Krista Anga Huaisenin Thu I Awih Ang U
Krista Anga Huaisenin Thu I Awih Ang U
“Huai takin awm rawh u! Keiin khawvêl ka ngam ta.”—JOH. 16:33, NW.
1. Engtiang khawpin nge Isua’n Pathian thu a awih?
ISUA KRISTA chuan Pathian duhzâwng a ti reng ṭhîn a. A Pa vâna mi thu âwih loh chu ngaih pawh a ngaihtuah chhin ngai lo. (Joh. 4:34; Heb. 7:26) Mahse, he leia a thiltawnte chuan a tân thu âwih a tiawlsam lo hle. Thu a hrilh ṭan tirh aṭangin, Isua chu Setana pawh tiamin a hmêlmate chuan a rinawmna kawng kalsan tûra hmin, nawr luih, a nih loh leh bum an tum a. (Mt. 4:1-11; Lk. 20:20-25) Chûng hmêlmate avângin Isua chuan rilru lam, thinlung lam, leh tisa lamah nasa takin a tawrh phah a ni. A tâwpah phei chuan, nghaisakna banah an tihlum hial a ni. (Mt. 26:37, 38; Lk. 22:44; Joh. 19:1, 17, 18) Chûng thil zawng zawng bâkah hrehawm nasa tak hnuaiah pawh Isua chu “thi khawp hiala thu zâwmin” a awm a ni.—Philippi 2:8 chhiar rawh.
2, 3. Hrehawm tuar chung pawha Isua thu âwihna aṭangin eng nge kan zir theih?
2 Leia mihring anga a thiltawn aṭangin, Isua chuan a hmaa a la tawn ngai miah loh, dinhmun harsa tak hnuaia thu âwih dân chu a zir a ni. (Heb. 5:8) Isua tân chuan Pathian Jehova rawngbâwlna kawngah zir belh tûr awm niin a lang lo mai thei. Ani chu kum chhiarsên loh chhûng Pathian Jehova nêna inṭhianna hnai tak neiin, thil siam hun chhûng zawng pawhin Pathian tân “mi themthiam angin” a lo awm tawh si a. (Thuf. 8:30) Amaherawhchu, mihring a nih laia hrehawm hnuaia rinna avânga a chhelna chuan a rinawm ngheh pumhlûmzia a târ lang. Pathian Fapa, Isua chuan a Pa chu a hnaih lehzual a ni. A thiltawn aṭangin eng nge kan zir theih?
3 Isua chu mi ṭha famkim mah ni se, ama theihna rinchhana thu âwih famkim chu a tum lo va. Thu a âwih reng theih nân Pathian hnênah ṭanpuina a dîl a ni. (Hebrai 5:7 chhiar rawh.) Kan tân pawh thu âwih reng tûr chuan inngaihtlâwmna neih leh Pathian ṭanpuina dîl ziah a ngai a ni. Chuvângin, tirhkoh Paula chuan Kristiante chu: “He rilru, Krista Isua pawha awm bawk kha, nangmahniah awm rawh se” tiin a zilh a ni, Isua chu “a inngaitlâwm a, thi khawp hiala thu zâwmin a lo awm” si a. (Phil. 2:5-8) Isua nun kawng chuan he khawvêl suaksual tak kârah pawh mihringte tân thu âwih theih a nihzia a târ lang. Isua chu mi ṭha famkim a ni ngei mai a; chuti chu, keini mi ṭha famkim lote tân thu âwih chu thil theih a ni em?
Ṭha Famkim Lo Chung Pawhin Thu Kan Awih Thei
4. Zalên taka duh thlan theihna neia siam kan nihna chuan kan tân eng awmzia nge a neih?
4 Pathian chuan Adama leh Evi chu finna leh zalên taka duh thlan theihna neiin a siam a. An thlahte kan nih avângin, keini pawhin zalên taka duh thlan theihna chu kan nei ve a ni. Chu mi awmzia chu eng nge ni? Chu chu thil ṭha ti tûr emaw, thil sual ti tûr emawin duh kan thlang thei tihna a ni. Thu danga sawi chuan, Pathianin a thu âwih emaw, âwih loh emaw thlang tûrin zalênna min pe tihna a ni. Chûng zalênna ropui tak chuan mawhphurhna a keng tel a. Kan duh thlanna siam chu kan tân nunna emaw, thihna emaw a nih theih tak zet bâkah, min ngainatute pawh a nghawng tel thei bawk a ni.
