Ungwan Kwagh Shi Taver Ishima Er Kristu Nahan

“Taver nen asema, Mo M hemba tar ne.”—YOH. 16:⁠33.

1. Yesu yange ungwa imo i Aôndo vindi vindi nena?

 YESU KRISTU eren ishima i Aôndo hanma shighe cii. Ma shighe môm tsô mhen u hemban Ter na u sha la ato va un ken ishima ga. (Yoh. 4:34; Heb. 7:26) Kpa akaa a yange tser un shin tar la na yô lu un zange u ungwan kwagh ga. Hii ken mhii u tom na u pasen kwagh shin tar la je, mbaihyomov mba Yesu, kua Satan cii, ve nôngo ér vea tsugh Yesu shi vea kighir un shi vea mee un a gbihi mimi na. (Mat. 4:​1-11; Luka 20:​20-25) Mbaihyomov mba Yesu yange ve na un ican ken ishima kua sha iyol kpishi. Zan zan je yô, ve va hingir u wuan un sha kon u mtsaha. (Mat. 26:​37, 38; Luka 22:44; Yoh. 19:​1, 17, 18) Er Yesu ya atsan a nyoon tsung ne kpishi nahan kpa, a za hemen “u ungwan kwagh zan zan ar ken ku.”​​—⁠Ôr Mbafilipi 2:⁠8.

2, 3. M-ongo u Yesu za hemen u ungwan kwagh shighe u lu yan ican la tese se nyi?

² Atsan a Yesu hingir or va shin tar ve va ya la tese un u ungwan kwagh ken ashighe a ican. (Heb. 5:⁠8) Alaghga a lu inja er Yesu fa kwagh u mcivir u Yehova vindi vindi je kwagh shi ga nahan. Kera kpa yange vande lun vea Yehova kôôsôô anyom imôngo, shi lu “or u fan tom” u Aôndo sha shighe u i lu gban tar la kpaa. (Anz. 8:30) Nahan kpa, ka er wa ishima shighe u hingir or ve lu yan ican la tese ér a tile sha mimi hen Aôndo kwagh shi  ga ye. Yesu, Wan u Aôndo yange seer kporom hen Ter na. Kwagh u yange er Yesu la tese se nyi?

³ Er Yesu lu or u vough nahan kpa, yange ker ér una tile sha tseeneke na ve una ungwan kwagh ga. Yange a shi sônon Aôndo ér a wase un una ungwan kwagh. (Ôr Mbaheberu 5:⁠7.) Gba u se kpa se hiden a ayol a ase ijime shi se eren msen hanma shighe ve se za hemen u ungwan kwagh ye. Sha ityôkyaa ne yô, apostoli Paulu wa Mbakristu kwagh ér: “Lu nen a mhen ne ken a ven u a lu ken Kristu Yesu la kpaa,” Un shon u “a hide a iyol Na ijime, hingir u ungwan kwagh zan zan ar ken ku” la. (Fil. 2:​5-8) Uma u Yesu la tese ér uumace vea fatyô u ungwan kwagh ken botar ne je kpaa. Yesu yô lu or u vough, kpa gema se uumace mba se yen mban di ye?

Er Se Yen Nahan kpa Se Fatyô u Ungwan Kwagh

4. Inja i mgbe u Aôndo a gbe se se lu a ian i tsuan kwagh u se soo u eren la ér nyi?

⁴ Aôndo yange gba Adam man Ifa, na ve kwaghfan shi na ve ian i tsuan kwagh u ve soo u eren yô. Er se lu ônov vev yô, se kpa se mba a ian i tsuan kwagh u se soo u eren yô. Inja i kwagh la ér nyi? Inja na yô se fatyô u eren kwagh u dedoo shin eren kwagh u bo. Kwagh ne tese ér Aôndo na se ian i tsuan u ungwan imo na shin ungwan ga. Er Aôndo a ne se ian i tsuan kwagh u sha ishima yase nahan kpa, se va pase un kwagh u se tsough u eren la. Jighilii yô, kwagh u se tsough u eren la una na se uma gayô ku. Kwagh u se tsough u eren la benden a ior asev kpaa.

