Halo tuir no sai aten-brani hanesan Kristu
Halo tuir no sai aten-brani hanesan Kristu
“Aten-brani bá, basá haʼu manán tiha mundu.”—JOAO 16:33.
1. Oinsá mak Jesus hatudu katak nia halo tuir Maromak?
JESUS KRISTU sempre halo tuir Maromak nia hakarak. Nia nunka hanoin atu kontra ninia Aman iha lalehan. (Joao 4:34; Ebr 7:26) Maibé kuandu nia hela iha rai, nia hasoru situasaun neʼebé halo susar ba nia atu halo tuir nia Aman. Husi tempu neʼebé Jesus komesa ninia serbisu haklaken, nia inimigu sira, inklui mós Satanás rasik, koko atu obriga, ka lohi Jesus atu husik nia fiar neʼebé metin ba nia Aman. (Mt 4:1-11; Lc 20:20-25) Inimigu sira-neʼe haterus no halo Jesus sente susar. Ikusmai, sira konsege oho nia iha ai-riin terus nian. (Mt 26:37, 38; Lc 22:44; Joao 19:1, 17, 18) Maski Jesus hasoru buat sira-neʼe hotu, maibé nia nafatin “halo tuir toʼo mate”.—Lee Filipe 2:8.
2, 3. Saida mak ita bele aprende husi Jesus nia ezemplu kona-ba halo tuir maski hasoru terus?
2 Jesus aprende buat ruma husi nia esperiénsia neʼe ka lae? Karik ita hanoin katak la iha buat ida neʼebé Jesus bele aprende kona-ba halo tuir Maromak Jeová, tanba nia hamutuk ho nia Aman ba tempu kleur ona, no sai nuʼudar Maromak nia “badain” kuandu kria buat hotu. (Prov 8:30) Maski nuneʼe, husi Jesus nia esperiénsia kuandu nia moris nuʼudar ema iha rai, nia aprende atu halo tuir iha situasaun susar neʼebé nia seidauk hasoru. (Ebr 5:8) Hodi tahan hasoru susar ruma nuʼudar ema, nia hatudu katak nia loloos laran-metin duni. Ida-neʼe halo Jesus, hakbesik liután ba nia Aman. Saida mak ita bele aprende husi Jesus nia esperiénsia neʼe?
3 Maski Jesus mak ema perfeitu, nia la koko atu halo tuir nia Aman ho ninia kbiit rasik. Nia halo orasaun ba Maromak atu ajuda nia atu halo tuir nafatin. (Lee Ebreu 5:7.) Atu ita nafatin halo tuir, ita mós presiza halo orasaun beibeik ho haraik-an, atu husu Maromak nia ajuda. Tan neʼe, apóstolu Paulo fó konsellu ba ema kristaun sira: “Buat neʼebé ema haree iha Kristu, halo ema haree mós iha imi,” tanba Kristu “haraik an hodi halo tuir toʼo mate”. (Flp 2:5-8) Jesus nia hahalok hatudu katak ema bele halo tuir maski sira hela iha ema aat nia leet. Sin, Jesus mak ema perfeitu, maibé oinsá ho ita ema neʼebé sala-naʼin?
Ita bele halo tuir maski ita ema sala-naʼin
4. Maromak kria ita ho liberdade atu hili. Ida-neʼe katak sá mai ita?
4 Maromak kria Adão no Eva nuʼudar kriatura neʼebé matenek no iha liberdade atu hili. Nuʼudar Adão nia bei-oan, ita mós iha liberdade atu hili. Neʼe katak sá? Ida-neʼe katak ita bele deside atu halo buat neʼebé diʼak ka buat neʼebé aat. Entaun, Maromak fó ita liberdade hodi hili atu halo tuir nia ka la halo tuir nia. Maibé liberdade neʼe lori mós responsabilidade. Tuir loloos, desizaun sira neʼebé ita halo bele lori moris ka mate mai ita. No desizaun sira-neʼe mós kona ema neʼebé besik ita.
