Ikalenu naYitoñojoka yaKristu

‘Mwikali nayitoñojoka yoyimu muntu namukwawu, mwatoñojokañayi Kristu Yesu.’—AROMA 15:5.

1. Muloñadi wutwatela kwimbujolila yililu yaKristu?

 YESU Kristu wahosheli nindi, “Inzenu kudami.” Wahosheli cheñi nindi, “Mudizili kudami muloña ami nawunda, nadizoza mumuchima, ninenu mukumona kunooka munyichima yenu.” (Matewu 11:28, 29) Iwu mutambi wawuwahi wunakumwekesha yililu yakukeña yikwetiyi Yesu. Mwalala Yesu hichakutalilahu chachiwahi chakulondela kubadika antu. Hela chakwila wadiña Mwana kaNzambi nawa wadiña nañovu nankashi, Yesu watiyilileña antu wushona niluwi, sweje-e ana akabakeneña.

2. Yililwinyi yamwekesheliyi Yesu yitukushinshikahu?

² Muchinu chibaba nimuyibaba yiyedi yikuhiñahu, tukudiza chitwatela kwikala nikutwalekahu kwikala nayitoñojoka yaYesu nikwimbujola “yitoñojoka yaKristu” muchihandilu chetu. (1 Akorinda 2:16) Tukushinshika nankashi hayililu yitanu yamwekesheliyi Yesu: Kuwunda nikudizoza, luwi, kwovwahila Nzambi, kubula woma nikukeña kwindi kwalala.

Dizilenu kuYililu yaYesu yaKuwunda

3. (a) Chumanyi chayidizishiliyi Yesu atumbanji twindi kutalisha hakudizoza? (b) Indi Yesu welilidi mpinji yamwekesheluwu atumbanji twindi kuzeya?

³ Yesu, Mwana kaNzambi wawanina, wadiheni kwinza heseki nakukalakala nawantu abula kuwanina nawa akwanshidi. Hakachi kawantu wenawa, amakwawu amujahili. Hela chochu, Yesu wadiñi namuzañalu nikudihemba. (1 Petulu 2:21-23) ‘Kutalisha mesu’ kudi Yesu kukutukwasha ninetu kwikala amuzañalu nikudihemba neyi tunatiyi kutama hamuloña wakutuvulumuna kudi akwetu. (Aheberu 12:2) Yesu wayilejeli atumbanji twindi kuditwika mpanda yindi nikudizila kudi yena. (Matewu 11:29) Chumanyi chadi kudizawu? Adi kudiza chililu chimu, Yesu wadiña ‘wawunda’ nawa wawudilileña atumbanji twindi hela chakwila aluwañesheleña. Hawufuku wakutwala kukufwa kwindi, Yesu wawelesheli nyendu yawu, chumichi chayidizishili kwikala ‘adizoza mumuchima’ nawa adi kanukaña mpinji yejima. (Tañenu Yowanu 13:14-17.) Nkumininaku, chelili aPetulu, niYakoba, niYowanu akañanyi ‘kutona,’ Yesu welukili nindi azeyeli. Wenhwili nindi, “Shimona, wudi mutulu?” Wahosheli cheñi nindi, “Tonenu, lombenu, mubuli kwiñila mukweseka. Chalala spiritu yinakeñi, ilaña mujimba wunazeyi.”—Maku 14:32-38.

4, 5. Indi chakutalilahu chaYesu chatela kutukwasha ñahi kwila kakawahi neyi akwetu anatuvulumuni?

⁴ Twelaña ñahi neyi mana kwetu hela muhela wukweti chililu chakudibecha, wanyakalaña kuhila, hela washintajalaña kutiyilila wunlomboli wawaeluda hela ‘wanduñu wamaana nikashinshi’? (Matewu 24:45-47) Hela chakwila chekalaña chaswayi kwanakena antu akwituña anatuvulumuni, ilana chatukalilaña kwanakena mana kwetu wunatuvulumuni. Neyi twanyakalaña kuhila muloña wayiluwa yawakwetu, twatela kudihula netu, ‘Nateli kumwekesha ñahi “yitoñojoka yaKristu”?’ Anukenu nenu Yesu hayihililili atumbanji twinduku hela chakwila amwekesheli kuzeya kuspiritu.

