Kia Akarongo e kia Ngakau Toa Mei ia Karaiti Rai

“Ka akamaroiroi ra, kua riro te re o teianei ao iaku.”​—IOA. 16:33.

1. Akapeea ra a Iesu i te akaope takiri anga i tona tu akarongo ki te Atua?

E RAVE ua ana a Iesu Karaiti i te anoano o te Atua. Kare rava aia i manako ana e kia akarongo kore i tona Metua i te rangi. (Ioa. 4:34; Ebe. 7:26) Inara ko tei tupu kiaia i te enua nei, kua riro ei akangata roa atu nona kia akarongo. Mei te akamataanga mai o tana angaanga tutu aere, kua tauta te au enemi o Iesu tei kapiti mai ia Satani uaorai, kia akanauru, kia maro, me kore kia akavare ia Iesu kia akaruke i tona arataa akarongo mou. (Mata. 4:​1-11; Luka 20:​20-25) Kua akatupu teia au enemi kia Iesu i te tu mamae kino, o te manako, te manako ngakau, e te kopapa. I te openga, kua rauka ia ratou i te tamate iaia ki runga i te rakau tamamae. (Mata. 26:​37, 38; Luka 22:44; Ioa. 19:​1, 17, 18) I roto pouroa i teia au tu nei, e noatu te kino pakari o te mamae, “kua akarongo ra [a Iesu] e tae ua atu ki tona mate anga.”​—E tatau ia Philipi 2:8, NW. *

2, 3. Eaa ta tatou ka tamou mai mei te tu akarongo o Iesu noatu te au tu kino tana i kite?

² Tei tupu kia Iesu ei tangata i runga nei i te enua kua riro ei apii iaia e mei teaa te tu kia akarongo i raro ake i te au turanga ngata tei kore rava aia i kite ana i mua ana. (Ebe. 5:8) Penei i te akaraanga, kare takiri e apinga toe ia Iesu kia apii no runga i te tavini anga ia Iehova. Ina oki e, i  mataora ana aia i tetai pirianga tumanava kia Iehova no tetai tuatau roa rava e kua riro ana ei “pu rave angaanga” no te Atua i te tuatau i angaia mai ei te au mea ravarai. (Mase. 8:30, NW) Noatu ra, na te akakoromaki anga ma te akarongo ei tangata noatu te kino tana i kite, kua akaope takiri aia i tona tu tiratiratu. Kua tupu ua atu rai a Iesu, te Tamaiti a te Atua i te pae vaerua. Eaa ta tatou ka tamou mai mei te au mea tei tupu kiaia?

³ Noatu oki e e tangata ara kore aia, kare a Iesu i titau ana kia vai akarongo ua ma te apa kore i roto i tona uaorai maroiroi. Kua pure aia kia tauturu mai te Atua iaia kia vai akarongo ua. (E tatau ia Ebera 5:7.) No tatou kia vai akarongo ua, ka anoano katoaia tatou kia akaaka e kia pure putuputu ua rai no te tauturu a te Atua. Ko teia te tumu i ako ei te apotetoro ko Paulo i te au Kerititiano e: “Kia vai rai teia tu manako i roto ia kotou mei tei roto katoa ia Iesu Karaiti,” tei “taakaaka aia iaia uaorai e kua akarongo ra e tae ua atu ki tona mate anga.” (Phili. 2:​5-8, NW) Te akapapu maira te arataa o Iesu e ka rauka i te tangata kia akarongo noatu e tei roto ratou i te taiate kino. E tika rai, e tu ara kore to Iesu, inara ka akapeea i reira te au tangata ara ua mei ia tatou rai?

Akarongo Noatu te Tu Ara

4. Te angaia mai anga ma te tikaanga kia iki, eaa ra te aiteanga o te reira no tatou?

⁴ Kua anga te Atua ia Adamu raua ko Eva ei nga tangata kite e e tikaanga to raua kia iki. Ei uanga na raua, e tikaanga katoa to tatou kia iki. Eaa te aiteanga o te reira? Te aiteanga koia oki ka rauka ia tatou kia iki i te rave i te mea meitaki me kore i te mea kino. Mei tera oki te tu, kua oronga mai te Atua i te tikaanga no tatou kia iki i te akarongo iaia me kore kia akarongo kore. Kapitiia mai ki taua tikaanga maata ra koia oki ko te apainga o ta tatou ikianga. E tika e, ko te kaveinga o ta tatou au ikianga, ka riro ei ora me kore ei mate no tatou. Ka akao katoa mai te reira i te aronga tei piri vaitata mai kia tatou.