5. Nuʼudar ema sala-naʼin, saida mak susar ba ita atu halo? Oinsá mak ita bele hasoru susar neʼe?
5 Tanba ita ema sala-naʼin, dala ruma susar ba ita atu halo tuir Maromak nia ukun-fuan sira. Paulo mós sente hanesan neʼe. Nia hatete: “Haʼu haree iha haʼu-nia liman ain buat seluk tan neʼebé halo funu hasoru ukun-fuan iha haʼu-nia laran, hodi kesi haʼu metin ba ukun-fuan sala nian neʼebé horik iha haʼu-nia liman ain.” (Rom 7:23) Karik fasil atu halo tuir kuandu ita la lakon buat ruma, no la hetan terus ruma. Maibé, ita sei halo saida kuandu ita-nia “hakarak aat isin nian” no “hakarak aat matan nian” halo susar mai ita atu halo tuir Maromak nia hakarak? Ita iha hakarak aat sira-neʼe tanba ita mak ema sala-naʼin no tanba “mundu nia espíritu” haleʼu ita, no hakarak aat sira-neʼe iha kbiit atu book ita atu la halo tuir Maromak. (1 Joao 2:16; 1 Kor 2:12) Atu hakarak aat sira-neʼe la domina ita, ita tenke ‘prepara ita-nia fuan’ antes hasoru susar ruma ka hasoru tentasaun ruma, no la husik buat naran deʼit hapara ita atu halo tuir Maromak. (Sal 78:8) Iha Bíblia laran ita iha ezemplu barak kona-ba ema neʼebé konsege duni halo tuir Maromak tanba sira prepara didiʼak sira-nia fuan.—Esd 7:10; Dan 1:8.
6, 7. Fó toʼok ezemplu ida kona-ba oinsá mak estuda mesak bele ajuda ita atu halo desizaun neʼebé matenek.
6 Dalan ida atu prepara ita-nia fuan mak ho badinas estuda Bíblia no estuda ita-nia livru sira neʼebé esplika kona-ba Bíblia. Hanoin toʼok situasaun tuirmai neʼe. Ita prontu ona atu estuda Bíblia iha kalan neʼebé baibain Ita estuda mesak. Ita foin halo orasaun ba Maromak Jeová hodi husu nia espíritu santu atu ajuda Ita atu halo tuir buat neʼebé Ita estuda husi ninia Liafuan. Ita mós planu ona atu haree filme ida iha kalan tuirmai. Ema dehan katak filme neʼe kapás, maibé Ita mós hatene katak filme neʼe nia parte balu hatudu hahalok neʼebé imorál no violénsia.
7 Depois, Ita hanoin kleʼan kona-ba Paulo nia konsellu iha Efeso 5:3: “Hanesan ema santu sira, keta husik ema ida iha imi leet temi sala-foʼer eh buat foʼer tomak, eh laran karak-teen nian.” Karik Ita mós hanoin-hetan Paulo nia konsellu iha Filipe 4:8. (Lee.) Nuʼudar Ita hanoin kleʼan kona-ba konsellu sira-neʼe, husu ba Ita-nia an: ‘Se haʼu haree filme neʼe, haʼu sei hatama hahalok aat iha haʼu-nia hanoin no laran. Se nuneʼe, haʼu tuir Jesus nia ezemplu kona-ba halo tuir Maromak ka lae?’ Entaun, saida mak Ita sei halo? Ita sei nafatin haree filme neʼe ka lae?
8. Tanbasá mak ita tenke hakaʼas an atu kaer metin nafatin ba Maromak nia matadalan kona-ba morál?
8 La diʼak atu ita la kaer metin ba Maromak nia matadalan kona-ba morál hodi hanoin katak ita iha kbiit atu kontrola an no la husik hahalok aat neʼebé ita haree iha filme book ita, hanesan hahalok imorál no violénsia. Tuir loloos, hanoin iha dalan neʼe mak hanesan ita ransu ho ema neʼebé iha hahalok aat. Duké hanoin hanesan neʼe ita tenke proteje ita-nia an no mós ita-nia oan sira husi hahalok aat mundu neʼe nian neʼebé haleno Satanás nia hahalok. Ema sempre hakaʼas an atu proteje sira-nia sasán hanesan televizaun atu la sai aat ka atu ema labele naʼok. Entaun, ita mós tenke hakaʼas an atu proteje ita-nia an husi Satanás nia “babeur aat hotu”, loos ka lae?—Ef 6:11.
