Tuikale ne ditumikila ne dikima anu bu Kristo

‘Nukoleshe mitshima yenu; ngakupita ba pa buloba bukole.’​—YONE 16:33.

1. Mmushindu kayi uvua Yezu mutumikile Nzambi mu malu onso?

YEZU KRISTO uvua wenza disua dia Nzambi misangu yonso. Kavua muanji kuteta musangu nansha umue bua kubenga kutumikila Tatuende wa mu diulu. (Yone 4:34; Eb. 7:26) Ntatu yakapetaye pa buloba kayivua mimupepejile malu bua kutumikilaye Nzambi to. Katshia anu ku ntuadijilu kua mudimu wa Yezu wa kuyisha, baluishi bende too ne Satana muine bakateta bua kumufikisha bua kubenga kutumikila Nzambi, kumuenzejabu ne kumuteyabu anu bua alekele lulamatu luende kudi Nzambi. (Mat. 4:1-11; Luka 20:20-25) Baluishi aba bakakengesha Yezu mu lungenyi ne ku mubidi bikole. Ndekelu wa bionso bakamushipela ku mutshi wa makenga. (Mat. 26:37, 38; Luka 22:44; Yone 19:1, 17, 18) Kadi mu malu onso aa, nansha mu makenga makole, Yezu wakashala anu ‘mutumikidi too ne ku lufu.’​—Bala Filipoi 2:8.

2, 3. Ntshinyi tshitudi mua kulongela ku mushindu uvua Yezu mutumikile Nzambi nansha pavuaye mu ntatu ne makenga?

² Ntatu ivua Yezu mupete pa buloba yakamuambuluisha bua kumanya mishindu mikuabu ya kutumikila Nzambi. (Eb. 5:8) Bidi bimueneka bu ne: Yezu kavua ne tshintu tshikuabu tshivuaye ne bua kulonga bua mushindu wa kuenzela  Yehowa mudimu, bualu ukavua musombe ne Yehowa bidimu bipite bungi ne uvua “muena mudimu” wende munene pavuaye ufuka bintu. (Nsu. 8:30) Kadi wakaleja muvuaye utumikila Nzambi mu malu onso pavuaye mutantamene ntatu yonso ivuaye mupete pa buloba ne ditabuja. Yezu Muana wa Nzambi wakakolesha malanda ende ne Tatuende. Ntshinyi tshitudi mua kulongela kudiye?

³ Nansha muvua Yezu muntu mupuangane, kakateta bua kutumikila Nzambi mu malu onso ku bukole buende nkayende to. Uvua ulomba Nzambi bua amuambuluishe bua kumutumikila. (Bala Ebelu 5:7.) Bua tuetu kuikala kutumikila Nzambi, tudi petu ne bua kudipuekesha ne kulomba Nzambi diambuluisha misangu yonso. Mupostolo Paulo wakabela bena Kristo bua bualu ebu ne: ‘Nuikale ne meji aa munda muenu akadi kabidi munda mua Kristo Yezu,’ bualu ‘wakadipuekesha, wakalua mutumikidi too ne ku lufu.’ (Filip. 2:5-8) Nsombelu wa Yezu wakaleja ne: bantu badi mua kutumikila Nzambi nansha bobu munkatshi mua bantu babi. Yezu yeye uvua muntu mupuangane, kadi netuambe tshinyi buetu tuetu bena mapanga?

Tudi mua kutumikila nansha mutudi bena mapanga

4. Kuikala ne bukokeshi bua kudisunguila malu kudi kumvuija tshinyi buetu tuetu?

⁴ Nzambi wakafuka Adama ne Eva, kubapeshaye lungenyi ne bukokeshi bua kudisunguila malu. Bu mutudi bana babu, tudi petu ne bukokeshi bua kudisunguila malu. Bualu ebu budi bumvuija tshinyi? Budi bumvuija ne: tudi mua kusungula bua kuenza malu mimpe anyi mabi. Mu mêyi makuabu, Nzambi mmutupeshe bukokeshi bua kusungula bua kumutumikila anyi kubenga kumutumikila. Kadi bukokeshi ebu budi butuela dibanza bualu mapangadika atudi tuangata adi mua kutukebela lufu anyi muoyo. Adi kabidi alenga bantu batudi tusomba nabu.

