Ia Tumau iā te Outou le Mafaufau o Keriso
Ia Tumau iā te Outou le Mafaufau o Keriso
‘Ia iā te outou le mafaufau lava lea e tasi sa iā Keriso Iesu.’—ROMA 15:5.
1. Aiseā e ao ai ona iā i tatou le mafaufau e pei o Keriso?
NA FETALAI Iesu e faapea, ‘Ia outou ō mai iā te aʻu, ia outou faaaʻoaʻo mai iā te aʻu, auā o aʻu o lē e agamalu ma lotomaulalo, ona outou mālōlō ai lea.’ (Mata. 11:28, 29) Ua faaalia manino mai i lenei valaaulia māfana le uiga alofa o Iesu. O ia o le faaaʻoaʻoga sili e mulimuli ai. E ui lava o ia o le Alo malosi o le Atua, na ia faaalia le tigāalofa ma le faapelepele, aemaise lava i ē e manaʻomia le fesoasoani.
2. O ā vala o uiga o Iesu o le a tatou iloiloina?
2 I lenei mataupu ma isi mataupu e lua o loo sosoo mai, o le a iloiloina ai le auala e tatou te atiaʻe ma faatumauina ai le mafaufau e pei o Iesu, ma faaatagia atu ai le “manatu o Keriso” i o tatou olaga. (1 Kori. 2:16) O le a tatou uaʻi atu i vala e lima: o le agamalu ma le lotomaulalo o Iesu, lona agalelei, lona usiusitai i le Atua, lona lototele, ma lona alofa e lē mavae.
Lesona mai le Agamalu o Keriso
3. (a) O le ā le lesona e faatatau i le lotomaulalo na aʻoaʻo e Iesu i ona soo? (e) O le ā na faia e Iesu ina ua ia vaaia ni vaivaiga o ona soo?
3 Na lotomalie Iesu, le Alo lelei atoatoa o le Atua, e afio mai i le lalolagi e auauna i tagata lē lelei atoatoa ma agasala. O nisi o i latou na mulimuli ane fasiotia o ia. Ae sa tumau pea ona olioli ma onosai Iesu. (1 Pete. 2:21-23) O le “vaavaai totoʻa” i le faaaʻoaʻoga a Iesu, e fesoasoani ai iā i tatou e olioli pea ma onosai e ui i masei ma vaivaiga o isi. (Epe. 12:2) Na valaaulia e Iesu ona soo e ‘amo lana avega’ ma aʻoaʻo mai iā te ia. (Mata. 11:29) O ā ni lesona o le a latou aʻoaʻoina ai? O se tasi o lesona, o le agamalu ma le onosai o Iesu e ui i vaivaiga o ona soo. I le pō a o leʻi maliu Iesu, na ia mulumuluina vae o ona soo ma aʻoaʻo atu ai se lesona i le “lotomaulalo” lea e lē galo iā i latou. (Faitau le Ioane 13:14-17.) I se taimi mulimuli ane ina ua lē “mataala” Peteru, Iakopo ma Ioane, na malamalama lelei Iesu i le mea e gata ai lo latou malosi. Na ia fesili atu e faapea, “Simona, ua e moe?” “Ia faaauau ona outou mataala ma tatalo, ina neʻi outou lolo atu i faaosoosoga. Ua naunau i ai le agaga a ua vaivai le tino.”—Mare. 14:32-38.
4, 5. E faapefea ona fesoasoani le faaaʻoaʻoga a Iesu iā i tatou pe a tatou feagai ma masei o isi?
4 O le ā e tatou te faia pe a faatautavā se uso talitonu, e maitaita, pe tuai foʻi ona faatatau fautuaga mai i toeaina po o le “pologa faamaoni ma le faautauta”? (Mata. 24:45-47) E ui e tatou te iloa o vaivaiga o se mea masani i le lalolagi a Satani, ae ua sili ona faigatā le feagai ai ma le lē lelei atoatoa o o tatou uso. Pe a vave ona tatou lē fiafia i masei o isi, e ao ona tatou fesili ifo e faapea, ‘E faapefea ona ou faaalia atili le “manatu o Keriso”?’ Ia manatua e leʻi ita Iesu i ona soo, e oo lava i taimi na latou vaivai ai faaleagaga.