9. Tanbasá mak ita tenke hili atu halo tuir Maromak Jeová loron-loron?
9 Loron-loron, ita hasoru situasaun neʼebé ita presiza hili atu halo tuir Maromak Jeová nia hakarak ka la halo tuir. Atubele hetan salvasaun, ita tenke halo tuir Maromak no moris tuir ninia matadalan sira. Hodi banati-tuir Kristu nia ezemplu kona-ba halo tuir Maromak maski “toʼo mate”, ita hatudu katak ita iha fiar neʼebé loos. Maromak Jeová sei fó kolen ba ita tanba ita hamriik metin nafatin. Jesus promete: “Ema neʼebé fiar metin toʼo rohan sei hetan moris rohan-laek.” (Mt 24:13) Ida-neʼe hatudu katak ita tenke hakaʼas an atu hatudu aten-brani hanesan Jesus.—Sal 31:24.
Jesus mak hatudu ezemplu diʼak liu kona-ba aten-brani
10. Problema saida deʼit mak karik ita hasoru? Saida mak ita presiza halo?
10 Ita presiza hatudu aten-brani atu hasoru mundu nia hahalok aat neʼebé haleʼu ita. Ita ema kristaun hasoru problema oioin neʼebé bele halo ita sees husi Maromak Jeová nia dalan sira. Porezemplu problema kona-ba morál, osan, relijiaun, no susar husi komunidade. Ema kristaun barak hetan terus husi sira-nia família rasik. No mós, ohin loron iha rai balu, besik eskola hotu hanorin kona-ba teoria evolusaun, no ideia kona-ba Maromak la iha sai buras liu iha ema nia leet. Kuandu hasoru problema sira-neʼe, ita labele sees deʼit no la halo buat ida. Maibé, ita tenke halo buat ruma atu proteje ita-nia an. Jesus nia ezemplu hatudu oinsá ita bele halo ida-neʼe.
11. Saida mak Jesus halo neʼebé bele ajuda ita atu hatudu aten-brani?
11 Jesus hatete ba ninia dixípulu: “Iha mundu imi sei hetan susar barak; maibé imi aten-brani bá, basá haʼu manán tiha mundu.” (Joao 16:33) Nia nunka husik mundu nia hahalok book nia. Nia nunka husik buat ida iha mundu atu hapara nia halaʼo ninia knaar atu haklaken, ka atu la kaer metin tan ba Maromak nia matadalan kona-ba morál no kona-ba adorasaun neʼebé loos. Ita mós hakarak halo nuneʼe. Iha orasaun, Jesus hatete kona-ba ninia dixípulu: “Sira laʼós mundu neʼe nian nuʼudar haʼu mós laʼós mundu neʼe nian.” (Joao 17:16) Hodi estuda no hanoin kleʼan kona-ba Kristu nia ezemplu kona-ba hatudu aten-brani, ita mós bele sai aten-brani atu la sai parte husi mundu neʼe.
Sai aten-brani hanesan Jesus
12-14. Konta toʼok Jesus nia ezemplu balu kona-ba hatudu aten-brani.
12 Jesus hatudu aten-brani bainhira nia halaʼo serbisu iha mundu. Hodi uza ninia kbiit nuʼudar Maromak nia oan, nia ho aten-brani “tama iha templu hodi duni sai ema sira hotu neʼebé faʼan no sosa iha neʼebá; nia taka fila ema troka osan sira-nia meza, no mós sira neʼebé faʼan falur nia banku sira”. (Mt 21:12) Iha kalan ikus iha ninia moris iha rai, Jesus ho aten-brani hakat ba oin atu proteje ninia dixípulu sira husi soldadu sira neʼebé mai atu kaer nia. Nia hatete: “Imi buka haʼu karik, husik sira-neʼe laʼo bá.” (Joao 18:8) Tuirmai, nia hatete ba Pedro atu hatama fali surik iha nia fatin, ida-neʼe hatudu katak Jesus la tau fiar ba buat kroʼat, maibé nia tau fiar ba Maromak Jeová.—Joao 18:11.
