Kiristtoosaagaadan Azazettiyaageetanne Xala Gidite

“Minnite; taani sa7aa xoonaas.”—YOHAANNISA 16:33.

1. Yesuusi Xoossau waani azazettidaakko qonccissa.

YESUUS KIRISTTOOSI ubbatoo Xoossaa sheniyaa poliis. I ba Aawaayyo azazettennan agganau mule qoppi erenna. (Yohaannisa 4:34; Ibraawe 7:26) SHin saˈan deˈishin a gakkidabay azazettiyoogaa metennaba oottibeenna. Yesuusi sabbakiyoogaa doommoosappe doommidi, Seexaanaa gujjin Yesuusa morkketi i ammanettidaagaa gidennaadan ammanttanau, wolqqanttanau woykko cimmanau malidosona. (Maatiyoosa 4:1-11; Luqaasa 20:20-25) Ha morkketi Yesuusi qofaaninne asatettan keehippe waayettanaadan oottidosona. Wurssettan eti barchiyaa mittan a woridosona. (Maatiyoosa 26:37, 38; Luqaasa 22:44; Yohaannisa 19:1, 17, 18) Keehi gita tuggay gakkidaba gidikkokka, he ubbaban Yesuusi ‘hayqqana gakkanaassikka azazettiis.’—Piliphphisiyuusa 2:8.

2, 3. Yesuusi tuggay gakkishinkka azazettidoogaappe ay tamaarana danddayiyoo?

² Yesuusi saˈan asa gididi deˈidoogee, kase mule beˈi erenna metiya hanotan azazettiyoogee woygiyoogaakko i tamaaranaadan oottiis. (Ibraawe 5:8) Yihoowayyo oottiyoogaa xeelliyaagan  Yesuusi tamaarana danddayiyo hagaappe aadhiyaabi baynnaba milatees. Ubba qassi, keehi daro wodiyau Yihoowaara mata lagge gididi deˈiis; qassi Xoossay meretaa medhiyo wode ayyo “waanna oosanchcha” gididi oottiis. (Leemiso 8:30) Gidikkonne, tuggay deˈishinkka asa gididi ammanuwan genccidoogee a suuretettaa kumetta hanotan bessiis. Yesuusi, Xoossaa Naˈay, ayyaanaaban dicciis. Nuuni a hanotaappe ay tamaarana danddayiyoo?

³ Yesuusi polo asa gidikkonne, ba shenedan kumetta hanotan azazettanau malibeenna. I azazettidi deˈanau Xoossay maaddanaadan woossiis. (Ibraawe 5:7 nabbaba.) Nuunikka azazettiyaageeta gididi deˈanau nu huuphiyaa kawushshananne Xoossay maaddanaadan ubbatoo woossana koshshees. Hegaa gishshau, kiitettida PHauloosi: ‘Bana kaushshidi hayqqana gakkanaassikka azazettida,’ “Kiristtoos Yesuusan de7iya ha qofai qassi inttenankka de7anau bessees” giidi Kiristtaaneta zoriis. (Piliphphisiyuusa 2:5-8) Yesuusa deˈoy, iita asa giddonkka asaa naati azazettana danddayiyoogaa boxooxissiis. Yesuusi polo gidiyoogee tuma; shin polo gidenna nu mala asaa naatubaa woygana danddayettii?

Polotettaa Pacay Deˈishinkka Azazettana Danddayoos

4. Nuuni koyidoogaa dooranaadan merettida giyoogee woygiyoogee?

⁴ Xoossay Addaamanne Hewaano qoppi danddayiyaanne bantta koyidoogaa dooranau danddayiya mereta oottidi medhiis. Eta naata gidiyoogaadan, nuussikka koyidobaa dooriyo maatay deˈees. Hegaa giyoogee woygiyoogee? Hegaa giyoogee nuuni loˈˈobaa oottanau gidin woy iitabaa oottanau qofaa qachanau danddayeettees giyoogaa. Hara baggaara, nuuni azazettanau woy agganau koyidoogaa dooriyo laˈatettaa Xoossay nuuyyo immiis. Hegaa mala gita laˈatettay aawatettaa kaalettees. Kandduwaaban nuuni qofaa qachiyoobay nuuyyo hayqo woy deˈo kaalettana danddayiyoogee tuma. Hegee nuuyyo matattiyaageetakka bochees.

