Kala yo Nyindu a Kristu

‘Nukala yo nyindu mosi yeno yo yeno, nze una wakala ye Kristu Yesu.’​—ROMA 15:⁠5.

1. Ekuma tufwete kadila yo nyindu a Kristu?

YESU KRISTU wavova vo: “Nwiz’oku ngina, . . . nwalongwa kwa mono; kadi i nlembami yo ntim’anleka: nwasolola vundu kia mioyo mieno.” (Mat. 11:​28, 29) E mboka yayi zola kwa Yesu isonganga. Ke vena muntu ko olenda kala mbandu ambote yafwana tangininwa. Kana una vo Mwan’a Nzambi on’olutidi awonso, wasonga ngemba ye nkenda, musungula kw’awana bakala muna mpasi.

2. Nkia mambu ma nyindu a Yesu tufimpa?

² Mun’elongi diadi ye muna malongi mole melanda, tufimpa una tulenda kadila ye “nyindu a Kristu” yo songa wo muna zingu kieto. (1 Kor. 2:​16) Entete mambu matanu tufimpa: Ntim’anleka ye lulembamu lwa Yesu, walakazi wandi, lemvo wandi kwa Nzambi, unkabu ye zola kwandi.

Tanginina Ntim’anleka a Kristu

3. (a) Yesu nki’elongi kavana kw’alongoki andi mu kuma kia ntim’anleka? (b) Yesu aweyi kavanga vava alongoki andi basonga lutovoko?

³ Yesu wa Mwan’alunga a Nzambi, wayiza ova ntoto mu sadila vana vena wantu alembi lunga ye asumuki. Akaka muna yau i besinga kumvonda. Kana una vo i wau, Yesu wakwamanana songa kiese ye volo. (1 Pet. 2:​21-​23) O ‘sia meso’ muna mbandu a Yesu dilenda kutusadisa mu vanga una kavanga vava tumonanga usumuki w’akaka. (Ayib. 12:⁠2) Yesu wavovesa alongoki andi vo ‘bavwata vangu kiandi’ yo longwa kwa yandi. (Mat. 11:​29) Adieyi kabalonga? Diantete, Yesu nkwa ntim’anleka kakala, wasonga luzindalalu kw’alongoki andi kana una vo mpilakanu bavanganga. Muna fuku wavitila lufwa lwandi, Yesu wasukula malu m’alongoki andi. Muna mpila yayi wabalonga diambu dina ke balendi vilakana ko, i sia vo, kala yo “ntim’anleka.” (Tanga Yoane 13:​14-17.) Kuna kwalanda, vava Petelo, Yakobo ye Yoane ke ‘bayingila’ ko, Yesu wazaya lutovoko lwau. Wayuvula vo: “E Simone, ng’olele e? kulendi yingila ola mosi ko e? Nuyingila yo samba, ke nwakota mu umpukumuni: o mwand’ele uzolele, kansi e nitu yatovoka.”​—⁠Maku 14:​32-38.

4, 5. E mbandu a Yesu aweyi ilenda kutusadisila vava akaka bevanganga o vilwa?

⁴ Adieyi tuvanga kele vo mpangi una ye fu kia vava sunda akaka yovo funga makasi mu nzaki yovo ke lemvokelanga luludiku lw’akuluntu mu nzaki ko yovo lwa “ntaudi akwikizi yo lulungalalu”? (Mat. 24:​45-​47) Diasazu mu yambulwila wantu a nza ya Satana vava bekutuvanganga e mbi, kansi, dilenda kala diampasi mu yambulwila mpangi zeto vava bevanganga o vilwa. Kele vo usumuki w’akw’eto utufungisi makasi, tufwete kiyuvula, ‘Nga ngina kieleka “yo nyindu a Kristu”?’ Sungamena vo Yesu kafungila alongoki andi makasi ko, kana nkutu vava bayoya muna mwanda.

⁵ Badika dina dia bwila Petelo wa ntumwa. Vava Yesu kabokela Petelo kavaika muna nzaza yo diatila vana ntandu a maza yakuna kakala, Petelo wadiata mu fikolo. I bosi, Petelo vava kamona e tembwa, wabakama kwa wonga yo yantika dimuka. Nga Yesu wavovesa Petelo vo: “I wete  una. Longokela vo diambu”? Ve. “O Yesu olambwidi-lambwidi koko kwandi, unzakidi, umvovese vo, e nkwa filukwikilu, adieyi okatikisidi?” (Mat. 14:​28-​31) Nze una Yesu kalambwila koko kwandi mu sadisa Petelo, yeto mpe tufwete sadisa mpangi zeto mu kumika lukwikilu lwau. I diau tulongokele muna dina kavanga Yesu kwa Petelo.

