Gi yesi na Gado èn sori deki-ati neleki Krestes

„Hori deki-ati! Mi wini grontapu kaba.”​—YOH. 16:33.

1. Fa Yesus sori taki a ben e gi yesi na Gado ala ten?

ALA TEN Yesus Krestes ben e du a wani fu Gado. Nowan enkri leisi a prakseri fu trangayesi en hemel Tata (Yoh. 4:34; Hebr. 7:26). Ma den sani di miti en na grontapu no ben e meki en makriki gi en fu gi yesi na Gado. Sensi a bigin nanga a preikiwroko fu en, den feanti fu en, sosrefi Satan, pruberi fu overtoigi en fu trangayesi Gado. Sonwan fu den feanti pruberi fu dwengi en fu du dati, èn trawan pruberi fu kori en (Mat. 4:1-11; Luk. 20:20-25). Den feanti disi ben gi Yesus furu broko-ede, den ben meki a firi sari srefisrefi, èn den ben pina en. Te fu kaba, den kiri en na wan pina-postu (Mat. 26:37, 38; Luk. 22:44; Yoh. 19:1, 17, 18). Aladi den sani disi ben miti Yesus, èn aladi a ben nyan hebi pina, toku a tan „gi yesi te na dede”.​—Leisi Filipisma 2:8.

2, 3. Te wi e luku taki Yesus gi yesi na Gado aladi a ben e nyan pina, dan san wi e leri fu en?

² Den sani di miti Yesus di a ben de na grontapu, leri en fu gi yesi na ini muilek situwâsi di no  ben miti en ete (Hebr. 5:8). Kande a ben gersi leki Yesus no ben abi fu leri noti moro te a abi fu du nanga a dini di a ben e dini Yehovah. Fu taki en leti, a ben de makandra nanga Yehovah wan bun langa pisi ten, èn a ben de a „tumusi bun wrokoman” di Gado ben gebroiki fu meki hemel nanga grontapu (Odo 8:30). Ma aladi a ben e kisi hebi tesi, toku a tan du san reti, èn na so a sori taki a gi yesi na Gado na ini ala sani. Yesus, a Manpikin fu Gado, ben kon moro krosibei na en Papa. San wi kan leri fu na eksempre fu en?

³ Aladi Yesus no ben abi sondu, toku a no pruberi fu tan gi yesi na Gado nanga en eigi krakti. A begi Gado fu yepi en fu tan gi yesi na en. (Leisi Hebrewsma 5:7.) Efu wi wani tan gi yesi na Gado, dan wi musu abi sakafasi tu, èn wi musu begi Gado doronomo fu yepi wi. Dati meki na apostel Paulus ben gi Kresten a rai disi: „Tan abi a srefi denki disi di Krestes Yesus ben abi tu.” Iya, „a saka ensrefi èn a gi yesi te na dede” (Fil. 2:5-8). Na eksempre fu Yesus e sori taki libisma man gi yesi na Gado, aladi den e libi na ini na ogri grontapu disi. A no de fu taki, dati Yesus no ben abi sondu. Ma fa a de nanga wi leki sondu libisma?

Wi kan gi yesi na Gado aladi wi abi sondu

4. Wi abi a grani fu teki wi eigi bosroiti. San disi wani taki?

⁴ Di Gado ben meki Adam nanga Eva, dan a gi den wan frustan èn den ben abi a grani fu teki den eigi bosroiti. Wi leki den bakapikin fu Adam nanga Eva abi a grani tu fu teki wi eigi bosroiti. San disi wani taki? Disi wani taki dati wi kan bosroiti efu wi sa du bun noso ogri. Sobun, Gado e gi wi na okasi fu bosroiti efu wi sa gi yesi na en, noso efu wi sa trangayesi en. Ma a bigi grani disi di wi abi, e poti wan bigi frantwortu na wi tapu. Iya, den bosroiti di wi e teki kan meki wi kisi libi, noso den kan tyari dede kon gi wi. Den bosroiti di wi e teki abi krakti tu tapu trawan.

