Folem Fasin Blong Kraes—Obei Long God Mo No Fraet

“Yufala i no fraet. Mi mi winim paoa blong olgeta samting blong wol ya finis.”—JON 16:33.

1. ?Jisas i obei long God go kasem wanem mak?

OLTAEM Jisas Kraes i mekem samting we God i wantem. Neva Jisas i gat tingting blong no obei long Papa blong hem long heven. (Jon 4:34; Hib. 7:26) Be ol samting we oli hapen long hem long wol, oli mekem se i no isi blong hem i obei long God. Long olgeta yia we Jisas i prij long wol, ol enemi blong hem, we hemia Setan tu, oli traem blong jenisim tingting blong hem, fosem hem, mo trikim hem, blong i no moa stap tru long God. (Mat. 4:1-11; Luk 20:20-25) Ol enemi ya blong Jisas oli mekem hem i harem nogud tumas long tingting, filing, mo bodi blong hem. Oli go kasem mak ya we oli kilim hem i ded long pos. (Mat. 26:37, 38; Luk 22:44; Jon 19:1, 17, 18) Long olgeta trabol ya we i mekem Jisas i safa bitim mak, hem i “obei long God gogo i ded.”—Ridim Filipae 2:8.

2, 3. ?Yumi save lanem wanem long eksampol blong Jisas blong obei long God, nating se hem i safa?

² Trabol we Jisas i kasem taem hem i stap long wol, i tijim hem olsem wanem blong obei long God taem hem i fesem ol niufala samting we hem i neva bin fesem bifo. (Hib. 5:8) Hem i bin stap klosap long Jeova mo frengud wetem hem longlongtaem finis. Hem i ‘man we i mekem ol plan we Jeova i folem’ taem hem i wokem ol samting long heven mo wol. Taswe, maet i luk olsem we i no moa gat wan samting we Jisas i mas lanem long saed blong fasin ya blong mekem wok blong Jeova. (Prov. 8:30) Be taem hem i stanap strong wetem bilif blong winim ol trabol we i mekem hem i safa long wol, hem i soemaot se hem i holemstrong long God fulwan. Long taem ya, Jisas, Pikinini blong God, i kam klosap moa long Jeova. ?Yumi save lanem wanem long stori ya blong Jisas?

³ Nating se Jisas i stretgud olgeta, hem i no traem stanap long paoa blong hem wan nomo blong obei oltaem long God. Hem i prea long God blong i givhan long hem blong obei. (Ridim Hibrus 5:7.) Blong yumi save obei oltaem, yumi mas gat tingting daon mo prea oltaem blong Jeova i halpem yumi. From samting ya, aposol Pol i givim advaes long ol Kristin se: “Tingting blong yufala i mas kam stret gud wetem tingting we Jisas Kraes i gat.” Hem “i mekem tingting blong hem i stap daon blong i obei long God, gogo i ded.” (Fil. 2:5-8, NW) Eksampol blong Jisas i pruvum se ol man oli naf blong obei long God, nating se oli stap long wol ya we i fulap long rabis fasin. I tru, Jisas i stretgud olgeta, ?be olsem wanem long yumi we yumi no stretgud?

Obei Long God Nating Se Yumi Sinman

4. ?I minim wanem se God i letem yumi blong yumi jusum rod blong yumi?

⁴ God i wokem Adam mo Iv blong tufala i naf blong skelem ol samting, mo i letem tufala i jusum rod we tufala i wantem folem. Yumi kamaot biaen long tufala, ale God i letem yumi tu blong yumi jusum rod blong yumi. ?Samting ya i minim wanem? Hemia i min se yumi save jusum blong mekem samting we i gud no samting we i nogud. Yes, God i letem yumi blong yumi nomo i save jusum sipos yumi wantem obei long hem no nogat. Wan samting nomo, se bambae yumi kasem frut blong rod we yumi jusum. Yes, jus blong yumi bambae i givim laef no ded long yumi. Mo ol jus blong yumi oli gat paoa long ol famle mo fren blong yumi tu.