5. Eaa te tu ngata ta tatou pouroa e kite ra, e akapeea tatou e autu ei?

⁵ No te mea kua anauia mai tatou i roto i te tu ara, kare i te tu natura kia akarongo tatou. Kare e ngoie ua ana i te akarongo ki te au ture a te Atua. Kua ngata tikai ia Paulo kia akarongo. Kua tata aia e: “Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.” (Roma 7:23) E tika, me kare e akaatingaanga, kare e mamae, me kore kare e tu ngata e o mai ana, ka ngoie ua i te akarongo. Inara ka akapeea i reira tatou me e maroanga tetai i rotopu i to tatou anoano kia akarongo e “te anoano tika kore o te kopapa nei, e te anoano tika kore o te mata nei”? E tupu mai ana teia au anoano tarevake no to tatou tu ara pera katoa no te akakeuanga a ‘te vaerua o teianei ao’ e takapini ra ia tatou, e e ririnui tikai te reira. (1 Ioa. 2:16; 1 Kori. 2:12) Kia patoi atu i te reira, ka anoanoia tatou kia ‘akonokono i to tatou ngakau’ i mua ake ka aro atu ei tatou i te turanga ngata me kore i te timataanga e kia iki i te akarongo kia Iehova, noatu e eaa te ka tupu. (Sala. 78:8) E maata ua atu ta tatou au akaraanga Pipiria no te aronga tei autu no te mea kua akonokono ratou i to ratou ngakau.​—Ezera 7:10; Dani. 1:8.

6, 7. Akatutu mai e ka akapeea te apii naau uaorai i te tauturu anga ia tatou kia rave i te au ikianga pakari.

⁶ Ko tetai mataara i te akonokono i to tatou ngakau koia oki ko te apii maroiroi i te au Tuatua Tapu e te au puka akatumuia ki runga i te Pipiria. E akamanako ana ia koe i roto i teia turanga. Penei e aiai teia no taau apii naau uaorai. Koi pure ua atura koe no te vaerua o Iehova kia tauturu ia koe i te taangaanga i taau i apii mai mei tana Tuatua. E parani taau i te akara i tetai teata i runga i te tivi a teia aiai ki mua. Kua akarongo koe e e rongo meitaki tikai to taua teata ra; e oti akera kua kite katoa koe e e au tuanga ainga tau kore e te ta ua to roto i te reira.

⁷ Te akamanako ra koe i te akoanga a Paulo i roto ia Ephesia 5:3 e: “Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na, ko tei tau ïa i te aronga tapu.” Te maara katoa ra ia koe te akoanga a Paulo i roto ia Philipi 4:8. (E tatau.) Ia koe e manako oonu atura i teia akoanga akauruia, ka ui koe kia koe uaorai e, ‘Me akakoro au i te akatuera i toku ngakau e toku manako ki taua au porokaramu ra, te aru ra ainei au i ta Iesu akaraanga no te akarongo ngaueue kore ki te Atua?’ Eaa ra taau ka rave? Ka akara ainei rai koe i taua teata ra noatu e eaa te tu?

8. Eaa tatou ka anoanoia ai kia akono marie i te turanga teitei no te tu tau e te turanga pae vaerua?

 ⁸ E tarevake tikai kia taakaaka i to tatou tu tau e te turanga pae vaerua, penei i te manako anga e te maroiroi ua ra tatou i te kopae atu i te au tu o te kapitianga kino, e o maira te tu tamataora ta ua e te ainga tau kore ki roto i taua tu kapitianga ra. Tera ra, ka tau tatou kia paruru ia tatou uaorai e ta tatou tamariki mei te au akakeuanga kino e akaata maira i te tu manako o Satani. E angaanga pakari ana te aronga taangaanga i te komupiuta kia paruru i ta ratou au komupiuta kia kore e takinoia e te au virus kino te ka takore i te au porokaramu, ka tamanamanata i te angaanga a te komupiuta, e te akatere i te komupiuta kia taangaanga i te reira ei akakino i te au komupiuta ke atu. Kare ainei i reira e tau kia angaanga pakari roa atu tatou i te paruru ia tatou uaorai mei “te au ravenga pakari” a Satani?​—Ephe. 6:11.