5. Gba u se cii se nôngo a nyi, man se hemba mbamtaver mba se tagher a mi mbara nena?

⁵ Er se ye dyako i myen yô, ka heghem se u ungwan kwagh ga. Ka lun se zange u kuran atindi a Aôndo ga. Paulu kpa yange nôngo kwagh tsung sha er una ungwan kwagh yô. A nger ér: “M ngu nengen a tindi ugen ken alegh a am kpaa, ngu nôngon num a tindi u ken mhen wam.” (Rom. 7:23) Nahan kpa, ka a gba u se ya ican shin se de kwagh u doon se ishima una kar se, shin a hagher se u eren kwagh ga yô, i hemba lun se zange u ungwan kwagh. Kpa shighe u “isharen i yolough man isharen i ashee” i lu hendan a isharen yase i ungwan kwagh la yô, se er nena? Asaren a bo ne nga a kende ken a vese sha ci u myen wase la, shi “jijingi u taregh” u a kase se ne kpa benden a vese, man akaa ne nga a tahav kpen kpen. (1 Yoh. 2:16; 1 Kor. 2:12) Aluer se soo u hendan a asaren ne yô, saa se vande ‘tilen a ishima yase’ cii ve se mase tagher a ma mtaver shin ma ikyaren ye, shi se vande tsuan u ungwan imo i Yehova, a lu nyi je ia er kpaa. (Ps. 78:⁠8) Akav a ior mba yange ve hemba mbamtaver sha ci u ve vande wan iyol keghen a kegh la nga ken Bibilo kpishi.​​—⁠Esera 7:10; Dan. 1:⁠8.

6, 7. Na ikyav i tesen er kwaghhenen u sha tseeneke una fatyô u wasen se u tsuan kwagh sha kwaghfan yô.

⁶ Gbenda môm u wan iyol keghen a kegh yô ka u timen ken Ruamabera kua ngeren mba pasen akaa a ken Bibilo sha gbashima. Tôô ase wer kwagh u i er shin heen ne er u. Tôô wer ka aikighe wou u henen kwagh. U vande eren msen wer Yehova a na u jijingi na, sha er una wase u u er sha akaa a u hen ken Mkaanem nam la yô. U gema u wa ishima u nengen ma fiim sha TV kpernan aikighe. U ungwa wer fiim la doo je, mbapuunakaa kpa wuese i. Nahan cii kpa, shi u fa wer fiim la tese idya man tswam.

⁷ Nahan u hide u gbidye kwar sha kwaghwan u Paulu, u a lu ken Mbaefese 5:3 ne, ér: “Kpa idya man hanma inja i hôngorough kua hua u eren yô, u teren tsô kpaa, de teren her a ven ga er i kom uicighanmbaiorov yô.” Shi u umbur kwaghwan u Paulu u a lu ken Mbafilipi 4:8 la. (Ôr.) U henen sha kwaghwan ne gbang yô, u pine iyol you wer, ‘Aluer m iv mhen wam man ishima yam aa akaa a i tese ken fiim ne yô, shi me lu dondon ikyav i Yesu a ver i ungwan imo i Aôndo la kpa?’ Nahan u er nena? U za hemen u nenge fiim laa?

8. Hii nan i doo u se lu wang ken jijingi man sha aerene?

⁸ Aluer se mba henen ser se fatyô u hemban  uijende mba bov, man gurgur u a nongo tswam man idya ker la kpaa, nahan se haa iyol inya, se kera kura atindiakaa a Yehova ga yô, se er kwagh sha ibume kpishi. Hemba doon u se kuran ayol a ase kua ônov asev cii sha ikyev i akaa vihin se a Satan a lu samber a mi la. Or ka nana lu a ilev, man ilev mbi a hii u muan hen ningir u nan yô, ka nan nôngo sha afatyô u nan cii ér nana kura ilev mbi nan, amua la a de nyer hen ya u nan ga. Nahan se yô, doo u se kera kura ayol a ase sha ikyev i “ayom” a Satan ga he?​​—⁠Ef. 6:⁠11.

