Jechuk jnopbentik kʼuchaʼal snopben Cristoe
Jechuk jnopbentik kʼuchaʼal snopben Cristoe
«Jechuc xanopic jech cʼu chaʼal laj snop ti Cristoe.» (FILI. 2:5, Ch)
1. ¿Kʼu yuʼun skʼan jechuk jnopbentik kʼuchaʼal Jesuse?
«LAʼIC ta jtojol», xi li Jesucristoe. «Chanic cʼu xʼelan coʼnton yuʼun toj lec coʼnton, biqʼuit cacʼoj jba. Me jech chapasique, jech cux xi avoʼntonic.» (Mat. 11:28, 29.) Li lekil takel ta ikʼel taje jaʼ chakʼ ta ilel ti lek tajek yoʼonton ta stojolal krixchanoetik echʼ li Jesuse. Stuk noʼox jech ti toj lek ta chanbel stalelale. Akʼo mi jaʼ xNichʼon Dios, oy sjuʼel xchiʼuk tsots yabtel li Jesuse, laj yakʼ ta ilel xkʼuxul yoʼonton xchiʼuk toj lek xa noʼox yoʼonton echʼ, mas to jech la spas ta stojolal li buchʼutik mas skʼanik kʼuxubinele.
2. ¿Kʼusi stalelaltak Jesús ta jchantik li ta oxib xchanobile?
2 Li ta xchanobil liʼe xchiʼuk li chib chtale te ta jchantik kʼuxi ta chanbel li snopben Cristoe xchiʼuk kʼuxi xuʼ jtatik li kʼusi xi tsbiiltas Vivliae: «Sjol yoʼnton li Cristoe» (1 Cor. 2:16). Voʼtos ta jchanbetik stalelal li Jesuse: ti manxo stalelale xchiʼuk ti bikʼit chakʼ sbae, ti oy slekil yoʼontone, ti jchʼunej mantale, ti tsots yoʼontone xchiʼuk ti chkʼanvan ta melele.
Jchanbetik xmanxoal li Cristoe
3. 1) ¿Kʼusi la spas jun velta Jesús sventa chakʼbe xchan yajtsʼaklomtak ti skʼan bikʼit xakʼ sbaike? 2) ¿Kʼu yelan laj yil Jesús li spaltail yajtsʼaklomtake?
3 Akʼo mi jaʼ xNichʼon Dios li Jesuse xchiʼuk ti tukʼe, ta sjunul yoʼonton tal ta Balumil sventa tal nakiuk xchiʼuk jpas mulil krixchanoetik, junantik taje jaʼ milvanik. Pe muʼyuk bu sten sba ta at-oʼonton xchiʼuk muʼyuk bu ti mu xa snaʼ kʼusi tspase (1 Ped. 2:21-23). Mi jaʼ te chkakʼ batel jsatik ta stojolal li Jesuse xchiʼuk ti lek tukʼ ta jchanbetik batel li stalelale, jaʼ me jech tstsʼikbe kuʼuntik spaltail li yantike (Heb. 12:2). Li Jesuse laj yalbe yajtsʼaklomtak ti jaʼ akʼo xkuchik li ikatsil yuʼune, laje laj yal ti akʼo xchanbeik kʼuyelan yoʼontone (Mat. 11:29). Ep kʼusitik xuʼ xchanbeik Jchanubtasvanej yuʼunik li yajtsʼaklomtake, jlome jaʼ li xmanxoale xchiʼuk ti kʼuyelan oy smalael yuʼun kʼalal oy kʼusi muʼyuk lek tspasike. Kʼalal jun xaʼox akʼobal skʼan xchame la spokbe yok li yajtsʼaklomtak sventa xakʼbe xchan ti skʼan «biqʼuit» xakʼ sbaike. ¡Mi jaʼuk bu xchʼay ta sjolik ti kʼuyelan laj yichʼik chanubtasele! (Kʼelo Juan 13:14-17.) Kʼalal muʼyuk xkuch yuʼunik vayel li Pedro, Santiago xchiʼuk Juane, muʼyuk bu x-ilin li Jesuse. Xi la sjakʼe: «Simón, ¿me vayemot?». Laje xi laj yalbe yoxvoʼalike: «Mu me xavayic; cʼopanic Dios, yuʼun jech mu xachʼunic sujel ta mulil». Ta skoj ti xaʼibe smelolal ti jaʼ ta skoj ti jpas muliletik ti vayike, xi albatike: «Li avoʼntonique tscʼan tscʼopan Dios, pero li abecʼtalique muʼyuc stsatsal» (Mar. 14:32-38).
