Kamumumvwida Leza Akuba Basicamba Mbuli Kristo
Kamumumvwida Leza Akuba Basicamba Mbuli Kristo
“Amulimbe myoyo, ndakiizunda nyika.”—JOH. 16:33.
1. Ino mbuti Jesu mbwaakali kumvwida Leza cakumanina?
JESU Kristo lyoonse wakali kucita luyando lwa Leza. Taakwe nociba ciindi comwe naakayeeyede kubazangila Bausyi bakujulu. (Joh. 4:34; Heb. 7:26) Pele akaambo kamapenzi ngaakajana anyika, tiicakali cuuba-uba kulinguwe kumvwida Leza. Kuzwa naakatalika mulimo wakwe wakukambauka, basinkondonyina, kubikkilizya a Saatani, bakali kusoleka kumuyunga, kumusinikizya akumweena kuti aleke kusyomeka kuli Leza. (Mt. 4:1-11; Lk. 20:20-25) Basinkondonyina aaba bakapa kuti Jesu apenge mumoyo akumucisa kumubili. Limwi bakamujaya buya acisamu cakupenzyezya. (Mt. 26:37, 38; Lk. 22:44; Joh. 19:1, 17, 18) Mumasunko aaya oonse amumapenzi aataambiki, Jesu wakazumanana kusyomeka “akuzumina nikuba kufwa.”—Amubale Ba-Filipi 2:8.
2, 3. Ino ncinzi ncotukonzya kwiiya kuzwa kukusyomeka kwa Jesu nokuba kuti wakali mumapenzi?
2 Izyintu zyakamucitikila Jesu naakali anyika zyakamuyiisya kumvwida Leza nomuba muziindi zikatazya. (Heb. 5:8) Tulakonzya kuyeeya kuti Jesu wakalizizyi zyoonse ziyandika mukubelekela Leza. Kayi wakakkala a Jehova kwamyaka minji kapati alimwi wakali kubeleka anguwe naakali kulenga. (Tus. 8:30) Nokuba boobo, ikuliyumya kwakwe naakali mumapenzi anyika, kwakatondezya kuti ulasyomeka. Jesu Mwana wa Leza, wakakomena kumuuya. Ino ncinzi ncotwiiya kuzwa kuzyintu zyakamucitikila?
3 Nokuba kuti wakali muntu uulondokede, Jesu kunyina naakali kulisyoma kuti ulakonzya kuzumanana kumvwida Leza munguzu zyakwe. Wakapaila kuli Leza kuti amugwasye kucita boobo. (Amubale Ba-Hebrayo 5:7.) Ikutegwa tuzumanane kumvwida Leza, andiswe tweelede kulibombya akupaila kuli nguwe lyoonse. Nkekaambo kaako imwaapostolo Paulo ncaakaambila Banakristo kuti: “Amube amoyo oyo nguwenya iwakali muli-Kristo Jesu . . . [i]wakalibombya akuzumina nikuba kufwa.” (Flp. 2:5-8) Ncaakacita Jesu cakatondezya kuti bantu balakonzya kumvwida Leza nokuba kuti bali akati kabantu babi. Jesu wakali muntu uulondokede, pele ino mbuti kujatikizya bantu batalondokede mbuli ndiswe?
Kumvwida Leza Nokuba Kuti Tatulondokede
4. Ino kuba alwaanguluko lwakulisalila kwaamba nzi kulindiswe?
4 Leza wakalenga Adamu a Eva kabali basongo bakonzya kulisalila zyakucita. Mbotuli bana babo, aswebo tulakonzya kulisalila mbubonya. Ino eeci caamba nzi? Caamba kuti tulakonzya kusala kucita cibotu naa cibi. Aboobo, tulakonzya kwaamba kuti Leza wakatupa lwaanguluko lwakusala kumumvwida naa kumuzangila. Nokuba kuti tulakonzya kulisalila, tweelede kulangisya notusala. Masimpe, nzyotusala zilakonzya kutupa buumi naa kufwa. Alimwi zilabajatikizya bantu bambi.
