Dulang le E-na le Boemo bja Kriste bja Monagano

“Le be le boemo bja monagano bjo bo swanago le bjo Kriste Jesu a bego a e-na le bjona.”—BAROMA 15:5.

1. Ke ka baka la’ng re swanetše go phegelela go ba le boemo bja Kriste bja monagano?

JESU KRISTE o itše: “Tlang go nna . . . le ithute go nna, gobane ke wa moya o boleta e bile ke wa pelo e ikokobeditšego, gomme le tla hweletša meoya ya lena tapologo.” (Mat. 11:28, 29) Taletšo ye e borutho e bonagatša gabotse tshekamelo ya Jesu ya go bontšha lerato. Ga go na motho yo e ka bago mohlala o mokaone woo re ka o latelago go swana le Jesu. Gaešita le ge Jesu e be e le Morwa yo matla wa Modimo, o ile a bontšha kwelobohloko le lerato, kudu-kudu go bao ba bego ba tlaišega.

2. Ke dika dife tša semelo sa Jesu tšeo re tlago go di ahla-ahla?

² Sehlogong se le dihlogong tše pedi tše di latelago, re tla ahla-ahla kamoo re ka hlagolelago le go boloka boemo bja monagano bjo bo swanago le bja Jesu gomme ka go rialo ra bontšha “monagano wa Kriste” maphelong a rena. (1 Bakor. 2:16) Re tla lebiša tlhokomelo kudu dikeng tše hlano tša Jesu: boleta le boikokobetšo bja gagwe, botho bja gagwe, go kwa ga gagwe Modimo, sebete le lerato la gagwe leo le tiilego.

Ithute Sekeng sa Kriste sa Boleta

3. (a) Ke thuto efe mabapi le boikokobetšo yeo Jesu a e rutilego barutiwa ba gagwe? (b) Jesu o ile a arabela bjang ge mafokodi a barutiwa ba gagwe a be a bonala?

³ Jesu, Morwa yo a phethagetšego wa Modimo, ka go rata o ile a tla lefaseng go tlo hlankela gare ga batho ba sego ba phethagala le ba sebe. Ka morago, ba bangwe ba bona ba be ba tla mmolaya. Lega go le bjalo, Jesu ka mehla o ile a dula a thabile e bile a kgona go laola maikwelo a gagwe. (1 Pet. 2:21-23) Go “dula re tsepeletše” mohlaleng wa Jesu go ka re thuša gore re dire se se swanago ge ba bangwe ba re šitela le go re kgopiša ka baka la go se phethagale. (Baheb. 12:2) Jesu o laleditše barutiwa ba gagwe gore ba rwale le yena joko ya gagwe gomme ka go rialo ba ithute go yena. (Mat. 11:29) Ba be ba ka ithuta’ng go yena? Selo seo ba bego ba tla ithuta sona go Jesu ke gore o be a na le moya o boleta gomme a sa felele barutiwa ba gagwe pelo, go sa šetšwe mafokodi a bona. Bošegong bja pele ga lehu la gagwe, Jesu o ile a ba hlapiša maoto, ka go rialo a ba ruta thuto yeo ba ka se kego ba e lebala mabapi le go ba le “pelo e ikokobeditšego.” (Bala Johane 13:14-17.) Ka morago, ge Petro, Jakobo le Johane ba be ba palelwa ke go ‘dula ba phakgame,’ Jesu ka go ba kwela bohloko o ile a lemoga bofokodi bja bona. O ile a botšiša gore: “Simone, na o robetše? . . . Dulang le phakgame e bile le rapela, e le gore le se tsene molekong. Go ba gona, moya o mafolofolo, eupša nama e a fokola.”—Mar. 14:32-38.

4, 5. Mohlala wa Jesu o ka re thuša bjang go lebeletšana le mafokodi a ba bangwe?

⁴ Re arabela bjang ge modumedi-gotee le rena a bontšha moya wa phadišano, a kgopišega ka pela goba a dika-dika go diriša keletšo e tšwago go bagolo goba go “mohlanka yo a botegago le wa temogo”? (Mat. 24:45-47) Le ge re ka ba re ikemišeditše go lebelela dika tša nama tša batho ba lefase la Sathane e le tše tlwaelegilego, dika tše bjalo e ka ba teko e kgolo ge di bonagatšwa ke bana babo rena. Ge e ba mafokodi a ba bangwe a re kgopiša gabonolo, re swanetše go ipotšiša gore, ‘Nka bontšha bjang “monagano wa Kriste” gakaone?’ Leka go dula o gopola gore Jesu ga se a ka a kgopišwa ke barutiwa ba gagwe, gaešita le ge ba be ba bontšha gore ba fokola moyeng ka tekanyo e itšego.