5. ?From wanem i no isi oltaem blong obei long God, mo yumi mas mekem wanem blong yumi save obei?

⁵ Yumi ol sinman, yumi no bon wetem fasin blong obei long God. I no isi oltaem blong obei long ol loa blong God. Pol tu i faenem i had. Hem i raetem se: “Mi luk we rabis fasin ya, we i stap wok long laef blong mi, hem i narafala. Hem i agens long Loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin, we i stap wok oltaem long tingting blong mi.” (Rom 7:23) I tru se taem  yumi no gat trabol mo evri samting i rongud, i isi moa blong obei long God. ?Be olsem wanem sipos ‘ol rabis samting we tingting blong yumi i wantem, mo ol samting we ae blong yumi i luk’ oli pulum yumi? Maet yumi wantem obei, be ol nogud samting ya oli pulum yumi from we yumi sinman, mo “spirit we i kamaot long wol” i gat paoa long yumi. Ol samting ya oli save pulum yumi strong. (1 Jon 2:16; 1 Kor. 2:12) Blong blokem olgeta, yumi mas ‘rerem hat blong yumi’ bifo we yumi fesem ol trabol mo bifo we wan nogud fasin i pulum yumi. Yumi mas mekem tingting blong yumi i strong se bambae yumi obei long Jeova nomata wanem samting i hapen. (Sam 78:8) Long Baebol, i gat plante eksampol blong olgeta we oli obei fulwan long Jeova from we oli rerem hat blong olgeta fastaem.—Esra 7:10, NW; Dan. 1:8.

6, 7. Eksplenem olsem wanem fasin blong stadi yu wan i save halpem yu blong mekem ol jus we oli waes.

⁶ Wan rod blong rerem hat blong yumi, hemia blong stadi gud long Baebol mo ol buk we oli eksplenem Baebol. Tingbaot samting we i save hapen long naet ya we yu stap stadi yu wan. Yu jes finisim prea blong yu blong askem Jeova blong givim tabu spirit blong hem, blong halpem yu blong mekem samting we yu lanem long Tok blong hem i wok long laef blong yu. Yu yu gat plan blong wajem wan muvi long televisin long nekis naet. Yu bin harem ripot blong ol man we oli jekem ol muvi se muvi ya i gud, be yu save se sam haf blong hem i soemaot nogud fasin long saed blong seks mo raf fasin.

⁷ Yu tingbaot advaes blong Pol long Efesas 5:3 se: “From we yufala i tabu, mo yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot.” Mo tu, yu tingbaot advaes blong Pol long Filipae 4:8. (Ridim.) Taem yu stap tingting dip long advaes ya we God i givim, yu stap askem se: ‘?Sipos mi wajem wan muvi we ol nogud fasin insaed long hem oli save gat paoa long hat mo tingting blong mi, mi rili stap folem eksampol blong Jisas blong obei gud long God?’ ?Ale, bambae yu mekem wanem? ?Bambae yu gohed nomo, yu wajem muvi ya?

8. ?From wanem yumi no mas kam slak blong folemgud tingting blong Jeova long saed blong ol gudfala fasin mo klin wosip?

⁸ Yumi no mas kam slak blong folemgud tingting blong Jeova long saed blong ol gudfala fasin mo klin wosip. I wan bigfala mastik blong ting se yumi strong, ale yumi naf blong blokem paoa blong ol rabis fren, hemia ol rabis fren long televisin tu we oli raf mo oli mekem rabis fasin. I moagud we yumi protektem yumi mo ol pikinini blong yumi long ol tingting blong Setan we oli save spolem yumi. Ol man oli lukaotgud blong blokem ol samting we i save givim rabis sik long olgeta ?Yu no ting se yumi mas traehad moa blong blokem ol “giaman trik” blong Setan?—Efes. 6:11.

9. ?From wanem yumi mas gat strong tingting evri dei blong obei long Jeova?

