Tan abi a srefi denki di Krestes ben abi
Tan abi a srefi denki di Krestes ben abi
„Abi a srefi denki di Krestes Yesus ben abi.”—ROM. 15:5.
1. Fu san ede wi musu pruberi fu kon abi a denki fu Krestes?
„UN KON na mi,” na so Yesus Krestes ben taki. A ben taki moro fara: „Leri fu mi, bika mi abi safri-ati nanga sakafasi, èn unu sa kisi krakti baka” (Mat. 11:28, 29). A switi kari disi e sori krin taki Yesus abi a bun fu wi na prakseri. Nowan libisma ben o man de wan moro bun eksempre leki en. Aladi Yesus ben de a makti Manpikin fu Gado, toku a ben e firi gi sma èn a ben sori switifasi gi den, spesrutu gi den wan di ben de na nowtu.
2. Na sortu sani wi sa poti prakseri?
2 Na ini na artikel disi èn na ini den tu trawan di e kon, wi sa luku fa wi kan kon abi a srefi denki leki Yesus. Wi sa luku tu fa wi kan sori taki wi e „denki soleki fa Krestes e denki” (1 Kor. 2:16). Wi sa poti prakseri na feifi sani. Wan fu den na a safri-ati nanga a sakafasi fu Yesus. Wi sa taki fu a switifasi di a ben e sori gi trawan, fu a fasi fa a ben e gi yesi na Gado, fu a deki-ati di a ben e sori, èn fu a trutru lobi di a ben abi.
Leri fu abi safri-ati neleki Yesus
3. (a) San na wán fasi fa Yesus sori den disipel fu en taki den ben musu abi sakafasi? (b) San Yesus du di a si den swakifasi fu den disipel fu en?
3 Yesus, a Manpikin fu Gado di ben de sondro sondu, ben de klariklari fu kon na grontapu fu kon dini na mindri sondu libisma. Sonwan fu den sma dati ben o kiri en bakaten. Ma toku Yesus noiti no ben e lasi en prisiri, èn a ben e dwengi ensrefi (1 Petr. 2:21-23). Te wi e „poti ala wi prakseri” na a eksempre fu Yesus, dan dati kan yepi wi fu no lasi wi prisiri èn fu dwengi wisrefi te wi e kisi fu du nanga den fowtu èn nanga den swakifasi fu trawan (Hebr. 12:2). Yesus ben gi den disipel fu en a kari fu teki a tyatyari fu en na den tapu, so taki den kan leri fu en (Mat. 11:29). San den ben kan leri? We, Yesus ben abi safri-ati, èn aladi den disipel fu en ben abi fowtu, toku a ben abi pasensi nanga den. A neti bifo Yesus dede, a wasi den futu, èn na so a leri den fu abi „sakafasi”. Noiti den ben o frigiti a sani dati di a ben leri den. (Leisi Yohanes 13:14-17.) Bakaten, di Petrus, Yakobus, nanga Yohanes no ben „tan na ai”, dan a no atibron nanga den, fu di den ben du a sani dati. A aksi: „Simon, yu e sribi?” A ben taigi den tu: „Un tan na ai èn begi, so taki unu no kisi tesi. A tru taki a yeye wani, ma a skin swaki.”—Mark. 14:32-38.
4, 5. Fa na eksempre fu Yesus kan yepi wi fu handri na a yoisti fasi nanga wi Kresten brada nanga sisa te den e du sani di wi no lobi?
4 Son leisi, a kan taki wan Kresten brada noso sisa fu wi lobi strei nanga trawan. Kande a e atibron esi-esi, noso kande a no de klariklari fu teki rai fu den owruman, noso fu „a getrow èn koni srafu”(Mat. 24:45-47). Fa wi feni a sani dati? Kande wi no e si en leki wan problema te sma na ini a grontapu fu Satan abi den swakifasi dati. Ma te den Kresten brada nanga sisa fu wi abi den fasi dati, dan a kan muilek gi wi fu gi den pardon. Efu a no makriki gi wi fu abi pasensi nanga den swakifasi fu trawan, dan wi musu aksi wisrefi a sani disi: ’San mi musu du ete fu kon „denki soleki fa Krestes e denki”?’ Pruberi fu hori na prakseri taki aladi den disipel fu Yesus ben abi swakifasi, toku a no ben e atibron nanga den.