5. Kan za hian eng harsatna nge kan tawh a, chu chu engtin nge hlawhtling taka kan hmachhawn theih ang?
5 Kan rochun ṭhat famkim lohna avângin thu âwih chu harsa kan ti ṭhîn a. Pathian dânte zawm chu a awlsam ṭhîn lo. Paula chuan chu harsatna chu a tâwk a. Hetiang hian a ziak a ni: “Ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah min hruai ṭhîn,” tiin. (Rom 7:23) Mahni inpêkna te, hrehawm tawrhna te, a nih loh leh remchân lohna te a awm loh hunah chuan thu âwih chu a awlsam zâwk ngei mai. Mahse, thu âwih kan duhna chu “tisa châkna te, mit châkna te” nêna a inkalh hunah engtin nge kan chhân lêt? Chûng châkna ṭha lote chu kan ṭhat famkim lohna aṭang leh min hual vêltu “khawvêl thlarau” aṭanga lo chhuak a ni a, thil an tithei êm êm a ni. (1 Joh. 2:16; 1 Kor. 2:12) Chûngte do thei tûr chuan, dinhmun khirh emaw, thlêmna emaw kan hmachhawn hmain ‘kan thinlung kan siam,’ a nih loh leh kan buatsaih a, eng dinhmun hnuaiah pawh Pathian Jehova thu âwih kan tum tlat a ngai a ni. (Sâm 78:8) Bible-ah hian an thinlung an siam avânga hlawhtling ta entawn tûr tam tak an awm a ni.—Ezr. 7:10; Dan. 1:8.
6, 7. Mahnia inzirnain duh thlanna finthlâk tak siam tûra min ṭanpui theih dân entîrna pe rawh.
6 Kan thinlung kan buatsaih theih dân kawng khat chu Bible leh Bible ṭanchhan thu leh hla chhuahte taima taka zir hi a ni. A hnuaia dinhmuna awm angah hian han inchan teh. Mahnia inzirna i neih zân a ni a. Pathian Jehova hnênah chuan a Thu i zirte i nunpui theih nân ṭanpuina i dîl zo chiah a ni. A tûk tlaiah chuan TV-ah film pakhat chu en i tum a. I film en tum chu faksêltute’n an fak mawi tih i hria a; chuti chung pawhin, nungchang bawlhhlawhna leh tharum thawhna a tel tih i hre bawk a ni.
7 Chutah, Ephesi 5:3-a Paula fuihna thu: “Mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se,” tih thu chu i ngaihtuah a. Philippi 4:8-a thurâwn pawh chu i hre chhuak bawk a ni. (Chhiar rawh.) Chûng thlarauva thâwk khum fuihna thute chhût ngunin, ‘Chûng film-ahte ka rilru leh thinlung ka pêk luih chuan, Pathian thu âwih tlatna kawnga Isua entawn tûr siam chu ka zui a ni thei ang em?’ tiin i inzâwt ta a ni. Engtin nge i tih tâk ang? Chu film chu i en tho tho dâwn em ni ang?
8. Engvângin nge nungchang leh thlarau lama tehna sângte chu kan vawn ṭhat ang?
8 Tharum thawhna leh nungchang bawlhhlawhna lama intihhlimna hmanga ṭhian sual kawm pawh tiamin, ṭhian sual kawmna rêng rêngin kan chungah nghawng pawi tak a nei thei a. Chûngte do thei tûra chak tâwka kan inhriat avânga nungchang leh thlarau lama tehna sângte kan vawn ṭhat loh chuan a pawi ngawt ang. Chutianga ti lovin, Setana thlarau thununna ṭha lo lakah keimahni leh kan fate kan vênghim zâwk tûr a ni. Computer hmangtute chuan an computer chu kawng chi hrang hranga tichhe theitu virus-te laka vêng him tûrin taima takin hma an la ṭhîn. Chuti chu, Setana ngamthlêmnate laka invêng him tûr chuan kan harhvâng lehzual tûr a ni lâwm ni?—Eph. 6:11.