⁹ Klosap evri dei, yumi fesem wan samting we i mekem se yumi mas jusum sipos bambae yumi folem rod blong Jeova no nogat. Sipos yumi wantem we God i givim laef long yumi, yumi mas obei long hem mo folem ol stret rod blong hem. Sipos yumi folem eksampol blong Kraes we i obei long God “gogo i ded,” yumi soemaot se bilif blong yumi i no giaman. Bambae Jeova i givim pei long yumi sipos yumi stap tru long hem. Jisas i promes se: “Man we i stanap strong gogo olgeta samting ya i finis, bambae God i sevem hem.” (Mat. 24:13) Blong kasem blesing olsem, i klia se yumi mas wokem strong tingting olsem Jisas.—Sam 31:24.

Jisas—Nambawan Eksampol Blong Strong Tingting

10. ?Wanem ol trabol we yumi fesem, mo yumi mas mekem wanem?

¹⁰ Ol man raonabaot long yumi oli gat ol tingting mo fasin blong wol. Taswe yumi mas gat strong tingting, blong yumi save blokem ol fasin ya oli no kam spolem yumi. Ol Kristin oli fesem plante samting we oli save pulum olgeta blong mekem rabis fasin, joen long wok blong ol giaman skul mo ol nogud kastom, mo oli fesem ol problem long saed blong mane tu. Ol trabol ya oli save mekem se oli lego stret rod blong Jeova. Plante Kristin, famle blong olgeta i agensem olgeta. Long sam kantri, ol skul oli strong moa naoia blong tijim ol pikinini long saed blong evolusen. Plante moa man oli no bilif long God. Yumi no save satem ae blong yumi long ol nogud tingting mo fasin ya mo  mekem olsem se oli no stap. Yumi wanwan i mas tekem aksen blong blokem olgeta, mo long rod ya yumi protektem yumi. Jisas i soemaot olsem wanem yumi save mekem samting ya.

11. ?Sipos yumi tingting dip long eksampol blong Jisas, olsem wanem samting ya i save mekem tingting blong yumi i strong moa?

¹¹ Jisas i talem long ol disaepol blong hem se: “Long wol ya bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ya finis.” (Jon 16:33) Jisas i neva letem ol samting blong wol i gat paoa long hem. Hem i neva letem olgeta oli blokem hem blong i no moa prij, mo i no moa folem stret rod blong mekem trufala wosip mo ol gudfala fasin. Yumi tu, yumi no mas letem wol i mekem yumi kam slak long ol samting ya. Jisas i prea long saed blong ol disaepol blong hem, i se: “Mi mi no man blong wol ya, mo long sem fasin, olgeta tu oli no man blong wol ya.” (Jon 17:16) Sipos yumi stadi long strong tingting blong Kraes mo tingting dip long eksampol blong hem, samting ya i save mekem yumi strong moa blong stap longwe long ol fasin blong wol.

Lan Long Jisas—No Fraet

12-14. Talem sam samting we Jisas i mekem, we oli soemaot se hem i no fraet.

¹² Taem Jisas i stap prij, hem i soemaot se hem i no fraet nating. Hem i no fraet blong yusum paoa we hem i gat olsem Pikinini blong God, blong ‘go long haos blong God, mo ronemaot ol man we oli stap mekem maket long haos ya. Hem i kafsaedem ol tebol blong ol man we oli stap jenisim mane, mo ol jea blong olgeta we oli stap salem nawimba.’ (Mat. 21:12) Long laswan naet bifo we Jisas i ded, ol soldia oli kam blong holem hem, be Jisas i no fraet nating. Blong protektem ol disaepol blong hem, hem i wokbaot i go long ol soldia, mo i talem se: “Sipos yufala i stap lukaot mi, be i gud yufala i letem ol man ya blong mi oli gohom.” (Jon 18:8) Jes biaen long hemia, hem i talem long Pita blong putumbak naef blong faet long paos blong hem. Samting ya i soemaot se Jisas i no dipen long ol tul blong faet blong ol man, blong mekem se hem i no fraet, be hem i trastem Jeova nomo.—Jon 18:11.