5. Ndutatu kayi lutudi nalu tuetu bonso? Mmushindu kayi utudi mua kulutantamena?

⁵ Bua mibi itudi bapiane, kutumikila Nzambi kakutu kudiluila nkayaku to. Kabitu bitekete bua kutumikila mikenji ya Nzambi misangu yonso to. Paulo uvua pende ne lutatu elu, bualu wakamba ne: ‘Ndi mmona mukenji mukuabu mu mubidi wanyi udi uluangana ne mukenji wa mu meji anyi, ne udi umbueja mu bupika bua mukenji wa bubi udi mu mubidi wanyi.’ (Lomo 7:23) Bushuwa, padi kutumikila Nzambi kakuyi kutulomba malu a bungi anyi kutukebela ntatu, bitu bitekete bua kumutumikila. Kadi ntshinyi tshitutu tuenza padi ‘lukuka lua mubidi, ne lukuka lua mêsu’ bibengangana ne dijinga dietu dia kutumikila Nzambi? Majinga mabi aa atu afumina ku dipanga bupuangane dietu ne kudi ‘nyuma wa pa buloba’ udi miaba yonso, ne atu ne bukole bua bungi. (1 Yone 2:16; 1 Kol. 2:12) Bua kuakandamena, tudi ne bua ‘kulongolola muoyo wetu’ kumpala kua tuetu kupeta ntatu anyi mateta ne tudi ne bua kudisuika bua kutumikila Yehowa nansha mu ntatu ya mushindu kayi. (Mus. 78:8, NW) Tudi ne bilejilu bia bantu ba bungi ba mu Bible bavua batumikile Nzambi bualu bavua badianjile kulongolola mioyo yabu.​—Eze. 7:10; Dan. 1:8.

6, 7. Leja mudi didilongela Bible mua kutuambuluisha bua kuangata mapangadika mimpe.

⁶ Tudi mua kulongolola muoyo wetu patudi tulonga Bible ne muoyo mujima, tulonga kabidi mikanda yetu. Difuanyikija mu nsombelu udi ulonda eu. Tekabi ne: tudi dituku diutu udilongela Bible. Udi ufuma ku dilomba Yehowa nyuma wende bua akuambuluishe bua kutumikila biudi mubale mu Dîyi diende. Udi mulongolole bua kutangila filme kampanda ku televizion dituku didi dilonda. Ukadi mumvue ne: bantu ba bungi badi bamuanyisha bikole nansha muudi mumanye kabidi ne: udi ne amue malu a tshiendenda ne a tshikisu.

⁷ Udi wela meji ku mubelu wa Paulo udi mu Efeso 5:3 udi wamba ne: ‘Tshiendenda ne malu a bundu ne dikuma dia mutshima kabitedibu mene munkatshi muenu; ebu budi buimpe bua bansantu benze.’ Udi uvuluka kabidi mubelu wa Paulo udi mu Filipoi 4:8. (Bala.) Paudi wela meji pa mvese eyi udi udiebeja ne: ‘Meme mulekele malu a mushindu eu abuela mu muoyo wanyi ne mu lungenyi luanyi, ndiku ndonda tshilejilu tshia Yezu tshia kutumikila Nzambi mu malu  onso anyi?’ Newenze tshinyi? Newenze anu tshiuvua mulongolole ne kutangila filme au anyi?

8. Bua tshinyi katuena ne bua kutekesha dipangadika dietu dia kutumikila Nzambi?

⁸ Nebikale bibi tuetu batekeshe dipangadika dietu dia kutumikila Nzambi, tuela meji pamuapa ne: tudi ne bukole bua kusomba ne balunda babi kabayi batunyanga, nansha balunda aba bikale malu a tshikisu anyi a tshiendenda atudi tutangila ku televizion. Kadi tudi ne bua kudilama tuetu bine ne kulama kabidi bana betu ku malu mabi aa adibu benza kudi bantu badi Satana ukokesha. Tshilejilu, bantu badi basue kuikala ne makanda a mubidi kabatu badia bintu bionso tshianana tshianana to. Kadi batu benza muabu muonso bua kabadi bintu bidi mua kubapetesha masama. Katuenaku mua kuenza bia muomumue bua kudilama ku “mateyi” a Satana anyi?​—Ef. 6:11.

