Annan lobeisans ek kouraz parey Kris
Annan lobeisans ek kouraz parey Kris
“Pran kouraz, mon’n ranport laviktwar lo lemonn.”—ZAN 16:33.
1. Ziska ki degre Zezi ti reste obeisan anver Bondye?
ZEZI KRI ti toultan fer lavolonte Bondye. I pa’n zanmen ni menm mazinen pour dezobeir son Papa dan lesyel. (Zan 4:34; Ebr. 7:26) Me sa ki i ti eksperyanse lo later pa ti fer li fasil pour li obeir. Depi o konmansman son travay predikasyon, bann lennmi Zezi enkli Satan li menm, ti esey konvenk, fors e trik Zezi pour fer li kas son fidelite. (Mat. 4:1-11; Lik 20:20-25) Sa bann lennmi ti fer Zezi soufer mantalman, emosyonnelman e fizikman. Finalman zot ti reisi met li a mor lo en poto. (Mat. 26:37, 38; Lik 22:44; Zan 19:1, 17, 18) Dan tou sa sityasyon e malgre sa kantite soufrans ki i ti pas ladan, Zezi ti reste “obeisan ziska lanmor.”—Lir Filipyen 2:8.
2, 3. Ki nou kapab aprann atraver lobeisans Zezi malgre ki i ti eksperyans soufrans?
2 Sa ki Zezi ti eksperyanse konman en imen lo later ti ansenny li bann nouvo laspe lo lobeisans. (Ebr. 5:8) Petet i paret ki ti nepli annan nanryen ankor pour Zezi aprann pour servi Zeova. Apre tou, Zezi in annan en relasyon pros avek Zeova pour bokou bokou letan e i ti “zouvriye abil” Bondye pandan kreasyon. (Prov. 8:30) Me kantmenm sa, soufrans ki i ti pas ladan lo later i’n prouve ki i ti totalman fidel. Zezi Garson Bondye ti vin pli pros avek son papa. Ki nou kapab aprann atraver son leksperyans?
3 Menm si i ti en zonm parfe, Zezi pa ti depan lo li menm pour demontre en lobeisans parfe. I ti priy Bondye pour ed li reste obeisan. (Lir Ebre 5:7.) Pour nou reste obeisan, nou osi nou bezwen annan limilite e priy Bondye regilyerman pour ganny son led. Pour sa rezon, zapot Pol ti konsey bann Kretyen: “Posed sa menm santiman ki ti dan Kris-Zezi . . . [ki] ti aksepte viv dan limilite e montre li obeisan ziska lanmor.” (Fili. 2:5-8) Lavi Zezi lo later ti prouve ki i posib pour imen obeir menm si zot viv parmi bann move dimoun. I vre Zezi ti parfe, me ki nou pou dir lo bann imen enparfe parey nou?
Nou kapab obeir malgre nou lenperfeksyon
4. Ki i vedir pour nou lefet ki nou’n ganny kree avek sa abilite pour swazir ant sa ki byen ek sa ki mal?
4 Bondye ti kree Adan ek Ev avek sa abilite pour swazir ant sa ki byen ek sa ki mal. Konman zot desandans, nou osi nou’n ganny kree avek sa abilite. Ki sa i vedir? I vedir ki nou kapab deside pour fer sa ki byen oubyen sa ki mal. Andotmo, Bondye in donn nou sa liberte pour swazir pour obeir li oubyen dezobeir. Sa liberte i osi enplik responsabilite, setadir rann li kont. Byensir desizyon ki nou pran i vedir swa lavi swa lanmor pour nou. Zot osi annan en lefe lo bann dimoun otour nou.
5. Ki lalit nou tou nou bezwen fer e ki mannyer nou kapab reisir?
5 Akoz nou’n erit lenperfeksyon, nou napa sa tandans pour obeir. I pa touzour fasil pour obeir Lalwa Bondye. Pol ti bezwen lalit pour obeir. I ti ekrir: “Mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan.” (Rom. 7:23) Byensir, ler nou pa bezwen fer okenn sakrifis, napa soufrans, oubyen okenn lenkonvenyans, i fasil pour obeir. Me ki mannyer nou azir ler sa dezir ki nou annan pour obeir i an konfli avek “dezir natir imen [e] dezir atraver nou lizye”? Sa bann move dezir i devlope akoz nou lenperfeksyon e osi akoz move lenfliyans “lespri dapre lemonn” otour nou ki annan en gran lenfliyans lo nou. (1 Zan 2:16; 1 Kor. 2:12) Pour kapab reziste zot, nou bezwen ‘prepar nou leker’ avan ki nou fer fas avek en sityasyon difisil oubyen tantasyon, e pour annan sa determinasyon pour obeir Zeova nenport kwa ki arive. (Ps. 78:8) Dan Labib, nou annan legzanp en kantite dimoun ki ti prepar zot leker.—Ezra 7:10; Dan. 1:8.