5 Seʻi manatu foʻi i le aposetolo o Peteru. Ina ua valaau atu Iesu iā te ia e oso ese mai le vaa ae savali mai i luga o le vai, sa faia faapea e Peteru mo sina taimi. Ona tepa atu lea o Peteru i le matagi ma amata ai loa ona goto. Pe na ita Iesu ma faapea atu: “Uā la! E iloa ai lava lou faatamala”? E leai! “Ona faaloaloa atu loa lea e Iesu o lona aao, ua taofi iā te ia ma faapea atu: ‘Aiseā ua e masalosalo ai? Ua matuā laʻitiiti tele lou faatuatua?’” (Mata. 14:28-31) Pe a vaivai le faatuatua o se uso, pe mafai ona tatou aapa atu e pei ona faia e Iesu ma fesoasoani ina ia toe faamalosia lona faatuatua? Na manino mai lenā lesona i le mea na faia ma le agamalu e Iesu iā Peteru.
6. O le ā sa fetalai atu ai Iesu i ona aposetolo e faatatau i le fia sili?
6 Sa aafia foʻi Peteru i le finauga faifai pea i le va o aposetolo po o ai e sili. Sa mananaʻo Iakopo ma Ioane e nofo le isi i le itu taumatau o Iesu i lona Malo, a o le isi i lona itu tauagavale. Ina ua faalogo i ai Peteru ma isi aposetolo, sa feita i latou. Na silafia e Iesu atonu na latou maua lenei uiga ona o le siʻomaga na ola aʻe ai. Na ia valaau i latou e ō mai iā te ia ma faapea atu: “Tou te iloa e pulepuletutū taʻitaʻi o malo i tagata, ma e pule foʻi tagata aloaʻia iā i latou. Ae e lē faapena outou; o sē e fia sili iā te outou e tatau ona avea o ia ma a outou auauna, ma o sē e fia muamua iā te outou, e tatau ona avea o ia ma a outou pologa.” Ona taʻu atu lea e Iesu o lana faaaʻoaʻoga: “Auā e leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.”—Mata. 20:20-28.
7. E faapefea ona tatou saosaolaumea i le autasi o le faapotopotoga?
7 O le manatunatu i le lotomaulalo o Iesu, o le a fesoasoani ai ina ia ‘fai i tatou ma tagata faatauvaa’ i o tatou uso. (Luka 9:46-48) O le faia faapea, e maua ai le autasi. E pei Ieova o le tamā o se aiga toʻatele, o lona finagalo ia “nonofo faatasi” ma le autasi lana fanau. (Sala. 133:1) Na tatalo Iesu i lona Tamā ia autasi Kerisiano moni uma ‘ina ia iloa ai e le lalolagi na ia auina mai o ia, ma ua ia alofa iā i latou e pei ona ia alofa mai iā te ia.’ (Ioa. 17:23) O le a mātauina i tatou o soo o Keriso ona o lo tatou autasi. Ina ia maua lenā autasi, e tatau ona iā i tatou le vaaiga a Keriso i vaivaiga o isi. Sa loto faamagalo Iesu, ma na ia aʻoaʻo e faapea, e faamagaloina i tatou pe a tatou faamagaloina isi.—Faitau le Mataio 6:14, 15.