9. Engvângin nge nî tin hian Pathian Jehova thu âwih kan tum tlat ang?
9 Nî tin deuhthaw hian, Pathian Jehova duhzâwngin thil kan ti dâwn nge dâwn lo tih chungchângah eng kawng emaw takin duhthlanna kan siam a ngai a. Chhandamna hmu tûr chuan, Pathian thu kan âwih a, a thu bul felte mila kan nun a ngai a ni. Isua’n ‘thi khawp hiala thu a zawmna’ chu entawnin, kan rinna a takzia kan lantîr thei a. Kan rinawmna chu Pathian Jehova’n mal a sâwm ang. Isua chuan: “A tâwp thlenga tuar peih apiang chu, chu mi ngei chu chhandamin a awm ang,” tih a tiam a ni. (Mt. 24:13) Chutiang ni tûr chuan Isua târ lan ang huaisenna dik tak neih a ngai tih a chiang hle.—Sâm 31:24.
Isua—Huaisenna Kawnga Entawn Tûr Ropui Ber
10. Eng ang nêksâwrnate nge kan tawn theih a, chûngte chu engtin nge kan chhân lêt ang?
10 He khawvêl rilru put hmang leh nungchang hual vêla awm kan nih avângin, chûng thilte min tihbawlhhlawhna do tûrin kan huaisen a ngai a ni. Kristiante chuan Pathian Jehova kawng felte aṭanga pêntîr thei nungchang lam te, khawtlâng lam te, sum leh pai lam te, leh sakhaw lama nêksâwrna te an tawng a. Mi tam tak chuan an chhûngkaw zînga mite hnên aṭangin dodâlna an tâwk a ni. Ram ṭhenkhatah chuan, zirna lamte chuan chan chhâwnna ngaih dân chu an zirtîr uar lehzual a, Pathian awm rin lohna pawhin ngaihsak a hlawh lehzual a ni. Chutiang nêksâwrna kan hmachhawnte chu kan ngaihthah mai thei lo. Do va, lo invênghim tûrin hma kan lâk a ngai a. Isua entîrna chuan kan hlawhtlin theih dân min kawhhmuh a ni.
11. Engtin nge Isua entawn tûr siam ngaihtuahna chuan huaisenna min pêk belh theih?
11 Isua chuan a zirtîrte hnênah: “Khawvêlah hian hrehawmin in awm ṭhîn; nimahsela, thlamuang takin [“huai takin,” NW] awm rawh u, keiin khawvêl ka ngam ta,” tiin a hrilh a. (Joh. 16:33) Ani chu he khawvêl thununna hnuaiah hian a tlâwm ngai lo va. He khawvêlin a thu hrilh rawngbâwlna a tihtâwp emaw, biakna dik leh nungchang dik tehna sâng a neihte a tihhniam emaw chu a remti ngai lo va; keini pawhin kan remti tûr a ni lo. Isua chuan a ṭawngṭainaah a zirtîrte chungchâng chu: “Khawvêla mi an ni lo, kei khawvêla mi ka ni lo ang bawk hian,” tiin a sawi. (Joh. 17:16) Huaisenna kawnga Krista entawn tûr siam zirna leh ngaihtuahna chuan khawvêl laka inla hrang tûra kan mamawh huaisenna min pe thei a ni.
Isua Hnên Aṭangin Huaisen Zir Rawh
12-14. Isua’n huaisenna a lantîr dân entîrna pe rawh.
12 Isua chuan a rawngbâwl chhûng zawng khân huaisenna nasa tak a lantîr a. Pathian Fapa a nih anga a thuneihna chu hmangin, huaisen takin “Pathian biak inah chuan a va lût a, biak ina englo zuartute leh leitute zawng zawng chu a hnawt chhuak a, tangka thlengtuho dawhkânte leh ṭhuro zuarho ṭhutphahte pawh chu a nam thlûksak” a ni. (Mt. 21:12) He leia a nun tâwp zâna amah man tûra sipaiho an lo kal khân, Isua chuan a zirtîrte humhim nân huaisen taka rawn pên chhuakin: “Nangnin kei mi zawng in nih chuan hêngho hi thlah ṭha rawh u,” tiin a sawi a. (Joh. 18:8) A hnu lawkah chuan, Petera hnênah a khandaih dah bo tûra hrilhin, Isua chuan a rinchhan chu khawvêl hriamhreite ni lovin, Pathian Jehova a nih zâwkzia a târ lang a ni.—Joh. 18:11.
