Imitá Kristu Su Obedensia i Kurashi

“Tene kurashi, mi a vense mundu.”—JUAN 16:33.

1. Splika te kon leu Hesus a obedesé Dios.

HESUKRISTU semper a hasi Dios su boluntat. Nunka el a pensa di desobedesé su Tata selestial. (Juan 4:34; Heb. 7:26) Pero debí na e kosnan ku el a eksperensiá riba tera no tabata fásil p’e keda obedesidu. For di tempu Hesus a kuminsá prediká, su enemigunan, inkluso Satanas, a purba konvens’é, fòrs’é òf koh’é den trampa pa asina e bira infiel na su Tata. (Mat. 4:1-11; Luk. 20:20-25) E enemigunan akí a kousa Hesus hopi angustia mental i emoshonal i doló físiko. Finalmente, nan a logra kousa su morto na un staka di tormento. (Mat. 26:37, 38; Luk. 22:44; Juan 19:1, 17, 18, NW) Atraves di tur e kosnan akí i apesar di sufrimentu intenso, Hesus a keda “obedesidu te na morto.”—Fil. 2:8.

2, 3. Kiko nos por siña for di e echo ku Hesus a keda obedesidu apesar di sufrimentu?

² Hesus su bida komo hende riba tera a siñ’é kiko kier men ser obedesidu bou di sirkunstansianan difísil ku e no a yega di eksperensiá mas promé. (Heb. 5:8) Hesus tabatin un asosiashon íntimo ku Yehova pa un periodo hopi largu i a sirbi komo “trahadó eksperto” di Dios durante e kreashon. Pues, kisas ta parse ku e tabata sa tur kos kaba enkuanto sirbi Dios i ku no tabatin nada mas ku e mester a  siña. (Pro. 8:30) Sinembargo, e echo ku e mes a perseverá den fe komo hende apesar di sufrimentu a duna prueba di su integridat perfekto na Yehova. Hesus, e Yu di Dios, a hala mas serka su Tata. Kiko nos por siña for di su eksperensia?

³ Ounke Hesus tabata un hòmber perfekto, e no a trata di keda perfektamente obedesidu riba su mes forsa. El a hasi orashon pidi Dios yudansa p’e keda obedesidu. (Lesa Hebreonan 5:7.) Pa nos por keda obediente, nos tambe mester ta personanan humilde ku ta hasi orashon regularmente pa pidi Dios su yudansa. P’esei, apòstel Pablo a konsehá kristiannan: ‘Laga tin den boso e aktitut mental akí ku tabatin tambe den Kristu Hesus,’ kende “a humiá su mes dor di bira obedesidu te na morto.” (Fil. 2:5-8) E manera ku Hesus a hiba su bida a duna prueba ku hende por keda obediente den un sosiedat malbado. Ta sierto ku Hesus tabata perfekto, pero kiko di hende imperfekto manera nos?

Obediente Apesar di Imperfekshon

4. Kiko e echo ku nos a ser kreá ku boluntat liber ta nifiká pa nos?

⁴ Dios a krea Adam i Eva komo kriaturanan inteligente i ku boluntat liber. Komo nan desendientenan, nos tambe tin boluntat liber. Kiko esei ta nifiká? E ta nifiká ku nos por skohe pa hasi loke ta bon òf loke ta malu. Ku otro palabra, Dios a duna nos e libertat di skohe pa obedes’é òf desobedes’é. Pero, huntu ku e libertat ei ta bini responsabilidat tambe. Sí, e desishonnan ku nos ta tuma relashoná ku loke ta bon i malu ta nifiká bida òf morto pa nos. Ademas, nan tin efekto riba e hendenan mas yegá na nos.

5. Ki lucha nos tur tin, i kon nos por tin éksito?

⁵ Debí na nos imperfekshon heredá, nos inklinashon natural no ta pa obedesé. No ta tur biaha ta fásil pa obedesé Dios su leinan. Pablo tabatin e lucha akí, i el a skirbi: “Den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi prezu di e lei di piká, kual ta den mi miembronan.” (Rom. 7:23) Ta klaru ku ta mas fásil pa obedesé ora no tin sakrifisio, doló ni difikultat enbolbí. Pero kon nos ta reakshoná ora nos deseo pa keda obediente ta na konflikto ku “e deseo di karni i e deseo di wowo”? Nos ta haña e deseonan robes akí debí na nos imperfekshon i tambe debí na influensia di “e spiritu di mundu” ku ta rondoná nos, i nan por tin un influensia poderoso riba nos. (1 Juan 2:16; 1 Kor. 2:12) Pa resistí nan, nos tin ku ‘prepará nos kurason’ promé ku nos haña nos ku un situashon difísil òf tentashon i determiná di antemano ku nos lo obedesé Yehova maske kiko ku pasa. (Sal. 78:8) Nos tin hopi ehèmpel bíbliko di personanan ku a logra keda obediente pasobra nan a prepará nan kurason.—Esd. 7:10; Dan. 1:8.