9. Eaa ra tatou ka tauta ai i te akarongo kia Iehova i te au ra ravarai?

⁹ Vaitata rai e i te au ra ravarai, i roto i tetai au tu ka anoanoia tatou kia iki me ka rave rai tatou i tetai au apinga kia tau ki to Iehova mataara me kare. Kia rauka ia tatou te ora, ka anoanoia tatou kia akarongo ki te Atua e kia aru i tana au kaveinga tika. Na te aruanga i te akaraanga a Karaiti no runga i te tu akarongo “e tae ua atu ki tona mate anga,” te akaari ra tatou e e tika tikai to tatou akarongo. Ka tutaki mai a Iehova i to tatou arataa akarongo mou. Kua taputou mai a Iesu e: “Kareka te tāpu tikai e tae ua atu ki te openga ra, ka ora ïa.” (Mata. 24:13) Te taka meitaki ra e, ka umuumuia tatou kia akatupu i te tu ngakau toa mou tikai, mei ta Iesu rai i akaari mai.​—Sala. 31:24.

Iesu​—Te Akaraanga Maata Roa Atu no te Tu Ngakau Toa

10. Eaa te au tu taomianga penei ka tukuia mai ki runga ia tatou, e akapeea tatou me ariu atu ki te reira?

¹⁰ No te mea e te koropiniia nei tatou e te aerenga manako pera katoa te tu o teianei ao, ka anoanoia te ngakau toa kia kopae i te akakinoanga a te reira. Te aro atura te au Kerititiano i te au maroanga o te tu tau, te pirianga tangata, te pae o te moni, e te akonoanga te ka riro i te taki ke ia ratou mei te au mataara tika o Iehova. E manganui te aro atura i te patoianga a te pamiri. I roto i tetai au enua, te turuturu ra te au akatereanga apii i te apiianga o te mea tupu ua mai, e te arikiia nei te irinakianga e kare e atua. Me aro atu tatou i taua au taomianga ra kare e rauka ia tatou i te anga ke i te reira. Ka anoanoia tatou kia rave maroiroi i te kopae atu i te reira e kia paruru ia tatou uaorai. Te akaari maira te akaraanga o Iesu e akapeea tatou i te autuanga i te reira.

11. Akapeea te akamanako anga no runga i te akaraanga a Iesu i te oronga anga mai kia tatou i te tu ngakau toa maata atu?

¹¹ Kua akakite a Iesu ki tana au pipi e: “E tumatetenga to kotou i teianei ao: ka akamaroiroi ra, kua riro te re o teianei ao iaku.” (Ioa. 16:33) Kare rava aia i ariki atu ana i te akakeuanga a teianei ao. Kare rava aia i akatika ana i teianei ao kia tapu iaia i te akatupu i tana angaanga tutu aere me kore kia taakaaka i tona au turanga no te akamori mou e te tu tau tikai; e kare katoa tatou e rave i te reira. I roto i te pure, kua tuatua a Iesu no tana au pipi e: “Kare ratou i to teianei ao, mei iaku nei rai oki, kare i to teianei ao.” (Ioa. 17:16) Na te apii anga i te akaraanga ngakau toa a Karaiti e te akamanako anga no runga i te reira e oronga mai kia tatou i te tu ngakau toa ka anoanoia kia vai takake ua rai mei teianei ao.

 Apii i te Tu Ngakau Toa mei ia Iesu

12-14. Oronga mai i te au akaraanga o Iesu i te akaari anga i te tu ngakau toa.

¹² Kua akaari mai a Iesu i te tu ngakau toa maata tikai i roto i tana angaanga orometua. Na te taangaanga anga i tona mana ei Tamaiti na te Atua, kua “aere aturā Iesu” ma te mataku kore “ki roto i te iero o te Atua, kua tuaru atura ki vao te aronga i oko atu e i oko mai i roto i te iero ra, tatipoki atura oki i te au papa o te aronga oko moni ra, e te au nooanga o te aronga i oko i te kukupa.” (Mata. 21:12) I te aere anga mai te au vaeau i te opu ia Iesu i tona po openga i runga nei i te enua, kua tu atu aia ma te ngakau toa i te paruru i tana au pipi, i te na ko anga e: “Te kimi nei kotou iaku ra, ka tuku atu ia ratou nei kia aere ana.” (Ioa. 18:8) I muri poto ua mai, kua akakite atu aia kia Petero kia tuku ke atu i tana koke, i te akaarianga mai e kare te tumu o to Iesu irinakianga i roto i te au apinga tamaki o te enua nei, mari ra tei roto ia Iehova.​—Ioa. 18:11.