5. San wi alamala musu leri, èn fa wi kan abi bun bakapisi?

⁵ Fu di wi abi sondu, meki wi musu leri fu gi yesi na Gado. A no makriki ala ten fu gi yesi na den wet fu Gado. Paulus ben musu leri tu fu gi yesi na Gado. A ben skrifi: „Mi e si taki wan tra wet de na ini mi skin, èn a wet disi e feti nanga a wet fu mi frustan èn a e meki taki mi e tron wan srafu fu sondu di de leki wan wet na ini mi skin” (Rom. 7:23). A no de fu taki, dati a moro makriki fu gi yesi na Gado te wi no abi fu libi wan tu sani na baka, te wi no abi fu pina, noso te wi no e kisi fu du nanga problema. San wi e du te wi wani gi yesi na Gado, ma na a tra sei, ’a lostu fu a skin, èn a lostu fu den ai’ abi krakti tu na wi tapu? Wi e kisi den takru lostu disi, fu di wi na sondu libisma, èn fu di „a yeye fu grontapu” abi krakti na wi tapu. Den lostu disi kan tranga srefisrefi (1 Yoh. 2:16; 1 Kor. 2:12). Fu man kakafutu gi den lostu disi, dan wi musu ’sreka wi ati’ fosi wi e kisi fu du nanga wan problema, noso wan tesi, èn wi musu kon abi a fasti bosroiti fu gi yesi na Yehovah awinsi san e pasa (Ps. 78:8). Bijbel abi furu eksempre fu sma di ben man kakafutu gi tesi fu di den ben sreka den ati.​—Esra 7:10; Dan. 1:8.

6, 7. Sori fa a studeri di wi e studeri Bijbel kan yepi wi fu teki koni bosroiti.

⁶ Wán fasi fa wi kan sreka wi ati, na te wi e studeri Bijbel nanga Bijbel publikâsi fayafaya. Pruberi fu si yusrefi na ini a situwâsi disi: Tide neti, yu de fu studeri Bijbel soleki fa yu gwenti fu du dati. Yu begi Yehovah kaba fu gi yu en santa yeye so taki yu kan du den sani di yu e leri na ini a Wortu fu en. Tamara neti, wan spesrutu felem sa de tapu telefisi, èn yu e prakseri fu luku a felem dati. Yu yere taki a felem dati moi. Ma yu sabi tu taki sma e du hurudu na ini a felem, èn den e du ogri tu.

⁷ Yu e prakseri a rai di Paulus gi na Efeisesma 5:3, pe skrifi: „Un no musu taki srefi fu hurudu, noso fu iniwan morsu tori, noso fu tori di e sori taki unu abi bigi-ai, fu di santa sma no e du den sani disi.” Yu e memre tu sortu rai Paulus gi na Filipisma 4:8. (Leisi en.) Yu e denki dipi fu a Bijbel rai disi, èn yu e aksi yusrefi: ’Efu mi e bosroiti fu luku den sortu felem disi, dan mi e gi yesi doronomo na Gado, soleki fa Yesus du  dati?’ San yu o du? Yu o luku a felem?

8. Fu san ede wi musu tan tyari wisrefi na wan fasi di Gado feni bun?

⁸ A no ben o bun te wi e bosroiti fu du wan sani aladi wi sabi taki Gado no feni a sani dati bun. Kande wi e teki a bosroiti dati fu di wi feni taki wi tranga nofo fu kakafutu gi takru kompe. Wi e kisi fu du nanga den takru kompe dati te wi e luku felem pe sma e du ogri nanga hurudu. Na presi taki wi e bosroiti fu luku den sortu felem disi, wi musu kibri wisrefi èn den pikin fu wi gi a denki fu Satan di kan abi krakti na wi tapu. Sma di e gebroiki computer e du ala san den man fu sorgu taki a computer fu den no e kisi virus. Den virus disi kan pori den tra computer programa, den kan meki taki a computer no e wroko bun moro, noso den kan meki taki a computer e gi tra computer problema. Efu sma e du so furu muiti fu sorgu taki a computer fu den no e kisi virus, dan wi musu du ala san wi man tu fu sorgu taki Satan no e kori wi nanga den „triki” fu en, a no so?​—Ef. 6:11.