⁵ Shinshikenu nsañu yakapostolu Petulu. Yesu chamutambikiliyi Petulu kufuma muwatu nakwenda hewulu damenji kulonda yenzi kudi Yena, Petulu wendeluku chantesha hohu. Ilaña, chamweniyi mpepela watachikili kunekama. Komana Yesu wazuwili nakumwila nindi: “Dichi  wunakeñeña! Lelu chiña wubabali”? Inehi. ‘Yesu wolweli chikasa chindi hohenohu, hakumukwata, nakumwila nindi, Eyi wukweti chikuhwelelu chantesha, wunalulutidi?’ (Matewu 14:28-31) Neyi kudi mana kwetu hadaha wunabuli chikuhwelelu, komana ninetu tunateli kwolola chikasa chachifwikija nakumukwasha kulonda yekali nachikuhwelelu chakola? Iku dikufumba kwakudiwunjika kwamumwekesheleluwu Petulu kudi Yesu.

6. Indi Yesu wayilejeli apostolu indi nindidi kutalisha hakufwila yifulu?

⁶ Hayina ntaadi yavulumukili hakachi kawapostolu yakwila nawu hinyi watela kwikala mukulumpi hakachi kawu, Petulu cheñi wadiñi hohu. A Yakoba niYowanu akeñeleña kushakama muWanta waYesu wumu kuchikasa chachidiilu mukwawu kuchimunswa. Petulu niapostolu amakwawu chatiyiluwu iyi nsañu, ahilili nankashi. Ilaña, Yesu welukili nindi adiñi nakulondela yaaku yelileñawu antu amuchituñilu. Dichi wayitambikili nakuyileja nindi: “Mweluka dehi anyanta jawaJentili chayiyulañawu; niantu awu alema chekalañawu nawanta hadi wena. Ilaña mukachi kenu bayi chakekala chochochuku; yowu wukukeña kwikala muneni mukachi kenu ekali mukwakuyikalakela; yowu wukukeña kwikala mukwakubadika mukachi kenu ekali nduñu yenu.” Kuhiñahu Yesu wahosheli hansañu yindi yomweni nindi: “Muloña chalala chenjiliyi Mwana kamuntu halondeli nindi akamukalakeluku, ilaña nindi akakalakeli akwawu, akahani wumi windi wakukuula nachu antu amavulu.”—Matewu 20:20-28.

7. Indi wejima wetu tunateli kwikala anuñañana ñahi muchipompelu?

⁷ Kutoñojoka hakudizoza kwaYesu kunateli kutukwasha kwikala ‘adikehesha’ hakachi kawamana kwetu. (Luka 9:46-48) Chumichi chikutuleñela kwikala anuñañana. Yehova, wudi neyi tata yawantu wukweti anyana amavulu, wakeñaña nindi anyanindi ‘ashakameña hamu nakutiyañana’ chachiwahi. (Masamu 133:1) Yesu wayilombeleluku akwaKristu alala ejima kudi Tata yindi nindi: “Ami mudi wena nineyi mudami, kulonda chakwikalawu wumu hohu eli alala chikupu, kulonda akwampata yamunu mwishina akeluki nawu yeyi wantemesheli; akeluki nawu wayikeñeli neyi chiwankeñelami.” (Yowanu 17:23) Dichi neyi twikala anuñañana, antu akutwiluka nawu tudi atumbanji twaKristu. Hakwila twikali anuñañana, twatela kudiwula yiluwa yawakwetu neyi chayidiwileñayi Kristu. Yesu wadiña namuchima wakwanakena, nawa washimwini nindi neyi twanakenaña antu anetu anateli kutwanakena.—Tañenu Matewu 6:14, 15.