9. Bua tshinyi tudi ne bua kudisuika bua kutumikila Yehowa dituku dionso?

⁹ Dituku dionso edi, tutu tusungula mu mushindu kampanda anyi kansanga ni tudi basue kuenza malu adi asankisha Yehowa anyi kubenga kuenza. Bua kupanduka, tudi ne bua kutumikila Nzambi ne kulonda mikenji yende. Patudi tutumikila Nzambi ‘too ne ku lufu’ anu bu Kristo, tudi tuleja mutudi ne ditabuja dilelela. Yehowa neatubeneshe bua lulamatu luetu. Yezu wakamba ne: ‘Wananukila too ne ku nshikidilu neasungidibue.’ (Mat. 24:13) Nunku, tudi ne bua kuikala ne dikima dikole anu bu divua nadi Yezu.​—Mus. 31:24.

Yezu udi tshilejilu tshinene tshia dikima

10. Ntatu kayi itudi tupeta? Ntshinyi tshitudi ne bua kuenza?

¹⁰ Bu mutudi munkatshi mua bantu badi benza malu bilondeshile lungenyi lua pa buloba ebu, tudi ne bua kuikala ne dikima bua kabatunyangi. Bena Kristo badi batuilangana ne ntatu ya miaba idibu basombele, ya makuta ne ya malu a ntendelelu idi mua kubapangisha bua kulonda njila ya Yehowa. Badi bakengesha ba bungi ba kudibu kudi bena mu mêku abu. Mu matunga makuabu, batu balongesha mu tulasa ne: bintu bionso mbidienzekele ne bantu ba bungi kabatshiena bitaba ne: Nzambi udiku to. Kumpala kua malu onso aa, katuena ne bua kushala anu bavunga maboko to. Tudi ne bua kuenza bualu kampanda bua kuatantamena ne kudilama. Tshilejilu tshia Yezu tshidi tshituleja tshia kuenza.

11. Mmushindu kayi udi kuelela meji pa tshilejilu tshia Yezu kutupetesha dikima dia bungi?

¹¹ Yezu wakambila bayidi bende ne: ‘Pa buloba nudi ne dikenga; kadi nukoleshe mitshima yenu; ngakupita ba pa buloba bukole.’ (Yone 16:33) Wakakandamena malu onso adi alonda lungenyi lua pa buloba. Kakitaba bua malu a pa buloba amupangishe bua kuenza mudimu wende wa kuyisha anyi bua kutekesha dipangadika diende dia kutendelela Nzambi ne dia kuenza malu mimpe to. Ke tshitudi petu ne bua kuenza. Yezu wakamba mu disambila bua bayidi bende ne: ‘Bobu kabena ba pa buloba, bu mundi meme tshiyi wa pa buloba.’ (Yone 17:16) Kulonga tshilejilu tshia dikima dia Kristo ne kuelelapu meji kudi mua kutupetesha dikima dia kubenga kubuelakana mu malu a pa buloba.

 Tulongele dikima kudi Yezu

12-14. Fila bilejilu bia muvua Yezu muleje dikima diende.

¹² Yezu uvua ne dikima dia bungi pavuaye wenza mudimu wende pa buloba. Bu muvuaye Muana wa Nzambi, wakenza mudimu ne bukokeshi buende ne ‘kubuela mu ntempelo wa Nzambi ne dikima dionso, kuipata bonso bakadi bapana bintu ne bakadi basumba bintu mu ntempelo, kutonkola mesa a bashintakaji ba mpalata ne nkuasa ya basumbishi ba nyunyi ya nkutshi.’ (Mat. 21:12) Pavua basalayi balue bua kumukuata butuku bua muladilu wa lufu luende, wakadileja patoke ne dikima dionso bua kukuba bayidi bende wamba ne: ‘Binuikala nunkeba meme, lekelayi aba baye.’ (Yone 18:8) Mutantshi mukese pashishe, wakambila Petelo bua kupingaja muele wende ku mukaba bua kuleja ne: Yezu kavua weyemena bia mvita bia pa buloba to, kadi uvua weyemena Yehowa.​—Yone 18:11.