5. Nuuni ubbay baaxetanaadan oottiyaabi aybee? He baaxiyan waatidi xoonana danddayiyoo?

⁵ Nuuni laattido nagaraappe denddidaagan, azazettiyoogee metennaba gidenna. Xoossaa higgiyau azazettiyoogee ubbatoo metennaba gidenna. PHauloosi azazettanau baaxetana koshshiis. I: “Ta bollaa giddon de7iya ta wozanaa qofaa higgiyaara warettiya dumma higgiyaa be7ais; he higgee ta bollaa giddon de7iya nagaraa ootissiya higgiyan tana qashissees” yaagidi xaafiis. (Roome 7:23) Yarshshiyoobi, azzanttiyaabi woy metiyaabi baynna wode, azazettiyoogee metennaagee qoncce. SHin nuuni azazettanau koyiyoogee ‘asatettaa amuwaaranne ayfen xeellidi qaaqqatiyoogaara’ moggenna wode waatanee? Ha bala amoy nu polotettaa pacaappenne nu yuushuwan deˈiya “sa7aa ayyaanaa” sugettaappe pulttees; qassi he amoy keehi wolqqaama. (1 Yohaannisa 2:16; 1 Qoronttoosa 2:12) Nuuni he amuwaa teqqanau, metoy woy paacee gakkanaappe kasetidi ‘nu wozanaa giigissana’ bessees; qassi aybi gakkikkokka, Yihoowayyo azazettanau murttana bessees. (Mazamure 78:8, NW) Bantta wozanaa giigissido gishshau murutida darotu leemisoy Geeshsha Maxaafan deˈees.—Iziraa 7:10; Daaneela 1:8.

6, 7. Buzo xinaatee aadhida eratetta dooruwaa dooranau waatidi maaddana danddayiyaakko leemisuwan yoota.

⁶ Nu wozanaa giigissiyo issi ogee, Geeshsha Maxaafaanne Geeshsha Maxaafan baasettida xuufeta minnidi xannaˈiyoogaa. Ne hanotay kaallidi deˈiyaagaa mala gaada qoppa. Hagee neeni buzo xinaatiyaa xannaˈiyo omarssa goos. Geeshsha Maxaafaappe xannaˈiyoobaa oosuwan peeshshanau Yihooway ba ayyaanan maaddana mala woossa simmaasa. Wonttetta galla omarssi issi pilmiyaa televizhiiniyan beˈanau halchadasa. Qofaa immiyaageeti he pilmiyaabaa loˈˈobaa haasayishin siyadasa; gidikkonne, he pilmee shori baynna asho gaytotettaanne makkalaa bessiyoogaakka eraasa.

⁷Efisoona 5:3n PHauloosi: “Geeshshatuyyo bessiyaagaadan, intte giddon shaaramuxiyoogeenne tunatetta ubbai, woi miishsha amottiyoogee mulekka siyettoppo” giido zoriyaa wotta dentta qoppaasa. PHauloosi Piliphphisiyuusa 4:8n (Nabbaba.) yootido zoriyaakka hassayaasa. Ayyaanaa kaaletuwan xaafettida ha zoriyaa  wotta dentta qoppaydda, ‘Taani ta wozanaanne ta qofaa eraydda hagaa mala prograamiyau aattada immikko, Yesuusi Xoossau minttidi azazettido leemisuwaa kaalliyaanaa?’ gaada nena oycha. Neeni ay oottuutee? Ay gidikkokka he pilmiyaa beˈuutee?

8. Nuuni kandduwaabaaninne ayyaanaaban xoqqa maaraa naagana bessiyoy aybissee?

⁸ Geella makkalaa woykko shori baynna asho gaytotettaa bessiya allaxxiyoobaa gujjiyaaba gidana danddayiya, iita laggetettaa teqqanau danddayays giidi qoppiyoogan, Yihoowa maaraa minttidi kaallanau murttido murttiyaa leppissiyoogee bala. Hegaappe, nuuninne nu naati moorettanaadan oottiya Seexaanaa ayyaanaa qohuwaappe naagettana bessees. Asaappe asaa oyqqiya harggee bana oyqqennaadan asay naagettanau baaxetiyoogaadan, nuuni ‘Seexaanaa iita cimuwaappe’ minnidi naagettana koshshees.—Efisoona 6:11.