9. Fu san ede wi musu abi a fasti bosroiti fu gi yesi na Yehovah ibri dei?

⁹ Pikinmoro ibri dei wi musu bosroiti efu wi sa du a wani fu Yehovah, noso efu wi no sa du dati. Efu wi wani kisi frulusu, dan wi musu gi yesi na Gado èn wi musu hori wisrefi na den regtfardiki markitiki fu en. Te wi e gi yesi na Gado „te na dede” neleki fa Krestes ben e du dati, dan wi e sori taki wi abi trutru bribi. Yehovah sa blesi wi fu di wi e tan gi yesi na en. Yesus ben pramisi: „A sma di horidoro te na a kaba, na en o kisi frulusu” (Mat. 24:13). A de krin taki, efu wi wani horidoro, dan wi musu kon abi trutru deki-ati, neleki Yesus.​—Ps. 31:24.

Yesus na a moro bun eksempre fu wan sma di sori deki-ati

10. Sortu tesi wi kan kisi, èn san wi musu du?

¹⁰ Fu di wi e kisi fu du doronomo nanga a denki fu grontapu èn nanga a fasi fa sma e tyari densrefi, meki wi musu abi deki-ati fu man kakafutu gi den sani dati. A fasi fa grontapusma e tyari densrefi, den sani di sma e fruwakti fu wi leki Kresten, moni problema, nanga den sani di kerki e leri sma, kan kon abi krakti na wi tapu. Den sani disi kan meki taki wi e drai baka gi den regtfardiki markitiki fu Yehovah. Furu Kresten e kisi gens fu famiri. Na ini son kondre, difrenti skoro e poti moro prakseri now na a evolutie-leri, èn moro nanga moro sma e bribi taki wan Gado no de. Te wi e kisi fu du nanga den sani disi, dan wi no kan sidon nomo. Wi musu du wan sani fu kakafutu gi den tesi disi, so taki wi kan kibri wisrefi. Na eksempre fu Yesus e sori wi fa wi kan du dati.

11. Te wi e poti prakseri na a eksempre fu Yesus, dan fa dati kan yepi wi fu kon abi moro deki-ati?

¹¹ Yesus ben taigi den disipel fu en: „Na grontapu unu e kisi banawtu, ma hori deki-ati! Mi wini grontapu kaba” (Yoh. 16:33). Noiti a gi pasi taki grontapu kon abi krakti na en tapu, noso taki grontapu tapu en fu du a preikiwroko. Noiti a gi pasi tu taki grontapu meki a du wan sani di Gado no feni bun, èn wi no musu du dati tu. Di Yesus ben e begi, dan a taki fu den disipel fu en: „Den no de wan pisi fu grontapu,  neleki fa mi no de wan pisi fu grontapu” (Yoh. 17:16). Te wi e ondrosuku fa Krestes sori deki-ati, èn te wi e poti prakseri na a eksempre fu en, dan dati kan gi wi a deki-ati di wi abi fanowdu fu no tron wan pisi fu grontapu.

Kon abi deki-ati neleki Yesus

12-14. Gi wan tu eksempre di e sori fa Yesus sori deki-ati.

¹² Di Yesus ben e du a diniwroko fu en, dan ala ten a ben e sori furu deki-ati. Fu di a ben de a Manpikin fu Gado, meki a no ben frede fu ’go na ini a tempel, èn fu yagi ala den sma go na dorosei di ben e seri èn ben e bai sani na ini a tempel. A drai den tafra tapu fu den sma di ben e broko moni, èn sosrefi den bangi fu den sma di ben e seri doifi’ (Mat. 21:12). Di srudati ben kon fu grabu Yesus a lasti neti di a ben de na grontapu, dan a sori deki-ati èn a gi ensrefi abra fu kibri den disipel fu en. A taki: „Efu na mi unu e suku, dan meki den wan disi gowe” (Yoh. 18:8). Syatu baka dati, a taigi Petrus fu poti en feti-owru baka na ini a saka. Na so Yesus sori taki a no ben e poti en frutrow tapu fetisani fu libisma, ma taki a ben e poti en frutrow tapu Yehovah.​—Yoh. 18:11.