6, 7. Ilustrá kon estudio personal por yuda nos tuma desishonnan sabí.

⁶ Un manera pa prepará nos kurason ta dor di studia e Skritura i publikashonnan basá riba Beibel diligentemente. Imaginá bo mes den e siguiente situashon. Suponé ku ta e anochi ku bo ta hasi estudio personal. Bo a kaba di hasi orashon pidi Yehova su spiritu santu pa yuda bo apliká loke bo ta siña for di su Palabra. Promé ku esei, bo a plania pa wak un sierto pelíkula na televishon e siguiente anochi. Bo a tende bon komentario tokante e pelíkula akí; pero bo sa tambe ku e tin algun kos inmoral i violento den dje.

⁷ Bo ta meditá riba Pablo su konseho na Efesionan 5:3: “No laga inmoralidat òf kualke sorto di impuresa òf golosidat ni wòrdu mentá mes meimei di boso, manera ta pas pa santunan.” Bo ta kòrda tambe riba Pablo su konseho na Filipensenan 4:8. (Les’é.) Segun ku bo ta meditá riba e konseho inspirá akí, bo ta puntra bo mes: ‘Si deliberadamente mi eksponé mi kurason i mente na e tipo di programanan ei, mi ta siguiendo Hesus su ehèmpel di obedensia estrikto na Dios?’ Kiko lo bo hasi? Lo bo wak e pelíkula tòg?

8. Dikon nos mester pega na normanan moral i spiritual haltu?

 ⁸ Lo ta un bobedat pa baha nos normanan moral i spiritual, kisas pensando ku nos ta sufisiente fuerte pa resistí e efektonan di mal asosiashon. Esaki ta konta tambe pa asosiashon den forma di entretenimentu violento i inmoral. Pues, en bes di baha nos normanan, nos tin ku protehá nos mes i nos yunan kontra e influensianan perhudisial di e spiritu di Satanas. Usuarionan di kòmpiuter ta hasi hopi esfuerso pa evitá ku nan kòmpiuter ta haña vírus pasobra vírus por destruí tur nan datonan, stroba e kòmpiuter di funshoná bon i asta poderá di e kòmpiuter i us’é pa ataká otro kòmpiuter. Nos tambe no mester vigilá pa protehá nos mes kontra Satanas su “trampanan”?—Efe. 6:11.

9. Dikon tur dia nos mester ta determiná pa obedesé Yehova?

⁹ Práktikamente tur dia, di un òf otro manera, nos tin ku skohe si nos ta obedesé Yehova òf nò. Pa nos por haña salbashon, nos tin ku obedesé Dios i biba na armonia ku su prinsipionan hustu. Ora nos ta sigui Kristu su ehèmpel di obedensia asta “te na morto,” nos ta demostrá ku nos tin berdadero fe. Yehova lo rekompensá nos fieldat. Hesus a primintí: “Esun ku perseverá te na fin, esei lo ta salbá.” (Mat. 24:13) Ta klaru ku pa nos por logra esaki nos mester desplegá e mesun kurashi ku Hesus tabatin.—Sal. 31:24, BPK.

Hesus Ta e Mihó Ehèmpel di Kurashi

10. Ki preshonnan nos por haña nos kuné, i kon nos mester reakshoná?

¹⁰ Debí ku nos ta rondoná ku e aktitut i kondukta di e mundu akí, nos mester di kurashi pa por resistí nan i no wòrdu kontaminá. Kristiannan tin ku lucha ku problemanan finansiero. Ademas, nan ta konfrontá preshon pa partisipá den loke ta malu òf den tradishon- òf práktikanan di religion falsu. E preshonnan akí por pone nos desviá for di e kaminda hustu di Yehova. Hopi kristian ta haña nan ku oposishon di nan famia. Den algun pais, institushonnan di enseñansa ta promové e teoria di evolushon mas ku nunka, i ateismo ta hañando mas atenshon. Ora nos haña nos ku e preshonnan ei, nos no por djis ignorá nan sin hasi nada. Nos tin ku tuma akshon pa resistí nan i asina protehá nos mes. Hesus su ehèmpel ta mustra nos kon nos por logra esei.