13 Ho aten-brani Jesus fó sai doutrina bosok neʼebé mestre falsu sira hanorin iha tempu neʼebá. Jesus hatete ba sira: “Susar boot ba imi, eskriba no farizeu sira, laran-makerek, basá imi taka reinu lalehan nian ba ema sira.” No nia hatutan: “Imi . . . tau ba kotuk buat hirak neʼebé boot liu iha ukun-fuan: justisa, laran-luak no fiar-metin. Imi hamoos kopu no bikan sira husi liʼur, maibé iha laran, sira nakonu ho naʼok no buat foʼer.” (Mt 23:13, 23, 25) Jesus nia dixípulu sira mós presiza hatudu aten-brani tanba ulun-naʼin relijiaun sira sei fó-terus no sei oho sira balu.—Mt 23:34; 24:9.
14 Jesus mós hatudu aten-brani hodi kontra hasoru anju aat sira. Iha loron ida, mane ida neʼebé anju aat sira domina, bá hasoru Jesus. Mane neʼe iha forsa toʼo ema ida la bele tahan nia ho korrente. Jesus la taʼuk, no nia duni sai anju aat sira-neʼe. (Mc 5:1-13) Ohin loron, Maromak la fó kbiit ba ema kristaun sira atu halo milagre hanesan neʼe. Maski nuneʼe, kuandu ita halaʼo serbisu atu haklaken no hanorin, ita mós halo funu hasoru Satanás, ida neʼebé “taka tiha ema fiar-laek sira-nia hanoin”. (2 Kor 4:4) Hanesan Jesus, ita-nia kilat “laʼós isin nian, maibé makaʼas liután neʼebé bele sobu rahun uma fatuk nian”, ka sobu rahun hanorin falsu neʼebé hanesan “uma fatuk nian”. (2 Kor 10:4) Hodi uza didiʼak kilat sira neʼebé Maromak fó ba ita, ita bele aprende buat barak husi Jesus nia ezemplu.
15. Tanbasá mak Jesus hatudu aten-brani?
15 Jesus hatudu aten-brani laʼós atu ema gaba nia, maibé tanba nia iha fiar. Ita mós tenke halo nuneʼe. (Mc 4:40) Oinsá mak ita bele iha fiar neʼebé loos? Dala ida tan, Jesus nia ezemplu bele ajuda ita. Nia hatudu katak nia hatene didiʼak Eskritura sira no tau fiar tomak ba ida-neʼe. Jesus uza kilat husi Maromak, neʼe mak Maromak nia Liafuan. Nia hatudu katak ninia hanorin sempre mai husi Eskritura sira. Dala barak nia dehan: “Hakerek tiha ona.” Neʼe katak hakerek nanis ona iha Maromak nia Liafuan. *
16. Oinsá mak ita bele hametin ita-nia fiar?
16 Atu ita bele tahan hasoru susar neʼebé ita hetan tanba ita mak Jesus nia dixípulu, ita tenke hametin ita-nia fiar. Ita bele halo ida-neʼe hodi lee no estuda Bíblia loron-loron, no tuir reuniaun sira, atu nuneʼe ita bele hatama iha ita-nia neon lia-loos neʼebé mak sai hun ba ita-nia fiar. (Rom 10:17) Ita mós tenke hanoin kleʼan kona-ba buat neʼebé ita aprende, hodi nuneʼe informasaun neʼe bele tama no book ita-nia laran. Kuandu ita iha fiar neʼebé metin, fiar neʼe bele book ita atu hatudu aten-brani. (Tgo 2:17) No ita mós tenke halo orasaun hodi husu Maromak nia espíritu santu, tanba fiar mak parte ida husi buat neʼebé espíritu lori mai.—Gal 5:22.
17, 18. Oinsá mak irmán klosan ida hatudu aten-brani iha eskola?