6, 7. Donn en legzanp pour montre ki mannyer letid personnel i kapab ed nou fer bann bon swa.
6 En fason pour prepar nou leker i par etidye o profon Labib ek bann piblikasyon baze lo Labib. Mazin ou dan sa sityasyon swivan. Meton in ariv sa zour swar ki ou’n deside pour fer ou letid personnel. Ou’n fek fini priye pour ganny led lespri sen Zeova pour ed ou aplik sa ki ou’n aprann dan son Parol. Ou ti’n plàn pour get en film lo televizyon son lannmen swar. Ou’n tande ki serten dimoun in koz an byen lo sa film, me ou osi konnen ki i annan serten senn imoral ek vyolans ladan.
7 Aprezan ou reflesir lo konsey ki zapot Pol i donnen dan Efezyen 5:3: “Zot devre alor veye ki tou form aktivite seksyel imoral, lavi dezordonnen, ek lanvi pour keksoz ki lezot dimoun i posede, pa menm ganny mansyonnen parmi zot.” Ou osi rapel sa konsey ki Pol ti donnen dan Filipyen 4:8. (Lir.) Ler ou pe medit lo sa konsey, demann ou lekor, ‘Si mon volonterman ekspoz mon leker ek lespri avek bann progranm koumsa, eski mon pe swiv legzanp Zezi pour obeir Bondye totalman?’ Ki ou pou fer? Eski ou pou deside get sa film kantmenm sa?
8. Akoz nou bezwen gard en o nivo standar moral ek spirityel?
8 I ti pou en fot pour bes nou bann standar moral ek spirityel, petet par mazinen ki nou ase for pour reziste lefe ki move frekantasyon i anmennen, sa i enkli menm ler sa frekantasyon i vin atraver vyolans ek divertisman imoral. Plito, nou bezwen protez nou ek nou zanfan kont bann move lenfliyans ki reflekte leta lespri Satan. Bann dimoun ki servi konpiter i pran en kantite prekosyon pour anpes zot konpiter ganny atake par bann viris ki lezot i anvoye, ki kapab detrir zot lenformasyon, enterfer avek son fonksyonnman, e menm kontrol sa konpiter e servi li pour atak lezot konpiter. Eski nou devret annan mwens vizilans ler nou pe protez nou kont “bann riz” Satan?—Efe. 6:11
9. Akoz tou le zour nou bezwen annan sa determinasyon pour obeir Zeova?
9 Preski tou le zour, dan en fason ou en lot nou bezwen swazir si nou pou fer keksoz fason ki Zeova i oule ouswa non. Pour nou kapab ganny sove, nou bezwen obeir Bondye e viv dapre son bann prensip drwat. Par swiv legzanp Kris ki ti reste obeisan menm “ziska lanmor,” nou montre ki nou annan vre lafwa. Zeova pou rekonpans nou si nou reste fidel. Zezi ti promet: “Me sa ki reste fidel ziska lafen pou ganny sove.” (Mat. 24:13) I kler alor ki nou bezwen devlop sa menm kalite kouraz ki Zezi ti demontre.—Ps. 31:24.
Zezi i sa pli bon legzanp en dimoun ki’n demontre kouraz
10. Ki kalite presyon nou kapab fer fas avek, e ki mannyer nou devret azir?
10 Lefet ki nou antoure avek dimoun ki annan leta lespri ek konportman sa lemonn, nou bezwen annan kouraz pour evite ganny kontaminen. Bann Kretyen i fer fas avek presyon dan domenn moralite, sosyal, finansyel e relizye ki kapab fer zot aret swiv semen drwat Zeova. En kantite zot i fer fas avek lopozisyon dan fanmir. Dan serten pei bann lenstitisyon dan domenn ledikasyon i kontinyen promot lansennyman lo evolisyon, e sa krwayans kot dimoun pa krwar dan legzistans en Bondye pe vin deplizanpli komen. Avek sa kantite presyon, nou pa kapab zis senpleman inyor zot e pa fer nanryen. Nou bezwen azir pour kapab reziste e protez nou. Legzanp Zezi i montre ki mannyer nou kapab reisir.