11. Dikon meditashon riba Hesus su ehèmpel por duna nos mas kurashi?

¹¹ Hesus a bisa su disipelnan: “Den mundu boso tin tribulashon, ma tene kurashi, mi a vense mundu.” (Juan 16:33) Nunka el a sukumbí na mundu su influensia. Nunka el a permití e mundu strob’é di kumpli ku su trabou di prediká ni pon’é baha su normanan relashoná ku adorashon berdadero i kondukta korekto. Nos tampoko no mester hasi esei. Den orashon, Hesus a bisa di su disipelnan: “Nan no ta di mundu, meskos ku ami no ta di mundu.” (Juan 17:16) Ora nos ta studia Kristu su ehèmpel di kurashi i ta meditá  riba dje, nos por haña e kurashi nesesario pa keda separá for di mundu.

Siña for di Hesus Kon pa Demostrá Kurashi

12-14. Duna ehèmpel di okashonnan ku Hesus a mustra kurashi.

¹² Hesus a desplegá masha kurashi durante su ministerio. Ehersiendo su outoridat komo Yu di Dios, ku kurashi el “a bai den tèmpel i a kore ku tur esnan ku tabata kumpra i bende den tèmpel saka nan afó, i a bòltu e mesanan di e kambiadónan di plaka, i e stulnan di esnan ku tabata bende palomba.” (Mat. 21:12) Ora e sòldánan a bini pa arestá Hesus e último anochi promé ku su morto, ku kurashi el a sali dilanti pa protehá su disipelnan i a bisa: “Si ta ami boso ta buska, laga esakinan bai.” (Juan 18:8) Algun ratu despues, el a manda Pedro warda su spada. Asina Hesus a mustra ku e no ta konfia den armanan literal, sino den Yehova.—Juan 18:11.

¹³ Ku kurashi Hesus a desenmaskará e maestronan falsu i sin amor di su tempu i nan siñansanan robes. El a bisa nan: “Ai di boso, eskribanan i fariseonan, hipókritanan, pasobra boso ta sera e reino di shelu pa hende . . . Boso a neglishá loke ta mas importante di e Lei: hustisia, miserikòrdia i fieldat. . . . Boso ta limpia e parti pafó di kopa i di tayó, ma paden nan ta yen di ladronisia i pashonnan deskontrolá.” (Mat. 23:13, 23, 25) Hesus su disipelnan lo mester tabatin e mesun kurashi ku e tabatin, pasobra lidernan religioso falsu lo a persiguí nan tambe i asta mata algun di nan.—Mat. 23:34; 24:9.

¹⁴ Asta demoño Hesus a enfrentá ku kurashi. Na un okashon, el a hañ’é konfrontá ku un hòmber poseí pa demoño ku tabata asina fuerte ku ningun hende no por a mar’é ku kadena. Sin miedu, Hesus a saka tur e demoñonan ku tabata dominá e hòmber. (Mar. 5:1-13) Awendia, Dios no ta duna kristiannan e poder pa hasi e tipo di milagernan ei. Apesar di esei, den nos trabou di prediká i siña, nos tambe tin ku hiba un lucha spiritual kontra Satanas, esun ku ta “siega mente di esnan ku no ta kere.” (2 Kor. 4:4) Manera tabata den kaso di Hesus, nos armanan “no ta karnal, ma poderoso den Dios pa basha e fòrtinan abou,” esta, ideanan religioso falsu profundamente ankrá. (2 Kor. 10:4) E ehèmpel di Hesus ta siña nos kon pa usa e armanan akí.

15. Riba kiko Hesus su kurashi tabata basá?

¹⁵ Hesus su kurashi no ta basá riba balentia, sino riba fe. Nos kurashi tambe mester ta asina. (Mar. 4:40) Kon nos por haña berdadero fe? Atrobe, Hesus su ehèmpel ta yuda nos. El a demostrá ku e tabatin un konosementu profundo di e Skritura i ku e tabatin pleno konfiansa den dje. Hesus no a usa spada literal komo su arma; mas bien, el a usa e spada di spiritu, esta, e Palabra di Dios. Bes tras bes, el a referí na e Skritura pa apoyá su siñansanan. Hopi bes el a introdusí su deklarashonnan ku e ekspreshon akí: “Ta pará skirbí,” esta, den e Palabra di Dios. *