9. Nuuni galla galla Yihoowau azazettanau murttana bessiyoy aybissee?

⁹ Galla galla gaana danddayettees, issi issiban nuuni hanotata Yihoowa ogiyan oottanaakko woy agganaakko doorana koshshees. Nuuni atotettaa demmanau, Xoossau azazettananne a geeshsha baaso siraataara moggidi deˈanau bessees. ‘Hayqqana gakkanaassikka’ gidin, Kiristtoosi azazettido leemisuwaa kaalliyoogan nu ammanoy wozanappe gidiyoogaa bessoos. Nuuni ammanettidi oottiyoobau Yihooway nuna woytana. Yesuusi: “Wurssettaa gakkanaashin gencciya urai attana” yaagidi qaalaa geliis. (Maatiyoosa 24:13) Hegau, Yesuusaagaa mala bessiya xalatettaa dichana koshshees.—Mazamure 31:24.

Yesuusi Xalatettan Ubbaappe Aadhiya Leemiso

10. Nuna ay mala sugettay gakkana danddayii? Nuuni waatidi zaaro immana koshshii?

¹⁰ Nuuni alamiyaa xeelaaninne eeshshan doodetti uttido gishshau, hegee nuna moorennaadan teqqanau xalatettaa koshshees. Kiristtaaneti Yihoowa geeshsha ogiyaappe deshanaadan oottana danddayiya sugettay kandduwaaban, deretettan, miishshaara gayttidabaaninne haymaanootiyaaban gakkees. Darota so asaappe ixoy gakkees. Issi issi biittatun, lodda laamiyaa qofaa kaseegaappe aaruwan minttidi tamaarissoosona; qassi Xoossay baawa giyoogee alamiyan bonchettida ammano gidiiddi deˈees. Nuuni Kiristtaane gidiyoogaadan, gakkiya hagaa mala sugettaa xaasayidi xeellana danddayokko. Hegaa teqqanaunne nu huuphiyau naagettanau baaxetana koshshees. Yesuusa leemisoy nuuni hegan waanidi murutana danddayiyaakko bessees.

11. Yesuusa leemisuwaa wotti dentti qoppiyoogee nuuni keehi xala gidanaadan oottiyoy ayba ogiyaanee?

¹¹ Yesuusi ba erissiyo ashkkaratussi: “Sa7an intte waayettana. SHin minnite; taani sa7aa xoonaas” yaagiis. (Yohaannisa 16:33) I alamiyaa sugettaa ubbatoo teqqiis. I ba sabbakiyo oosuwaa polennaadan woykko tumu goynuwaunne suure eeshshau kaalliyo maaraa xaasayidi xeellanaadan alamee oottana mala mule paqqadibeenna. Yesuusi ba erissiyo ashkkarata xeelliyaagan: “Taani sa7aassa gidennaagaadan, etikka sa7aassa gidokkona” yaagidi woossiis. (Yohaannisa 17:16) Kiristtoosa xalatettaa leemisuwaa xannaˈiyoogeenne wotti dentti qoppiyoogee nuuni alamiyaappe  shaahettanau koshshiyaagaa keena xala gidanaadan oottana danddayees.

Yesuusappe Xalatettaa Tamaara

12-14. Yesuusi xalatettaa bessido leemisuwaa yoota.

¹² Yesuusi ba haggaazuwaa wode ubban gita xalatettaa bessiis. I Xoossaa Naˈaa gidiyoogaadan ba maataa goˈettidi, aynne yayyennan “Beeta Maqidasiyaa gelidi, hegan baizziyaageetanne shammiyaageeta ubbaa kare yedettiis; qassi miishshaa laammiyaageetu xaraphpheezaanne haraphphiyaa baizziyaageetu oidiyaa aatti [yeggiis].” (Maatiyoosa 21:12) Yesuusi saˈan deˈido wurssetta qammi wotaaddarati a oyqqanau yiido wode, ba erissiyo ashkkarata qohuwaappe naaganau sinttau kiyidi, “Intte tana koyiyaabaa gidikko, hageeta yeddite” yaagiis. (Yohaannisa 18:4-8) Hegaappe guuttaa takkidi, PHeexiroosi ba bisuwaa shoohuwan zaaridi wottanaadan yootiis; yaatiyoogan, i ammanettiyoy ola miishshaana gidennan Yihoowana gidiyoogaa bessiis.—Yohaannisa 18:11.