5 Luku a tori fu na apostel Petrus. Di Yesus taigi Petrus fu komoto na ini a boto èn fu waka na tapu a watra kon na en, dan Petrus waka na tapu a watra trutru fu wan pisi ten. Ma di Petrus poti prakseri na a bigi winti, dan a bigin sungu. A de so taki Yesus atibron na en tapu? A ben taigi en: „Kisi yu moi! Nanga dati yu no sa tweifri moro”? Nôno! Bijbel e taki: „Wantewante Yesus langa en anu, grabu en hori, èn a taki: ’Yu no e bribi nofo. Fu san ede yu bigin tweifri?’” (Mat. 14:28-31) San wi o du te wi e kisi fu du nanga wan Kresten brada noso sisa di abi wan swaki bribi? Wi ben o langa wi anu gi en na wan agersi fasi, fu yepi en fu kon abi moro bribi? Na dati wi e leri te wi e luku fa Yesus handri na wan safri-ati fasi nanga Petrus.
6. Di den apostel fu Yesus ben e suku biginen, dan san Yesus leri den?
6 Den apostel ben e tan meki trobi nanga makandra sortuwan fu den ben de a moro bigiwan, èn Petrus ben de wan fu den. Yohanes nanga Yakobus ben de na ini a tori tu. Wán fu den ben wani sidon na a reti-anusei fu Yesus te a ben de na ini a Kownukondre fu en, èn a trawan ben wani sidon na a kruktu-anusei fu en. Di Petrus nanga den tra apostel kon yere a tori, dan den atibron. Yesus ben sabi taki na a libimakandra pe den ben kweki, ben meki taki den ben abi den fasi dati. A kari den kon na en, èn a taki: „Unu sabi taki den tiriman fu den grontapusma, e basi den èn den bigiman abi makti na den tapu. A no de so nanga unu, ma efu wan sma wani de wan bigiwan na un mindri, dan a musu de un dinari; efu wan sma wani de a fosiwan na un mindri, dan a musu de un srafu.” Baka dati, Yesus poti prakseri na en eigi eksempre, èn a taki: „Na so a Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma.”—Mat. 20:20-28.
7. Fa ibriwan fu wi kan yepi fu meki taki wánfasi de na ini a gemeente?
7 Te wi e poti prakseri na a sakafasi di Yesus ben abi, dan dati kan yepi wi fu ’tyari wisrefi leki a moro lagiwan’ na mindri wi Kresten brada nanga sisa (Luk. 9:46-48). Te wi e du dati, dan wánfasi sa de na wi mindri. Yehovah de leki wan papa fu wan bigi osofamiri, èn a wani taki den pikin fu en „e libi nanga makandra na ini wánfasi” (Ps. 133:1). Yesus ben begi en Papa gi ala tru Kresten, èn a taki: „Mi de wán nanga den èn yu de wán nanga mi, so taki den kan tron wán na wan volmaakti fasi, fu grontapu kan kon sabi taki na yu seni mi kon èn taki yu lobi den neleki fa yu lobi mi” (Yoh. 17:23). Sobun, te wi de na ini wánfasi, dan sma sa man si taki wi na bakaman fu Krestes. Fu man de na ini a wánfasi dati, dan wi musu si den swakifasi fu trawan soleki fa Krestes ben e si den swakifasi fu sma. Yesus ben de klariklari fu gi den disipel fu en pardon, èn a leri den taki den sa kisi pardon soso te den e gi trawan pardon.—Leisi Mateyus 6:14, 15.