4, 5. ¿Kʼuxi chakʼ kiltik li stalelal Jesús ti akʼo stsʼikbe kuʼuntik li spaltail yantike?
4 ¿Kʼusi ta jpastik kʼalal oy ta yoʼonton tsalbail junuk kermanotike, ti anil ch-iline o ti vokol ta chʼamel chaʼi li tojobtasel chakʼ moletik xchiʼuk li «jʼabtel ti jun [«tukʼ», NM] yoʼnton [...], ti lec bije»? (Mat. 24:45-47.) Nopem xkaʼitik ta kʼelel ti jaʼ jech stalelal li krixchanoetik ta balumile, ti jaʼ tspasik li kʼusi tskʼan bekʼete; pe taje muʼyuk jnopojtik ti jechuk stalelal li kermanotaktike. Mi chkakʼtik venta ti ta anil chi j-ilin yuʼun li spaltailike, skʼan xi jakʼbe jbatike: «¿Kʼusi skʼan jpas sventa xkakʼ ta ilel lek li “sjol yoʼnton li Cristoe”?». Jvules ta joltik ti muʼyuk ti mu xa snaʼ kʼusi tspas Jesús ta skoj li spaltail yajtakboltake.
5 Jkʼeltik kʼusi kʼot ta pasel ta stojolal li jtakbol Pedroe. Kʼalal yakal chanav ta ba nab li Jesuse xchiʼuk ti laj yalbe Pedro ti akʼo xyal li ta kanova sventa chtal nupatuk ta bee, xanav onoʼox ta ba nab ta melel li Pedroe. Pe kʼalal laj yil ti kʼuyelan li ikʼe ixiʼ, vaʼun lik ochuk yalel li ta nabe. ¿Mi ilin Jesús ta stojolal li Pedroe? ¿Mi xi van laj yalbee: «Jaʼ cha kʼan. Jaʼ to xa chan-o jech maʼ leʼe»? Mu jechuk laj yalbe, xi chal li Vivliae: «Ta ora la stsacbe scʼob li Pedroe. Jech laj yalbe: “¡Muʼyuc to lec xchʼunojel avoʼnton! ¿Cʼu yuʼun chloʼilaj avoʼnton?”» (Mat. 14:28-31). Mi oy junuk kermanotik ti yakal chchʼay xchʼunel yoʼonton chkiltike, jtsakbetik skʼob xkaltik ek xchiʼuk jtsatsubtasbetik yoʼonton. Jaʼ me jech ta jchanbetik stalelal Jesús ti kʼuyelan manxo laj yakʼ sba ta ilel ta stojolal Pedroe.
6. ¿Kʼusi laj yakʼbe xchan yajtsʼaklomtak Jesús ta sventa ti buchʼu tskʼan tajek mukʼ skʼoplale?