5. Ino nzyintu nzi zipa kuti kacitukatazya kumvwida Leza, alimwi ino ncinzi ncotukonzya kucita kuti tutayungwi?
5 Mbwaanga twakakona kutalondoka, cilatukatazya kumumvwida Leza. Tacili cuuba-uba lyoonse kutobela milawo ya Leza. Paulo wakasolekesya kumvwida Leza. Wakalemba kuti: “Ndabona mulao umbi muzizo zyangu, uulwisya mulao wamoyo wangu, nkabela ndaba mwaange wamulao wazibi uuli muzizo zyangu.” (Rom. 7:23) Masimpe, ikuti kakutayandiki kuliimya naa kakunyina mapenzi, ncuuba-uba kumumvwida Leza. Pele ino ncinzi ncotukonzya kucita kuti katuyanda kumvwida Leza kumwi katunyomenena “zisusi zyanyama niziba zisusi zyameso”? Eezyi zisusi zyanyama zilaboola akaambo kakuti tatulondokede alimwi akuti tulayungwa ‘amuuya wanyika,’ alimwi eezyi zilakonzya kutunyonganya. (1 Joh. 2:16; 1 Kor. 2:12) Kutegwa tutayungwi, tweelede kulibambila mumoyo katutananjila mumapenzi naa katutanasunkwa alimwi tweelede kuti katukanzide kumumvwida Jehova lyoonse. (Int. 78:8) Tulijisi zikozyanyo zinji zyamu Bbaibbele zyabantu bakacita kabotu akaambo kakuti bakalibambila mumoyo.—Ezr. 7:10; Dan. 1:8.
6, 7. Amwaambe ciiyo ca Bbaibbele ncotucita mbocikonzya kutugwasya kusala camaano.
6 Inzila imwi mbotukonzya kulibambila mumoyo nkwiinda mukubala Bbaibbele amabbuku aamba zyamu Bbaibbele. Amuyeeye kuti: Mbobuzuba mbomucita ciiyo ca Bbaibbele. Mwapaila kuti Jehova amupe muuya uusalala kutegwa umugwasye kutobela zyintu nzyomwaiya mu Bbaibbele. Muyanda kuti buzuba butobela mukeebelele cisobano cimwi acipekupeku. Mwakamvwa bantu kabaamba kuti cisobano eeci ncibotu, nokuba boobo mulizyi kuti mucisobano eeci bantu tabalilemeki alimwi mbankondo.
7 Mwayeeya lulayo lwa Paulo ku Ba-Efeso 5:3 ilwakuti: “Pele bwaamu amisyobo yoonse yabusofwaazi akulikumbuzya, zintu ezi tazyeelede nikuba kwaambwa akati kanu, nkaambo mbuboobo mbubeelede basalali.” Alimwi mwayeeya malailile aa Paulo aali ku Ba-Filipi 4:8. (Amubale.) Nomuzinzibala kuyeeya lulayo oolu lwakasololelwa amuuya, mwalibuzya kuti: ‘Ikuti kandeebelela zyintu zili boobu, sena ndilacitobela cikozyanyo ca Jesu cakumvwida Leza?’ Ino muya kucita buti? Sena muya kuceebelela cisobano eeci?
8. Ino nkaambo nzi ncotweelede kuzumanana kuzibikkila maano zyeelelo zya Jehova?
8 Inga kwaba kulubizya ikuti twaleka kuzibikkila maano zyeelelo zya Jehova, akuyeeya kuti tatukonzyi kuyungwa abantu batali kabotu kubikkilizya akweebelela zisobano zyankondo akutalilemeka. Muciindi caboobo, tweelede kulikwabilila swebo abana besu kuzyintu zili boobu izitondezya muuya wa Saatani. Balimi balabeleka canguzu ikukwabilila zisyango kutuyuni, tuuka alimwi abanyama kutegwa batazinyonyooni. Andiswe mbubwenya tweelede kulikwabilila “[ku]meneeno aa-Diabolosi.”—Ef. 6:11.