¹³ Yezu wakela balongeshi ba dishima bavua kabayi ne dinanga patoke ne kuleja ne dikima dionso muvua malongesha abu mikale a dishima. Wakabambila ne: ‘Nuenu bafundi ne Bafalese, nudi bena lubombo, mulawu ulualua kunudi, bualu bua nuenu nudi nuinjidila bantu tshiibi tshia bukalenge bua mu diulu. Nudi nulekela kuenza malu makole a mikenji ya Nzambi, bulelela ne luse ne ditabuja. Nudi nuuvua pa nyima pa lupanza ne dilonga, kadi munda muabi mudi bunyengi ne mudi.’ (Mat. 23:13, 23, 25) Bayidi ba Yezu bavua ne bua kuikala ne dikima bu diende bualu bamfumu ba bitendelelu bavua ne bua kubakengesha pabu ne kushipa bamue ba kudibu.​—Mat. 23:34; 24:9.

¹⁴ Yezu uvua ukandamena nansha bademon ne dikima. Dituku dikuabu, wakapetangana ne muntu uvua ne bademon ba bungi ne uvua ne bukole bua bungi bualu kakuvua muntu nansha umue uvua ukokesha bua kumusuika ne shene to. Yezu kakatshina to, kadi wakipata bademon bavua bakuate muntu au. (Mâko 5:1-13) Lelu Nzambi kena upesha bena Kristo bukole bua kuenza bishima bia mushindu eu to. Kadi patudi tuyisha bantu ne tubalongesha, tudi petu tuluangana ne Satana udi ‘ufofomija mêsu a meji a badi kabayi ne ditabuja.’ (2 Kol. 4:4) Anu bu Yezu, bia mvita bietu ‘kabiena bia mubidi, kadi bidi bikole ku mêsu kua Nzambi bia kushimbula nabi ngumbu ya mvita’ idi mishindame bikole, idi mikale malongesha a dishima. (2 Kol. 10:4) Patudi tumona muvua Yezu muenze mudimu ne bia mvita bidi Nzambi mutupeshe ebi, tudi tulongela malu a bungi ku tshilejilu tshiende.

15. Yezu uvua wenza malu ne dikima bua tshinyi?

¹⁵ Yezu kavua wenza malu ne dikima anu bua kukemesha bantu to, kadi bualu uvua ne ditabuja. Ke tshitudi petu ne bua kuenza. (Mâko 4:40) Ntshinyi tshitudi mua kuenza bua kupeta ditabuja dikole? Tshilejilu tshia Yezu tshidi tshituambuluisha kabidi mu bualu ebu. Uvua muleje muvuaye mumanye Dîyi dia Nzambi bimpe ne weyemena malu adimu. Yezu kavua wenza mudimu ne muele wetu wa bushuwa eu to, kadi ne muele wa nyuma anyi Dîyi dia Nzambi. Uvua ne tshibidilu tshia kutela Dîyi dia Nzambi bua kujadika malongesha ende. Uvua utamba kuambila bantu ne: ‘Bakafunda dîyi ne’ bua kuamba ne: bavua bafunde mu Dîyi dia Nzambi. *

16. Ntshinyi tshitudi mua kuenza bua kupeta ditabuja dikole?

¹⁶ Bua tuetu kupeta ditabuja didi mua kutantamena ntatu yonso idi ifumina ku dikala bayidi ba Kristo, tudi ne bua kubala Bible dituku dionso ne kumulonga, kubuela mu bisangilu bia bena Kristo bua kubueja malongesha adi mikale  nshindamenu wa ditabuja dietu mu mioyo yetu. (Lomo 10:17) Tudi kabidi ne bua kuela meji bikole pa malu atudi tulonga bua ashale mu muoyo wetu. Anu ditabuja didi ne muoyo ke didi mua kutusaka bua kuenza malu ne dikima. (Yak. 2:17) Tudi kabidi ne bua kulomba Nzambi nyuma wende bualu ditabuja ngikadilu udi nyuma eu upetesha bantu.​—Gal. 5:22.