6 Li Pedro xtoke te kapal ti kʼalal nopajtik noʼox laj yut sbaik jtakboletik ta skoj ti tskʼan tsnaʼik buchʼu mas mukʼ skʼoplal yuʼunike. Jun veltae, li Santiago xchiʼuk Juane la skʼanbeik Jesús ti akʼo xchotiik ta sbatsʼikʼob xchiʼuk ta stsʼetkʼob li ta Ajvalilal yuʼun Diose, vaʼun ilin-o li Pedro xchiʼuk li yantik jtakboletike. Ta skoj ti jech oy ta yoʼontonik tsalbaile jaʼ van te la xchanik ti kʼuyelan li krixchanoetik ti bu chʼiik tale, taje snaʼoj onoʼox Jesús. Jech oxal la stak ta ikʼel xchiʼuk xi laj yalanbee: «Xanaʼic cʼu xʼelan tspasic li ajvaliletic yuʼun yantic lume. Jaʼ noʼox ta smozoinvanic. Jech noxtoc li bochʼotic yichʼoj tsots yabtelique jaʼ noʼox tsots tspasvanic ta mantal. Mu me jechuc xapasic li voʼoxuque. Li bochʼo tscʼan ichʼbil ta mucʼ avuʼunique, acʼo spas sba ta avajtunelic. Li bochʼo tscʼan mucʼ chcʼot avuʼunique, acʼo comuc ta avajtunelic». Laje laj yalbe sba skʼoplal stuk: «Ti Xnichʼon cristiano licʼote, mu yuʼunuc tal mozoinvancun; tal cacʼ jba ta tunel ta atojolic. Xchiʼuc tal jpoj loqʼuel ep cristianoetic sventa mu xbatic ta chʼayel» (Mat. 20:20-28).
7. ¿Kʼuxi xuʼ jkolta jbatik sventa jmojuk oyutik li ta tsobobbaile?
7 Mi ta jnoptik ti kʼuyelan bikʼit laj yakʼ sba Jesuse, mas me mu tsotsuk chkaʼitik ti «biqʼuit ta [xkakʼ jbatike]» (Luc. 9:46-48). Mi jech ta jpastike, mas me jmoj oyutik. Jaʼ jech kʼuchaʼal jun totil ti ep xnichʼnabe, li Jeovae tskʼan ti lekuk xil sbaik li xnichʼnabtake xchiʼuk ti «coʼol coʼntontic» xi jkuxiutike (Sal. 133:1). Li Jesuse la skʼanbe sTot ti junuk noʼox oyikuk li yajtsʼaklomtake. ¿Kʼu yuʼun? Xi laj yale: «Jech ta snaʼic o scotol cristianoetic ta banamil ti voʼot laj atacun tale, xchiʼuc ti lec acʼanoj li bochʼotic jun cʼotemun jchiʼuque jech chac cʼu chaʼal lec acʼanojun li vuʼune» (Juan 17:23). Jaʼ jech, li kʼusi ta xichʼik-o ojtikinel li melel yajtsʼaklomtak Cristoe jaʼ ti jmoj noʼox oyike. Akʼo mi jech, sventa jmojuk oyutike skʼan jechuk jtalelaltik kʼuchaʼal Jesús ti stsʼik kuʼuntik li spaltail yantike. Li stuke lek snaʼ xakʼ perton xchiʼuk laj yal ti chakʼbutik perton Jeova mi chi j-akʼvan ta perton eke (kʼelo Mateo 6:14, 15).
8. ¿Kʼusi xuʼ jchanbetik li ermanoetik ti voʼne xa tajek chtunik ta stojolal Jeovae?
8 Jech xtok xuʼ ep kʼusi jchantik ta stojolal li ermanoetik ti voʼne xa tajek yakal chchanbeik stalelal li Jesuse xchiʼuk ti tspasik persa stsʼikbel spaltail li yantike. Ti kʼalal oy slekil yoʼontonike yakʼojik venta ti maʼuk noʼox chkoltavan ti «jtsʼictic cʼu xʼelanic ec li bochʼotic muʼyuc to stsatsal yoʼntonique», moʼoj, yuʼun jaʼ chkoltavan sventa jmoj oyutik xchiʼuk tstijbe yoʼonton sjunul tsobobbail ti akʼo jechuk snopik kʼuchaʼal Jesuse. Li kʼusi tskʼanik ta stojolal yermanoike, jaʼ jech ta skʼanik kʼuchaʼal la skʼan li Pablo ta stojolal li yermanotak ta Roma ti xi laj yale: «Li Dios ti chijyacʼbutic smucʼul coʼntontic, ti chispatbutic coʼntontique, acʼo yacʼ ti coʼol avoʼntonic acotolic jech chac cʼu chaʼal tscʼan li Cajvaltic Jesuse. Yuʼun jech jun noʼox chacʼot ta acotolic; jun noʼox acʼopic chavalbeic slequilal li Diose, jaʼ li Stot Cajvaltic Jesucristoe» (Rom. 15:1, 5, 6). Jaʼ jech, ta jkʼupil kʼoptatik Jeova kʼalal jmoj chkichʼtik ta mukʼe.