9. Ino nkaambo nzi ncotweelede kumumvwida Jehova abuzuba?
9 Abuzuba, tweelede kusala kumvwida Jehova naa pe. Kutegwa tukafwutuke, tweelede kumumvwida Leza akupona kweelana anjiisyo zyakwe ziluleme. Kwiinda mukutobela cikozyanyo ca Kristo cakumvwida ‘nikuba kusikila kulufwu,’ tutondezya kuti tulijisi lusyomo lwini-lwini. Jehova uyakutulongezya akaambo kakusyomeka kwesu. Jesu wakasyomezya kuti: “Oyo uuliyumya kusikila kumamanino uzoofutuka.” (Mt. 24:13) Kucita boobu, kuyandika kuba basicamba mbuli Jesu.—Int. 31:24.
Jesu Ncikozyanyo Cibotu Cabusicamba
10. Ino nzyintu nzi zikonzya kutuyunga alimwi ino inga twacita buti kutegwa tutayungwi?
10 Tuyandika kuba basicamba kutegwa tutayungwi abantu batalilemeki ibatuzingulukide. Banakristo balasikilwa masunko aajatikizya kutalilemeka, bukkale bubi, kuyandisya mali alimwi abukombi bwakubeja alo aakonzya kubalesya kutobela zyeelelo zya Leza ziluleme. Bantu banji balapenzyegwa mumukwasyi. Muzisi zimwi, izikolo zipati ziyabwiindila kuyiisya kuti zyintu zyakasanduka buya alimwi banji baya busyoma kuti Leza tako. Akaambo kazyintu eezyi zicitika, tatukonzi kukkala buyo. Tweelede kulikwabilila kutegwa tutayungwi. Cikozyanyo ca Jesu cilatutondezya mbotukozya kucita oobo.
11. Ino mbuti kuzinzibala kuyeeya cikozyanyo ca Jesu mbokukonzya kutupa kuba basicamba?
11 Jesu wakaambila basikwiiya bakwe kuti: “Munyika mulaba amapenzi, pele amulimbe myoyo, ndakiizunda nyika.” (Joh. 16:33) Kunyina naakayungwa anyika. Kunyina naakalekela zyintu zyamunyika kuti zimulesye kukambauka naa kutabubikkila maano bukombi bwakasimpe; andiswe inga twacita mbweena oobo. Mumupailo Jesu wakaamba basikwiiya bakwe kuti: “Tabali banyika mbuli mbwentali wenyika amebo.” (Joh. 17:16) Ikubala akuzinzibala kuyeeya zikozyanyo zya Kristo zyabusicamba kulakonzya kupa kuti andiswe tube basicamba kutegwa tuzumanane kutaba banyika.
Amwiiye Jesu Kuba Basicamba
12-14. Amupe zikozyanyo citondezya Jesu mbwaakali sicamba.
12 Jesu lyoonse wakali sicamba mumulimo wakwe wakukambauka. Naakali kubelesya nguzu zyakwe, Imwana wa Leza cakutayoowa “wakanjila muntempele ya-Leza, wakatanda boonse ibakali kuula akuulisya muntempele, wakatapaula matafule aabo basikusintana mali, azyuuno zyabo bakali kuulisya inkwilimba.” (Mt. 21:12) Ciindi basikalumamba nobakaboola kumujata Jesu imasiku ibuzuba bwakwe bwamamanino anyika, cabusicamba wakabakwabilila basikwiiya bakwe akwaamba kuti: “Na muyandaula ndime, aba abazwe.” (Joh. 18:8) Nokwakainda buyo ciindi cisyoonto, wakaambila Petro kuti atabelesyi panga, kutondezya kuti wakajisi lusyomo muli Jehova ikutali muzilwanyo zyaanyika.—Joh. 18:11.