6. Yesu adieyi kalonga kw’alongoki andi mu kuma kia fu kia vava etunda?

⁶ Petelo wakala mpe vava antumwa batantana kana nani osundidi muna yau. Yakobo ye Yoane bazola vwanda, omosi kuna koko kwalunene, wakaka kuna koko kwalumonso lwa Yesu vava keyala muna Kintinu kiandi. Vava Petelo ye ntumwa zakaka bazaya wo, bafunga makasi. Yesu wazaya vo e fu kiaki kuna zunga kina basansukila bavwila kio. Wababokela yo kubavovesa vo: ‘Nuzeye wo vo akuluntu a zula i bekubaboselelanga, e nene miau mpe mina ye wisa muna yau. Omo yeno, ke wau mukala ko: kansi konso on’ozolele kituka se nene vovo nwina, i kala selo kieno: konso ona mpe ozolele kala ntu vovo nwina, i kala selo kieno.’ I bosi, Yesu wayika mbandu a yandi kibeni, oku vo: “Diau adimosi yo Mwan’a muntu, kayiz’asadilwa kwa selo ko, kasadila kaka, yo vana moyo andi se lukulu lua wantu ayingi.”​—⁠Mat. 20:​20-28.

7. Aweyi konso muntu mu yeto kalenda wokesela ungudi muna nkutakani?

⁷ O badika lulembamu lwa Yesu dilenda kutusadisa mu ‘kisakidika’ vana vena mpangi zeto. (Luka 9:​46-​48) Avo tuvangidi wo, tunungununa kintwadi kieto. Nze se dina yo wana ayingi, Yave ozolanga vo wan’andi ova ntoto “bakadila vamosi” muna ungudi. (Nku. 133:⁠1) Yesu wasamba kwa S’andi vo Akristu awonso akieleka bakala yo ungudi, kimana ‘e nza yazaya wo vo yandi wantuma, kabazola mpe e nzola kanzola.’ (Yoa. 17:​23) Ungudi weto usonganga vo tu alandi a Kristu. Muna kala yo ungudi, tufwete badikilanga usumuki w’akaka nze una Kristu kabadikilanga wo. Yesu nloloki kakala, yo longa vo avo tuloloka akaka, yeto mpe tulolokwa.​—⁠Tanga Matai 6:​14, 15.

8. Adieyi tulenda longoka muna mbandu y’awana besadilanga Nzambi se mvu miayingi?

⁸ Tulenda mpe longoka mayingi muna tanginina lukwikilu lw’awana betangininanga Kristu se mvu miayingi. Nze Yesu, e selo yayi ya Nzambi besonganga umbakuzi muna usumuki w’akaka. Bazeye vo o tanginina nkenda za Kristu ke disadisanga kaka ko mu “nata mayovoka m’awana bakondwa ngolo,” kansi mpe mu wokesa ungudi. Vana ntandu, dikasakesanga e nkutakani yawonso mu kala yo nyindu a Kristu. Bazolele vo ampangi zau bakala yo nyindu nze una Paulu wa ntumwa kazola vo Akristu muna Roma bakala wau. Wavova vo: “O Nzambi a luzindalalu yo fiauzi kanuyambula nwakala yo nyindu mosi yeno yo yeno, mun’owu wa Kristu Yesu: yo nua mosi nwakembel’o Nzambi w’Es’andi a Mfumu eto Yesu Kristu kumosi.” (Roma  15:​1, 5, 6) Kieleka, kintwadi muna nsambil’eto nkembo kitwasanga kwa Yave.

9. Ekuma tuvwididi mwand’avelela o mfunu muna tanginina mbandu a Yesu?

⁹ Yesu watezanesa “ntim’anleka” yo lembama kuna vo kimosi muna fu ya mbongo a mwand’avelela a Nzambi. Muna kuma kiaki, kaneIe vo tulongokanga e mbandu a Yesu, mwand’avelela a Yave tuvwidi o mfunu muna kuntanginina una ufwene. Tufwete lombanga mwand’avelela a Nzambi yo si’e ngolo za yima mbongo a mwanda, i sia vo, ‘zola, kiese, luvuvamu, luzindalalu, walakazi, unsongi, kwikizi, lembama, volo.’ (Ngal. 5:​22, 23) Avo tulanda mbandu a lulembamu yo ntim’anleka kasisa Yesu, tuyangidika Yave wa S’eto ezulu.