8. San wi kan leri fu den wan di e anbegi Gado langa ten kaba?
8 Wi kan leri furu tu te wi e sori a srefi bribi leki den sma di e teki na eksempre fu Krestes furu yari langa kaba. Neleki Yesus, den sma disi no e atibron esi-esi te trawan e meki fowtu. Den leri taki te den e sori safri-ati neleki Krestes, dan dati e yepi den fu „tyari den swakifasi fu den wan di no de so tranga”, èn a e meki tu taki wánfasi de na ini a gemeente. Boiti dati, te sma abi den fasi disi, dan dati e gi a heri gemeente deki-ati fu denki soleki fa Krestes e denki. Den Kresten di teki na eksempre fu Yesus, e suku a bun fu den Kresten brada nanga sisa fu den, neleki fa na apostel Paulus ben e suku a bun fu den Kresten na ini Rome. Paulus ben taki: „Meki a de so, taki Gado di e meki wi horidoro èn di e gi wi trowstu, yepi unu fu abi a srefi denki di Krestes Yesus ben abi, so taki unu kan gi a Gado èn Tata fu wi Masra Yesus Krestes glori leki wán man èn nanga wán mofo” (Rom. 15:1, 5, 6). Iya, te wi e anbegi Yehovah na ini wánfasi, dan a e kisi glori.
9. Fu san ede wi abi santa yeye fanowdu fu man teki na eksempre fu Yesus?
9 Yesus ben sori taki wan sma di abi „sakafasi” na wan sma di abi safri-ati, èn dati na wan fu den froktu fu Gado en santa yeye. Dati meki te wi e ondrosuku na eksempre fu Yesus, dan wi abi a santa yeye fu Yehovah fanowdu tu, so taki wi kan du sani soifri soleki fa Yesus ben du sani. Wi musu begi Gado fu gi wi a santa yeye fu en, èn wi musu meki muiti fu kweki den froktu fu a yeye dati. Den froktu dati na „lobi, prisiri, vrede, langa pasensi, bun-ati, bunfasi, bribi, safri-ati, èn dwengi yusrefi” (Gal. 5:22, 23). Te wi e sori sakafasi nanga safri-ati neleki fa Yesus ben e du dati, dan wi hemel Tata, Yehovah, sa prisiri nanga wi.
Yesus ben e sori switifasi gi sma
10. Fa Yesus sori switifasi gi trawan?
10 Switifasi na wan tra pisi fu a froktu fu Gado en santa yeye. Yesus ala ten ben e sori switifasi gi trawan. Ala sma di ben wani abi demakandra nanga Yesus, ondrofeni taki „nanga prisiri a ben meki sma kon na en”. (Leisi Lukas 9:11.) San wi kan leri fu a switifasi di Yesus ben sori? Wan sma di abi switifasi e handri bun nanga trawan, a e sori safri-ati gi den, èn a e firi gi den. Yesus ben abi den fasi dati tu. A ben e firi gi trawan ’bika sma ben e pina den èn den ben e waka bruyabruya leki skapu di no abi skapuman’.—Mat. 9:35, 36.
11, 12. (a) Fruteri fu wan okasi pe Yesus sori taki a ben e firi gi wan sma. (b) San yu kan leri fu na eksempre disi?
11 Te Yesus ben abi sari-ati gi sma èn te a ben e firi gi sma, dan a ben e meki muiti fu yepi den sma dati. Twarfu yari langa, wan uma ben e lasi brudu. Na uma disi ben sabi taki a no ben krin fu anbegi Gado, soleki fa a Wet di Gado ben gi Moses ben e sori. Boiti dati, iniwan sma di ben fasi en, no ben krin tu fu teki prati na a anbegi (Lef. 15:25-27). Ma a ben sabi taki Yesus ben abi bunfasi èn taki a ben e handri na wan switi fasi nanga sma. A musu de so taki na a sani dati gi en na overtoigi taki Yesus ben o man dresi en èn taki a ben o wani dresi en trutru. A ben e tan taigi ensrefi: „Efu mi man fasi en dyakti nomo, dan mi o kon betre.” Na uma teki deki-ati èn a fasi Yesus. Wantewante a firi taki a ben kon betre.
12 Yesus ben firi taki wan sma ben fasi en, èn a drai luku suma na en. Na uma ben e frede èn a ben e beifi fu di a ben e denki taki Yesus ben o bari en fu di a ben pasa a Wet. A trowe ensrefi na Yesus futu èn a fruteri en ala sani. A de so taki Yesus bari a pôti uma disi di ben e pina? Kwetikweti! A taigi en: „Mi umapikin, na a bribi fu yu meki yu kon betre. Meki sani waka bun gi yu” (Mark. 5:25-34). A ben musu fu de wan trowstu gi na uma fu yere fa Yesus ben taki so switi nanga en!