8. O le ā e tatou te aʻoaʻoina mai i le faaaʻoaʻoga a ē ua autausagā ona auauna i le Atua?
8 E tele mea e tatou te aʻoaʻoina mai le faaaʻoaʻo i le faatuatua o ē ua autausagā o faaaʻoaʻo iā Keriso. I le pei o Iesu, e masani ona latou malamalama i vaivaiga o isi. Ua aʻoaʻoina i latou o le faaalia o le agaalofa e pei o Keriso, e lē gata e mafai ai ona latou “tauave vaivaiga o ē e lē malolosi” ae e maua ai foʻi le autasi. E lē gata i lea, e faalaeiauina ai le faapotopotoga atoa ia mafaufau e pei o Keriso. E latou te mananaʻo e faia e o latou uso, e pei ona manaʻo le aposetolo o Paulo e faia e Kerisiano i Roma, i lona faapea atu: “Ia foaʻi atu iā te outou e le Atua o lē ua tatou tumau ma aumaia ai faamāfanafanaga, le mafaufau lava lea e tasi sa iā Keriso Iesu, ina ia outou faamamaluina faatasi ma le leo e tasi le Atua, o le Tamā lea o lo tatou Alii o Iesu Keriso.” (Roma 15:1, 5, 6) Ioe, e viia Ieova pe a tatou tapuaʻi atu iā te ia ma le autasi.
9. Aiseā e tatou te manaʻomia ai le agaga paia ina ia mulimuli ai i le faaaʻoaʻoga a Iesu?
9 I le fetalaiga a Iesu, e iai le sootaga o le “lotomaulalo” ma le agamalu, o se vala lea o le fua o le agaga paia o le Atua. O lea la, e tatou te manaʻomia le agaga paia o Ieova, faapea ma le suʻesuʻeina o faaaʻoaʻoga a Iesu, ina ia tatou faaaʻoaʻo lelei iā te ia. E ao ona tatou tatalo mo le agaga paia o le Atua ma taumafai e atiaʻe vala o le fua o le agaga paia—“o le alofa, olioli, filemu, faapalepale, agalelei, mataalofa, faatuatua, agamalu, ma le amio pulea.” (Kala. 5:22, 23) O le mulimuli la i le faaaʻoaʻoga o le lotomaulalo ma le agamalu o Iesu, o le a tatou faafiafia ai lo tatou Tamā o i le lagi o Ieova.
Na Agalelei Iesu i Isi
10. Na faapefea ona faaalia e Iesu le agalelei?
10 O le agalelei o se vala o le fua o le agaga paia. Sa faaalia pea e Iesu le agalelei i isi. Na “talileleia” e Iesu i latou uma na ō atu iā te ia. (Faitau le Luka 9:11.) O le ā se lesona e tatou te aʻoaʻoina mai le agalelei sa faaalia e Iesu? O le tagata agalelei, e faaleuō, māfana, tigāalofa, ma e agaalofa. O uiga na sa faaalia e Iesu. Na ia lagona le tigāalofa i tagata “auā ua pei i latou o mamoe ua faamanuʻalia ma faileagaina, ua leai so latou leoleo mamoe.”—Mata. 9:35, 36.
11, 12. (a) Faamatala mai se mea na faia e Iesu ona o lona alofa. (e) O le ā e te aʻoaʻoina mai ai?
11 Na gaoioi foʻi Iesu ona o lona tigāalofa ma le agaalofa i isi. Seʻi mafaufau i se mea na tupu. E 12 tausaga o mafatia se fafine i le maʻi puna toto. Sa ia iloa, i le Tulafono a Mose, sa avea lona maʻi ma mea e lē mamā ai o ia faapea ma isi e paʻi atu iā te ia. (Levi. 15:25-27) Peitaʻi, ona o uiga ma le auala na feagai ai Iesu ma tagata, na talitonu ai le fafine e mafai e Iesu ona faamālōlōina o ia, ma o le a ia faia faapea. Na iā te ia pea le manatu: “A tau lava o loʻu paʻi atu i lona ofu, ona ou toe malosi ai lea.” Na ia maua le lototele ma faia faapea, ma na ia lagona ai loa ua faamālōlōina o ia.
