Unaj k-uʼuyik tʼaan yéetel maʼ k-chʼaʼik saajkil jeʼex tu beetil Jesuseʼ
Unaj k-uʼuyik tʼaan yéetel maʼ k-chʼaʼik saajkil jeʼex tu beetil Jesuseʼ
«Yanak a wóoleʼex, tumen teneʼ tsʼoʼok in tsʼáancheʼetik yóokʼol kaab.» (JUAN 16:33)
1. ¿Baʼaxten k-aʼalik Jesuseʼ jach tu yuʼubaj u tʼaan Dios?
JESUSEʼ mantatsʼ tu beetaj baʼax ku yaʼalik u Taata yaan teʼ kaʼanoʼ. Letiʼeʼ jach upuliʼ maʼ tu tuklaj u beetik baʼax maʼ utstutʼaan Diosiʼ (Juan 4:34; Heb. 7:26). Baʼaleʼ, le baʼaxoʼob tu muʼyajtaj way Luʼumoʼ tu beetaj u talamtaltiʼ u yuʼubik tʼaan. Desde ka káaj u kʼaʼaytajeʼ, Satanás yéetel u maasil máaxoʼob pʼekmiloʼ, tu yóotaj u túulchʼintoʼob u beet baʼax maʼ utstutʼaan Diosiʼ (Mat. 4:1-11; Luc. 20:20-25). Jach tu beetoʼob u muʼyaj, yéetel tu tsʼoʼokeʼ tu kíimsoʼob le ka tu chʼuykíintoʼob tiʼ upʼéel cheʼoʼ (Mat. 26:37, 38; Luc. 22:44; Juan 19:1, 17, 18). Baʼaleʼ kex jach yaʼab úuchik u muʼyajeʼ, Jesuseʼ tu «yuʼubaj tʼaan» tak ka kíimi (Fili. 2:8).
2, 3. ¿Baʼax ku yeʼesiktoʼon le bix úuchik u yuʼubik tʼaan Jesusoʼ?
2 Yoʼolal le baʼaxoʼob tu muʼyajtaj Jesús way Luʼumoʼ tu kanaj baʼax uláakʼ táakaʼan ichil u yuʼubaʼal u tʼaan Dios (Heb. 5:8). ¿Baʼax túun uláakʼ tu kanaj? Letiʼeʼ u millonesi jaʼaboʼob tu máansaj yiknal u Taata, yéetel tu yáantaj bey utúul «j-maʼalob meeyjil» le ka tu beetaj tuláakal baʼaloʼ (Pro. 8:30, NM). Le baʼaxoʼob tu muʼyajtaj way Luʼumoʼ tu túuntaj u yóol, baʼaleʼ le úuchik u chúukpajal u yóol u aktáantoʼ tu yeʼesaj jach tu jaajil ku yuʼubik tʼaan. Lelaʼ le áant u maas bisuba yéetel u Taata. ¿Baʼax k-kanik tiʼ le bix úuchik u yuʼubik tʼaanoʼ?
3 Kex minaʼan u kʼebaneʼ, u yojel maʼ tu páajtal u yuʼubik tʼaan wa maʼ u yáantaʼal tumen Jéeoba. Le oʼolal tu kʼáataj u yáantaj mantatsʼ (xokaʼak Hebreob 5:7). Toʼon xaneʼ unaj k-eʼesik kabal óolal yéetel k-kʼáatik u yáantaj Dios utiaʼal k-uʼuyik u tʼaan. Apóstol Pabloeʼ tu yaʼalaj tiʼ le sukuʼunoʼoboʼ: «Tuukulneneʼex jeʼel bix tuukulnajik Cristo Jesusoʼ. [...] [Letiʼeʼ] tu yuʼubaj tʼaan» tak tu kíimbal (Fili. 2:5-8). Le baʼax tu beetaj Jesusoʼ ku yeʼesikeʼ kex jach kʼasaʼan le yóokʼol kaabaʼ, jeʼel u páajtal u yuʼubik máak u tʼaan Dioseʼ. Baʼaleʼ ¿bix jeʼel u páajtal k-beetik baʼax ku yaʼalik Dios kex kʼeban wíinkoʼoneʼ?
Kex kʼebanoʼoneʼ jeʼel u páajtal k-uʼuyik tʼaaneʼ
4. ¿Baʼax páajtalil tsʼaʼantoʼon tumen Jéeoba?
4 Adán yéetel Evaeʼ yaan kaʼach u páajtalil tiʼob u yéeyikoʼob baʼax ken u beetoʼob. Toʼon xaneʼ láayliʼ tsʼaʼantoʼon le páajtalilaʼ. Yantoʼon u páajtalil k-yéeyik k-beetik baʼax uts wa k-beetik baʼax kʼaas, k-uʼuyik u tʼaan Dios wa maʼ. Baʼaleʼ le baʼax k-chʼaʼatuklik k-beetkoʼ jeʼel u beetik u bintoʼon utsil wa kʼaasileʼ, yéetel jeʼel xan u taasik uts wa kʼaas tak tiʼ u maasileʼ, tsʼoʼoleʼ jeʼel tak u beetik k-salvartik k-kuxtal wa k-peʼertikeʼ.