17 Irmán klosan ida naran Kitty, iha esperiénsia kona-ba oinsá fiar halo nia sai aten-brani. Husi kiʼik kedas nia hatene katak iha eskola nia labele “moe kona-ba evanjellu”, ka lia-foun diʼak, no nia hakarak tebes atu fó sasin ba nia kolega sira. (Rom 1:16) Tinan-tinan nia hakarak atu fó-hatene sira kona-ba lia-foun diʼak, maibé nia dada an tanba nia sente taʼuk. Kuandu nia sai boot uitoan, nia muda eskola. Nia hatete ba nia an: “Agora haʼu hakarak selu fali tempu sira neʼebé haʼu halo lakon ona.” Kitty halo orasaun atubele hatudu aten-brani hanesan Jesus, atubele iha matenek, no atubele iha oportunidade atu fó sasin.
18 Iha loron primeiru neʼebé Kitty tama eskola, iha ninia klase mestre husu estudante ida-idak atu fó koñese sira-nia an. Estudante balu fó-hatene kona-ba sira-nia relijiaun, no dehan katak sira ladún halo tuir buat neʼebé sira fiar. Kitty haree katak oportunidade neʼe mak resposta ba ninia orasaun. Kuandu mestre bolu nia, ho aten-brani nia hatete: “Haʼu Testemuña ba Jeová, no Bíblia mak haʼu-nia matadalan kona-ba morál no kona-ba adorasaun.” Nuʼudar nia koʼalia daudauk, estudante balu hatudu sira-nia oin katak sira la gosta. Maibé estudante seluk see tilun no depois neʼe husu pergunta ba nia. Mestre mós uza Kitty nuʼudar ezemplu diʼak kona-ba ema ida neʼebé kaer metin ba buat neʼebé nia fiar. Kitty kontente tebes tanba nia aprende atu sai aten-brani hanesan Jesus.
Hatudu fiar no aten-brani hanesan Jesus
19. (a) Oinsá mak ita bele hatudu fiar neʼebé loos? (b) Oinsá mak ita bele halo Maromak Jeová kontente?
19 Apóstolu sira mós hatene katak atu hatudu aten-brani sira presiza iha fiar neʼebé metin. Tan neʼe mak sira husu ba Jesus: “Haboot ami-nia fiar!” (Lee Lucas 17:5, 6.) La toʼo atu fiar katak Maromak iha, maibé fiar neʼebé loos mós katak ita haburas relasaun neʼebé besik ho Maromak Jeová. Ida-neʼe hanesan oan neʼebé hadomi no tau fiar ba nia aman neʼebé sempre hatudu domin no laran-diʼak. Maromak haleno Salomão atu hakerek: “Haʼu-nia oan, se ó-nia laran sai matenek, haʼu-nia laran sei haksolok, sin, haʼu-nia laran. No haʼu-nia rins sei haksolok kuandu ó-nia ibun koʼalia buat neʼebé loos no moos.” (Prov 23:15, 16) Hanesan neʼe, kuandu ita ho aten-brani kaer metin ba buat neʼebé loos, Maromak Jeová sei sente kontente, no ida-neʼe sei halo ita sai aten-brani liután. Tan neʼe, mai ita hotu sempre halo tuir Jesus nia ezemplu, hodi hatudu aten-brani no kaer metin ba buat neʼebé loos!
[Nota–rodapé]
^ par. 15 Haree ezemplu seluk iha Mateus 4:4, 7, 10; 11:10; 21:13; 26:31; Marcos 9:13; 14:27; Lucas 24:46; Joao 6:45; 8:17.
Ita bele hatán?
• Saida mak bele ajuda ita atu nafatin halo tuir maski ita ema sala-naʼin?
• Oinsá mak ita bele haburas fiar neʼebé loos? Oinsá mak ida-neʼe bele ajuda ita atu hatudu aten-brani?
• Saida mak sei akontese kuandu ita halo tuir no hatudu aten-brani hanesan Kristu?
[Pergunta estudu nian]
[Dezeñu iha pájina 13]
Ita ‘prepara ita-nia fuan’ atu hasoru tentasaun ruma ka lae?
[Dezeñu iha pájina 15]
Ita bele hatudu aten-brani hanesan Jesus, kuandu ita iha fiar neʼebé metin