12 Na silafia e Iesu na paʻi atu se tagata iā te ia, ma ia faliu ane e vaai po o ai. Atonu sa fefe le fafine neʻi otegia o ia ona o le solia o le Tulafono, ma na ia faapaʻū i luma o Iesu ma taʻu atu le mea atoa na tupu. Pe na otegia e Iesu si nei fafine mafatia? E leai! Na ia faapea atu ma le alofa, “Loʻu afafine e, ua e malosi ona o lou faatuatua. Alu ia ma le filemu.” (Mare. 5:25-34) E mautinoa sa faamāfanafanaina o ia ina ua ia faalogo i na upu!
13. (a) Na faapefea ona ese uiga o Iesu mai le ʻau Faresaio? (e) Na faapefea ona feagai Iesu ma tamaiti?
13 E lē pei Keriso o le ʻau Faresaio lotomaaa, auā e na te leʻi faaaogā lana pule e faamamafa ai avega a isi. (Mata. 23:4) Nai lo lenā, na ia aʻoaʻo ma le agalelei ma le onosai tagata i ala o Ieova. Sa avea o ia o se uō māfana i ona soo, sa alofa ma agalelei pea, ma o ia o se uō moni. (Faata. 17:17; Ioa. 15:11-15) E oo lava i tamaiti, na faigofie ona latou faalatalata atu iā Iesu, ma na ia māfana atu iā i latou. E leʻi avea lona pisi tele ma mea e taofia ai o ia mai le mafuta faatasi ma tamaiti. I se tasi taimi, o lo latou lagona fia tāua e pei o taʻitaʻi lotu, na taofia ai e soo o Iesu le aumai o fanau iti a tagata ina ia paʻi atu Iesu iā i latou. Sa lē fiafia Iesu i le mea na faia e ona soo. Na ia faapea atu iā i latou: “Tuu ai pea tamaiti e ō mai iā te aʻu, ae aua le taofia i latou. Auā ua fai le malo o le Atua ma tofi o ē e pei o nei tamaiti.” Ona ia faaaogā lea o se tamaitiiti e avatu ai se lesona iā i latou i le faapea atu: “E moni ou te fai atu iā te outou, O sē na te lē taliaina le malo o le Atua e pei o se tamaitiiti, e lē ulu atu lava i ai o ia.”—Mare. 10:13-15.
14. O ā aogā e maua e fanau pe a faaalia le naunau moni iā i latou?
14 Seʻi manatu i lagona na iai i na tamaiti i tausaga mulimuli ane ina ua matutua, na latou manatua na ‘fusi i latou e Iesu Keriso ma faamanuia iā i latou.’ (Mare. 10:16) O le a lē galo i fanau i lenei vaitaimi mea lelei o loo faia e toeaina ma isi, ona o le naunau moni iā i latou. O le mea e sili atu ona tāua, o le a iloa e fanau i le faapotopotoga o loo faaalia i ai le naunau moni mai lava a o laiti, o loo iai le agaga o Ieova i ona tagata.
Ia Faaalia le Agalelei i se Lalolagi Lē Alofa
15. Aiseā e lē o se mea e faateʻia ai le leai o se agalelei i aso nei?
15 E toʻatele tagata i lenei vaitau ua latou lagona e maʻimau le taimi e agalelei ai i isi. O lea la, e feagai pea tagata o Ieova ma le agaga o le lalolagi i aso uma, i aʻoga, i galuega, i femalagaaʻiga, ma le talaʻiga. Atonu e tatou te lē fiafia i uiga lē alofa o tagata, ae e lē o se mea e faateʻia ai. Na faagaeeina e Ieova Paulo e lapataʻi mai i le faigatā o le olaga i nei “aso e gata ai,” ma o le a feagai ai Kerisiano moni ma “ē e alolofa iā i latou lava, . . . e lē lotoaiga.”—2 Timo. 3:1-3.