⁵ Ela hloko phihlelo ya moapostola Petro. Ge Jesu a be a laela Petro gore a tšwe ka  lesela-watleng gomme a tle go Yena a sepela godimo ga meetse, Petro o ile a kgona go dira bjalo ka nakwana. Ke moka o ile a lebelela ledimo gomme a thoma go nwelela. Na Jesu o ile a mo galefela gomme a mmotša gore: “O kgonegile! O tla rutega”? Aowa! “Ka bjako Jesu [o ile] a otlolla seatla sa gagwe a mo swara a re go yena: ‘Wena wa tumelo e nyenyane, ke ka baka la’ng o fentšwe ke pelaelo?’” (Mat. 14:28-31) Ge e ba re ka swanelwa ke go lebeletšana le go hloka tumelo ga ngwanabo rena, na ka tsela ya seswantšhetšo re ka otlolla letsogo la rena gomme ra mo thuša go matlafatša tumelo ya gagwe? Ye ke thuto yeo re ithutago yona tseleng e boleta yeo Jesu a e dirišitšego ge a be a thuša Petro.

6. Ke’ng seo Jesu a se rutilego barutiwa ba gagwe mabapi le go tsoma bophagamo?

⁶ Le gona, Petro o be a akaretšwa phenkgišanong ya baapostola e sa kgaotšego ya gore yo mogolo ke mang gare ga bona. Jakobo le Johane ba be ba nyaka gore yo mongwe a dule ka letsogong la Jesu le letona gomme yo mongwe a dule ka go le letshadi Mmušong wa gagwe. Ge Petro le baapostola ba bangwe ba e-kwa se, ba ile ba galefa. Jesu o be a tseba gore mohlomongwe ba ka ba ba hueditšwe ke setšhaba seo ba godišeditšwego go sona gore ba be le boemo bjo bja monagano. O ile a ba biletša go yena gomme a re: “Le a tseba gore babuši ba ditšhaba ba a di buša gomme banna ba bagolo ba a di laola. Ga go bjalo gare ga lena; eupša mang le mang yo a nyakago go ba yo mogolo gare ga lena e swanetše go ba modiredi wa lena, gomme mang le mang yo a nyakago go ba wa pele gare ga lena e swanetše go ba mohlanka wa lena.” Ke moka, Jesu o ile šupa mohlaleng wa gagwe gomme a re: “Go etša ge Morwa wa motho a se a tlela go direlwa, eupša a tletše go direla le go nea moya wa gagwe gore e be topollo bakeng sa ba bantši.”—Mat. 20:20-28.

7. Yo mongwe le yo mongwe wa rena a ka tlaleletša bjang boteeng bja phuthego?

⁷ Go naganišiša ka boikokobetšo bja Jesu go ka re thuša go ‘itshwara bjalo ka ba banyenyane’ gare ga bana babo rena. (Luka 9:46-48) Go dira bjalo go tlaleletša boteeng. Jehofa, bjalo ka tate yo a nago le lapa le legolo, o nyaka gore bana ba gagwe ‘ba dule ba kwana’ gomme ba dirišane. (Ps. 133:1) Jesu o ile a kgopela Tatagwe ka thapelo gore Bakriste ka moka ba therešo ba be boteeng, e le gore “lefase le tsebe gore o nthomile le gore o ba ratile go etša ge o nthatile.” (Joh. 17:23) Ka baka leo, botee bja rena bo thuša go re hlaola re le balatedi ba Kriste. E le gore re thabele botee bjoo, re swanetše go lebelela mafokodi a ba bangwe ka tsela yeo Kriste a bego a dira. Jesu o be a lebalela gomme o ile a ruta gore re ka lebalelwa feela ge e ba re lebalela ba bangwe.—Bala Mateo 6:14, 15.