9. Er nan ve i doo u hanma iyange yô se kange ishima u ungwan imo i Yehova?

⁹ Hanma iyange yô ka i gba u se tsua u eren kwagh er Yehova a tese la shin eren ga. aluer se soo u zuan a myom yô, saa se ungwan imo i Aôndo shi se kuran atindiakaa a na a perapera la kpaa. Aluer se dondo ikyav i Kristu ver sha u ungwan kwagh ‘zan zan aren ken ku’ la yô, se tese ser jighjigh u nan wase la ka u mimi. Nahan Yehova una na se injar sha jighjigh u nan wase la. Yesu yange tôndo zwa ér: “or u nana taver ishima zan zan mkur yô, ka nan á yima nan ye.” (Mat. 24:13) Sha mimi yô, gba u se taver ishima vough er Yesu kpa taver nahan ve se kôr cio u wan ishima zan zan mkur ye.​​—⁠Ps. 31:⁠24.

Yesu Ver Se Ikyav i Ishimataver i Hemban Cii

10. Ka mbamkighir mba nyi se tagher a mini, man doo u se er nena?

¹⁰ Er tar ne u kase se a anza man aeren a u cii yô, gba u se taver ishima keng ve ua hôngor se ga ye. Mbakristu mba tagher a mbamkighir sha kwagh u aeren man mbamlu mba iorov man kwagh u inyar kua kwagh u kwaghaôndo, mba vea fatyô u yangen ve u dondon igbenda i Yehova i perapera yô. Mbagenev kpishi mba tagher a ahendan hen tsombor ve. Ken ityar igen yô, mba hemban tesen ityesen i or due ken inyamtoho la ken imakeranta seer a seer cii, shi mbanyiman Aôndo kpa mba ngeen seer a seer. Er se tagher a mbamkighir mban yô, doo u se gba teman tsô se kenger a kenger ga. Gba u se hendan a mbamkighir mban shi se kura ayol a ase kpaa. Ikyav i Yesu ver la tese se er se er kwagh ne yô.

11. U gbidyen kwar sha ikyav i Yesu la una seer taver se ishima nena?

¹¹ Yesu yange kaa a mbahenen nav ér: “Shin tar ne yô, ican ngi eren ne; kpa taver nen asema, Mo M hemba tar ne.” (Yoh. 16:33) Yesu hendan kwagh a mkighir u tar ne hanma shighe cii. Mayange je Yesu de ér tar ne u yange un u eren tom na u pasen kwagh shin u gema ieren na i vough la shin u na un una de u eren akaa a mcivir u mimi ga; se kpa se er nen nahan. Yesu ôr kwagh u mbahenen nav ken msen ér: “Ve mba ior i tar ne ga, er Mo kpaa M lu or u tar ne ga nahan.” (Yoh. 17:16) Aluer se mba timen sha kwagh u ishimataver i Kristu la shi gbidyen kwar sha mi yô, ishima ia hemba taver se u lun ior i tar ne ga.

Hen Ishimataver hen Yesu

12-14. Pase akav a tesen ishimataver i Yesu.

¹² Yesu yange tese ishimataver i kpilighyol ken tom na u pasen kwagh jimin cii. Er Yesu  lu Wan u Aôndo yô, yange yar tom a tahav mbu i na un la, nahan “nyôr ken tempel u Aôndo, zenda mbateenkwagh man mbayamenkwagh ken tempel cii kera, A mgbegha utebur mba mbamusannyaregh man mkônom ma mbateenmkungum kera kpaa” a mciem shio. (Mat. 21:12) Shighe u udugwer va u va kôron Yesu hen tugh nav mbu masetyô shin tar la, yange taver ishima due za pase iyol na sha er una kura mbahenen nav yô, a kaa ér: “Aluer ka Mo ne keren yô, de nen mban, ve̱ yem a ne vev.” (Yoh. 18:⁠8) Ica gba ga maa shi kaa a Peteru ér a hide a wa sanker na ken var, kwagh ne tese ér Yesu lu suur sha ikyav mbi utyaav ga, kpa lu suur sha Yehova.​​—⁠Yoh. 18:⁠11.