9. ¿Kʼu yuʼun chtun kuʼuntik chʼul espiritu sventa jechuk jtalelaltik kʼuchaʼal Jesuse?
9 Li Jesuse laj yal ti «biqʼuit [yakʼoj sbae]» xchiʼuk ti muʼyuk bu tstoy sbae, ti chʼabal toybail taje jaʼ jtos yabtel ti xchʼul espiritu Diose. Jaʼ yuʼun chaʼa, chtun kuʼuntik li chʼul espiritu sventa jchanbetik lek stalelal li Jesuse; maʼuk noʼox skʼan ta jkʼelbetik skʼoplal li stalelale. Jkʼanbetik Jeova li xchʼul espiritue xchiʼuk kakʼtik persa ti jchʼiestik ta jkuxlejaltik li yabtele: «Ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc [xchiʼuk] jnaʼtic spajesel jbatic» (Gál. 5:22, 23). Mi ta jchanbetik ti bikʼit chakʼ sbae xchiʼuk ti muʼyuk ta jtoy jbatik kʼuchaʼal la spas Jesuse, lek me chilutik li jTotik ta vinajele.
Oy slekil yoʼonton ta stojolal krixchanoetik li Jesuse
10. ¿Kʼuxi laj yakʼ ta ilel slekil yoʼonton li Jesuse?
10 Jtos yabtel li chʼul espiritu xtoke jaʼ li slekil oʼontonale. Li Jesuse skotol onoʼox velta oy slekil yoʼonton ta stojolal li krixchanoetike. Jech, li krixchanoetik ti tskʼan chnopajik ta stojolale «ichʼbil cʼotic ta mucʼ yuʼun ti Jesuse» (kʼelo Lucas 9:11, Ch). ¡Toj echʼ xa noʼox ep kʼusi xuʼ jchantik ta stojolal! Li krixchano ti lek yoʼontone lek xkʼopoj, oy xkʼuxul yoʼonton xchiʼuk xlokʼ noʼox ta yoʼonton yakʼel kʼusitik. Taje jaʼ jech echʼ li Jesuse. Kʼuxubaj ta yoʼonton li krixchanoetike yuʼun «tanpuquic jech chac cʼu chaʼal chijetic ti muʼyuc xchabiele» (Mat. 9:35, 36).
11, 12. 1) Albo skʼoplal ti bu laj yakʼ ta ilel xkʼuxul yoʼonton li Jesuse. 2) ¿Kʼusi xuʼ jchanbetik Jesús li ta parafoetik liʼe?
11 Pe li Jesuse maʼuk noʼox kʼuxubaj ta yoʼonton li krixchanoetike; yuʼun ep kʼusitik la spas sventa tskoltaanan. Jkʼelbetik skʼoplal jun ants ti oy xa ta lajcheb jabil chil svokol ta tuchʼpatijele. Li ants taje snaʼoj ti kʼuchaʼal chal li sMantal Moisese, chopol chkom ta skoj ti jech ipe, jaʼ jech ch-ikʼub ek mi oy buchʼu tsta ta tijel li antse (Lev. 15:25-27). Pe li kʼusi yaʼioj ta stojolal Jesuse xchiʼuk ti kʼuyelan snaʼ stsak ta venta li krixchanoetike jaʼ la spat-o yoʼonton ti chpoxtaate. Xi la snope: «Acʼo me jaʼ noʼox ta jpicbe li scʼuʼe, xuʼ chicol o». La spas ta tsots yoʼonton, nopaj batel ta stojolal, la spikbe skʼuʼ vaʼun ta anil noʼox laj yaʼi ti poxtaj xae.