¹³ Yesuusi ba wode deˈiya worddo asttamaaretanne eta bala timirttiyaa yayyennan qoncciyaa kessiis. Yesuusi etau hagaadan giis: “Lo77o milatiya iitatoo, higgiyaa tamaarissiyaageetoonne Parisaawetoo, asaayyo saluwaa kawotettaa intte gorddiyo gishshau, intteyyo aayye7ana; . . . higgiyan de7iya keehi koshshiyaageeta aggi bayeeta; hegeeti pirddaa, maarotettaanne xillotettaa. . . . Intte shaatiyaayyoonne keriyaayyo bolla baggaa geeshsheeta; shin intteyyo giddoora bonqqiyoogeenne uuzettiyoogee kumi uttiis.” (Maatiyoosa 23:13, 23, 25) Haymaanootiyaa kaalettiya worddoti Yesuusi erissiyo ashkkarata yedettanaunne etappe issota issota woranau deˈiyo gishshau, etikka aagaadan xalana koshshees.—Maatiyoosa 23:34; 24:9.

¹⁴ Yesuusi daydanttata eqettiyoogankka xalatettaa bessiis. Issi wode, Yesuusi ooninne oyqqidi sanssalatan qachanau danddayenna, daydanttati oyqqido issi bitaniyaara gayttiis. Yesuusi yayyennan, bitaniyaa oyqqida daro daydanttata kessiis. (Marqqoosa 5:1-13) Ha wodiyan hegaa mala maalaalissiyaabata oottanaadan Xoossay Kiristtaanetussi wolqqaa immibeenna. Gidikkokka, sabbakiyoogaaninne tamaarissiyoogan nuunikka “ammanenna asatu qofaa” jallissida Seexaanaara ayyaana olaa olettana bessees. (2 Qoronttoosa 4:4) Yesuusaagaadan nu ola miishshay “ha sa7aagaa gidenna. SHin qatuwaa,” giishin keehippe aakkidaba gidikkonne bala gidida haymaanootiyaa timirttiyaa “laalanau wolqqaara de7iya Xoossaa tooraa.” (2 Qoronttoosa 10:4) Ha ayyaanaabaa ola miishshata goˈettiyoogan, nuuni Yesuusa leemisuwaappe darobaa tamaaroos.

15. Yesuusa xalatettay aybin baasettidee?

¹⁵ Yesuusa xalatettay coo minotettan gidennan ammanuwan baasettiis. Nu xalatettaykka hegaadaana gidana bessees. (Marqqoosa 4:40) Waanidi tumu ammanoy deˈiyoogeeta gidana danddayiyoo? Haˈˈikka Yesuusa leemisuwaappe kaaletuwaa demmoos. I Geeshsha Maxaafaa loyttidi eriyoogaanne an keehippe ammanettiyoogaa bessiis. Yesuusi goˈettido ola miishshay, coo biso gidennan ayyaanaa bisuwaa, Xoossaa Qaalaa. I ba timirttiyaa kaafanau zaari zaaridi Geeshsha Maxaafaappe yootiis. I daroto ba tamaarissiyooban, Xoossaa maxaafan ‘yaagettidi xaafettiis’ giyaagaa goˈettiis. *

16. Nuuni mino ammanuwaa demmana danddayiyoy ayba ogiyaanee?

¹⁶ Erissiyo ashkkara gidiyoogan gakkiya paaciyaa xoonana danddayiya ammanuwaa dichanau, ammanuwau baaso gidida tumaa nu wozanan wottanaadan, Geeshsha Maxaafaa galla galla nabbabanaunne xannaˈanau, qassi Kiristtaane  shiiqotun beettanau bessees. (Roome 10:17) Qassi nuuni tamaariyoobay nu wozanaa denttettanaadan hegaa wotti dentti qoppanau bessees. Xalatetta oosuwau nuna denttettana danddayiyay paxa deˈiya ammano xalla. (Yaaqooba 2:17) Ammanoy ayyaanaa ayfiyaa macara gidiyo gishshau, nuuni geeshsha ayyaanaa demmanau woossana bessees.—Galaatiyaa 5:22.