13 Isua chuan a hun laia hmangaihna nei lo zirtîrtu derte leh an zirtîrna dik lote chu huaisen takin a hai lang a. An hnênah chuan: “Nangni lehkhaziaktu leh Pharisai vervêkte u, in chung a pik e! vân ram kawng chu mite in khârsak si ṭhîn. . . . Dân thu pawimawh zâwk—felna te, khawngaihna te, rinawmna te chu—in ngaihthah si ṭhîn. . . . No leh thlêng pawn lam in silfai a, a chhûng erawh chu hlêprûkna leh insûm lohnain a khat si a,” tiin a sawi a ni. (Mt. 23:13, 23, 25) Isua zirtîrte pawhin chutiang huaisenna chu an mamawh ngei ang; sakhaw hruaitu derte’n anni pawh an tihduhdah a, an zînga ṭhenkhat an tihhlum bawk dâwn avângin.—Mt. 23:34; 24:9.
14 Isua chuan ramhuaiho pawh huaisen takin a do bawk a. Ṭum khat pawh, ramhuai man mi pakhat chak tak, khaidiat pawha tuma phuar ngheh theih loh chuan a hmachhawn a. Isua chuan chu pa thunun tlattu ramhuai tam takte chu hlau lovin a hnawt chhuak a ni. (Mk. 5:1-13) Tûn laiah, Pathianin chutianga thilmakte ti thei tûrin Kristiante hnênah thiltihtheihna a pe tawh lo va. Chutichung pawhin, kan thu hrilh leh zirtîr siamnaah hian ‘ring lote rilru tideltu,’ Setana chu beiin, thlarau lam indonaah kan tel tûr a ni. (2 Kor. 4:4) Isua ang bawkin, kan râlthuamte chu “tisaa mi a ni si lo va, kulhpui nghet takte ṭhiatna tûra Pathian zârah thil ti thei tak a ni zâwk” a ni—chu kulhpui nghet takte chu sakhaw zirtîrna dik lo, mite rilrua nghet tlat site sawina a ni. (2 Kor. 10:4) Hêng thlarau lam râlthuamte hman dân chungchângah Isua entawn tûr siam aṭangin kan inzir ṭeuh thei a ni.
15. Isua huaisenna chu enga innghat nge a nih?
15 Isua huaisenna chu huaina ngawr ngawra innghat ni lovin, rinnaa innghat a ni a. Kan huaisenna pawh chu chutianga innghat a ni tûr a ni. (Mk. 4:40) Engtin nge rinna dik tak chu kan neih theih ang? He mi kawngah pawh hian, Isua entawn tûr siam chuan min kaihruai leh a ni. Ani chuan Pathian Lehkha Thu a hriat chianzia leh a rin pumhlûmzia a lantîr a. Râlthuam ang maiin Isua chuan ngûnhnâm tak tak ni lovin, thlarau lam ngûnhnâm, Pathian Thu chu a vai zâwk a ni. A thu zirtîrte chu Pathian Thu a nihzia târ lan nân Pathian Lehkha Thu hmangin a nemnghet ṭhîn a. ‘Tih ziak a ni,’ tih ṭawngkam hmang fovin, Pathian Thu aṭanga a sawi chhâwn a nihzia a târ lang a ni. *
16. Engtin nge rinna kan neih lehzual theih ang?
16 Krista hnungzuitute tawn ngei tûr fiahnate laka ding nghet thei tûr rinna nei tûr chuan nî tin Bible kan chhiar a, kan zir a ngai a, Kristian inkhâwmnaahte telin, rinna innghahna ber thutak chu rilrua kan dah a ngai a ni. (Rom 10:17) Chu bâkah, kan thil zirte chu kan thinlung thleng ngei tûra kan chhût—ngun taka ngaihtuah—a ngai bawk. Rinna nung chauhvin huaisen taka thil ti tûrin min chêttîr thei a ni. (Jak. 2:17) Tin, rinna chu thlarau rah pêng zînga mi a nih avângin thlarau thianghlim dîlin kan ṭawngṭai tûr a ni bawk.—Gal. 5:22.
17, 18. Engtin nge unaunu tleirâwl pakhatin school-ah huaisenna a lantîr?