12 Li Jesuse laj yakʼ venta ti oy buchʼu pikbat skʼuʼe, vaʼun la skʼel ta spat-xokon buchʼu ti jech la spase. Ta skoj ti chiʼ mi ch-ilin ta stojolal ta skoj ti muʼyuk la stsak ta venta sMantal Moisés li antse, chnik ta xiʼel la skejan sba ta stojolal li Jesuse xchiʼuk jamal laj yalbe li kʼusi la spase. ¿Mi ute van yuʼun li Jesuse? Moʼoj; xi patbat yoʼontone: «Tseb, lacol xa ta sventa xchʼunojel avoʼnton. Jaʼ yuʼun junuc avoʼnton batan» (Mar. 5:25-34). ¡Xkuxet tajek yoʼonton laj yaʼi li ants ta skoj ti kʼusi lek laj yichʼ albele!
13. 1) ¿Kʼuxi mu xkoʼolaj stalelal ta jnitvanejetik ta relijion li Jesuse? 2) ¿Kʼu yelan laj yil ololetik li Jesuse?
13 Li Jesuse mu jechuk kʼuchaʼal fariseoetik ti tsots tspasvanik ta mantale, akʼo mi akʼbil yabtel yuʼun Dios muʼyuk laj yakʼbe xkuch «alal icatsil» li krixchanoetike (Mat. 23:4). Moʼoj, yuʼun ti kʼusie ta xkʼuxul yoʼonton xchiʼuk oy smalael yuʼun ti kʼuyelan la xchanubtas li krixchanoetik ta smantal Jeovae. Jaʼ jun lekil amigoil laj yilik ta melel Jesús li yajtsʼaklomtake, jaʼ jun krixchano ti lek snaʼ xkʼopoj laj yilike (Pro. 17:17; Juan 15:11-15). Kʼalal ta ololetik lek tajek chaʼiik ta xchiʼinel ta loʼil li Jesuse, jaʼ jech laj yaʼi li Jesús eke. Muʼyuk maʼ ti mu xa xokob ta xchiʼinel ta loʼile. Jun veltae, jaʼ xa jech la spas stalelalik kʼuchaʼal li jtoyba jnitvanejetik ta relijion li yajtsʼaklomtak Jesuse, yuʼun la smakik ta be li totil-meʼiletik sventa mu xa xikʼik tal ta stojolal Jesús li yalab xnichʼnabik sventa ch-akʼbatik bendisione. Pe li stuke muʼyuk lek laj yil, jaʼ yuʼun xi laj yalbee: «Acʼo talicuc ta jtojol li ololetique; mu me xapajesic. Yuʼun li bochʼotic jaʼ jechic jech chac cʼu chaʼal ololetique jaʼ chventainatic yuʼun Dios». Vaʼun la stunes ololetik sventa chchanubtas li yajtsʼaklomtake: «Melel li cʼusi chacalboxuque, li bochʼo mu scʼan ventainel yuʼun Dios jech chac cʼu chaʼal ololetique, mu xuʼ ta xʼoch yoʼ bu tspas mantal [li] Dios[e]» (Mar. 10:13-15).
14. ¿Kʼuxi tstabeik sbalil ololetik kʼalal chkʼuxubinatik ta tsobobbaile?