13 Jesu tanaakayoowa kubaambila bamayi bakubeja kuti nzyobakali kuyiisya zyakali zyakubeja. Wakabaambila kuti: “Maawe inywe nubalembi aba-Farisi, nubasikuupaupa ameso! nkaambo mulajalila Bwami bwakujulu kubusyu bwabantu. . . . Makani mapati aa-Mulao mulaaleka, nkukuti lubeta aluzyalo alusyomo. . . . Mulasanzya atala akanywido ambede, pele mukati mulizwide lunyanzyo akutalyeendelezya.” (Mt. 23:13, 23, 25) Basikwiiya ba Jesu abalo bakali kuyandika kuba basicamba akaambo kakuti basololi babukombi bwakubeja bakali kuyoobapenzya akujaya bamwi akati kabo.—Mt. 23:34; 24:9.
14 Jesu wakali sicamba akumadaimona. Bumwi buzuba, wakaswaangana amuntu wakanjidwe madaimona iwakali anguzu cakuti kunyina muntu wakali kukonzya kumwaanga nketani. Jesu tanaakayoowa kwaagusya madaimona manji aakali kupenzya muntu ooyu. (Mk. 5:1-13) Aano mazuba, Banakristo tabajisi nguzu kuzwa kuli Leza zyakucita maleele aali boobu. Nokuba boobo, mumulimo wesu wakukambauka alimwi akuyiisya, andiswe tweelede kulwana nkondo yakumuuya a Saatani, “[i]waofwaazya meso aabaabo batazumina.” (2 Kor. 4:4) Mbubwenya mbuli Jesu, zilwanyo zyesu “tazyeensi zyabantu buyo, nzyanguzu zya-Leza zyakumwaisya mampangala mayumu”—injiisyo zidumide zyabukombi bwakubeja. (2 Kor. 10:4) Notubelesya zilwanyo zyakumuuya eezyi, twiiya cikozyanyo ca Jesu.
15. Ino busicamba bwa Jesu bwakayeeme anzi?
15 Busicamba bwa Jesu bwakayeeme alusyomo muli Leza, ikutali kulisyoma mwini. Andiswe mbotweelede kuba oobu. (Mk. 4:40) Ino mbuti mbotukonzya kuba alusyomo lwini-lwini? Tweelede kutobela cikozyanyo ca Jesu. Wakalaazyi kabotu Magwalo alimwi wakali kwaasyoma. Jesu tanaakali kubelesya zilwanyo zyakumubili, pele wakali kubelesya panga lyamuuya, Ijwi lya Leza. Lyoonse naakali kuyiisya wakali kubelesya Magwalo. Kanji-kanji wakali kutalika amajwi aakuti: “Kulilembedwe kuti,” nkokuti mu Jwi lya Leza. *
16. Ino mbuti mbotukonzya kuba alusyomo luyumu?
16 Kutegwa tube alusyomo luyumu lukonzya kutugwasya kuzunda masunko aaboola akaambo kakuba basikwiiya, tweelede kubala akwiiya Bbaibbele abuzuba akujanika kumiswaangano ya Bunakristo, akukazyiba kabotu kasimpe aayeeme lusyomo. (Rom. 10:17) Tweelede kuzinzibala kuyeeya zyintu nzyotwiiya, kutegwa zinjile mumoyo. Lulikke lusyomo luyumu ndolukonzya kutupa kucita zyintu cabusicamba. (Jak. 2:17) Alimwi tweelede kupaila ikulomba muuya uusalala nkaambo lusyomo ncibeela camicelo yamuuya.—Gal. 5:22.
17, 18. Ino mbuti umwi mucizi mbwaakatondezya busicamba kucikolo?