13. (a) Fa Yesus ben de heri tra fasi leki den Fariseiman? (b) Fa Yesus ben e handri nanga pikin-nengre?
13 Tra fasi leki den Fariseiman di no ben e firi gi trawan, Krestes noiti no gebroiki a makti fu en fu poti moro hebi tapu trawan (Mat. 23:4). Ma Yesus ben abi switifasi nanga pasensi te a ben e leri sma fu kon sabi Yehovah. Ala ten Yesus ben e firi gi den disipel fu en, èn a ben e sori lobi nanga switifasi gi den doronomo. Iya, a ben de wan trutru mati fu den (Odo 17:17; Yoh. 15:11-15). Srefi pikin-nengre ben lobi fu de makandra nanga Yesus, èn soleki fa a sori, dan Yesus ben lobi en tu fu de makandra nanga den. A no ben abi trobi fu tapu nanga wan sani di a ben e du, soso fu abi demakandra nanga pikin-nengre. Wan leisi, den disipel fu en pruberi fu tapu sma fu tyari den pikin fu den go na Yesus, so taki a ben kan fasi den. Den disipel disi ben de nanga a denki ete taki den ben prenspari moro trawan. Yesus no ben feni a sani disi bun. A taigi den: „Meki den pikin-nengre kon na mi; no pruberi fu tapu den fu kon na mi, bika den sma di de leki den pikin disi sa kisi a kownukondre fu Gado.” Baka dati, a gebroiki den pikin fu leri den disipel fu en wan prenspari sani. A taigi den: „Fu tru, mi e taigi unu: Efu wan sma no e teki a kownukondre fu Gado leki wan yongu pikin, dan a no sa go na ini a kownukondre kwetikweti.”—Mark. 10:13-15.
14. Sortu wini pikin-nengre e kisi te sma e sori lobi gi den?
14 Prakseri fa sonwan fu den pikin dati ben o firi furu yari baka dati, te den ben tron man nanga uma. Den ben o memre taki Yesus Krestes ’ben brasa den hori èn blesi den’ (Mark. 10:16). Pikin-nengre na ini a ten disi e kisi wini te owruman nanga trawan e sori lobi gi den. Te den pikin disi kon bigi, dan den sa abi moi prakseri tu te den e memre den sma dati. San moro prenspari, na taki te sma na ini a gemeente e sori lobi frukufruku kaba gi yongu pikin, dan den pikin disi e leri taki Yehovah en santa yeye de tapu a pipel fu en.
Sori switifasi gi trawan na ini wan grontapu pe sma no e sori switifasi
15. Fu san ede a no musu fruwondru wi taki furu sma na ini a ten disi no e sori switifasi gi trawan?
15 Furu sma na ini a ten disi feni taki den no abi ten fu sori switifasi gi trawan. Dati meki ibri dei te den futuboi fu Yehovah de na skoro, na den wrokope, te den e go na tra kondre, noso te den de na ini a preikiwroko, dan den e kisi fu du nanga a yeye fu grontapu. Kande wi e sari te sma no e handri bun nanga wi, ma a sani dati no musu fruwondru wi. Yehovah ben meki Paulus warskow wi taki na ini „den lasti dei” disi di tranga fu pasa, tru Kresten ben o kisi fu du nanga sma di ’lobi densrefi nomo èn di no abi lobi gi trawan’.—2 Tim. 3:1-3.