17 Unaunu tleirawl pakhat, Kitty-i chuan rinna dik takin huaisenna a awmtîr theihzia a tawng a. Ani chuan a naupan lai aṭang rêngin, school-ah “chanchin ṭha chu [a] zahpui” tûr a ni lo tih a hria a, school-a a ṭhiante hnêna chanchin ṭha hrilh chu a duh tak zet a ni. (Rom 1:16) Kum tinin, mi dangte hnêna chanchin ṭha hrilh chu a tum ṭhîn a; mahse, huaisenna a tlâk chham avângin a thei leh ṭhîn lo. A hnuah chuan a school kalna chu a thlâk a. “Tun ṭum chu, ka lo hmaih tawhte aiah hun remchâng ka hmuh apiang ka hmang ṭangkai tawh ang” a ti a. Tichuan, Kitty-i chu Krista neih ang huaisenna te, remhriatna te, leh hun remchâng ṭha te nei tûrin a ṭawngṭai ta a ni.
18 A school kal hmasak ber nî chuan naupangte chu mahni inhmêlhriattîrna nei tûrin a mal tê têa koh an ni a. An zînga mi engemaw zât chuan an sakhaw zawm hming sawi langin, an thurin an nunpui tak tak loh thu an sawi belh ṭhîn a ni. Katty-i chuan chu chu a hun remchâng dîl chiah chu a ni tih a hria a. A hun a rawn thlen chuan, “Jehova Thuhretute zînga pakhat ka ni a, thlarau lam leh nungchang lama min kaihruaitu ber chu Bible hi a ni,” tiin inring tâwk takin a sawi a. A han sawi zawm chuan naupang ṭhenkhat chuan an lo ner khum vêl a. Mahse ṭhenkhat dang chuan ngun taka ngaithlain, a hnuah zawhnate an zâwt thung a ni. An zirtîrtu pawhin, Katty-i chu mahni thurin humhimna kawnga entawn tûr ṭhaah a hmang hial a. Katty-i chu huaisenna kawnga Isua entawn tûr a zui avâng chuan a lâwm hle a ni.
Krista Neih Ang Rinna leh Huaisenna Lantîr Rawh
19. (a) Rinna dik tak neihnaah eng nge tel? (b) Engtin nge Pathian Jehova kan tihlâwm theih?
19 Tirhkohte pawhin an huaisenna thiltih chu rinnaa innghat a ni tûr a ni tih an hria a. Isua hnênah: “Kan rin tiphui deuh vang che,” tiin an ngên a ni. (Luka 17:5, 6 chhiar rawh.) Rinna dik tak neih chu Pathian a awm tih rinna neih mai a ni lo. Chutah chuan Pathian Jehova nêna inlaichînna nghet leh ṭha tak, hmangaihna leh khawngaihna nei tak pa ber leh a fa naupang inkâra awm inlaichînna ang neih chu a tel a ni. Thlarauva thâwk khumin, Solomona chuan heti hian a ziak a ni: “Ka fapa, i rilru a fin chuan ka thinlung a lâwm tak tak ang. A ni, i kâin thil dik a sawiin ka rilru a hlim ang,” tiin. (Thuf. 23:15, 16) Chutiang bawkin, thu bul felte atâna huaisen taka kan dinna chuan Pathian Jehova a tilâwm a, chu chuan kan huaisenna a tizual a ni. Chuvângin, Isua entawn tûr siam chu zui zêlin, felna atân huaisen takin i ding ang u! (w09 9/15)
[Footnote]
^ par. 15 Entîr nân, Matthaia 4:4, 7, 10; 11:10; 21:13; 26:31; Marka 9:13; 14:27; Luka 24:46; leh Johana 6:45; 8:17 te en rawh.
Kan Hrilhfiah Thei Em?
• Engin nge ṭha famkim lo kan ni chung pawha thu min âwihtîr reng thei ang?
• Rinna chu engah nge a innghah a, chu chuan engtin nge min tihhuaisen theih?
• Thu âwihna leh Krista neih ang huaisenna kan lantîrna chuan eng rah nge a chhuah ang?
[Zirlai Atâna Zawhnate]
[Phêk 15-naa milem]
Thlêmna do tûrin ‘i thinlung i buatsaih’ em?
[Phêk 17-naa milem]
Isua angin, rinnaa innghat huaisenna kan lantîr ve thei