¹³ Yesu shi yange pon mbatesen mbaaiev mba sha ayange a na, mba ve lu a dooshima ga mbara kua atesen a ve a aiegh la cii. Yesu kaa a ve ér: “Kwagh á tser ne, ne mbangeren man Mbafarishi, ne mbaimangerev, gadia ne mba cirin ior tartor u Sha; ne kera wa akaa a a hembe lun a inja ken atindi la ikyo ga, er: ijirôron man mhôônom ma zungwen man jighjigh u nan; . . . Gadia ka ne kile iyongo man gbande ken ijime na, kpa kimi yô, ve iv a mtusu man u kôron iyol tsaha ga la.” (Mat. 23:​13, 23, 25) Gba u mbahenen mba Yesu kpa vea taver ishima nahan, sha ci u ve kpa mbahemenev mba kwaghaôndo u aiegh vea tôv ve a ican shi vea wua mbagenev je kpaa.​​—⁠Mat. 23:34; 24:⁠9.

¹⁴ Azôv je kpa Yesu yange taver ishima hendan kwagh a á. Sha shighe ugen la, Yesu zua a orgen u lun a ujijingi mba hôngorough, u taver agee je ma or fatyô u kangen un sha mshir ga yô. Nahan Yesu dugh ujijingi mba hôngorough mba ve lu ken or la kpishi la kera a mciem shio. (Mar. 5:​1-​13) Nyian ne, Aôndo na Mbakristu tahav mbu eren amba a uivande la ga. Nahan kpa, er se lu eren tom wase u pasen kwagh shi tesen ior ne nahan, gba u se nôngon ityav mbi ken jijingi a Satan, un shon u a “pir [mbananjighjighga] ashe a asema” la. (2 Kor. 4:⁠4) “Ikyav mbi utyav yasev ka mbi iyolough ga, kpa ka mbi ageev sha ishigh ki Aôndo sha ci u yôhôr ayou a utya,” ka jighjigh mba nan mba sha mi ga mba ior ve lu a mi ica i gbe la je la, di er ikyav mbi utyaav mbi Yesu kpa lu nahan. (2 Kor. 10:⁠4) Se hen u yaren tom a ikyav mbi utyaav mbi Aôndo a ne se ne ken ikyav i Yesu ver se la.

15. Ishimataver i Yesu la yange i har sha nyi?

¹⁵ Ishimataver i Yesu la yange i har sha mkende u ken ishima tsô ga, kpa i har sha jighjigh u nan. Doo u ishimataver yase kpa ia har sha jighjigh u nan. (Mar. 4:​40) Se er nan ve se lu a jighjigh u nan taveraa? Heen kpa ikyav i Yesu ver la ia wase se. Yange fa Ruamabera tsema tsema shi suur sha mi kpaa. Yesu yange a yar tom a sanker u jijingi u a lu Mkaanem ma Aôndo la, lu sanker kpôô kpôô ga. Hanma shighe yô, Yesu yaren tom a Ruamabera ken ityesen na. Ashighe kpishi Yesu una ôron kwagh u i nger ken Ruamabera yô, a hii kaan ér: “I nger ér,” ka kwagh u i nger ken Mkaanem ma Aôndo je la. *

16. Se er nan ve se seer lun a jighjigh u nan na?

¹⁶ Aluer se soo u maan jighjigh u nan u una wase se u wan ishima a ameen a mbahenen mba Yesu cii ve tagher a mi la yô, saa se ôron shi se timen ken Bibilo ayange ayange shi se zaan mbamkombo mba Mbakristu shi se kusun mimi mba ve lu imaagh ki jighjigh u nan la ken asema a ase kpaa. (Rom. 10:17) Shi gba u se gbidye kwar sha kwagh u se hen la zulee, sha er una bende a ishima yase yô. Ka jighjigh u nan u a lu kpenegh ga la tseegh  una fatyô u mgbeghan se u eren kwagh sha ishimataver ye. (Yak. 2:​17) Shi gba u se er msen se sôn icighan jijingi, sha ci u jighjigh u nan ka vegher u ityamegh ki jijingi.—Gal. 5:​22.

17, 18. Anmgbian u kwase ugen tese ishimataver ken makeranta nena?