11. Ki mannyer nou kapab ganny plis kouraz kan nou reflesir lo legzanp Zezi?
11 Zezi ti dir avek son bann disip: “Dan lemonn zot bezwen soufer. Me pran kouraz, mon’n ranport laviktwar lo lemonn.” (Zan 16:33) I pa ti zanmen les li ganny enfliyanse par sa lemonn. I pa ti zanmen les sa lemonn fer li aret fer sa travay predikasyon ki i ti ganny konfye oubyen fer li bes son standar an rapor avek vre ladorasyon ek bon kondwit; i pa devret leka pour nou osi. Zezi ti dir sa parol swivan dan en lapriyer ki i ti fer konsernan son bann disip: “Zot pa fer parti lemonn parey mwan mon pa fer parti lemonn.” (Zan 17:16) Ler nou etidye e reflesir lo legzanp ki Zezi in kite dan lafason ki i ti demontre kouraz, sa i kapab donn nou sa lafors neseser pour reste separe avek sa lemonn.
Aprann pour vin en dimoun kouraze atraver legzanp Zezi
12-14. Donn serten legzanp konman Zezi ti demontre ki i ti en dimoun kouraze.
12 Zezi ti demontre ki i ti annan bokou kouraz tou dilon son minister. Par servi son lotorite konman Garson Bondye, san okenn lafreyer i “ti antre dan Tanp e sas tou bann ki ti pe aste e vann . . . I ti savir latab bann ki ti pe sanz larzan e sez bann ki ti pe vann pizon.” (Mat. 21:12) Ler bann solda ti vin aret Zezi sa dernyen zour swar ki i ti pase lo later, avek kouraz i ti avans devan pour protez son bann disip, an dizan: “Si se mwan ki zot pe rode, les lezot sa bann zonm ale.” (Zan 18:8) En pe letan pli tar, i ti demann avek Pyer pour remet son lepe dan son fouro, sa i montre ki pa ti met son konfyans dan bann zarm ki’n ganny fer par imen, me dan Zeova.—Zan 18:11.
13 Zezi ti denons bann fo ansennyan dan son letan ki pa ti demontre okenn lanmour pour lezot e i ti osi devwal zot bann fo lansennyman. Zezi ti dir avek zot: “Maler! profeser Lalwa ek Farizyen, ipokrit! Zot ferm laport Rwayonm Lesyel pour dimoun . . . Zot negliz sa ki pli enportan dan Lalwa, tel ki lazistis, konpasyon, ek fidelite . . . Zot netway an-deor lakoup ek pla, me anndan i ranpli avek vol e avek bann move dezir.” (Mat. 23:13, 23, 25) Bann disip Zezi ti pou bezwen sa menm kalite kouraz akoz bann sef relizye ti pou persekit e touy serten parmi zot.—Mat. 23:34; 24:9.
14 Zezi pa ti per pour fer fas avek bann demon. En fwa, i ti ganny konfronte avek en zonm ki ti posede par demon, i ti telman for ki personn pa ti kapab anmar li avek en lasenn. San okenn lafreyer Zezi ti fer sa bann demon sorti dan sa zonm ki ti anba zot kontrol. (Mark 5:1-13) Ozordi, Bondye pa’n donn bann Kretyen pouvwar pour fer sa bann kalite mirak. Me kantmenm sa, ler nou pe prese oubyen ansennyen, nou osi nou bezwen lalit kont Satan, sa enn ki’n “avegle . . . lentelizans” bann ki pa krwar dan Bondye. (2 Kor. 4:4) Parey dan ka Zezi nou bann zarm “pa zarm ki zonm i servi, me bann zarm ki annan pisans Bondye ki kapab detri . . . bann fo rezonnman,” setadir bann fo lansennyman relizye ki’n anrasinen dan leker bann dimoun. (2 Kor. 10:4) Ler nou byen servi bann zarm ki Zeova in donn nou, nou aprann en kantite avek legzanp Zezi.
15. Kwa ki ti fer Zezi annan kouraz?
15 Zezi ti en dimoun kouraze pa zis akoz i ti brav, me akoz i annan lafwa. I devret osi leka pour nou. (Mark 4:40) Ki mannyer nou kapab devlop vre lafwa? La ankor legzanp Zezi i kapab gid nou. I ti demontre ki i ti annan en konnesans byen aprofondi lo Lekritir e i ti annan konfyans total dan Parol Bondye. Zezi pa ti servi en vre lepe konman zarm, me i ti servi lepe lespri setadir Parol Bondye. Souvandfwa, i ti siport sa ki i ti ansennyen par refer avek Lekritir. Souvan i ti konmans koze par dir: “I’n ekrir,” oubyen “dan Lekritir i’n dir,” setadir, dan Parol Bondye. *
