Christian ke eyo Bible ẹma ẹsisobo ukem mfịna emi. Ọkpọfọn in̄wam nditọete nnyịn ukem nte mme Christian ẹkesin̄wamde kiet eken ini oro. Ke uwụtn̄kpọ, Paul ọkọdọhọ mme Christian ete: “Ẹtịn̄ ikọ ẹsọn̄ọ ukpọn̄ eke ofụhọde esịt, ẹn̄wam mbon mmemidem, ẹnyene anyanime ye kpukpru owo.” (1 Thess. 5:14) Emi ọwọrọ ke ana ifọn ido ye mme owo nte Christ ọkọfọnde.
17, 18. Didie ke ikeme ndikpebe mfọnido Jesus?
17 Ana mme Christian ‘ẹdara nditọete mmọ,’ ẹnyụn̄ ẹnam n̄kpọ ye mmọ nte Jesus akpanamde, ẹnen̄ede ẹkere ẹban̄a kpukpru owo—edide ebịghi ikọdiọn̄ọ mmọ, m̀mê akpa inyụn̄ isobode mmọ edi oro. (3 John 5-8) Kpa nte Jesus mîkesibetke-bet ẹteteme enye atua mme owo mbọm, ikpanaha nnyịn ibebet ẹteteme nnyịn in̄wam nditọete nnyịn. Ikpakam inanam esinem mmọ ndidu ye nnyịn kpukpru ini.—Isa. 32:2; Matt. 11:28-30.
18 Akpana kpukpru nnyịn ifọn ido ye nditọete nnyịn, inanam n̄kpọ iwụt ke imekere iban̄a mmọ inyụn̄ ifiọk mfịna mmọ. Yom ifet nam emi. Paul ọkọdọhọ ete: “Ẹda ima nditọete ẹnyene esịt ima ẹnọ kiet eken. Ẹda iso ke ndinọ kiet eken ukpono.” (Rome 12:10) Ikọ Paul ọwọrọ ke ana itiene uwụtn̄kpọ Christ, ifọn ido ye mme owo, inyụn̄ ikpep ndima “ima eke mîsan̄ake ye mbubịk.” (2 Cor. 6:6) Paul ọkọdọhọ ke utọ ima oro “enyenyene anyanime onyụn̄ ọfọn ido. . . . ifịbeke ufụp, inamke inua, ikohokede idem.” (1 Cor. 13:4) Utu ke ndisịn nditọete nnyịn ke esịt, nnyịn ikpakam inam item emi: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.”—Eph. 4:32.
19. Edieke ifọnde ido nte Christ, nso ididi utịp?
19 Ndisịn ukeme mfọn ido kpukpru ini nte Christ ekesifọnde ayada ediwak edidiọn̄ edi. Emi ayanam spirit Jehovah odu ke esop, onyụn̄ anam kpukpru owo ẹn̄wụm mbun̄wụm spirit emi. Ke adianade do, edieke ikpebede Jesus inyụn̄ in̄wamde nditọete nnyịn ẹnam ntre, nnyịn iyadiana kiet ikpono Jehovah ke inemesịt, ndien emi eyenem enye esịt. Mmọdo, ẹyak idomo nte ikpekekeme ndinyene ifụre ifụre ido nnyụn̄ mfọn ido ye mme owo nte Jesus akanamde.
Nte Afo Emekeme Ndinam An̄wan̄a?
• Didie ke Jesus okowụt ke ‘imenyene ifụre ifụre ido inyụn̄ isụhọde esịt’?
• Didie ke Jesus ekesifọn ido ye mme owo?
• Didie ke ikeme ndinyene ifụre ifụre ido nnyụn̄ mfọn ido nte Christ ke idiọk ererimbot emi?
[Mme Mbụme Ukpepn̄kpọ]
[Ndise ke page 8]
Edieke mbuọtidem eyenete ememde nte eke Peter ekememde, ndi ayan̄wam enye?
[Ndise ke page 10]
Nso ke akpanam man esop enem owo ndidu ke ntak mfọnido?