¹³ Yesus no ben frede tu fu tyari kon na krin taki den falsi leriman fu a ten fu en no ben abi lobi gi sma, èn taki den ben e leri sma sani di no tru. A ben taigi den: „Helu fu unu, un leriman fu Wet nanga Fariseiman, un hoigriman! Bika unu e tapu a kownukondre fu hemel gi sma.” Yesus ben taki moro fara: „Unu e frigiti den moro prenspari sani fu a Wet, namku retidu nanga sari-ati nanga getrowfasi. . . . Unu e krin dorosei fu a kan èn fu a preti, ma inisei den lai nanga sani di unu fufuru èn nanga gridi lostu” (Mat. 23:13, 23, 25). Den disipel fu Yesus ben o abi a srefi deki-ati dati fanowdu, fu di den fesiman fu falsi bribi ben o frufolgu den tu, èn den ben o kiri sonwan fu den.​—Mat. 23:34; 24:9.

¹⁴ Yesus ben sori deki-ati tu di a kakafutu gi den ogri yeye. Wan leisi, a miti nanga wan man di ben abi ogri yeye na en tapu. A man disi ben tranga so te, taki nowan sma ben man tai en nanga keti. Ma Yesus no ben frede a man disi. A taigi den someni ogri yeye di ben de na a man disi tapu, fu komoto na a man tapu (Mark. 5:1-13). Na ini a ten disi, Gado no gi Kresten a makti fu du den sortu wondru disi. Ma te wi de na ini a preikiwroko, èn te wi e gi sma leri, dan wi musu feti tu teige Satan, a sma di ’breni a frustan fu den sma di no e bribi’ (2 Kor. 4:4). Neleki fa a ben de nanga Yesus, na so den fetisani fu wi „no komoto fu libisma, ma Gado meki den krakti nofo fu broko sani puru di tanapu steifi”. Den sani dati na falsi kerkileri di sma e bribi fayafaya (2 Kor. 10:4). Na eksempre fu Yesus e leri wi krin fa wi musu gebroiki den fetisani disi di Gado gi wi.

15. Fu san ede Yesus ben man sori deki-ati?

¹⁵ Yesus no ben sori deki-ati soso fu prei kefalek. Ma a ben sori deki-ati fu di a ben abi bribi. Na so a musu de tu nanga wi (Mark. 4:40). Fa wi kan kon abi trutru bribi? Wi kan teki leri baka fu na eksempre fu Yesus. A ben sabi den Santa Buku fu Bijbel dorodoro, èn a ben frutrow dorodoro na den tapu tu. A fetisani di Yesus ben gebroiki, no ben de wan trutru feti-owru, ma a ben de a feti-owru fu a yeye, noso Gado Wortu. Ibri tron baka a ben e poti prakseri na den Santa Buku fu Bijbel, fu sori taki den leri fu en na tru leri. Nofo tron, te a ben e taki wan sani, dan a ben e bigin nanga den wortu: „Gado Buku taki.” *

16. San kan yepi wi fu kon abi wan moro tranga bribi?

 ¹⁶ Efu wi wani kon abi a bribi di kan yepi wi fu kakafutu gi den tesi di wi leki disipel fu Krestes e kisi, dan wi musu leisi èn studeri Bijbel ibri dei. Boiti dati, wi musu go na den Kresten konmakandra doronomo. Te wi e du den sani disi, dan wi sa kon frustan den tru tori di kan yepi wi fu kon abi wan moro tranga bribi (Rom. 10:17). Wi musu denki dipi tu fu den sani di wi e leri, so taki den kan doro wi ati. Na soso te wi e du san wi e bribi, wi o man sori deki-ati (Yak. 2:17). Èn wi musu begi Gado fu gi wi en santa yeye, fu di bribi na wan fu den froktu fu a yeye.​—Gal. 5:22.