16. Ki mannyer nou kapab devlop en pli gran lafwa?
16 Pour batir en lafwa solid ki pour permet nou fer fas avek tou kalite leprev ki nou pou definitivman gannyen ler nou vin en disip, nou bezwen lir e etidye Labib sak zour. Nou bezwen asiste bann renyon Kretyen, fer antre dan nou lespri bann laverite ki form par fondman lafwa. (Rom. 10:17) Nou bezwen osi medit, setadir reflesir o profon lo sa ki nou aprann, pour fer ki sa lansennyman i antre dan nou leker. Zis en lafwa vivan ki kapab motiv nou pour azir avek kouraz. (Zak 2:17) Nou devret priye pour resevwar lespri sen akoz lafwa i form par fri lespri.—Gal. 5:22.
17, 18. Ki mannyer en zenn ser ti demontre kouraz kot lekol?
17 En zenn ser ki apel Kitty ti arive konpran atraver son eksperyans ki mannyer vre lafwa i donn kouraz. Depi tre zenn, i ti konnen ki i pa ti devret “onte pour anons sa bon nouvel” kot lekol, e i ti vreman anvi donn en bon temwannyaz son bann kanmarad lekol. (Rom. 1:16) Sak lannen, i ti annan sa determinasyon pour fer plis zefor pour esey koz avek lezot konsernan sa bon nouvel, me i pa ti arive akoz i ti napa ase kouraz pour fer li. Ler i ti dan bann dernyen lannen son ladolesans i ti sanz lekol. I ti dir: “Sa voyaz mon pour fer sir ki mon profit tou loportinite ki avan mon’n les pase.” Kitty ti priye pour ganny kouraz parey Zezi, pour demontre bon zizman, e pour ganny sa bon loportinite.
18 Premye zour lekol, bann zelev ti ganny demande pour entrodwir zot lekor enn par enn. Laplipar ti mansyonn larelizyon ki zot ti’n grandi ladan, e zot ti osi azoute ki zot pa ti pe vreman pratik zot krwayans. Kitty ti realize ki sa ti sa loportinite ki i ti’n priy lo la. Ler son tour ti arive, i ti dir avek konfyans: “Mon en Temwen Zeova, e Labib i sa liv ki donn mwan bon gidans lo bann keksoz moral e spirityel.” Anmezir ki i ti kontinyen koze, serten zelev ti montre dapre lekspresyon lo zot figir ki zot ti agase par sa ki i ti pe dir. Me lezot ti port latansyon e zot ti poz li kestyon plitar. Sa ansennyan ti menm pran Kitty konman en bon legzanp en dimoun ki defann son krwayans. Kitty ti vreman kontan akoz i ti’n aprann pour annan kouraz atraver legzanp ki Zezi in kite.
Demontre lafwa ek kouraz parey Kris
19. (a) Kwa ki kapab fer nou devlop vre lafwa? (b) Ki mannyer nou kapab fer plezir Zeova?
19 Bann zapot osi ti realize ki zot aksyon ranpli avek kouraz ti bezwen baze lo lafwa. Zot ti enplor Zezi: “Fer nou ganny plis lafwa!” (Lir Lik 17:5, 6.) Annan vre lafwa i vedir plis ki senpleman krwar ki Bondye i egziste. I enplik devlop en relasyon entim avek Zeova, menm kalite relasyon ki en pti zanfan i annan avek en bon papa ki kontan li. Anba lenspirasyon, Salomon ti ekrir: “Mon garson si ou leker i vin saz, sa pou fer mon leker osi rezwir. E mon ronnyon pou dan lazwa kan ou eksprim konsernan ladrwatir.” (Prov. 23:15, 16) Pareyman, ler nou defann avek kouraz bann prensip drwat Zeova sa i fer li plezir e lefet ki nou konn sa, sa i donn nou plis kouraz. Alor, annou toultan imit legzanp Zezi, par defann ladrwatir Zeova avek kouraz!
[Not anba lo paz 17]
^ par. 15 Pour lezot legzanp, vwar Matye 4:4, 7, 10; 11:10; 21:13; 26:31; Mark 9:13; 14:27; Lik 24:46; Zan 6:45; 8:17.
Eski ou kapab eksplike?
• Kwa ki pou ed nou reste obeisan menm si nou enparfe?
• Lo kwa vre lafwa i baze, e ki mannyer sa i kapab ed nou pour nou annan kouraz?
• Ki pou arive si nou obeir e demontre kouraz parey Kris?
[Kestyon]
[Portre lo paz 16
Eski ou pe ‘prepar ou leker’ pour reziste tantasyon?
[Portre lo paz 18]
Parey Zezi nou kapab demontre kouraz ki baze lo lafwa