16. Kon nos fe por oumentá?

¹⁶ Komo disipel di Kristu, tin algun prueba ku nos no por evitá. Pa por edifiká un fe ku por resistí e pruebanan ei, nos tin ku lesa i studia Beibel diariamente i asistí na reunionnan kristian. Asina nos ta hinka den nos mente e bèrdatnan ku ta forma e fundeshi di nos fe. (Rom. 10:17) Ademas, nos tin ku  meditá—reflekshoná profundamente—riba loke nos ta siña pa esakinan por baha den nos kurason. Ta un fe bibu so por motivá nos pa tuma akshon ku kurashi. (Sant. 2:17) I nos tin ku hasi orashon pidi Dios pa su spiritu santu, pasobra fe ta un aspekto di e fruta di spiritu.—Gal. 5:22, NW.

17, 18. Kon un ruman muhé hóben a desplegá kurashi na skol?

¹⁷ Un ruman muhé hóben ku yama Kitty a eksperensiá kon berdadero fe ta duna kurashi. For di chikitu, e tabata sa ku e no mester tin “bèrgwensa di e evangelio” na skol. I realmente e tabata ke duna un bon testimonio na su kompañeronan di klas. (Rom. 1:16) Tur aña e tabata pone su mes pa prediká e bon nobo na e muchanan, pero e no tabatin e kurashi pa hasié. Durante su último añanan di tiner, el a kambia di skol, i el a bisa: “E biaha akí sí mi ta bai prediká pa tur e biahanan ku mi a keda sin hasié.” Kitty a resa pidi Dios kurashi manera Kristu, p’e ta kouteloso i p’e haña un bon oportunidat.

¹⁸ Riba e promé dia di skol, un maestro a pidi e studiantenan pa nan kada un introdusí nan mes. Vários di nan a menshoná nan religion i a agregá ku nan no ta ègt praktiká nan fe. Kitty a realisá ku esaki tabata e oportunidat ku el a resa pidi p’e. Ora su bùrt a yega, ku konfiansa el a bisa: “Mi ta Testigu di Yehova i mi fuente di guia den asuntunan relashoná ku adorashon i kondukta korekto ta Beibel.” Segun ku el a sigui papia, algun studiante a traha un kara komo si fuera su religion ta ko’i kèns. Pero, tabatin otronan ku a presta atenshon i ku despues a hasi pregunta. E maestro a asta usa Kitty komo un bon ehèmpel di un persona ku ta defendé su kreensianan. Kitty ta masha kontentu ku el a siña for di Hesus su ehèmpel di kurashi.

Demostrá Fe i Kurashi Manera Kristu

19. (a) Kiko berdadero fe ta enserá? (b) Kon nos por hasi Yehova kontentu?

¹⁹ E apòstelnan tambe a komprondé ku nan aktonan di kurashi mester tabata basá riba fe. P’esei, nan a roga Hesus: “Oumentá nos fe!” (Lesa Lukas 17:5 i 6.) Berdadero fe ta enserá mas ku djis kere ku Dios ta eksistí. E ta enserá kultivá un relashon íntimo ku Yehova; un relashon similar na esun di un yu chikitu ku su tata kariñoso ku ta stim’é. Bou di inspirashon, Salomon a skirbi: “Mi yu, si bo kurason ta sabí, e ora ei mi kurason tambe lo keda kontentu. Sí, mi alma lo regosihá, ora bo lepnan papia loke ta korekto.” (Pro. 23:15, 16) Di mes manera, ora nos ta desplegá kurashi i defendé prinsipionan hustu, nos ta hasi Yehova kontentu. I e echo ku nos ta konsiente di esei mes ta duna nos mas kurashi. P’esei, laga nos semper imitá Hesus su ehèmpel dor di para firme i ku kurashi pa loke ta hustu!

[Nota]

Bo Por Splika?

• Kiko lo yuda nos keda obediente ounke nos ta imperfekto?

• Kiko ta e base pa berdadero fe, i kon fe por yuda nos aktua ku kurashi?

• Kiko nos ta logra dor di imitá Kristu su obedensia i kurashi?

[Preguntanan di Estudio]

[Plachi na página 16]

Abo ta ‘prepará bo kurason’ pa resistí tentashon?

[Plachi na página 18]

Meskos ku Hesus, nos tambe por demostrá kurashi basá riba fe