8. Tunateli kudizilaku kwodi kuchakutalilahu chawambuña aNzambi anamuzatili hadi yaaka yayivulu?

⁸ Anetu nawa tunateli kudiza yuma yayivulu kuhitila mukwimbujola chikuhwelelu chawantu anembujoli Kristu hadi yaaka yayivulu. Kufwana Yesu, antu wenawa avula kudiwula yiluwa yakoñañawu akwawu. Eluka nawu kumwekesha wushona neyi waKristu kwatukwashaña “kusenda kuzeyazeya kwawantu abula ñovu” cheñi kwatuleñelaña kwikala anuñañana. Cheñi, kwakoleshaña chipompelu chejima kumwekesha yitoñojoka yaKristu. Akeñaña amana kwawu amwekesheña yililu yamuchidiwu neyi chakeñeleñayi kapostolu Pawulu nindi akwaKristu amuRoma eleña mwenimu, nindi: “Nzambi wakutatakena niwakukundeja, ayiiteji kwikala nayitoñojoka yoyimu muntu namukwawu, mwatoñojokañayi  Kristu Yesu; kulonda mulemeshi Nzambi yaMwanta wetu Yesu Kristu, yowu Tata yindi, namuchima wumu nikanwa kamu.” (Aroma 15:1, 5, 6) Eña, neyi tudifukulaña mukunuñañana tukumuhamekaña Yehova.

9. Muloñadi wutwakeñelaña kwikala naspiritu yajila kulonda twimbujoli chakutalilahu chaYesu?

⁹ Yesu wafwanishili ‘kudizoza mumuchima’ nakuwunda, yumiyi yekala hakachi kamukabu waspiritu yaNzambi yajila. Dichi, hampinji yitunakudiza chakutalilahu chaYesu, twatela kwikala naspiritu yaYehova yajila kulonda twimbujoli ichi chakutalilahu munjila yayiwahi. Twatela kulomba spiritu yaNzambi yajila nikufwila kwikala namukabu wachu chidi neyi “muzañalu, kuwunda, kukaba kabe-e luwi, kuwaha, kashinshi, kwovwaha, nikudihemba.” (Aŋalija 5:22, 23) Neyi tukumwekeshaña yililu yakudizoza nikuwunda yamwekesheliyi Yesu, tukumuzañalesha Tata yetu wamwiwulu, Yehova.

Yesu Watiyilileña Antu Luwi

10. Indi Yesu wamwekesheli ñahi luwi?

¹⁰ Luwi cheñi lwekala hakachi kamukabu waspiritu yajila. Yesu watiyilileña antu luwi mpinji yejima. Antu ejima amukeñakeñeleña Yesu chikupu ‘wayishikijili chachiwahi’ (Tañenu Luka 9:11.) Chumanyi chitukudizila kuluwi lwamwekesheliyi Yesu? Muntu wukweti luwi, wakwashanaña, wawunda, wakamenaña, nawa wekala nawushona. Dichadiñayi Yesu. Watiyilileña antu wushona, “muloña akabakeni, apalañeni neyi nyikoku yakadi kabiña.”—Matewu 9:35, 36.

11, 12. (a) Shimunenu chuma cheliliyi Yesu chinakumwekesha wushona. (b) Chumanyi chimukudizilaku kunichi chakutalilahu?

¹¹ Yesu wamwekesheli cheñi wushona niluwi kuhitila mukukwasha antu. Talenu chuma chamwekeni. Mumbanda wumu wakatili chikatu chakupweka mashi hadi yaaka 12. Welukili nindi kwesekeja naNshimbi jamwinkeluwu Mosi, yena nimuntu wukumukunka hanateli kuya nakudifukulaku, muloña wudi namajilu. (Alevi 15: 25-27) Hela chochu, iwu mumbanda wakuhweleli nindi Yesu wukweti ñovu yakumuuka muloña welukili nindi wakamenaña antu. Wahosheli nindi: “Neyi nukukumina dakukunka kumahinindi nukukola.” Wanyamukili, hakukunka kumahina aYesu nawa hohenohu yokola nikukola.

