Magmasinugtanon ug Magmaisogon Sama ni Kristo

“Magmaisogon! Gidaog ko na ang kalibotan.”—JUAN 16:33.

1. Unsa ka bug-os ang pagkamasinugtanon ni Jesus sa Diyos?

 SI Jesu-Kristo kanunayng nagbuhat sa kabubut-on sa Diyos. Wala siya sukad maghunahuna sa pagsupak sa iyang langitnong Amahan. (Juan 4:34; Heb. 7:26) Apan tungod sa iyang kahimtang sa yuta, dili sayon alang kaniya nga magmasinugtanon. Sukad sa sinugdanan sa iyang ministeryo, ang mga kaaway ni Jesus, apil si Satanas, naningkamot sa pagkombinsir, pagpugos, o pagbitik kang Jesus aron mosupak siya sa Diyos. (Mat. 4:1-11; Luc. 20:20-25) Ang maong mga kaaway ni Jesus nagpahinabo kaniyag hilabihang kasakit sa hunahuna, emosyonal, ug pisikal. Sa kataposan, ilang gilansang siya sa sakitanang estaka. (Mat. 26:37, 38; Luc. 22:44; Juan 19:1, 17, 18) Latas niining tanan, ug bisan pa sa grabeng pag-antos, si Jesus “nagmasinugtanon hangtod sa kamatayon.”—Basaha ang Filipos 2:8.

2, 3. Unsay atong makat-onan sa pagkamasinugtanon ni Jesus bisan pa sa iyang pag-antos?

² Ang pagkinabuhi ni Jesus sa yuta nagtudlo kaniya kon sa unsang paagi magmasinugtanon ubos sa malisod nga mga kahimtang. (Heb. 5:8) Kon hunahunaon, daw nahibalo na si Jesus sa tanan bahin sa pag-alagad kang Jehova. Gani, magkauban sila ni Jehova sulod sa taas nga panahon ug siya mao ang “batid nga magbubuhat”  sa dihang gilalang sa Diyos ang mga butang. (Prov. 8:30) Bisan pa niana, ang iyang paglahutay diha sa pagtuo ubos sa pag-antos nagpamatuod sa iyang bug-os nga pagkamasinugtanon. Si Jesus, ang Anak sa Diyos, miuswag sa espirituwal. Unsay atong makat-onan sa iyang kasinatian?

³ Bisan tuod siya hingpit nga tawo, si Jesus wala magsalig sa iyang kaugalingon sa pagpabiling masinugtanon. Siya nag-ampo alang sa tabang sa Diyos aron padayong magmasinugtanon. (Basaha ang Hebreohanon 5:7.) Aron kita makapabiling masinugtanon, kinahanglan usab kitang magpaubos ug kanunayng mag-ampo alang sa tabang sa Diyos. Tungod niini, si apostol Pablo nagtambag sa mga Kristohanon: “Hupti kini nga tinamdan sa pangisip diha kaninyo nga diha usab kang Kristo Jesus,” kinsa “nagpaubos ug nagmasinugtanon hangtod sa kamatayon.” (Filip. 2:5-8) Nagpamatuod kana nga ang mga tawo mahimong magmasinugtanon bisan taliwala sa daotang kalibotan. Tinuod, hingpit si Jesus, apan komosta ang mga tawong dili hingpit sama kanato?

Mahimong Magmasinugtanon Bisag Dili Hingpit

4. Unsay kahulogan alang kanato ang pagbatog kagawasan sa pagpili?

⁴ Gilalang sa Diyos si Adan ug Eva ingong intelihenteng mga linalang nga dunay kagawasan sa pagpili. Ingong ilang mga kaliwat, kita usab may kagawasan sa pagpili. Unsay buot ipasabot niana? Kana nagpasabot nga kita makapili sa paghimog maayo o sa paghimog daotan. Sa ato pa, ang Diyos naghatag kanatog kagawasan sa pagsugot o pagsupak kaniya. Duyog nianang dakong kagawasan ang responsibilidad. Sa pagkatinuod ang atong mga desisyon magkahulogag kinabuhi o kamatayon alang kanato. Makaapektar usab kana sa mga tawo nga suod kanato.

