“Oupwe apilükülük, pun ngang üa akufu fanüfan.”​—JON 16:33.

1. Äweweei mwo ükükün watteen än Jises älleasochisi Kot.

 JISES KRAIST a föri letipen Kot fansoun meinisin. Ese mwo nge fän eü an ekiekin älleasolapa Seman we lon läng. (Jon 4:34; Ipru 7:26) Iwe nge, minne a fis ngeni woon fönüfan ese emecheresi an epwe älleasochis. Seni le poputään an angangen afalafal, Setan me ekkewe ekkoch chon oputa Jises ra sotun etipetipa, eriäni, are otupu pwe epwe likitalo an tuppwöl ngeni Kot. (Mt. 4:1-11; Luk 20:20-25) Ra efisi watteen än Jises riäfföü, letipeta, me metek. Ra pwal mwo nge efisi an mälo woon efoch irään ninni. (Mt. 26:37, 38; Luk 22:44; Jon 19:1, 17, 18) Inaamwo ika a fokkun riäfföü, nge Jises a “aleasochis tori mäla.”​—Filipai 2:8.

2, 3. Met sia tongeni käeö seni än Jises älleasochis inaamwo ika a küna riäfföü?

² Minne Jises a küna lon manauan woon fönüfan a äiti ngeni weween älleasochis fän sokkun weires ese mwo küna fän eü. (Ipru 5:8) Jises a fen chiechiöch ngeni Jiowa langattam fansoun, me i nöün Kot “sousile angang” le föratä mettochun fönüfan. (SalF. 8:30) Ina pwata itä ürürün a fen unus an sile  usun an angang ngeni Kot. Iwe nge, an likiitü lon an lükülük fän riäfföü atun i emön aramas a ännetatä pwüngün enletin an tuppwöl. Jises, Nöün Kot we, a feffeitä lon an ririöch ngeni Seman we. Met sipwe tongeni käeö seni minne a fis ngeni?

³ Ikaamwo Jises emön aramas mi unusöch, nge sap minne a äkkälleasochis seni pwisin an pöchökkül. A tingor än Kot älillis pwe epwe chök äkkälleasochis. (Älleani Ipru 5:7.) Ika sipwe akkamwöchü ach tuppwöl, a pwal lamot sipwe tipetekison me tittingor än Kot älillis iteitan. Ina pwata, ewe aposel Paul a öüröüra Chon Kraist: “Eäni ewe chök ekiek Kraist Jesus a eäni,” ewe mi “püsin atekisonatiu o eäni aleasochis tori mäla.” (Fil. 2:5-8) Föfförün Jises a ännetatä pwe aramas ra tufichin älleasochis, nge meit ika ra nom lein aramas mi ngaw. Pwüngün pwe Jises a unusöch, nge epwe tufich ngeni aramas rese unusöch?

Sia Tongeni Älleasochis Inaamwo Ika Sise Unusöch

4. Met weween Kot a förikich pwe sipwe tufichin filatä?

⁴ Atam me If iir förien Kot mi tipatchem me a nom rer ewe tufichin filatä. A pwal nom rech mwirimwiriir kewe ena tufich. Met weween ena? A wewe ngeni pwe sia tongeni filatä ach sipwe föri minne mi mürinnö are minne mi ngaw. Iwe, Kot a mut ngenikich ach sipwe filatä le älleasochisi are älleasolapa. Nge ika sia filingaw, sipwe küna liwinin. Pwüngün pwe minne sia filatä epwe tongeni atoto rech manau are mälo. A pwal kküü manauen ekkewe aramas mi silekich.

5. Ifa ewe mettoch a weires ngenikich meinisin? Met epwe elikiitükich?

⁵ Pokiten sia älemwiri ewe tipis seni Atam, sise unusöch. Älleasochis esap ina pükün eöreniach. Ese mecheres ach sipwe älleasochisi än Kot kewe allük fansoun meinisin. Paul a meefi weiresin. A makkeei: “Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.” (Rom 7:23) Pwüngün pwe älleasochis epwe mwaren mecheres ika esor met sipwe pennükü, are esor riäfföün are osukosukan. Nge met sipwe föri ika ra ü fengen ach mochen älleasochis me ‘mochenia-ingauen fitukach, me mochenia-ingauen mesach’? Ekkena mocheniaingaw mi fokkun pöchökkül ra fis pokiten sise unusöch me pokiten etipetipaen “ngünün fanüfan.” (1 Jon 2:16; 1 Kor. 2:12) Ren ach sipwe ü ngeni ekkena mocheniangaw, sipwe fokkun ‘amolätä letipach’ me mwen an epwe torikich sossot are weires, me sipwe apposa letipach le älleasochisi Jiowa, ese lifilifil met epwe fis. (Kölf. 78:8) Lon ewe Paipel, mei wor chommong pworausen chokkewe mi likiitü pun ra ammolnatä letiper.​—Esra 7:10; Tan. 1:8.