¹³ Kua akaari mataku kore a Iesu i te tu aroa kore o te au puapii pikikaa o tona tuatau e ta ratou au apiianga tarevake. “Aue kotou, e te au tata tuatua, e te au Pharisea e, e aronga pikikaa! te topiri nei kotou i te basileia o te ao i te tangata nei,” i akakite atu ei a Iesu kia ratou. “Te akaruke nei [kotou] i te au mea mamaata o te ture, te tuatua-tau, te aroa, e te akarongo. . . . Te tamā nei kotou i to vao i te kapu e te mereki, kareka o roto, te ki nei ïa i te noinoi apinga, e te kaki anga kore.” (Mata. 23:​13, 23, 25) Ka anoano te au pipi a Iesu i taua tu ngakau toa ra no te mea ka takinokinoia ratou e ka tamateia tetai papaki ia ratou e te au arataki akonoanga pikikaa.​—Mata. 23:34; 24:9.

¹⁴ Kua patoi ngakau toa atu a Iesu i te au temoni katoa. I tetai atianga, kua aravei mai tetai tangata uruia e te temoni, e ririnui maata tona kare e tangata e rauka kia tapeka i taua tangata ra ki te vivi. Ma te mataku kore, kua tuaru atu a Iesu i te au temoni e manganui e akatere ra i taua tangata ra. (Mare. 5:​1-13) I teia tuatau, kare te Atua i oronga mai ana ki te au Kerititiano te mana kia rave i taua tu temeio ra. Noatu ra, i roto i ta tatou angaanga tutuanga e te apiianga, e tamaki katoa atu tatou ia Satani, te vaerua e ‘akapoiri ra i te ngakau o te aronga akarongo kore.’ (2 Kori. 4:4) Mei ia Iesu rai, kare oki ta tatou taoonga tamaki “i ta te kopapa, e mea mana ra i te Atua, i te uri anga i te au punanga ketaketa ki raro”​—te au irinakianga tarevake a te akonoanga tei oonu ki roto i te ngakau o te tangata. (2 Kori. 10:4) I te taangaanga anga i teia au taoonga tamaki i te pae vaerua, e maata ua atu ta tatou ka tamou mai mei te akaraanga a Iesu.

15. Kua akatumuia to Iesu tu ngakau toa ki runga i teaa?

¹⁵ Kare te tu ngakau toa o Iesu i akatumuia ki runga i tona uaorai tu mataku kore, mari ra ki runga i te akarongo. Ka anoano katoa tatou kia pera rai. (Mare. 4:40) Akapeea e rauka ai ia tatou te akarongo tika tikai? Te oronga akaou maira ta Iesu akaraanga i te aratakianga no tatou. Kua akaari mai aia i tona kite tikai no te au Tuatua Tapu e te irinaki pu tikai ki roto i te reira. Ei taoonga tamaki, kua taangaanga a Iesu, kare i te koke tikai, mari ra i te koke a te vaerua, te Tuatua a te Atua. Mei tera taime ki tera taime kua turuturu aia i tana apiianga na te taiku anga i te au Tuatua Tapu. I te maataanga i te taime, kua akamata aia i tana tuatua ki te takiato e: “Kua tataia,” koia oki, i roto i te Tuatua a te Atua. *

16. Akapeea e rauka ai kia maata atu to tatou akarongo?

¹⁶ Kia akatupu i te akarongo te ka rauka i te patoi atu i te au tu timataanga te ka tupu me riro mai ei au pipi, ka anoanoia tatou kia tatau e kia apii i te Pipiria i te au ra ravarai e kia aere atu ki te au uipaanga Kerititiano, i te akaki anga i to tatou au manako ki te tuatua mou, ko te tumu oki ia o te akarongo. (Roma 10:17) Ka anoano katoaia  tatou kia manakonako​—akara oonu atu​—no runga i ta tatou i apii mai, kia akakeu te reira i to tatou ngakau. Na te akarongo maroiroi anake ua e akakeu ia tatou kia rave i te angaanga ma te ngakau toa. (Iako. 2:17) E ka anoanoia tatou kia pure no te vaerua tapu no te mea e tuanga te akarongo no te ua o te vaerua.​—Gala. 5:22.

17, 18. Akapeea tetai tuaine mapu i te akaarianga i te tu ngakau toa i te apii?