5. Unsang pakigbisog ang giatubang natong tanan, ug sa unsang paagi kita molampos?

⁵ Tungod sa atong napanunod nga pagkadili-hingpit, dili kinaiyanhon ang pagsugot. Dili kanunayng sayon ang pagtuman sa mga balaod sa Diyos. Si Pablo may pakigbisog niining bahina. Siya misulat: “Nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.” (Roma 7:23) Siyempre, kon dili ka magsakripisyo, masakitan, o mahasol, dali ra ang pagsugot. Apan unsay atong buhaton kon magkasumpaki ang atong tinguha nga magmasinugtanon ug ang ‘tinguha sa unod ug tinguha sa mga mata’? Kining sayop nga mga tinguha nagsumikad sa atong pagkadili-hingpit maingon man sa impluwensiya sa “espiritu sa kalibotan,” ug kini kusganon kaayo. (1 Juan 2:16; 1 Cor. 2:12) Aron masuklan kana, kinahanglan natong ‘andamon ang atong kasingkasing’ sa dili pa kita makaatubang ug malisod nga kahimtang o tentasyon ug magmadeterminado nga magmasinugtanon kang Jehova, bisag unsa pay mahitabo. (Sal. 78:8) Dunay daghang ehemplo sa Bibliya niadtong nagmasinugtanon tungod kay ilang giandam ang ilang kasingkasing.—Esd. 7:10; Dan. 1:8.

6, 7. Ipakita kon sa unsang paagi ang personal nga pagtuon makatabang kanato sa paghimog maalamong mga desisyon.

⁶ Ang makugihong pagtuon sa Kasulatan ug sa binase-sa-Bibliya nga mga publikasyon maoy usa ka paagi sa pag-andam sa atong kasingkasing. Handurawa ang imong kaugalingon nga naa niining situwasyona. Ibutang ta nga eskedyul nimo sa personal nga pagtuon nianang gabhiona. Mao pay pagkahuman nimo ug ampo alang sa espiritu ni Jehova sa pagtabang kanimo nga mapadapat ang imong nakat-onan gikan sa iyang Pulong. Nagplano kang motan-awg salida sa TV pagkasunod gabii. Imong nahibaloan nga maayog komento ang mga kritiko bahin nianang salidaha, apan nasayod ka usab nga aduna kanay pipila ka imoral ug mapintas nga mga esena.

⁷ Imong gipamalandong ang tambag ni Pablo sa Efeso 5:3: “Ang pakighilawas ug ang tanang matang sa kahugawan o kadalo dili gayod angay hisgotan sa inyong taliwala, ingon nga nahiangay sa mga balaan.” Nahinumdoman usab nimo ang awhag ni Pablo sa Filipos 4:8. (Basaha.) Samtang gitimbangtimbang kining tambaga, suknaa ang imong kaugalingon, ‘Kon tuyoon nako pagladlad ang akong kasingkasing ug hunahuna sa maong mga programa, ako bang gisunod  ang ehemplo ni Jesus sa bug-os nga pagkamasinugtanon ngadto sa Diyos?’ Unsa may imong buhaton? Motan-aw ka pa ba gihapon nianang salidaha?

8. Nganong angay natong huptan ang hataas nga sukdanan sa moral ug espirituwal?

⁸ Dili nato angayng paubson ang atong moral ug espirituwal nga mga sukdanan, nga tingali maghunahuna nga kita lig-on ug makasukol ra sa mga epekto sa daotang pakig-uban, lakip na nianang sa mapintas ug imoral nga kalingawan. Hinunoa, angay natong panalipdan ang atong kaugalingon ug ang atong mga anak batok sa makadaot nga impluwensiya sa espiritu ni Satanas. Ang mga tiggamit ug kompiyuter maningkamot pag-ayo nga dili masudlag virus ang ilang kompiyuter nga makadaot niini ug nianang sa uban. Dili ba angay usab kitang maningkamot sa pagpanalipod sa atong kaugalingon batok sa “malipatlipatong kaugdahan” ni Satanas?—Efe. 6:11.