6, 7. Äweweei ifa usun ach pwisin käeö a tongeni älisikich le kefiliöch.

⁶ Sia akkammolnatä letipach ren ach käkkäeöfichi ewe Paipel me ekkewe puken äweween Paipel. Anchangei pwe itä iei ewe pwinin kopwe pwisin käeö Paipel. Ka kerän wes le tingorei Jiowa än we ngün mi fel pwe epwe älisuk le apwönüetä met ka käeö seni an we Kapas. Ka ekiekin katol eü kachito woon TV lon ewe pwinin mwirin. Ka rongorong än aramas apasa pwe a fokkun apwapwa, nge ka pwal silei pwe a wor föfförün sikepwach me mwänesol lon.

⁷ Ka ekieki usun än Paul fön lon Efisus 5:3, a erä: “Esap pwüng pwe sokopaten föförün lisowu ika mocheisou ika tipemong epwe fen mwo nge fis ika föü lefilemi.” Ka pwal chechchemeni än Paul fön lon Filipai 4:8. (Älleani.) Atun ka ekilonei än kewe fön, kopwe pwisin eisinuk, ‘Ika ua filatä pwe upwe amasoua letipei me ekieki ren minne upwe katol, ua itä äppirü Jises le titchikin älleasochisi Kot?’ Met kopwe föri? Kopwe chüen katol ena kachito?

8. Pwata sipwe fokkun achocho le älleasochisi än Jiowa kewe allük fansoun meinisin?

 ⁸ Ese pwüng ach sipwe ekisaalo ach achocho le älleasochisi Jiowa fansoun meinisin, pokiten sia ekieki pwe a naf ach pöchökkül le ü ngeni etipetipaen chiechi mi ngaw, pachelong minen apwapwa mi sikepwach me mwänesol. Nge sipwe fen fokkun tüttümünü pwisin kich me nöüch kewe pun ekkena mettoch mi pwäri ekiekin Setan ra tongeni eingawakich. Usun chök än aramas fokkun tümünüöchüür pwe ete üriir semwen, pwal ina chök usun, sipwe fokkun tümünükich seni än Setan kewe “tipatchem-sola.”​—Ef. 6:11, TF.

9. Pwata sipwe tipeppos le älleasochisi Jiowa iteiten rän?

⁹ Arapakkan iteiten rän, sipwe fili ika sipwe föri met Jiowa a mochen are sisap. Ika sia mochen küna manau, sipwe fokkun älleasochisi Kot me apwönüetä an kewe kapasen emmwen mi pwüng. Ren ach äkkäppirü än Jises älleasochis “tori mäla,” sia affata pwe ach lükü mi enlet. Jiowa epwe liwini ach lükülük. Jises a pwonei: “Iö epwe likitü tori lesopolan epwe küna manau.” (Mt. 24:13) A ffat lamoten ach sipwe ämääraatä ewe sokkun pwora mi pwüng, ewe a nom ren Jises.​—Kölf. 31:24.

Jises, Ewe A Pwora Lap Seni Meinisin

10. Met sokkun sossot epwe tongeni torikich, me met sipwe föri?

¹⁰ Ekiekin me föfförün chon fönüfan ra pwellikich, ina pwata, sipwe pwora pwe rete eingawakich. Chon Kraist ra küna sossotun ar repwe föfföringaw, fiti eörenien are föfförün lamalam chofona, me osukosuk lon pekin moni. Ekkena mettoch ra tongeni erikiir seni alen Jiowa kewe mi pwüng. Chommong ra küna pwe ar kewe famili ra ü ngeniir. Lon ekkoch fönü, a lapolo än ekkewe sukul tekia asukula aramas pwe mettoch meinisin ra pwisin fisitä, me a pwal chommongolo chokkewe mi erä pwe esor emön Kot. Sisap chök tunalo are amönüngaw seni ekkena sossot. Ach pwäratä pwora lon ach kewe föfför epwe tümünükich. Minne Jises a föri, ina eü leenien äppirü ngenikich.