¹⁷ Anmgbian u kwase ugen, iti na ér Kitty, a kav er jighjigh u nan a ne se ishimataver yô. Hii shighe u lu iyev la je, yange fa er gba u ‘kunya ua kôr un sha ci u Loho u Dedoo’ ken makeranta ga yô, shi sar un kpishi u pasen mba ve lu kelase môm la kwagh kpaa. (Rom. 1:16) Hanma inyom yô, yange a kange ishima ér una pase mbagenev kwagh, kpa er lu a ishimataver ga yô, a kan shio. Anyom nga kar yô, anmgbian u kwase ne musan makeranta. Nahan a kaa ér, “Kwa ne yô me kera ungwa ato mer ian ne shi i karem ga.” Kitty maa er msen ér Yehova a na un imba ishimataver i Kristu kpa lu a mi la man kwaghfan kua ian i injaa, sha er una pase kwagh yô.

¹⁸ Sha iyange i hii zan makeranta la je, i kaa ér mbayevmakeranta ve pase ayol a ve asange asange. Mbayevmakeranta mban kpishi pase kwaghaôndo u i yese ve ker yô, shi ve kaa ér ve mba ze adua hanma shighe ga. Kitty maa kav ér ka ian i un er msen ér i va una pase kwagh je ne. Ka gbe sha Kitty yô, a kaa vangertiôr ér, “M ngu môm ken Mbashiada mba Yehova, man ka Bibilo i tesen mo er me civir Aôndo shi me lu a inja i dedoo ye.” Er Kitty lu a kure kwaghôron na ga la, mbayevmakeranta mbagenev gba gbongor un ashe, u tesen ér kwaghaôndo na la ka ibumekwagh. Kpa mbagenev yô kegh ato zulee, je yô ve va pine un mbampin kpishi. Tica u Kitty kpa kaa ér a ver ikyav i dedoo i pasen kwagh u jighjigh u nan na a ashe a cian shio. Kwagh ne doo Kitty kpishi er un dondo ikyav i ishimataver i Yesu ver la nahan.

Lu a Jighjigh u Nan shi Taver Ishima er Kristu Nahan

19. (a) U nan jighjigh sha mimi la wa nyi man nyi kere? (b) Se na a saan Yehova iyol nena?

¹⁹ Mbaapostoli kpa yange ve kav ér gba u ishimataver ve la ia har sha jighjigh u nan. Yange ve kaa a Yesu ér: “Seer se jighjigh u nan!” (Ôr Luka 17:​5, 6.) U nan jighjigh sha mimi la ka di u kaan ér Aôndo ngu tseegh tsô ga. Gba u jighjigh u nan wase la una za shimi je se hingir u yan ikyar kôôsôô vea Yehova, er ikyar i anye u kiriki ka nan ya vea ter u nan u fan kwagh, u nan lu a dooshima la nahan. Aôndo yange na Solomon nger ér: “Wan wam, aluer ishima you ia lu a kwaghfan yô, mo iyol yam kpaa, á saan mo ken ishima. Een, ahi am aa ember, aluer zwa wou ua ôron akaa a vough yô.” (Anz. 23:​15, 16) Kape ka sea taver ishima, sea tile sha mimi sha kwagh u perapera ve i saan Yehova iyol je la. man ka sea fa ser se mba eren kwagh u saan Yehova iyol yô, ishima i hemba taver se cii. Nahan yô, se dondo nen ikyav i ishimataver i Yesu a ver la sha u taver ishima, eren kwagh u perapera hanma shighe cii!

[Ngeren mba shin kpe]

Ú Fatyô u Pasen Kpa?

• Er se yen nahan kpa, kanyi ia wase se ve se za hemen u ungwan kwaghaa?

• Jighjigh u nan sha mimi har sha nyi, man kwagh ne una wase se u taver ishima nena?

• Aluer se za hemen u ungwan kwagh shi taver ishima er Kristu nahan yô, kanyi ia due kere?

[Mbampin Mba Ngeren u Henen]

[Foto u sha peeji 13]

U ‘tile a ishima you’ shin u wa iyol u hendan kwagh a ameen vee?

[Foto u sha peeji 15]

Se fatyô u lun a ishimataver i i har sha jighjigh u nan la, er Yesu nahan