Yesu Wasonga Walakazi Kw’akaka

10. O Yesu aweyi kasongela walakazi?

¹⁰ Walakazi mpe kimosi muna fu ya mbongo a mwand’avelela. Yesu wasonga walakazi kw’akaka. Akwa ntima miansongi ana bayenda kwa Yesu, ‘watoma kubatambula.’ (Tanga Luka 9:11.) Adieyi tulenda longoka muna walakazi kasonga o Yesu? O nkwa walakazi, muntu ambote kekalanga, nkwa kiese, nzodi a wantu ye nlembami. Yesu i wau kikilu kakala. Wamwena wantu e nkenda “kadi bavwa zavunwa yo tendangiana, nze mameme makondwa mvungudi.”​—⁠Mat. 9:​35, 36.

11, 12. (a) Yika una Yesu kasongela ngemba. (b) Adieyi lenda longoka mun’evangu diadi?

¹¹ Yesu wasonga walakazi ye ngemba muna mavangu. Badika diambu edi. Nkento mosi wavaikwanga menga vioka mvu 12. Nkento ndioyo wazaya wo vo, muna Nsiku a Mose, oyandi ye konso ona okunsimba wafunzuka kekala. (Fuka 15:​25-​27) Kansi, dina kazaya mu kuma kia Yesu diankwikidisa vo olenda kunsasula. Wavova vo: “Ovo mpiakan’aka mvwatu andi, mpulukidi.” Kuna unkabu, waviakana Yesu yo sasuka vana vau.

¹² Yesu wabakula vo muntu wamviakana yo viluka mu zaya kana nani wansimba. Nanga mu kuma kia wonga wa tumbwa, wau vo nsiku kakulula, o nkento ndioyo wayantika zakama yo fukama mu kuyisunzula. Nga Yesu watumba nkento ndioyo wakala muna mpasi? Ve. Wamvovesa vo: “E mwana, lukwikilu luaku luvulwizi; wenda yo luvuvamu.” (Maku 5:​25-​34) Ekwe kiese kamona mu wá e mvovo miami miangemba!

13. (a) Yesu aweyi kaswaswanena ye Afarisi? (b) Yesu aweyi kakadilanga ye yingyana-ngyana?

¹³ Nswaswani ye Afarisi akwa ntima miambadi, Kristu kasadilanga wisa kiandi mu kudikila mazitu kw’akaka ko. (Mat. 23:⁠4) Kansi, wabalonga nzila za Yave kuna ngemba ye luzindalalu. Yesu wazolanga kieleka alongoki andi, yo kadila yau kuna walakazi. (Nga. 17:17; Yoa. 15:​11-​15) Kana nkutu yingyana-ngyana, bazolanga kumfinama. Yandi mpe wabayangalelanga. Kayambula ko vo salu kakala kiau kiansimba yo lembi tambula yingyana-ngyana. Lumbu kimosi, alongoki andi ana bavavanga etunda nze afidi a mabundu a tandu kiau, bavava sima ana batwasanga wan’au kwa Yesu kabaviakana. Yesu kayangalala ko mu dina bavanga alongoki andi. Wabavovesa vo: ‘Nuyambula yingyana-ngyana iza kwa mono;  ke nubasimi ko: kadi e kintinu kia Nzambi ki’awana bena wau.’ I bosi, wasadila yingyana-ngyana mu kubavana elongi diamfunu. Wavova vo: ‘Kieleka inusamunwini vo, konso on’olembi tambul’e kintinu kia Nzambi nze kingyana-ngyana, kakoti kio nkutu ko.’​—⁠Maku 10:​13-15.

14. Nkia nluta bebakanga yingyana-ngyana vava besongwanga o zola?

¹⁴ Yindula una yingyana-ngyana yayina bamona vava bakituka se ambuta, mu sungamena vo Yesu Kristu ‘kakubawonzakana muna moko mandi, yo kubasambula.’ (Maku 10:​16) O unu, yingyana-ngyana mpe besinga sungamena ye kiese kiawonso o zola besongwanga kw’akuluntu ye kw’ampangi zakaka. Edi disundidi o mfunu, o wana ana besongwanga zola tuka muna kileke kiau, bezayanga vo mwand’a Yave usalanga muna nkangu andi.