11. Ifa usun ach ekipwichi än Kraist pwora epwe alapalo ach pwora?

¹¹ Jises a ereni nöün kewe chon käeö: “Lon fanüfan ämi oupwe riaföü, nge oupwe apilükülük, pun ngang üa akufu fanüfan.” (Jon 16:33) Ese kkuf fän etipetipaen fönüfan. Ese mut ngeni chon fönüfan ar repwe aükalo an angangen afalafal are akisaalo an föfföri minne mi pwüng fansoun meinisin, äkkäeüin lon an fel ngeni Kot, iwe, sipwe pwal usun chök Jises. Lon an iotek, iei alon Jises usun nöün kewe chon käeö: “Sap ir chon peppeni fönüfan, ussun chök ngang usap peppeni fönüfan.” (Jon 17:16, NW) Ach käkkäeö me ekilonei usun än Kraist pwora a tongeni apworaikich le ikkimulo seni fönüfan.

 Käeö Pwora Seni Jises

12-14. Äweweei ifa usun Jises a pwäratä pwora.

¹² Jises a fokkun pwora le akkafalafal. I nöün Kot we a apwönüetä wisan we fän pwora, iwe, “a tolong lon ewe imwenfel o asüowu ätekewe meinisin mi kamö o amömöla pisek ikenan. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom.” (Mt. 21:12) Lon ewe säingoon pwinin manauan woon fönüfan, a pwora le tümünü nöün kewe chon käeö ren an ereni ekkewe sounfiu mi etto aresini: “Are oua küttaei, oupwe mwüt ngeni ätekei pwe repwe feila.” (Jon 18:8) Ekiselo mwirin, a ereni Piter an epwe aliwinsefälielong nöün ketilas lon leenian. A pwäratä pwe Jises a lükülük woon Jiowa, nge sap woon pisekin efeiengaw.​—Jon 18:11.

¹³ Jises a pwora le akkaffat mwäällin ekkewe nouwisen lamalam esor ar tong me ar kewe afalafal chofona. A ereniir: “Feiengauemi, ämi Sensen Allük me Farisi! Ämi chon likatuputup! Oua öpüngala ewe asam ngeni Mwün Läng seni aramas. Ousap aleasochis ngeni ekewe allük mi fokun aüchea usun pwüng, kirikiröch me allükülük. . . . Oua limeti lükün ämi kap me sepi, nge lon a ur ren mine a torikemi ren angangen mwäneson me kirikiringau.” (Mt. 23:13, 23, 25) A lamot nöün Jises kewe chon käeö repwe pwora pun ekkewe nouwisen lamalam chofona repwe pwal eriäfföür me nielo ekkoch leir.​—Mt. 23:34; 24:9.

¹⁴ Jises a pwal mwo nge pwora ngeni ekkewe timon. Lon eü atun, a chuuri emön mwän mi wor ngününgaw woon, iwe, a kon pöchökkül pwe ese wor emön a tongeni föti ngeni sein. Iwe, Jises ese niuokkus le atowu chommong timon mi nemeni ena mwän. (Mark 5:1-13) Ikenäi, Kot ese atufichi Chon Kraist ar repwe föri ena esin manaman. Iwe nge, lon ach angangen afalafal me asukul, sipwe pwal mammaun ngeni Setan, ewe mi “achuna ekiekin letipen chokewe resap lükü.” (2 Kor. 4:4) Ekkewe pisekin maun Jises me kich sia äkkäeä “sap pisekin ei fanüfan, nge pisekin Kot mi manaman, aia aea le atai ekewe lenien pöchökül,” weween, ekkewe pworaus aramas ra wesewesen lükü nge mi mwääl. (2 Kor. 10:4) Sipwe käeö seni Jises äeään ekkewe pisekin maun seni Kot.

15. Än Jises pwora a alongolong woon met?

¹⁵ Än Jises pwora a alongolong woon an lükü, nge sap woon an ekiekin einga aramas. Epwe pwal chök ina usuch. (Mark 4:40) Ifa usun sipwe tongeni eäni lükü mi enlet? Sipwe nengenisefäli än Jises we leenien äppirü. A unusen silefichi me lükülük woon än Kot Kapas. A nönnöünöü ewe ketilasen ngün, ewe Kapasen Kot, nge sap wesewesen efoch ketilas. Fän chommong, a änneta pwüngün an kewe afalafal ren an aloni alon Paipel. Me mwen an epwe afalafal, fän chommong a akkomw apasa, “A mak,” weween, lon än Kot Kapas. a