¹³ Ol tija blong giaman skul long taem blong Jisas oli no lavem ol man, mo oli tijim ol man long ol giaman tijing. Jisas i no fraet blong talemaot ol nogud fasin blong olgeta. Hem i talem stret long olgeta se: “Ol tija blong Loa mo ol Farisi. Sore tumas long yufala. Yufala i gat tu fes. Yufala i stap mekem olsem we yufala i lokem doa long fes blong ol man we oli wantem kam we God i King blong olgeta . . . yufala i tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem. . . . I olsem we yufala i stap wasem afsaed blong plet, mo panikin blong yufala nomo, be insaed i doti. Yufala i fulap long ol fasin ya we yufala i man blong stil, mo yufala i stap tingbaot yufala nomo.” (Mat. 23:13, 23, 25) Ol disaepol blong Jisas tu oli nidim fasin ya blong no fraet, from we ol lida blong giaman skul oli mekem i nogud long olgeta mo oli kilim sam long olgeta i ded.—Mat. 23:34; 24:9.

¹⁴ Jisas i no fraet long ol rabis spirit tu. Wan man we rabis spirit i stap long hem i kam luk Jisas. Plante taem ol man oli traem fasem man ya long hankaf mo jen, be hem i brekem olgeta. Jisas i no fraet. Hem i girap i ronemaot ol rabis spirit we oli holemtaet man ya long paoa blong olgeta. (Mak 5:1-13) God i no givim paoa long ol Kristin tede blong mekem ol bigbigfala wok olsem. Be taem yumi prij long ol man mo tijim olgeta, yumi tu yumi faet agens long Setan, from we hem nao i ‘satem tingting blong ol man we oli no bilif, nao oli stap long tudak.’ (2 Kor. 4:4) Sem mak olsem Jisas, ‘ol samting we yumi stap yusum blong faet, oli no samting blong faet blong wol ya. Yumi stap yusum ol samting blong faet blong God, we oli naf blong brekemdaon ol giaman toktok we ol man oli stap talem blong blokem trutok.’ Hemia ol tijing blong giaman skul we oli stap strong long tingting blong ol man. (2 Kor. 10:4) Yumi save lanem plante samting long eksampol blong Jisas, long saed blong fasin blong yusum ol tul blong faet we God i givim.

15. ?From wanem Jisas i no fraet?

¹⁵ Jisas i no fraet nating, be hemia i no from we hem i wan strong man. Strong bilif nao i mekem se Jisas i no fraet. Yumi mas sem mak. (Mak 4:40) ?Olsem wanem yumi save gat bilif we i no giaman? Long saed ya, eksampol blong Jisas i save givhan long yumi bakegen. Hem i savegud Baebol mo i trastem ol tok blong Baebol fulwan. Hem i no faet wetem wan prapa naef blong faet, be hem i yusum  naef blong faet ya we tabu spirit i givim, hemia Tok blong God. Bakegen mo bakegen, hem i yusum ol vas blong Baebol blong sapotem ol tijing blong hem. Taem hem i stap tijim ol man, plante taem hem i yusum tok ya: “Baebol i talem se.” *

16. ?Olsem wanem yumi save gat moa bilif?

¹⁶ Blong wokem bilif we i save stanap strong agensem ol trabol we yumi ol disaepol blong Jisas i kasem, yumi mas ridim Baebol evri dei mo stadi long hem, yumi mas go long ol Kristin miting, mo yumi mas tingting oltaem long ol trutok we bilif blong yumi i stanap long olgeta. (Rom 10:17) Yumi mas tingting dip tu long samting we yumi lanem, blong mekem se i kasem hat blong yumi. Sipos yumi wantem se bilif i pusum yumi blong no fraet mo tekem aksen, bilif ya i mas laef. (Jem. 2:17) Mo tu, yumi mas prea from tabu spirit, from we bilif i frut blong spirit ya.—Gal. 5:22, NW.