17 Mucizi wazyina lya Kitty wakabona lusyomo lwini-lwini mbolukonzya kupa busicamba. Kuzwa kubwana, wakalizyi kuti tanaakeelede kufwa “nsoni ku-Makani Mabotu” nali kucikolo alimwi wakali kuyanda kubakambaukila basicikolonyina. (Rom. 1:16) Amwaka, wakali kusoleka canguzu kuti abakambaukile makani mabotu, pele wakali kuwayawaya akaambo kakuti tanaakali sicamba. Naakaba amyaka iitandila ku 20, wakacinca cikolo. Wakati: “Lino tandeelede kukakilwa kukambauka mbuli mbondali kucita musyule.” Kitty wakapaila ikulomba kuba sicamba akuba mupampu mbuli Kristo, alimwi akuti ajane ciindi cakukambauka.
18 Ibuzuba bwakusaanguna kucikolo, basicikolo bakaambilwa kuti umwi aumwi alipandulule. Bunji bwabo bakaamba cikombelo cabo, akuti tiibakali kucibikkila maano. Kitty wakazyiba kuti eeci nceciindi ncaakali kupailila. Nocakasika ciindi cakwe cakulipandulula, cabusicamba wakaamba kuti: “Ndili umwi wa Bakamboni ba Jehova, alimwi mu Bbaibbele mondijana busolozi bwakumuuya abwakulilemeka.” Naakali kwaamba, basicikolonyina bamwi bakali kumulanga munzila iitondezya kuti lusyomo lwakwe ndwabufwubafwuba. Pele bamwi bakali kuswiililisya mpoonya naakamanizya bakamubuzya mibuzyo. Bayi mane bakaamba kuti Kitty wakali cikozyanyo cibotu mukwiiminina lusyomo. Kitty ulikkomene akaambo kakuti wakaiya cikozyanyo ca Jesu cabusicamba.
Amube Alusyomo Abusicamba Mbuli Kristo
19. (a) Ino kuba alusyomo lwini-lwini kubikkilizya nzi? (b) Ino mbuti mbotukonzya kukkomanisya Jehova?
19 Bamaapostolo abalo bakazyiba kuti kutegwa kabacita zyintu cabusicamba bakeelede kuba alusyomo. Bakalomba Jesu kuti: “Yungizya lusyomo lwesu.” (Amubale Luka 17:5, 6.) Kuba alusyomo lwini-lwini takugoleli buyo akusyoma kuti Leza nkwali. Kubikkilizya kuba acilongwe ciyumu a Jehova akumusyoma mbuli mwana musyoonto mbwabasyoma bausyi. Kasololelwa amuuya, Solomoni wakalemba kuti: “Mwanaangu, na moyo wako uli abusongo, moyo wangu ambebo ulakondwa. Njookondwa mukati kansa zyangu, na milomo yako ilaamba ziluleme.” (Tus. 23:15, 16) Mbubwenya oobo, ikuti andiswe cabusicamba twatobela injiisyo ziluleme, Jehova ulakondwa, alimwi eeci cipa kuti tuzumanane kuba basicamba. Aboobo, lyoonse katutobela cikozyanyo ca Jesu, ikwiiminina bululami cabusicamba.
Bupanduluzi buyungizidwe
^ munc. 15 Amubone Matayo 4:4, 7, 10; 11:10; 21:13; 26:31; Marko 9:13; 14:27; Luka 24:46; Johane 6:45; 8:17.
Sena Inga Mwapandulula?
• Ino ncinzi cikonzya kutugwasya kuti tuzumanane kumvwida Leza nokuba kuti tatulondokede?
• Ino lusyomo lwini-lwini luyeeme anzi, alimwi ino mbuti mbolukonzya kutugwasya kuba basicamba?
• Ino ncinzi ciyoocitika ikuti twazumanana kumvwida Leza akuba basicamba mbuli Kristo?
[Mibuzyo yaciiyo]
[Cifwanikiso icili apeeji 13]
Sena mulalibambila mumoyo kutegwa mwaazunde masunko?
[Cifwanikiso icili apeeji 15]
Tulakonzya kutondezya busicamba buyeeme alusyomo mbuli Jesu mbwaakacita