8. Re ka ithuta’ng mohlaleng wa bao ba hlanketšego Modimo ka nako e telele?

⁸ Le gona, re ka ithuta mo gontši ka go ekiša tumelo ya bao ba feditšego nywaga e mentši ba ekiša Kriste. Go swana le Jesu, batho ba gantši ba kwešiša mafokodi a ba bangwe. Ba ithutile gore go bontšha kwelobohloko bjalo ka Kriste ga go re thuše feela go “rwala mafokodi a bao ba sa tiago,” eupša gape go tlaleletša boteeng. Go feta moo, go kgothaletša phuthego ka moka go bonagatša boemo bja Kriste bja monagano. Ba kganyogela bana babo bona selo swanago le seo Paulo a bego a se kganyogela Bakriste ba Roma ge a be a re: “Eka Modimo yo a fago kgotlelelo le khomotšo a ka le nea gore gare ga lena le be le boemo bja monagano bjo bo swanago le bjo Kriste Jesu a bego a e-na le bjona, gore ka go kwana le rete Modimo le Tatago Morena wa rena Jesu Kriste ka  molomo o tee.” (Baroma 15:1, 5, 6) Ee, botee bja rena borapeding bo tlišetša Jehofa kgodišo.

9. Ke ka baka la’ng re hloka moya o mokgethwa e le gore re ekiše mohlala wa Jesu?

⁹ Jesu o ile a tswalanya go ba le “pelo e ikokobeditšego” le boleta, e lego karolo ya dienywa tša moya o mokgethwa wa Modimo. Ka gona, e le gore re ekiše mohlala woo gabotse, re hloka moya o mokgethwa wa Jehofa gotee le go ithuta mohlaleng wa Jesu. Re swanetše go rapelela moya o mokgethwa wa Modimo le go katanela go hlagolela dienywa tša ona—“lerato, lethabo, khutšo, bopelotelele, botho, bolo, tumelo, boleta, boitshwaro.” (Bagal. 5:22, 23) Ka gona, ge re latela mohlala wa boikokobetšo le wa boleta woo o beilwego ke Jesu, re tla thabiša Tatago rena wa legodimong, Jehofa.

Jesu o be a Swara ba Bangwe ka Botho

10. Jesu o bontšhitše botho bjang?

¹⁰ Botho le bjona ke karolo ya dienywa tša moya o mokgethwa. Jesu ka mehla o be a swara ba bangwe ka botho. Batho bohle bao ba bego ba nyaka Jesu ba ile ba lemoga gore o “ba amogela ka botho.” (Bala Luka 9:11.) Re ithuta’ng bothong bjo bo bontšhitšwego ke Jesu? Motho yo boleta o na le bogwera, o bonolo, o kwela ba bangwe bohloko e bile o a gaugela. Jesu o be a le bjalo. O be a šokela batho “gobane ba be ba šokiša gomme ba gašane go swana le dinku tše di se nago modiši.”—Mat. 9:35, 36.

11, 12. (a) Hlalosa mohlala wo o bontšhago kwelobohloko ya Jesu. (b) O ka ithuta’ng mohlaleng wo o ahla-ahlwago mo?

¹¹ Le gona, Jesu o ile a bontšha ka mediro gore o kwela batho bohloko le go ba šokela. Ela hloko mohlala wo. Mosadi yo mongwe o be a tlaišitšwe ke bolwetši bja ngope ka nywaga e 12. O be a tseba gore go ya ka Molao wa Moše, boemo bja gagwe bo be bo mo šilafatša gotee le go šilafatša motho le ge e le ofe yo a ka mo kgomago. (Lef. 15:25-27) Lega go le bjalo, botumo bja Jesu le tsela yeo a bego a swara batho ka yona di swanetše go ba di ile tša mo kgodiša gore o na le matla a go mo fodiša le gore o rata go mo fodiša. O be a duletše go bolela gore: “Ge nka kgwatha feela dikobo tša gagwe tša ka ntle ke tla fola.” O ile a rapa sebete, a dira bjalo gomme gatee-tee a ikwa gore o fodišitšwe.