17, 18. Ntshinyi tshivua muanetu mukuabu wa bakaji muenze bua kuleja muvuaye ne dikima mu tulasa?

¹⁷ Muanetu wa bakaji mukuabu utshidi nsonga diende Kitty wakamona mudi ditabuja dikole dipetesha muntu dikima. Katshia anu ku buana buende, uvua mumanye ne: kavua ne bua ‘kufua bundu bua lumu luimpe’ mu tulasa, ne uvua musue kuyisha balongi nende. (Lomo 1:16) Tshidimu tshionso uvua udisuika bua kuyisha balongi nende lumu luimpe, kadi kavua ubayisha bualu uvua ne buôwa. Bidimu bikese pashishe, wakaya mu tshilongelu tshikuabu. Wakadiambila ne: “Bua musangu eu, tshiakushala kabidi mupuwe to.” Kitty wakalomba Nzambi dikima dia buena dia Kristo, budimu ne bikondo bimpe bivuaye ne bua kuyisha.

¹⁸ Dituku dia kumpala dia kalasa, mulongeshi wakalomba mulongi yonso bua kudimanyisha kumpala kua bakuabu. Balongi ba bungi bakakula bua bitendelelu biabu, kadi kulejabu ne: kabavua batamba kulonda malongesha abi to. Kitty wakamona ne: ke tshikondo tshivuaye mulombe Nzambi bua kuyisha atshi. Pakafika dîba dia yeye kudimanyisha, wakamba ne dishindika dionso ne: “Ndi Ntemu wa Yehowa ne Bible ke udi undombola mu malu anyi a ntendelelu ne mu bienzedi bianyi.” Pavuaye wenda wakula, bamue balongi bakabipisha kuisu. Kadi bakuabu bakamuteleja ne ntema yonso ne kuluabu kumuela nkonko. Mulongeshi wakambila balongi bakuabu muvua Kitty tshilejilu tshimpe tshia muntu udi ulonda malongesha a tshitendelelu tshiabu. Kitty udi ne disanka dia bungi bua mudiye mulongele dikima ku tshilejilu tshia Yezu.

Tuikale ne ditabuja ne dikima anu bu Kristo

19. (a) Kuikala ne ditabuja dikole kudi kumvuija tshinyi? (b) Ntshinyi tshitudi mua kuenza bua kusankisha Yehowa?

¹⁹ Bapostolo bakamona pabu ne: malu onso avuabu benza ne dikima avua ne bua kufumina ku ditabuja diabu. Ke bualu kayi bakasengelela Yezu ne: ‘Udiundishe ditabuja dietu.’ (Bala Luka 17:5, 6.) Kuikala ne ditabuja dikole kakuena kumvuija anu kuitaba ne: Nzambi udiku to. Kadi kudi kumvuija kuikala mu malanda makole ne Yehowa anu bu malanda atu pankatshi pa muana mutekete ne tatuende udi mumunange. Solomo wakafunda ku bukole bua nyuma ne: ‘Muananyi, bikala mutshima webe ne meji, mutshima wanyi mene newikale ne disanka. Bulelela, mutshima wanyi neusanke pamba mishiku yebe mêyi makane.’ (Nsu. 23:15, 16) Bia muomumue, patudi tulonda mikenji ya mu Bible ne dikima, Yehowa udi usanka ne bualu ebu budi buvudija dikima dietu. Nunku, tuikalayi tuidikija Yezu misangu yonso, tuimanyina malu makane ne dikima dionso.

[Mêyi adi kuinshi]

Udi muvuluke anyi?

• Ntshinyi tshiatuambuluisha bua kutungunuka ne kutumikila Nzambi nansha mutudi bena mapanga?

• Ditabuja dilelela ditu difumina ku tshinyi? Mmushindu kayi udi bualu ebu mua kutupetesha dikima?

• Ntshinyi tshienzeka tuetu tutumikila Nzambi ne tuenza malu ne dikima bu Kristo?

[Nkonko ya dilonga]

[Tshimfuanyi mu dibeji 13]

Udi ‘ulongolola muoyo webe’ bua kutantamena mateta anyi?

[Tshimfuanyi mu dibeji 15]

Tudi mua kuleja mudi dikima dietu difumina ku ditabuja dietu anu bu Yezu