17, 18. ?Olsem wanem wan yangfala Kristin sista i soemaot long skul se hem i no fraet?

¹⁷ Wan yangfala Kristin sista we nem blong hem Kitty, i luksave olsem wanem bilif we i no giaman i save winim fraet. Stat long taem we hem i smol nomo, hem i save se i no mas ‘sem long gud nius,’ mo hem i rili wantem givim wan gudfala witnes long ol fren blong hem long skul. (Rom 1:16) Evri yia, gel ya i mekemap tingting blong hem blong talemaot gud nius long ol narafala, be fraet i holem hem. Taem hem i kam bigwan moa, hem i go long wan narafala skul. Nao hem i talem se: “Naoia bambae mi givim witnes oltaem, blong kasembak olgeta janis ya we mi mi mestem finis.” Ale, Kitty i prea, i askem long Jeova blong givhan long hem blong i gat fasin olsem Kraes we i no fraet. Hem i askem tu se bambae hem i save ol stret tok blong talem, mo se bambae hem i kasem wan gudfala janis blong givim witnes.

¹⁸ Long faswan dei long skul, tija i askem ol studen wanwan blong talemaot se oli hu. Plante oli talemaot jos we oli gruap long hem, mo oli talem tu se oli no stap folemgud jos blong olgeta. Kitty i luksave se hemia janis ya we hem i bin prea from. Taem hem i toktok, hem i talem wetem strong tingting se: “Mi mi wan Witnes blong Jeova, mo mi trastem ol tok blong Baebol blong lidim mi long wosip blong mi mo long ol fasin blong laef.” Taem Kitty i gohed blong toktok, sam studen oli mekem fes blong olgeta i nogud blong soem se oli no laekem tok blong hem. Be sam narafala oli lesingud, mo biaen oli askem sam kwestin. Tija tu i talem se Kitty i givim gudfala eksampol, from we hem i no fraet blong tokbaot bilif blong hem. Kitty i glad tumas we hem i lanem blong no fraet olsem Jisas.

Folem Fasin Blong Kraes—Soemaot Bilif Mo No Fraet

19. (a) ?Strong bilif, hem i olsem wanem? (b) ?Olsem wanem yumi save mekem Jeova i glad tumas?

¹⁹ Ol aposol tu oli kasem save se sipos oli wantem gat fasin ya we oli no fraet blong tekem aksen, oli mas gat bilif. Oli askem strong long Jisas se: “Plis yu mekem bilif blong mifala i kam strong moa.” (Ridim Luk 17:5, 6.) Blong gat strong bilif, i no naf blong bilif nomo se God i stap. Man we i gat strong bilif, i lanem blong trastem Jeova mo  frengud wetem hem, olsem wan smol pikinini wetem papa blong hem we i kaen mo i lavem hem. Tabu spirit i pulum Solomon blong raetem se: “Pikinini blong mi, sipos yu kam waes, bambae mi mi glad we mi glad. Sipos mi harem we yu stap talem ol waestok, bambae mi mi glad tumas.” (Prov. 23:15, 16) Sem mak long yumi. Taem yumi no fraet blong stanap strong long stret fasin, Jeova i glad tumas. Taem yumi save se hem i glad, yumi kam strong moa blong no fraet. !From samting ya, i gud yumi folem eksampol blong Jisas oltaem, mo yumi no fraet blong stanap strong long stret fasin!

[Futnot]

?Yu Yu Save Eksplenem?

• ?Wanem bambae i givhan long yumi blong obei long God oltaem, nating se yumi sinman?

• ?Strong bilif i stanap long wanem, mo olsem wanem bilif olsem i save halpem yumi blong no fraet?

• ?Wanem bambae i kamaot sipos yumi gat fasin olsem Kraes, we i obei long God mo i no fraet?

[Kwestin]

[Tok blong pija long pej 17]

Yumi save gat fasin olsem Jisas, we hem i no fraet from we i hem i gat bilif