14 Nopo xa noʼox avaʼi kʼuyelan laj yaʼi sbaik ta tsʼakal li ololetik ti kʼalal sta xaʼox svaʼlejike, kʼalal chvul ta sjolik ti petatik yuʼun Jesuse xchiʼuk ti akʼbatik bendisione (Mar. 10:16). Jaʼ jech li avie, li ololetik ta steklumal Diose chichʼik chabiel yuʼun li moletike xchiʼuk li yan ermanoetik ta tsobobbaile, chakʼik ta ilel ti oy ta yoʼontonike, jaʼ yuʼun kʼalal mi chʼiike xkuxet noʼox me yoʼonton tsvules ta sjolik taje. Li kʼusi mas tsots skʼoplale: jaʼ ti ta sbikʼtal onoʼox chchanik ti te oy xchʼul espiritu Jeova li ta steklumale.
Oyuk me slekil koʼontontik ta jun chopol balumil
15. ¿Kʼu yuʼun mu labaluk chkiltik ti ep krixchanoetik muʼyuk slekil yoʼontonike?
15 Li krixchanoetik avie, mu noʼox xokob chaʼiik ta yakʼel ta ilel slekil yoʼontonik ta stojolal li krixchanoetike, jaʼ yuʼun toj echʼem chkiltik jujun kʼakʼal ti jaʼ noʼox tskʼan sba stukike: chkiltik ta chanob vun, ta abtelal, ta kaye xchiʼuk ta chol mantal. Akʼo mi chopol chkaʼitik ti vaʼ yelane, muʼyuk me bu labal xa chkaʼitik. Jech kʼuchaʼal akʼbat snaʼ yuʼun Dios li Pabloe, li ta «slajebal cʼacʼale» chil svokolik li melel yajtsʼaklomtak Cristoe, yuʼun «jaʼ noʼox tspasic cʼusi tscʼan stuquic» li krixchanoetik ti «muʼyuc slequil yoʼntonic, muʼyuc xcʼuxul yoʼntoni[ke]» (2 Tim. 3:1-3).
16. ¿Kʼusitik xuʼ jpastik ta tsobobbail sventa xkakʼtik ta ilel li slekil koʼontontike?
16 ¡Toj jelel ta jyalel ti kʼuyelan chil sbaik li buchʼutik oyik ta stsobobbail yajtsʼaklom Cristoe! Jkotoltik ti ta jchanbetik stalelal li Jesuse ta me jkolta jbatik ti akʼo jechuk-o xkil jbatike. ¿Kʼuxi? Veno, ta jkoltatik xchiʼuk ta jpatbetik yoʼonton li epal ermanoetik ti chil svokolik ta chamel xchiʼuk ti tsnuptanik yan vokoliletike. Akʼo mi yantik stsatsaj batel li vokoliletik li ta «slajebal cʼacʼale», taje mu me achʼuk to. Jech xa onoʼox laj yil svokolik ta voʼne li yajtsʼaklomtak Cristoe. Jech oxal, toj tsots skʼoplal ti skolta sbaik ta slekil yoʼontonike. Xi laj yalbe mantal yermanotak li Pabloe: «Tsatsubtasbeic me yoʼnton li bochʼotic muʼyuc stsatsal yoʼntonique. Coltaic me li bochʼotic aluben noʼox chaʼyique. Mu me xʼechʼ avoʼntonic; talbat xacolta abaic» (1 Tes. 5:14). Jaʼ jech skʼan jpastik li avi eke: skʼan xkakʼtik ta ilel li slekil koʼontontike.
17, 18. ¿Kʼuxi xuʼ jechuk slekil koʼontontik kʼuchaʼal Jesuse?
17 «Ichʼbil cʼotic ta mucʼ» yuʼun Jesús li buchʼutik tstsʼakliike, taje jaʼ me jech skʼan jpastik ta stojolal li kermanotaktik eke. Skʼan me jech jtsaktik ta mukʼ kʼuchaʼal tsakvan ta mukʼ li Jesuse. Skʼan me xkakʼ ta koʼontontik ta melel skotol li ermanoetike: li buchʼutik voʼne xa xkojtikintike xchiʼuk li buchʼutik jaʼ to laj kojtikintike (3 Juan 5-8). Lokʼ ta yoʼonton chkoltavan stuk li Jesuse, ta xkʼuxul yoʼonton la skolta li krixchanoetike. Jchanbetik stalelal xchiʼuk jpatbetik yoʼonton li buchʼutik xkojtikintike (Isa. 32:2; Mat. 11:28-30).