16. Ifa usun sipwe tongeni alapalo ach lükü?

¹⁶ Ren ach sipwe ämääraatä ewe esin lükü mi tongeni elikiitükich fän sokkun sossot mi tottori nöün Jises kewe chon käeö, sipwe pwal äkkälleani me käkkäeö Paipel iteiten rän me fiffiti ach kewe mwich, pwe sipwe  fotukalong ekkewe pworaus mi enlet lon ekiekich pun ina longolongun ach lükü. (Rom 10:17) Sipwe pwal ekilonei me lefareni minne sia käkkäeö. Lükü mi manau chök a tongeni achchüngükich pwe sipwe eäni föfför mi pwora. (Jem. 2:17) Iwe, sipwe iotek fän iten ngün mi fel pun lükü eü kinikinin uwaan ewe ngün mi fel.​—Kal. 5:22.

17, 18. Ifa usun emön nengngin a pwäratä pwora lon sukul?

¹⁷ Emön chienach itan Kitty a küna ifa usun lükü mi enlet epwe apworaikich. Seni le kükkünün, a silei pwe esap “sawäsini” ewe kapas allim lon sukul, iwe, a wesewesen mochen pwäratä ewe enlet ngeni chienan kewe chon sukul. (Rom 1:16) Iteiten ier, a achocho le apposa letipan pwe epwe pwäratä ewe kapas allim ngeni ekkewe ekkoch, nge lape ngeni fansoun, ese fos pun ese kon lien pwora. Mwirin fitu ier, a siwil an sukul. A erä, “Iei, üpwele fokkun achocho pwe usap chüen fanafanelo usun chök me loom.” Lon än Kitty iotek, a tingor pwe epwe pwora usun chök Jises, epwe mirit, me epwe tongeni wor atun epwe afalafal lon sukul.

¹⁸ Le poputään sukul, ewe sense a ereni ekkewe chon sukul pwe repwe apasa en me itan. Ekkoch ra affata menni lamalam ra choni, nge ra pwal erä pwe rese kon lien fiffiti mwökütükütün. Kitty a esilla pwe ina met ewe a ioteki. Atun a tori fansoun an epwe fos, a apasa fän lükülük, “Ngang emön Chon Pwäratä Jiowa, iwe, ewe Paipel, ina met a ekkemmweni ai fel ngeni Kot me ai kewe föfför.” Atun a fos, ekkoch chon sukul ra onupatä meser. Nge ekkoch ra aüselingöch me kapas eis ngeni mwirin. Ewe sense a pwal mwo nge ingeiti Kitty pun a üppos fän iten an lükü. Kitty a pwapwa pun a käeö seni än Jises pwora.

Äppirü än Kraist Lükü me Pwora

19. (a) Met weween ach sipwe eäni lükü mi enlet? (b) Epwe ifa usun sipwe tongeni apwapwaai Jiowa?

¹⁹ Ekkewe aposel ra pwal esilla lamoten ar pwora epwe alongolong woon lükü. Ra tingormaü ngeni Jises: “Kopwe alapalo am luku!” (Älleani Luk 17:5, 6, TF.) Lükü mi enlet ese chök wewe ngeni ach sipwe lükü pwe mei wor emön Kot. A wewe ngeni ach sipwe ämääraatä ach pacheöch ngeni Jiowa, usun chök emön kükkün semirit a riri ngeni seman we mi kirekiröch me tong. Fän emmwenien ngün mi fel, Salomon a makkeei: “Nei, are kopwe mirit, üpwe fokun pwapwa. Lelukei epwe mwänek, are ka apasa kapas mi pwüng.” (SalF. 23:15, 16) Pwal ina chök usun, ach pwora le üppos fän iten minne mi pwüng a kan apwapwaai Jiowa, iwe, ach silei ena epwe alapalo ach pwora. Ina minne, sipwe äkkäppirü Jises le üppos fän iten minne mi pwüng!

[Footnote]

Ka Tongeni Äweweei?

• Met epwe atufichikich ach sipwe äkkälleasochis inaamwo ika sise unusöch?

• Lükü mi enlet a alongolong woon met, iwe, ifa usun epwe älisikich ach sipwe pwora?

• Met mwiriloon ach äkkälleasochis me ach äkkäppirü ewe sokkun pwora Jises a eäni?

[Ekkewe Kapas Eis fan Iten ewe Lesen]

[Sasing lon pekin taropwe 16]

Ka fen ‘amolnatä letipom’ pwe kopwe fiffiu ngeni sossot?

[Sasing lon pekin taropwe 18]

Sipwe tongeni äppirü Jises le pwäratä pwora mi alongolong woon lükü