¹² Jesu o ile a lemoga gore go na le motho yo a mo kgomilego, gomme o ile a retologa go bona gore ke mang. Mosadi yo, mohlomongwe ka go tšhaba go kgalengwa ka ge a tshetše Molao, o ile a wela fase dinaong tša gagwe a thothomela gomme a mmotša therešo ka moka. Na Jesu o ile a kgalema mosadi yo yoo a bego a tlaišega? Le ganyenyane! O ile a mo kgonthišetša ka gore: “Morwedi wa-ka, tumelo ya gago e go fodišitše. Sepela ka khutšo.” (Mar. 5:25-34) Ruri go kwa mantšu ao a botho go swanetše go ba go ile gwa mo kgothatša!

13. (a) Boemo bja Jesu bja monagano bo be bo fapane bjang le bja Bafarisei? (b) Jesu o be a swara bana bjang?

¹³ Ka go fapana le Bafarisei ba dipelo tše thata, Kriste ga se a ka a diriša matla a gagwe a bolaodi go imetša batho ba bangwe. (Mat. 23:4) Go e na le moo, ka botho le go se fele pelo o ile a ruta ba bangwe ditsela tša Jehofa. Jesu e be e le mogwera yo a nago le lerato wa balatedi ba gagwe, ka mehla a ba rata e bile a le botho, e le mogwera wa kgonthe. (Die. 17:17; Joh. 15:11-15) Gaešita le bana ba be ba ikwa ba lokologile ge ba e-na le Jesu, gomme le yena o be a ikwa a lokologile ge a e-na le bona. O be a emiša mediro ya gagwe e le gore a fetše nako a e-na le bana. Lebakeng le lengwe, barutiwa ba gagwe, bao ba bego ba sa dutše ba nagana gore ba bohlokwa go swana baetapele ba bodumedi bao ba bego ba ba dikologile, ba ile ba leka go thibela batho go tliša bana ba bona go Jesu gore a ba bee diatla. Jesu ga se a ka a  thabišwa ke seo. O ile a ba botša gore: “Lesang bana ba banyenyane ba tle go nna; le se leke go ba thibela, gobane mmušo wa Modimo ke wa ba bjalo ka bona.” Ke moka, a diriša bana go ruta barutiwa thuto e bohlokwa, o itše: “Ruri ke re go lena, Mang le mang yo a sa amogelego mmušo wa Modimo go swana le ngwana yo monyenyane a ka se tsene go wona le gatee.”—Mar. 10:13-15.

14. Ke mehola efe yeo bana ba e hwetšago ge ba kgahlegelwa e le ka kgonthe?

¹⁴ Nagana kamoo ba bangwe ba bana bao ba bego ba tla ikwa ka gona nywaga e mentši ka morago ge e šetše e le banna le basadi gomme ba gopola kamoo Jesu Kriste ‘a ilego a ba gokarela gomme a ba šegofatša.’ (Mar. 10:16) Bana ba lehono le bona ba tla gopola bagolo ka lerato gotee le batho ba bangwe bao ba ba kgahlegelago e le ka kgonthe. Sa bohlokwa le go feta, bana bao ba newago tlhokomelo e bjalo ka phuthegong ba ithuta go tloga bjaneng gore moya wa Jehofa o bathong ba gagwe.

Bontšha Botho Lefaseng Leo le se Nago Botho

15. Ke ka baka la’ng re sa swanela go makatšwa ke batho ba sego botho lehono?

¹⁵ Batho ba bantši lehono ba nagana gore ga ba na nako ya go bontšha batho ba bangwe botho. Ka gona, batho ba Jehofa ka mehla ge ba le sekolong, mošomong, ba le leetong le ge ba le bodireding ba lebeletšana le moya wa lefase. Batho ba sego botho ba ka re nyamiša, eupša ga ba swanela go re makatša. Jehofa o ile a budulela Paulo go re lemoša e sa le pele gore bophelo ‘mehleng ye e thata ya bofelo’ bo tla dira gore Bakriste ba therešo ba lebeletšane le “baithati, . . . ba ba se nago maikwelo a borutho a tlhago.”—2 Tim. 3:1-3.