16. O le ā la tatou vaega e fai ina ia faaalia ai le agalelei e pei o Keriso i le faapotopotoga?
16 I le isi itu, e maua le faafouina i le faapotopotoga Kerisiano moni, e ese ai mai lenei lalolagi lē alofa. I le faaaʻoaʻo iā Iesu, e mafai e i tatou uma ona saosaolaumea i lenā siʻomaga lelei. O le ā le auala e faia ai faapea? E toʻatele tagata i le faapotopotoga o loo manaʻomia le fesoasoani ma faalaeiauga ona o loo maua i maʻi ma isi tulaga faigatā. I nei “aso e gata ai,” ua faatupulaʻia faafitauli, ae e lē faapea ai e fou. I vaitaimi o le Tusi Paia, sa aafia foʻi Kerisiano i faafitauli faapena. O lea la, e aogā gaoioiga alofa i aso nei, e pei foʻi ona aogā i na Kerisiano. O se faaaʻoaʻoga, na timaʻi atu Paulo i Kerisiano “ia faamāfanafana i ē mafatia, ia fesoasoani i ē vaivai, ma ia faapalepale i tagata uma lava.” (1 Tesa. 5:14) O lona uiga ia faatino le agalelei e pei ona faia e Keriso.
17, 18. O ā ni auala e tatou te faaaʻoaʻo ai i le agalelei o Iesu?
17 Ua iai i Kerisiano le matafaioi ia talileleia o latou uso, ma feagai ma i latou e pei ona faia e Iesu, e ala i le faaalia o le naunau moni i ē ua tele tausaga o tatou masani, faapea ma ē e tatou te leʻi feiloaʻi muamua i ai. (3 Ioa. 5-8) Sa tausolomua Iesu i le faaalia o le agalelei i isi, ma e tatau foʻi ona tatou faia faapea ina ia faalaeiau ai pea isi.—Isa. 32:2; Mata. 11:28-30.
18 E mafai e i tatou uma ona faaalia le agalelei i isi e ala i le naunau mo lo latou lelei. Ia vaavaai ni auala ma ni avanoa e faia ai faapea. Ia fesoasoani i so o se isi! Ua timaʻi mai Paulo e faapea: “Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.” (Roma 12:10) O lona uiga ia mulimuli i le faaaʻoaʻoga a Iesu, ia feagai ma isi i se auala māfana ma agalelei, ma ia faaalia le “alofa e lē faatagāfai.” (2 Kori. 6:6) Na faamatala e Paulo le alofa e pei o Keriso e faapea: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina.” (1 Kori. 13:4) Nai lo le teuloto o masei o o tatou uso ma tuafafine, ia tatou utagia le timaʻiga lenei: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.”—Efe. 4:32.
19. O ā iʻuga lelei e maua ona o le faaalia o le agalelei e pei o Keriso?
19 E anoanoaʻi faamanuiaga tatou te maua pe a taumafai e atiaʻe ma faaalia le agalelei o Keriso i taimi uma, ma i so o se tulaga. O le a matuā galue ai le agaga o Ieova i le faapotopotoga, ma fesoasoani i tagata uma e atiaʻe le fua o le agaga. E lē gata i lea, pe a tatou mulimuli i le faaaʻoaʻoga a Iesu ma fesoasoani i isi e faia faapea, o le a olioli ai le Atua i la tatou tapuaʻiga e faia ma le fiafia ma le autasi. O lea la, seʻi o tatou finafinau pea e faaalia le agamalu ma le agalelei o Iesu, i a tatou feutagaʻiga ma isi.
Pe Mafai Ona E Faamatala?
• Na faapefea ona faaalia e Iesu o ia o lē e “agamalu ma lotomaulalo”?
• Na faapefea ona faaalia e Iesu le agalelei?
• O ā ni auala e tatou te faaalia ai le agamalu ma le agalelei e pei o Keriso, i lenei lalolagi lē alofa?
[Fesili mo le Suʻesuʻega]
[Ata i le itulau 8]
Pe a vaivai le faatuatua o se uso e pei ona tupu iā Peteru, pe tatou te fesoasoani atu iā te ia?
[Ata i le itulau 10]
O le ā lau vaega e fai ina ia avea ai le faapotopotoga ma siʻomaga e iai le agalelei?