18 Jtos ti kʼuxi xuʼ xkakʼtik ta ilel slekil koʼontontike jaʼ ti kʼalal oy kʼusi lek ta jpastik ta stojolal yantike. Pe taje maʼuk noʼox me skʼan jkʼeltik ti butik skʼan xkakʼtik ta ilel slekil koʼontontike, moʼoj, yuʼun skʼan xlokʼ ta koʼontontik ti xi jkoltavane. Xi laj yal li Pabloe: «Lecuc xavil abaic ta jujun tal ta sventa ti coʼol achiʼil abaique. Coʼoluc xavil abaic. Ichʼo abaic ta mucʼ ta jujun tal» (Rom. 12:10). ¿Kʼuxi xuʼ jpastik? Jaʼ ti kʼalal ta jchanbetik stalelal li Cristoe, ti chkakʼtik ta ilel slekil-xkʼuxul koʼontontik ta stojolal yantike xchiʼuk «ti ta melel» chi jkʼanvane (2 Cor. 6:6). Li Pabloe xi laj yalbe skʼoplal li buchʼu chkʼanvane: «Li bochʼo chcʼanvane oy smucʼul yoʼnton, lec yoʼnton, mu xtiʼetuc yoʼnton. Mu xacʼ sba ta ichʼel ta mucʼ ta sventa cʼusi xuʼ yuʼun; mu stoyilan sba» (1 Cor. 13:4). Mu me teuk-o ta koʼontontik li kʼusi tspasbutik kermanotaktike, jaʼ lek jchʼuntik li tojobtasel liʼe: «Lec xavil abaic, cʼux xavaʼay abaic ta jujuntal. Talbat xapasbeic abaic perdón jech chac cʼu chaʼal la spasboxuc perdón Dios ta sventa li Cristoe» (Efe. 4:32).
19. ¿Kʼusi sbalil ta jtatik kʼalal oy slekil koʼontontike?
19 Mi chvinaj ta jtalelaltik ti oy slekil koʼontontike xchiʼuk ti chi jkʼuxubinvane, ep me bendision ta jtatik. Kʼalal jech ta jpastike, lek me ch-abtej ta tsobobbail li chʼul espiritue, ta me xvinaj ti chchʼi li yabteltake. Mi ta jchanbetik stalelal li Jesuse xchiʼuk mi ta jkolta kermanotaktik ti akʼo jechuk spasik eke, xmuyubaj noʼox me xchiʼuk jun noʼox me oy li tsobobbaile, vaʼun jaʼ me jech xkuxet noʼox yoʼonton Jeova ta sventa li kabteltike. Jaʼ yuʼun chaʼa, jchanbetik-o me stalelal Jesús ti manxo xkakʼ jbatike xchiʼuk ti jechuk xkakʼtik ta ilel slekil koʼontontik ta stojolal li yantike.
¿Mi xuʼ xavalbe smelolal?
• Ti «toj lec coʼnton, biqʼuit cacʼoj jba», ti xie, ¿kʼuxi laj yakʼ ta ilel li Jesuse?
• ¿Kʼuxi laj yakʼ ta ilel slekil yoʼonton li Jesuse?
• ¿Kʼuxi chkakʼtik ta ilel jmanxoaltik xchiʼuk slekil koʼontontik li ta jun chopol balumil liʼe?
[Sjakʼobiltak sventa xchanobil]
[Lokʼol ta pajina 8]
Mi oy junuk kermanotik ti yakal chkʼunib xchʼunel yoʼonton chkiltik kʼuchaʼal kʼot ta stojolal li Pedroe, ¿mi ta jtsakbetik skʼob xkaltik ek?
[Lokʼol ta pajina 10]
¿Kʼusi skʼan xa pas sventa oyuk slekil oʼontonal li ta tsobobbaile?