5. ¿Baʼax jach unaj k-tsʼáaik óol k-beete, yéetel baʼax jeʼel u yáantkoʼoneʼ?
5 Yoʼolal le kʼebanoʼ, u suukaʼanileʼ maʼatech k-uʼuyik tʼaan, le oʼolal ku talamtaltoʼon k-beetik baʼax ku yaʼalik Dios. Tak apóstol Pabloeʼ kʼaʼabéetchaj u jach tsʼáaik u yóol u beet baʼax maʼalob, letiʼeʼ ku yaʼalik: «Kin wilikeʼ tiʼ in wíinklileʼ yaan baʼax ku bin tu contra in tuukul; lelaʼ u yaʼalmajtʼaan le kʼeban yaan tiʼ in wíinkliloʼ yéetel u palitsiltmaen» (Rom. 7:23). U jaajileʼ, maʼ talam jeʼel u yuʼubik tʼaan máak wa maʼ táan u aktáantik wa baʼax talamileʼ. Baʼaleʼ ¿baʼax k-beetik ken taalak t-tuukul «u kʼaakʼas tsʼíibolaloʼob le luʼumkabil wíinkliloʼ» yéetel «u kʼaakʼas tsʼíibolalil le ichoʼ»? Yoʼolal le kʼeban yaan t-wíinklil yéetel yoʼolal bix u tuukul le máaxoʼob maʼatech u meyajtkoʼob Diosoʼ jeʼel u joʼopʼol k-jach tsʼíiboltik k-beetik baʼaxoʼob maʼ maʼalobtakeʼ (1 Juan 2:16; 1 Cor. 2:12). Le oʼolal utiaʼal k-luʼsik t-tuukuleʼ, táanileʼ unaj k-chʼaʼatuklik maʼ k-beetik baʼax maʼ utstutʼaan Jéeoba kex jeʼel baʼaxak ka úuchkeʼ (Sal. 78:8). Le Bibliaoʼ ku tʼaan tiʼ yaʼab máaxoʼob chúukpaj u yóol u beetoʼob beyoʼ (Esd. 7:10; Dan. 1:8).
6, 7. ¿Baʼax eʼesik u kʼaʼabéetil u xokik máak le Biblia utiaʼal u chʼaʼatukultik tubeel baʼax ken u beetoʼ?
6 Upʼéel baʼax jeʼel u yáantkoʼon utiaʼal maʼ k-beetik baʼax kʼaaseʼ letiʼe ka k-jóoʼs u súutukil utiaʼal k-xokik le Biblia yéetel u maasil jóoʼsaʼaniloʼoboʼ. Koʼox aʼalikeʼ táan a xook teʼ súutuk a jóoʼsmoʼ. Tsʼoʼok a kʼáatik tiʼ Jéeoba ka u tsʼáatech u kiliʼich muukʼ yéetel ka u yáantech a beet le baʼax ken a kan teʼ Bibliaoʼ. Tukulteʼ tuláakʼ kʼiineʼ yaan u máansaʼal tiʼ televisión upʼéel película a kʼáat a chaʼante. Baʼaleʼ kex yaan máakoʼob aʼalik jach jaʼtseʼ, tsʼoʼok xan a wojéeltik ku chíikpajal tuʼux táan u yúuchul baʼateliʼ yéetel tuʼux ku beetaʼal uláakʼ baʼaloʼob kʼaastakiʼ.
7 Teech túuneʼ ku joʼopʼol a tuukul tiʼ baʼax ku yaʼalik apóstol Pablo teʼ Efesoiloʼob 5:3: «Teʼex utiaʼaleʼex Jajal Dioseʼ, maʼ unaj mix u yaʼalaʼal ichileʼex le núupkʼebanoʼ, mix jumpʼéel uláakʼ baʼal kʼaas wa u tsʼíibolalil u nikkúunsaʼal taakʼin». Ku kʼaʼajal xan tech le baʼax ku yaʼalik Filiposiloʼob 4:8 (xokaʼak). Ku tsʼoʼokoleʼ ka tuklik: «Wa ka in chaʼant le película sáamaloʼ, ¿jeʼel wa in weʼesik kin wuʼuyik u tʼaan Dios jeʼex tu beetil Jesusoʼ?». Wa ka úuchuktech beyaʼ, ¿baʼax jeʼel a beetkeʼ? ¿Yaan wa a chaʼantik kex beyoʼ?
8. ¿Baʼax tuukulil maʼ unaj yantaltoʼoniʼ?
8 Maʼ unaj k-tuklik maʼ ken u beettoʼon kʼaas k-bisikba yéetel máaxoʼob maʼatech u meyajtkoʼob Diosiʼ, mix k-chaʼantik baʼaloʼob kʼaastak yéetel subtsiltak ku máansaʼal teʼ cine wa tiʼ televisionoʼ. Kʼaʼabéet k-kanáantikba yéetel k-kanáantik k-paalal tiʼ le baʼaloʼob kʼaastak ku taal tiʼ Satanasoʼ. Jeʼex u kanáantkuba máak utiaʼal maʼ u tsaʼayal upʼéel pakʼbeʼen kʼojaʼanil tiʼeʼ, bey xan unaj k-kanáantikba tiʼ «u táabsajiloʼob kʼasilbaʼal» (Efe. 6:11).