9. Nganong magmadeterminado kita sa pagsugot kang Jehova sa adlaw-adlaw?

⁹ Halos kada adlaw, kita kinahanglang mopili kon ato bang buhaton o dili ang mga butang sumala sa sukdanan ni Jehova. Aron maluwas, kinahanglan natong sugton ang Diyos ug magkinabuhi sumala sa iyang matarong nga mga prinsipyo. Pinaagi sa pagsundog sa ehemplo ni Kristo sa pagkamasinugtanon bisan “hangtod sa kamatayon,” atong gipakita nga tiunay ang atong pagtuo. Si Jehova magaganti sa atong pagkamatinumanon. Si Jesus nagsaad: “Siya nga nakalahutay hangtod sa kataposan mao ang maluwas.” (Mat. 24:13) Tataw nga kinahanglan natong ugmaron ang hustong matang sa kaisog, sama sa gipakita ni Jesus.—Sal. 31:24.

Si Jesus—Pangunang Ehemplo sa Kaisog

10. Unsang matanga sa mga pagpit-os ang mahimong maatubang nato, ug unsay angay natong reaksiyon niana?

¹⁰ Tungod kay kita mahimong maimpluwensiyahan sa tinamdan ug panggawi sa kalibotan, kinahanglang magmaisogon kita aron dili mahugawan niana. Ang mga Kristohanon nakasinatig moral, sosyal, pinansiyal, ug relihiyosong mga pagpit-os nga makapatipas kanila gikan sa matarong nga mga dalan ni Jehova. Daghan ang gilutos sa ilang pamilya. Diha sa pipila ka nasod, ang mga eskuylahan naningkamot gayod sa pagtudlo sa teoriya sa ebolusyon, ug ang ateyismo nahimo nang dinawat. Dili mahimong ibalewala na lang nato ang maong mga pagpit-os. Angay kitang molihok aron sa pagsukol ug sa pagpanalipod sa atong kaugalingon. Gipakita sa ehemplo ni Jesus kon sa unsang paagi kita molampos.

11. Sa unsang paagi ang pagpamalandong sa ehemplo ni Jesus makahatag kanatog dugang kaisog?

¹¹ Giingnan ni Jesus ang iyang mga tinun-an: “Sa kalibotan kamo adunay kasakitan, apan magmaisogon! Gidaog ko na ang kalibotan.” (Juan 16:33) Wala gayod siya magpaimpluwensiya sa kalibotan. Wala gayod niya tugoti ang kalibotan nga mopugong kaniya sa pagsangyaw o magpaubos sa iyang mga sukdanan alang sa matuod nga pagsimba ug hustong paggawi. Angay nga ingon usab kita niana. Diha sa pag-ampo, si Jesus miingon bahin sa iyang mga tinun-an: “Sila dili bahin sa kalibotan, ingon nga ako dili bahin sa kalibotan.” (Juan 17:16) Ang pagtuon sa ehemplo ni Kristo sa pagpakitag kaisog ug ang  pagpamalandong niana makahatag kanato ug kaisog sa pagpabiling bulag sa kalibotan.

Magmaisogon Sama Kang Jesus

12-14. Paghatag ug mga pananglitan diin si Jesus nagpakitag kaisog.

¹² Si Jesus nagpasundayag ug dakong kaisog diha sa iyang ministeryo. Ginamit ang iyang awtoridad ingong Anak sa Diyos, siya maisogong “misulod sa templo ug nag-abog sa tanang namaligya ug namalit diha sa templo, ug gipanglintuwad ang mga lamesa sa mga tig-ilis ug salapi ug ang mga lingkoranan niadtong namaligyag mga salampati.” (Mat. 21:12) Sa dihang miabot ang mga sundalo aron sa pagdakop kang Jesus sa kataposang gabii niya sa yuta, siya maisogong nanalipod sa iyang mga tinun-an, nga nag-ingon: “Kon ako ang gipangita ninyo, palakta kini sila.” (Juan 18:8) Wala madugay human niana, iyang giingnan si Pedro sa pag-uli sa espada sa sakoban niini, sa ingon nagpakita nga si Jesus nagsalig, dili sa pisikal nga mga hinagiban, kondili kang Jehova.—Juan 18:11.