¹⁷ Kua kite mai tetai tuaine mapu ko Kitty tona ingoa, e akapeea te akarongo tika tikai i te oronga anga mai i te tu ngakau toa. Mei tona meangiti anga mai, kua kite aia e kare aia e tau kia “akama i te evangelia” i roto i te apii, e kua inangaro tikai aia i te oronga atu i te akakitekiteanga meitaki ki tona au taeake i te apii. (Roma 1:16) I te au mataiti tataki tai, kua manako aia i te tuatua atu ki etai ke i te tuatua meitaki, inara kua emiemi aia i te tuatua atu kia ratou no te mea kua ngere aia i te tu ngakau toa. I tetai au mataiti i muri mai, kua taui tana apii. Kua akakite aia e, “Teia taime, ka taangaanga roa au i te au atianga taku i kaimoumou.” Kua pure a Kitty no te tu ngakau toa mei to Karaiti rai, te tu matakite, e te atianga tau.

¹⁸ I te ra mua i te apii, kua patiia te au tamariki apii kia akaaravei mai ia ratou tataki tai uaorai. E maata ratou tei taiku mai i te akonoanga i utuutuia mai ei ratou, i te akakite anga e kare tikai ratou e piri putuputu atu ana ki roto i ta ratou akamorianga. Kua kite mai a Kitty e ko teia tikai te atianga tana i pure ana. I te tae anga ki tona taime, kua tuatua aia ma te papu tikai e, “Ko au tetai o te Au Kite o Iehova, e ko te tumu o toku aratakianga no runga i te au mea te o maira te akamorianga e te tu tau tikai, koia oki ko te Pipiria.” Iaia e tuatua atura, kua takara mai tetai au tamariki apii i to ratou mata i te akaari mai e e akarongo neneva ua tona. Inara, kua akarongo mai etai atu kiaia e kua ui mai i tetai au uianga i muri mai. Kua akariro te puapii ia Kitty ei akaraanga meitaki no te paruru i tona uaorai irinakianga. Kua rekareka tikai a Kitty e kua tamou mai aia i te akaraanga ngakau toa o Iesu.

Akaari i te Akarongo e te Tu Ngakau Toa mei to Karaiti

19. (a) Eaa te o maira i te rauka anga mai te akarongo tika tikai? (e) Akapeea tatou i te akarekareka anga ia Iehova?

¹⁹ Kua kite katoa mai te au apotetoro e ka anoanoia kia akatumuia ta ratou au angaanga ngakau toa ki runga i te akarongo. Kua pati akatenga ratou kia Iesu e: “E akamaata mai i to matou akarongo.” (E tatau ia Luka 17:​5, 6.) Te rauka anga te akarongo tika tikai, e maata atu te ka anoanoia i te irinaki ua e te vai ra te Atua. Te o maira te akatupu anga i tetai pirianga oonu tikai kia Iehova, tei aite rai ki te pirianga o tetai tamaiti meangiti ki tona metua aroa e te takinga meitaki. Kua akauruia a Solomona kia tata e: “E taku tamaiti e, kia pakari toou ra ngakau, ka rekareka ïa toku ngakau, toku uaorai nei rai. Ka rekareka to roto iaku nei, kia tuatua toou vaa i te tuatua tika.” (Mase. 23:​15, 16) Na roto rai i taua tu ra, ka riro to tatou tu ngakau toa i te turuturu i te au kaveinga tuatua tika ei akarekareka ia Iehova e na te kiteanga i te reira e akamaata atu i to tatou tu ngakau toa. No reira, kia aru ua atu rai tatou i te akaraanga o Iesu, i te turuturu anga i te turanga tuatua tika ma te ngakau toa!

[Au Tataanga Rikiriki i Raro]

Ka Rauka Ainei ia Koe te Akataka?

• Eaa te ka tauturu ia tatou kia vai akarongo ua noatu te tu ara?

• Kua akatumuia te akarongo tika tikai ki runga i teaa, e ka akapeea teia i te tauturu anga ia tatou kia ngakau toa?

• Eaa te ka tupu me vai akarongo ua tatou e te akaari ra i te tu ngakau toa mei to Karaiti rai?

[Au Uianga Apii]

[Tutu i te kapi 13]

Te ‘akonokono ra koe i toou ngakau’ kia patoi i te au timataanga?

[Tutu i te kapi 15]

Mei ia Iesu rai, ka rauka ia tatou kia akaari i te tu ngakau toa tei akatumuia ki runga i te akarongo