¹² Yesu welukili nindi kudi muntu wunamukunki, hakushetumuka nindi yamoni muntu wunamukunki. Iwu mumbanda, hadaha watiyili woma nindi akumuzuwila muloña wakufumpa Lushimbi, wadinatili hamaseki kunyendu yaYesu nakuzaala hakumuleja nsañu yejima. Komana Yesu wamuhosholeli iwu mumbanda kazweñi wadiña nakukabakana? Inehi. Wamulejeli nindi ‘Eyi mwanami, chikuhwelelu cheyi chinakukoleshi dehi. Yaña mukuwunda.’ (Maku 5:25-34) Wenowu muzañalu watiyiliyi hakutiya mazu amuchidiwu!

13. (a) Indi yililu yaYesu yambukili ñahi nayawaFwarisi? (b) Indi Yesu wayakemeneni ñahi nyana yanyanya?

¹³ Kwambukaku nawaFwarisi achinchika nyichima, Kristu hazatishili ñovu yindi nakulunjikilahu antu yiteluku. (Matewu 23:4) Ilaña, wayidizishili antu njila jaYehova chachiwahi nawa mukuwunda. Yesu wadiñi ibwambu dawatumbanji wukweti wushona, wayikeñeli, nawa wayitiyilileña luwi mpinji yejima, mwalala Yesu wadiña ibwambu dawu chikupu. (Yishimu 17:17; Yowanu 15:11-15) Anyana niwena adiña akasunuka kwinza kudi Yesu, niyena wadiña wayikeña anyana. Hadiña nanyidimu yayivulu yamukañesheleña kuwana mpinji yakwikala nawanyanaku. Mpinji yimu, atumbanji twindi, achidiñi nayitoñojoka neyi yawakulumpi jansakililu amwiluña dawu yakudimona neyi asweja kulema, akaanishili antu kuleta nyana yanyanya kudi Yesu nawu yayinañiki makasa.  Yesu watiyili kutama hachuma cheliluwu atumbanji twindi. Wayilejeli nindi: “Itejenu anyana anyanya kwinza kudami, bayi muyilekeshaku, muloña wanta waNzambi wawena adi chochichi.” Kuhiñahu wateneni nyana yanyanya kulonda yayidizishi, wahosheli nindi: “Nukuyileja chalala nami, muntu wukubula kutambula wanta waNzambi neyi mwana wanyanya, hakwiñilamu nihantuku.”—Maku 10:13-15.

14. Indi anyana akamenañawu chiwahi ahetelañamu ñahi?

¹⁴ Toñojokenu chatiyiluwu anyana amakwawu chelili anakuli dehi, anukileña nawu Yesu Kristu ‘wayakatili mumakasindi nikuyikiswila.’ (Maku 10:16) Nyana yamakonu yakazañalala hakwanuka chayakameneneñawu chiwahi kudi aeluda niantu amakwawu. Sweje-e, anyana akamenañawu chikupu muchipompelu kufuma kuwansi elukaña nawu spiritu yaYehova yayikwashaña antu jindi.

Mwekeshenu Luwi Mukanu Kaayi Katama

15. Muloñadi chitukubulila kuhayama hayililu yawantu yakadi luwi makonu?

¹⁵ Makonu antu amavulu atoñojokaña nawu hiyakweti mpinji yakutiyila antu luwuku. Dichi, mafuku ejima antu jaYehova atalañanaña nawantu akweti yililu yakwituña, hashikola, kumudimu, halwendu nimumudimu wakushimwina. Antu neyi atwila katama twaneñaña, ilaña hiyatela kutuhayamishaku. Yehova wamoneneni Pawulu kutusoñamisha chadimu nindi chihandilu munanu ‘mafuku akala akukuminina’ chakaleñela akwaKristu alala kutalañana nawantu “akwakudikeña . . . abulaña kukeñañana mwasemwakenawu.”—2 Timotewu 3:1-3.