¹³ Si Jesus maisogong nagyagyag sa dili-mahigugmaon ug mini nga mga magtutudlo sa iyang adlaw ug sa ilang sayop nga mga pagtulon-an. “Alaot kamo, mga eskriba ug mga Pariseo, mga salingkapaw! tungod kay kamo nagatak-op sa gingharian sa mga langit atubangan sa mga tawo,” giingnan sila ni Jesus. “Wala kamo magtagad sa mas bug-at nga mga butang sa Balaod, nga mao, ang hustisya ug ang kaluoy ug ang pagkamatinumanon. . . . Kamo naghinlo sa gawas sa kopa ug sa pinggan, apan sa sulod kini puno sa inagaw ug sa paghingapin.” (Mat. 23:13, 23, 25) Ang mga tinun-an ni Jesus magkinahanglan ug susamang kaisog tungod kay ang mini nga mga lider sa relihiyon maglutos usab kanila ug magpatay sa pipila kanila.—Mat. 23:34; 24:9.

¹⁴ Si Jesus maisogong mibarog bisan batok sa mga demonyo. Sa usa ka higayon, siya giatubang sa usa ka tawong gidemonyohan, kinsa kusgan kaayo nga walay makagapos kaniyag kadena. Sa way-kokahadlok, gipagula ni Jesus ang daghang demonyo nga nagkontrolar sa maong tawo. (Mar. 5:1-13) Karong adlawa, ang Diyos wala maghatag sa mga Kristohanon ug gahom sa paghimo nianang maong mga milagro. Bisan pa niana, sa atong pagsangyaw ug pagpanudlo, kita usab kinahanglang makiggubat kang Satanas, ang usa nga “nagbuta sa mga hunahuna sa mga dili-magtutuo.” (2 Cor. 4:4) Sama kang Jesus, ang atong mga hinagiban “dili unodnon, kondili gamhanan tungod sa Diyos aron sa pagpukan sa lig-ong pagkatarok nga mga butang”—nakagamot pag-ayo apan sayop nga relihiyosong mga pagtulon-an. (2 Cor. 10:4) Sa paggamit niining espirituwal nga mga hinagiban, daghan kitag makat-onan sa ehemplo ni Jesus.

15. Sa unsa nagsumikad ang kaisog ni Jesus?

¹⁵ Ang kaisog ni Jesus nagsumikad, dili sa yanong kaisog sa kaugalingon, kondili diha sa pagtuo. Kinahanglan nga mao usab kita. (Mar. 4:40) Sa unsang paagi kita makabaton ug tinuod nga pagtuo? Sa gihapon, ang ehemplo ni Jesus naggiya kanato. Siya batid sa Kasulatan ug bug-os nga nagsalig niana. Ingong hinagiban, si Jesus naggamit, dili sa literal nga espada, kondili sa espada sa espiritu, ang Pulong sa Diyos. Sa makadaghan, siya mikutlo sa Kasulatan aron sa pagsuportar sa iyang pagtulon-an. Sagad iyang sugdan ang iyang mga pamulong pinaagi sa pag-ingon: “Kini nahisulat,” sa ato pa, diha sa Pulong sa Diyos. a

16. Sa unsang paagi molig-on ang atong pagtuo?

¹⁶ Aron makabaton ug pagtuo nga makalahutay sa mga pagsulay nga modangat tungod sa pagkahimong tinun-an, kita kinahanglang magbasa ug magtuon sa Bibliya sa adlaw-adlaw ug motambong sa Kristohanong mga tigom, nga  magsilsil sa atong hunahuna sa kamatuoran nga maoy patukoranan sa pagtuo. (Roma 10:17) Kinahanglan usab nga kita mamalandong sa atong makat-onan, ug itisok kini sa atong kasingkasing. Ang buhi lamang nga pagtuo ang mohatag kanatog kaisog. (Sant. 2:17) Dugang pa, kita kinahanglang mag-ampo alang sa balaang espiritu tungod kay ang pagtuo maoy bahin sa bunga sa espiritu.—Gal. 5:22.