16. Re ka godiša bjang botho bjo bo swanago le bja Kriste ka phuthegong?

¹⁶ Ka lehlakoreng le lengwe, boemo ka phuthegong ya Bokriste bja therešo bo fapane le bja lefase le leo le se nago botho. Ka go ekiša Jesu, yo mongwe le yo mongwe wa rena a ka tlaleletša boemong bjoo bjo bobotse. Re ka dira seo bjang? Sa pele, ba bantši ka phuthegong ba nyaka go thušwa le go kgothatšwa ka gobane ba na le mathata a tša maphelo goba maemo a mangwe a thata. ‘Mehleng ye ya bofelo’ mathata a bjalo e ka ba a mantši, eupša ga se a mafsa. Mehleng ya Beibele, Bakriste ba be ba tlaišwa ke mathata a bjalo. Ka baka leo, ke mo go swanetšego gore Bakriste ba thušwe gona bjale go etša ge go be go swanetše gore ba thušwe nakong e fetilego. Ka mohlala, Paulo o ile a kgothaletša Bakriste gore ba ‘bolele ka mo go homotšago le meoya e nyamilego, ba thekge ba fokolago le go ba le bopelotelele go bohle.’ (1 Bathes. 5:14) Se se akaretša go diriša seka sa Kriste sa botho.

17, 18. Ke ditsela dife tše dingwe tšeo ka tšona re ka ekišago botho bja Jesu?

¹⁷ Bakriste ba na le boikarabelo bja ‘go amogela bana babo bona ka botho,’ go ba swara ka tsela yeo Jesu a bego a tla ba swara ka yona, go tshwenyega e le ka kgonthe ka bao re ilego ra ba tseba ka nywaga e mentši le ka bao re sa kago ra kopana le bona pele. (3 Joh. 5-8) Ka ge Jesu a ile a gata mogato wa pele wa go bontšha ba bangwe botho,  le rena re swanetše go dira bjalo, ka mehla re lapološe ba bangwe.—Jes. 32:2; Mat. 11:28-30.

¹⁸ Yo mongwe le yo mongwe wa rena a ka bontšha botho ka go direla ba bangwe mediro yeo e bontšhago gore o tshwenyega ka bona. Tsoma ditsela tšeo ka tšona o ka direlago ba bangwe botse le go bula dibaka tša go dira bjalo. Kgahlegela ba bangwe! Paulo o eleditše ka gore: “Leratong la borwarre e-bang le maikwelo a borutho a bonolo go yo mongwe le yo mongwe. Go bontšhaneng kgodišo, etelelang pele.” (Baroma 12:10) Seo se ra gore re latele mohlala wa Kriste, re sware ba bangwe ka borutho le ka botho gomme re ithute go bontšha “lerato le le se nago boikaketši.” (2 Bakor. 6:6) Paulo o hlalositše lerato leo le swanago le la Kriste ka tsela ye: “Lerato le na le bopelotelele e bile le botho. Lerato ga le hufege, ga le ikgantšhe, ga le ikgogomoše.” (1 Bakor. 13:4) Go e na le gore re bolokele bana babo rena le dikgaetšedi dikgopi, re ka latela keletšo e rego: “E-bang ba botho yo mongwe go yo mongwe, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.”—Baef. 4:32.

19. Ke meputso efe yeo e tlišwago ke go bontšha botho bja go swana le bja Kriste?

¹⁹ Go katanela ga rena ka mehla go hlagolela le go bontšha botho bja go swana le bja Kriste maemong ka moka go re tlišetša meputso e mentši. Moya wa Jehofa o tla kgona go šoma ka bolokologi ka phuthegong gomme wa tšweletša seenywa se sebotse sa moya. Go tlaleletša moo, ge re latela mohlala woo Jesu a re beetšego wona e bile re thuša ba bangwe go dira se se swanago, borapedi bja rena bjo bo thabišago le bjo bo nago le botee bo tla thabiša Modimo. Ka gona, ka mehla a re kataneleng go bontšha boleta le botho bja Jesu ge re dirišana le ba bangwe.

Na o ka Hlalosa?

• Jesu o ile a bontšha bjang gore ‘ke wa moya o boleta le wa pelo e ikokobeditšego’?

• Jesu o ile a bontšha botho bjang?

• Ke ditsela dife tše dingwe tšeo ka tšona re ka bontšhago bonolo le botho bja go swana le bja Kriste lefaseng le leo le sa phethagalago?

[Dipotšišo tša Thuto]

[Seswantšho go letlakala 8]

Ge tumelo ya ngwanabo rena e fokola, go etša ge go bile bjalo ka ya Petro, na re tla mo thuša?

[Seswantšho go letlakala 10]

O ka thuša bjang go dira gore phuthego e be lefelo le šireletšegilego leo le nago le botho?