16. Fa wi kan yepi fu sorgu taki a gemeente na wan presi pe sma e sori switifasi gi makandra?
16 Ma den sma na ini a tru Kresten gemeente e tyari densrefi heri tra fasi leki den sma na ini na grontapu disi pe sma no e sori switifasi gi trawan. Te wi e teki na eksempre fu Yesus, dan ibriwan fu wi kan yepi fu sorgu taki a gemeente e tan wan presi pe sma e sori switifasi gi makandra. Fa wi kan du dati? Fu eksempre, furu sma na ini a gemeente abi wi yepi nanga deki-ati fanowdu, fu di den siki, noso fu di den abi tra problema. Na ini den „lasti dei” disi, a kan taki moro nanga moro sma e kon abi den problema disi, ma den problema disi a no nyunwan. Na ini Bijbel ten, Kresten ben abi den srefi sortu problema disi. Dati meki a fiti fu yepi wi Kresten brada nanga sisa na ini a ten disi, neleki fa a ben fiti taki den Kresten na ini Bijbel ten ben e yepi makandra. Paulus, fu eksempre, ben gi Kresten a rai fu „taki na wan fasi di e trowstu den sma di lasi-ati, fu yepi den swakiwan, èn fu abi langa pasensi nanga ala sma” (1 Tes. 5:14). Fu man du dati, dan wi sa musu sori switifasi gi trawan neleki Krestes.
17, 18. San na wan tu fasi fa wi kan sori switifasi neleki fa Yesus ben du dati?
17 Kresten abi a frantwortu fu ’gi den brada nanga sisa fu den wan switikon’. Iya, den musu handri nanga den neleki fa Yesus ben o handri nanga den. Dati meki wi e poti trutru prakseri na den wan di wi sabi furu yari langa kaba, èn na den wan di wi no ben miti ete (3 Yoh. 5-8). Neleki fa Yesus ben e poti prakseri na trawan, na so wi musu de wan deki-ati gi trawan ala ten.—Yes. 32:2; Mat. 11:28-30.
18 Ibriwan fu wi kan du wan sani fu sori trawan taki wi e broko wi ede nanga den, èn taki wi e frustan fa den e firi. Prakseri fa yu kan yepi den, èn suku okasi fu du dati tu. Meki muiti fu yepi trawan! Paulus ben gi wi a rai disi: „Neleki fa brada lobi makandra, na so un musu abi dipi firi gi makandra.” A ben taki tu: „Unu fosi musu bigin sori trawan lespeki” (Rom. 12:10). Dati wani taki dati wi musu teki na eksempre fu Krestes. Iya, wi musu handri na wan switi fasi nanga trawan, èn wi musu leri fu „lobi sma sondro fu hoigri” (2 Kor. 6:6). Luku san Paulus ben taki fu a lobi dati di Kresten musu abi gi trawan: „Lobi abi langa pasensi èn a abi switifasi. Lobi no e dyarusu, a no e meki bigi, èn a no abi bigimemre” (1 Kor. 13:4). Na presi taki wi e atibron nanga wi Kresten brada nanga sisa, a moro bun fu teki a rai disi: „Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes.”—Ef. 4:32.
19. Sortu bun bakapisi wi sa kisi te wi e sori switifasi neleki fa Krestes ben e du dati?
19 Te wi e tan meki muiti fu sori switifasi ala ten èn na ini ibri situwâsi, dan dati sa tyari furu blesi kon gi wi. A yeye fu Yehovah sa man wroko fri na ini a gemeente, èn a sa yepi ala sma fu sori den froktu fu a yeye. Boiti dati, te wi e teki na eksempre di Yesus gi wi, èn te wi e yepi trawan fu du a srefi, dan wi sa anbegi Gado nanga prisiri èn na ini wánfasi, èn Gado srefi sa prisiri. Fu dati ede, wi musu tan du muiti fu sori safri-ati nanga switifasi gi trawan, neleki fa Yesus ben e du dati.
Yu kan tyari disi kon na krin?
• Fa Yesus ben sori taki a ben abi ’safri-ati èn taki ben abi sakafasi’?
• Fa Yesus ben sori switifasi gi trawan?
• San na wan tu fasi fa wi kan sori safri-ati nanga switifasi na ini a sondu grontapu disi?
[Aksi fu a tori disi]
[Prenki na tapu bladzijde 8]
Te wan Kresten brada noso sisa en bribi kon swaki, neleki fa dati ben pasa nanga Petrus, dan wi sa langa wi anu fu yepi en?
[Prenki na tapu bladzijde 10]
Fa yu kan yepi fu sorgu taki a gemeente e tan wan presi pe sma e sori switifasi?