17, 18. Issi yelaga michiyaa timirtte keettan xalatettaa bessidoy ayba ogiyaanee?

¹⁷ Kiti geetettiya issi yelaga michiyaa tumu ammanoy waatidi xalanaadan oottiyaakko ba deˈuwan beˈaasu. Timirtte keettan ‘wonggeliyaa mishiraachuwan yeellatana’ koshshennaagaa a naatettaappe doommada erausu; qassi a banaara tamaariyaa naatussi markkattanau wozanappe koyawusu. (Roome 1:16) A layttan layttan haratussi mishiraachuwaa yootanau qofaa qachawusu; shin yayyiyo gishshau hegaadan ootta erukku. Guutta layttaappe guyyiyan a timirtte keettaa laammaasu. He wode a, “Hanno gakkanaashin taappe halida injjiyaa gishshaa oottanau giigaas” yaagaasu. Kita Kiristtoosaagaadan xalanau, akeekaanne loˈˈo injjiyaa demmanau woossaasu.

¹⁸ Koyro gallassi tamaareti huuphiyan huuphiyan banttabaa yootanaadan shoobettidosona. Daroti bantta haymaanootiyaanne a minttidi kaallennaagaakka yootidosona. Kita demmanau woossido injje wodee hagaa gidiyoogaa akeekaasu. I kayay gakkin, xalatettan “Taani Yihoowa Markka; qassi goynuwaanne suure kandduwaa xeelliyaagan taani kaalliyoy Geeshsha Maxaafaa” yaagaasu. A haasayishin issi issi tamaareti i haymaanootiyaa kallennaagaa bessiya hanotan o xeellidosona. SHin harati akeekan ezggidosona; qassi guyyeppe issi issi oyshaa oychidosona. Asttamaaree ubba Kita ba ammaniyoobau zaaro immiyoogan loˈˈo leemiso gidiyoogaa yootiis. Yesuusa xalatettaa leemisuwaappe timirttiyaa demmidoogan Kita keehippe ufayttaasu.

Kiristtoosaagaa Mala Ammanuwaanne Xalatettaa Bessa

19. (a) Tumu ammanoy deˈiyoogee ay ay gujjii? (b) Nuuni Yihoowa ufayssana danddayiyoy ayba ogiyaanee?

¹⁹ Kiitettidaageetikka bantta xalatettau ammanoy baaso gidana bessiyoogaa akeekidosona. Eti Yesuusa: “Nuussi ammanuwaa gujja” yaagidi mintti oychidosona. (Luqaasa 17:5, 6 nabbaba.) Tumu ammanoy deˈiyoogee Xoossay deˈiyoogaa ammaniyoogaappe aadhiyaaba. Kehanne siiqiya aawaara issi guutta naˈau deˈiya gaytotettaa mala hanotan, hegee Yihoowaara mata dabbotettaa medhiyoogaa gujjees. Ayyaanay denttettin Solomoni: “Ta na7au, neeni aadhdhida eranchcha gidikko, ta wozanaikka ufaittana; ne inxxarssai suurebaa haasayiyo wode, ta wozanai ufaittees” yaagidi xaafiis. (Leemiso 23:15, 16) Hegaara issi mala hanotan, geeshshatetta baaso siraataa nuuni xalatettan kaafiyoogee Yihoowa ufayssees; qassi hegaa eriyoogee nuuni xalatettaa gujjanaadan oottees. Yaatiyo gishshau, geeshshatettaa xalatettan kaafiyoogan, ubbatoo Yesuusa leemisuwaa kaalliyaageeta gidoos!

[Footnotes]

Qonccissana Danddayay?

• Polotettaa pacay deˈishinkka nuuni azazettiyaageeta gididi deˈanaadan maaddiyaabay aybee?

• Tumu ammanoy baasettidoy aybinee? Hegee nuuni xala gidanaadan maaddana danddayiyoy ayba ogiyaanee?

• Nuuni azazettiyoogaaninne Kiristtoosaagaa mala xalatettaa bessiyoogan demiyo ayfee aybee?

[Oyshata]

[Sinttaa 16n deʼiya misiliyaa]

Neeni paaciyaa eqettanau ‘ne wozanaa giigissay’?

[Sinttaa 18n deʼiya misiliyaa]

Yesuusaagaadan ammanuwan baasettida xalatettaa bessana danddayoos