16. Tunateli kumwekesha ñahi luwi neyi Kristu muchipompelu?

¹⁶ Kwambukaku, yililu yamwekeshañawu muchipompelu chalala chawakwaKristu yazañaleshaña nawa yambuka chikupu nayawantu abula luwi mukaayi. Dichi neyi tukumwimbujolaña Yesu, wejima wetu tunateli kumwekesha luwi muchipompelu. Tunateli kumwekesha ñahi luwi? Chakutachikilahu, antu amavulu muchipompelu akeñaña nawu tuyikwashi nikuyikolesha muloña anakuyekela nayikatu hela kumona kukala kweneni. Munanu ‘mafuku akukuminina,’ kukala kwamuchidiwu kukuswejelañaku, ilaña kwatachikili dehi. Kushankulu, akwaKristu amweneña kukala kwamuchidiwu. Dichi, twatela kwila yuma yatela kutukwasha neyi cheliluwu akwaKristu akushankulu. Chakutalilahu, Pawulu wayikonkwomweneni akwaKristu, ‘kukundeja aneña, kukwasha azeya, nikudiwunjika nawantu ejima.’ (1 Atesalonika 5:14) Hakwila twili mwenimu, twatela kumwekesha luwi neyi Kristu muyuma yonsu.

17, 18. Njilanyi mutwatela kwimbujolila luwi lwaYesu?

¹⁷ AkwaKristu akweti mudimu ‘wakutambwila amana kwawu chiwahi,’ kuyakamena neyi chadi kuyakamenayi Yesu, nikukeña chikupu antu itwadiluka dehi nawu niantu itwabula kumonahu dehi. (3 Yowanu 5-8) Neyi chochatachikileñayi Yesu kumwekesha wushona kudi antu, anetu nawa dichitwatela kwila,  kuzañalesha amakwawu mpinji yejima.—Isaya 32:2; Matewu 11:28-30.

¹⁸ Wejima wetu tunateli kutiyila antu luwi kuhitila mukuyilila yuma yinakumwekesha nawu twayakamenaña. Dichi keñakeñenu njila mwakumwekeshela luwi. Dikitenu chikupu! Pawulu wayikonkomweneni nindi: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Dikwila nawu twatela kwimbujola chakutalilahu chaKristu, kukeña antu nikuyitiyila luwi, nikwiluka chakumwekesha “kukeña kwakadi kudimbana.” (2 Akorinda 6:6) Pawulu walumbulwili kukeña kudi neyi kwaKristu ñane: “Kukeña kwadiwunjikaña, kukweti niluwi; kukeña hikwahetaña ichimaku, kukeña hikwadinkaña wantaku; hikwaditoheshañaku.” (1 Akorinda 13:4) Chatela tuhembeleña ana kwetu niahela ndulu, twatela kutiyilila kukonkomwena kwakwila nawu: “Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.”—Aefwesesa 4:32.

19. Yumanyi yayiwahi yafumaña mukumwekesha luwi neyi Kristu?

¹⁹ Neyi tuzata nañovu kulonda tumwekeshi luwi neyi Kristu mpinji yejima muyuma yejima tukahetelamu chikupu. Spiritu yaYehova yikuzatikaña chachiwahi muchipompelu, nawa yikukwasha ejima kwikala namukabu waspiritu. Kubombelahu, neyi twimbujolaña chakutalilahu chemikiliyi Yesu nikukwasha amakwawu kwila mwomumu, Nzambi yomweni wukuzañalala nakudifukula kwetu kutwadifukulaña mukunuñañana. Dichi, mpinji yejima tufwileña kumwekesha kuwunda niluwi lwaYesu hakudikunda nawantu.

Munateli Kulumbulula?

• Indi Yesu wamwekesheli ñahi nindi wadiña ‘wawunda nawa wadizoza mumuchima’?

• Indi Yesu wamwekesheli ñahi luwi?

• Njilanyi jikwawu mutwamwekeshelaña kuwunda niluwi neyi Kristu mudinu ituña datama?

[Malwihu aKuzatisha haKudiza]

[Mwevulu wudi hefu 11]

Neyi chikuhwelelu chamana kwetu chinakehi neyi chakeheli chaPetulu, komana tunateli kwolola chikasa nakumukwasha?

[Mwevulu wudi hefu 13]

Tunateli kwiladi kulonda tumwekesheña luwi muchipompelu?