17, 18. Sa unsang paagi ang usa ka batan-ong sister nagpakitag kaisog diha sa eskuylahan?

¹⁷ Usa ka batan-on nga ginganlag Kitty nakaeksperyensiya kon sa unsang paagi ang tinuod nga pagtuo makahatag ug kaisog. Sukad sa iyang pagkabata, siya nahibalo nga dili niya angayng “ikaulaw ang maayong balita” diha sa eskuylahan, ug gusto gayod niyang makasangyaw sa iyang mga klasmet. (Roma 1:16) Kada tuig, maningkamot siya sa pagpaambit sa maayong balita ngadto sa uban, apan magpanuko siya tungod sa kakulang ug kaisog. Sa dihang hapit na siyang mag-20 anyos, mibalhin siyag eskuylahan. Siya miingon, “Sugod karon, dili na gyod nako palabyon ang kahigayonan nga makasangyaw.” Si Kitty nag-ampo alang sa samag-Kristo nga kaisog, maayong panghukom, ug hustong higayon.

¹⁸ Sa unang adlaw sa klase, ang mga estudyante nagpailaila sa ilang kaugalingon. Ubay-ubay ang nag-ingon nga duna silay relihiyon apan dili sila hinimba. Naamgohan ni Kitty nga mao kini ang higayon nga iyang giampo. Sa dihang iya nang turno sa pagpailaila, siya maisogong miingon, “Usa ako sa mga Saksi ni Jehova, ug ang Bibliya maoy akong giya maylabot sa pagsimba ug hustong panggawi.” Samtang siya nagpadayon sa pagsulti, ang pipila ka estudyante nangyam-id. Apan ang uban namati ug sa ulahi nangutana kaniya. Gihimo gani sa maestro si Kitty nga maayong ehemplo sa pagdepensa sa pagtuo. Nalipay kaayo si Kitty nga iyang gisundog ang pagkamaisogon ni Jesus.

Ipakita ang Samag-Kristo nga Pagtuo ug Kaisog

19. (a) Unsay nalangkit sa pagbaton ug tinuod nga pagtuo? (b) Sa unsang paagi atong mapalipay si Jehova?

¹⁹ Naamgohan usab sa mga apostoles nga ang ilang kaisog kinahanglang ipasukad sa pagtuo. Sila mihangyo kang Jesus: “Hatagi kami ug dugang pa nga pagtuo.” (Basaha ang Lucas 17:5, 6.) Ang pagbaton ug tinuod nga pagtuo naglangkit ug labaw pa kay sa pagtuo nga naglungtad ang Diyos. Kini naglangkit sa pag-ugmad ug suod nga relasyon kang Jehova, nga susama sa relasyon sa usa ka gamayng bata sa iyang maluloton ug mahigugmaong amahan. Si Solomon gidasig sa pagsulat: “Anak ko, kon ang imong kasingkasing nahimong maalamon, ang ako gayong kasingkasing magamaya. Ug ang akong mga rinyon magasadya sa dihang ang imong mga ngabil magasulti sa butang nga matul-id.” (Prov. 23:15, 16) Sa samang paagi, ang atong maisogong pagbarog dapig sa matarong nga mga prinsipyo makapalipay kang Jehova, ug ang pagkahibalo niana makahatag kanatog dugang kaisog. Busa, atong sundogon kanunay ang ehemplo ni Jesus, nga maisogong magbarog dapig sa pagkamatarong!

[Footnote]

Makapatin-aw Ka Ba?

• Unsay motabang kanato sa pagkahimong masinugtanon bisan pa sa atong pagkadili-hingpit?

• Sa unsa nagsumikad ang tinuod nga pagtuo, ug sa unsang paagi makatabang kini kanato nga magmaisogon?

• Unsay moresulta sa atong pagkamasinugtanon ug pagpakitag samag-Kristo nga kaisog?

[Mga Pangutana sa Pagtuon]

[Hulagway sa panid 13]

Imo bang ‘giandam ang imong kasingkasing’ sa pagsukol sa mga tentasyon?

[Hulagway sa panid 15]

Sama kang Jesus, kita makapakitag kaisog pinasukad sa pagtuo