17, 18. Fa wan yongu sisa sori deki-ati na skoro?

¹⁷ Wan yongu sisa di nen Kitty ben ondrofeni fa trutru bribi gi en deki-ati. Sensi di a ben yongu, a ben sabi taki a no ben musu ’syen fu taki fu a bun nyunsu’ na skoro (Rom. 1:16). A sisa disi ben e angri fu gi kotoigi na den pikin fu en klas. Ibri yari, a ben e bosroiti fu fruteri trawan a bun nyunsu, ma a no ben abi nofo deki-ati fu gi kotoigi. Di a ben de wan tini, dan a go na wan tra skoro. A ben taki: „Disi leisi, mi no o meki a srefi fowtu, ma mi o teki den okasi di mi e kisi.” Kitty begi Gado fu gi en a deki-ati di Krestes ben abi. A aksi Gado tu fu gi en koni, èn a yoisti okasi fu gi kotoigi.

¹⁸ A fosi dei na skoro, ibri studenti ben musu fruteri pikinso fu ensrefi. Wan tu fu den pikin ben taki sortu bribi den abi, ma den ben taki tu dati den no e teki prati na a anbegi dati doronomo. Kitty kon si taki disi ben de na okasi di a ben aksi Yehovah fu gi en. Di en ben musu fruteri pikinso fu ensrefi, dan a taki sondro frede: „Mi na wan Yehovah Kotoigi. Den sani di mi e bribi e komoto fu Bijbel, èn Bijbel leri mi tu fa mi musu tyari misrefi.” Di a ben e taki moro fara, dan wan tu pikin drai den ai, fu di den no ben wani arki. Ma trawan fu den ben e arki, èn bakaten den ben poti aksi gi en. A skoromeester ben taki srefi dati Kitty na wan bun eksempre fu di a opo taki gi a bribi fu en. Kitty breiti srefisrefi taki a leri fu sori deki-ati neleki Yesus.

Sori bribi nanga deki-ati neleki Krestes

19. (a) San a wani taki fu abi trutru bribi? (b) Fa wi kan meki Yehovah prisiri?

¹⁹ Den apostel ben frustan tu taki den ben musu abi bribi fu man sori deki-ati. Den ben begi Yesus: „Gi wi moro bribi.” (Leisi Lukas 17:5, 6.) Wan sma di abi trutru bribi no e bribi nomo taki Gado de. Neleki fa wan yongu pikin lobi en papa di e sori switifasi gi en, na so wan sma di abi trutru bribi, lobi Yehovah. Gado ben meki Salomo skrifi: „Mi manpikin, efu yu kon abi wan koni ati, dan mi ati sa prisiri, iya di fu mi. Èn mi niri o prisiri te yu e taki san reti” (Odo 23:15, 16). Yehovah e prisiri tu te wi e tan hori wisrefi na regtfardiki markitiki. Èn fu di wi sabi dati, meki wi e kisi moro deki-ati. Sobun, meki wi teki na eksempre fu Yesus ala ten, èn meki wi abi deki-ati fu tan du san reti!

[Futuwortu]

Yu kan tyari disi kon na krin?

• San o yepi wi fu tan gi yesi na Gado aladi wi abi sondu?

• San a wani taki fu abi trutru bribi, èn fa disi kan yepi wi fu sori deki-ati?

• San o de a bakapisi te wi e tan gi yesi na Gado èn te wi e sori deki-ati neleki Krestes?

[Aksi fu a tori disi]

[Prenki na tapu bladzijde 13]

Yu e ’sreka yu ati’ fu man kakafutu gi tesi?

[Prenki na tapu bladzijde 15]

Te wi abi bribi, dan wi kan sori deki-ati neleki Yesus