Songa Walakazi mu Nza Yayi Yambi

15. Ekuma wantu ayingi bakondelo walakazi o unu?

¹⁵ Wantu ayingi ke bekalanga ye ntangwa ko mu songa walakazi kw’akaka. Muna kuma kiaki, e lumbu yawonso, nkangu a Yave uvangwanga e mbi kuna sikola, kuna salu, ekolo bekangalanga ye muna salu kia umbangi. E fu yambi ilenda kutukendeleka, kansi ke yikutusivikisanga ko. Yave wavumunwina Paulu mu kutulukisa vo, e zingu kiampasi mu “lumbu yambaninu” kifila Akristu akieleka mu kala vamosi ye ‘akwa kizola, . . . minkondwa-ungudi.’—⁠2 Tim. 3:​1-3.

16. Aweyi tulenda songela walakazi muna nkutakani nze Kristu?

¹⁶ Kansi, nswaswani ye nza yayi yakondwa luvuvamu, e nkutakani y’Akristu fulu kia luvuvamu. Avo tutanginina Yesu, yeto awonso tulenda siamisa luvuvamu muna nkutakani. Aweyi tulenda wo vangila? Entete, ndonga muna nkutakani bavwidi o mfunu a lusadisu ye lukasakeso mu kuma kia mpasi za mayela yovo mambu makaka. Omu “lumbu yambaninu,” e mpasi zazi zilenda wokela, kansi ke zampa ko. Kuna nz’ankulu, Akristu bamona mpe mpasi zazi. Muna kuma kiaki, o sadisa akaka mfunu kwina o unu nze una diakala kw’Akristu a tandu kiantete. Kasikil’owu, Paulu wasonekena Akristu vo ‘bakasakes’akwa ntima mia nkenda, basikinin’atovoki, balandula lutantu kwa wantu awonso.’ (1 Tes. 5:​14) Ediadi divavanga vo twasonga walakazi kw’akaka nze una Kristu kavanga.

17, 18. Nkia mpila tulenda tanginina walakazi wa Yesu?

¹⁷ Akristu awonso kiyekwa bena kiau kia ‘tambula ampangi zau kuna ngemba’ yo kadila yau nze una Yesu kadi kadila yau, yo songa o zola kw’awana tuzayanene yau ye awana ke tuzayanene yau ko. (3 Yoa. 5-8)  Nze una Yesu kavitilang’o ntu mu songa e ngemba, yeto mpe tufwete kasakesanga yo songa ngemba kw’akaka.​—⁠Yes. 32:2; Mat. 11:​28-30.

¹⁸ Yeto awonso tulenda songa walakazi muna vanga konso diambu muna wete dia wantu akaka. Tuvavanga elau dia songa walakazi kwa mpangi zeto. Paulu wavova vo: “Mun’owu wa nzolani a ungudi, nukalaziana yo walakazi; mun’owu wa zitu, nuyinduziana.” (Roma 12:​10) Ediadi divavanga vo twalanda e mbandu a Kristu, kadila y’akaka kuna kiese ye walakazi yo songa ‘nzola yakondw’o kivùnina.’ (2 Kor. 6:⁠6) Paulu wayikila o zola nze kuna kwasonga Kristu mu mvovo emi: “O zola ke kuna ya kimpala ko; o zola ke kukusàna ko, ke kukutùndisa ko.” (1 Kor. 13:⁠4) Vana fulu kia lundila mpangi zeto z’akala ye z’akento o makasi, tulanda luludiku olu: “Nulembamiana, nukala yo walakazi, nuyambuziana, una kanuyambulwil’o Nzambi muna Kristu.”​—⁠Ef. 4:32.

19. Nkia nluta tulenda baka muna songa walakazi nze Kristu?

¹⁹ E ngolo tuvanganga ntangwa zawonso mu songa walakazi kw’akaka nze una Kristu kavanga, nluta miayingi dikututwasilanga. O mwand’a Yave ukalanga muna nkutakani yo sadisa awonso mu yima mbongo a mwanda. Vana ntandu, avo tulende mbandu kasisa o Yesu yo sadisa akaka mu vanga diau adimosi, e kiese ye kintwadi kieto kia nsambila, kiyangidika Nzambi. Muna kuma kiaki, yambula twasi’e ngolo za songa lulembamu ye walakazi muna nkal’eto y’akaka.

[Yuvu ya Longoka]

[Foto ina muna lukaya lwa 8]

Nze dina diabwila Petelo, tulenda kumika lukwikilu lwa mpangi eto vava lukulukanga

[Foto ina muna lukaya lwa 10]

Adieyi olenda vanga mu kitula e nkutakani se fulu kia luvuvamu?

Nga Olenda Sasila?

• Yesu aweyi kasongela ‘lulembamu ye ntim’anleka’?

• Yesu aweyi kasongela walakazi?

• Nkia mpila tulenda songela lulembamu ye walakazi mu nza yayi yambi?