9. ¿Baʼaxten sáamsamal unaj k-ilik beetik baʼax utstutʼaan Jéeoba?
9 Sáamsamal ku unaj k-tuklik wa yaan k-beetik baʼax u kʼáat Jéeoba. Wa k-kʼáat ka u salvartoʼoneʼ unaj k-beetik baʼax utstutʼaan yéetel k-chaʼik u nuʼuktikoʼon. Utiaʼal k-eʼesik jach tu jaajil yaan k-fe tiʼeʼ, unaj k-uʼuyik u tʼaan kex ka yanak k-kíimil tu yoʼolal, jeʼex tu beetil Jesuseʼ. Jéeobaeʼ yaan u beetik u bintoʼon utsil wa ku chúukpajal k-óol. Jesuseʼ tu yaʼalaj: «Le máax ku muʼukʼaʼantal u yóol tak tu xuuleʼ, bíin [salvartaʼak]» (Mat. 24:13). Baʼaleʼ utiaʼal u beetik máak baʼax utstatʼaan Dioseʼ, kʼaʼabéet maʼ u chʼaʼik saajkil jeʼex tu beetil Jesuseʼ (Sal. 31:24).
Jach unaj k-beetik jeʼex Jesús, le máax maʼ tu chʼaʼaj saajkiloʼ
10. ¿Baʼaxoʼob k-aktáantik ikil k-meyajtik Dios, yéetel baʼax unaj k-beetik?
10 Tumen kuxaʼanoʼon tiʼ upʼéel kʼasaʼan yóokʼol kaabeʼ, unaj k-beetik tuláakal le ku páajtaleʼ utiaʼal maʼ k-tuklik mix k-beetik baʼaloʼob kʼaastak. U jaajileʼ yaʼab baʼaxoʼob k-aktáantik jeʼel u beetkoʼob k-náachtal tiʼ Jéeobaeʼ. Yaan sukuʼunoʼobeʼ ku chʼaʼapʼektaʼaloʼob tumen u láakʼtsiloʼob. Tiʼ yaʼab escuelaʼobeʼ jach ku yilaʼal u kaʼansaʼal tiʼ evolución u taal máak, yéetel jach táan u bin u yaʼabtal máakoʼob maʼatech u creerkoʼob wa yaan Dios. Utiaʼal maʼ k-tuukul beyaʼ unaj k-kanáantikba. Le baʼaxoʼob tu beetaj Jesusoʼ jeʼel u yáantkoʼon k-kanáantbaeʼ.
11. ¿Baʼaxten ku yáantkoʼon utiaʼal maʼ k-chʼaʼik saajkil le k-tuukul tiʼ le baʼaxoʼob tu beetaj Jesusoʼ?
11 Jesuseʼ tu yaʼalaj tiʼ u disipuloʼob: «Tiʼ le yóokʼol kaaboʼ teʼexeʼ yaan a mukʼyajeʼex, baʼaleʼ yanak a wóoleʼex, tumen teneʼ tsʼoʼok in tsʼáancheʼetik yóokʼol kaab» (Juan 16:33). Letiʼeʼ maʼ tu chaʼaj u kʼaskúuntaʼal u tuukul tumen le máaxoʼob maʼatech u meyajkoʼob Diosoʼ. Maʼ tu chaʼaj u beetaʼal tumen mix máak u xuʼulul u kʼaʼaytik le maʼalob péektsiloʼ mix ka u beet baʼaxoʼob maʼ maʼalobtak tu táan Diosiʼ. Toʼoneʼ bey xan unaj k-beetkoʼ. Ka payalchiʼinaj tiʼ Dioseʼ, Jesuseʼ tu yaʼalaj yoʼolal u disipuloʼob: «Jeʼel bix maʼ yóokʼol kaabileneʼ bey xan letiʼob maʼ yóokʼol kaabiloʼobiʼ» (Juan 17:16). Wa k-xokik teʼ Biblia le baʼaxoʼob tu beetaj Jesús yéetel wa k-tuukul tiʼ le baʼaxoʼob k-kaniktiʼoʼ, yaan u yáantkoʼon utiaʼal maʼ k-táakbesikba tiʼ u baʼalubaʼob le yóokʼol kaabaʼ.
Maʼ k-chʼaʼik saajkil jeʼex Jesuseʼ
12-14. Aʼal tiʼ baʼax súutukiloʼob maʼ tu chʼaʼaj saajkil Jesusiʼ.
12 Teʼ kʼiinoʼob táan u kʼaʼaytaj way Luʼumoʼ, Jesuseʼ tu yeʼesaj maʼatech u chʼaʼik saajkil. Meyajnajtiʼ le páajtalil tsʼaʼantiʼ tumen u Taataoʼ, «ook tu [templo] Jajal Dioseʼ ka tu jóokʼesaj tuláakal le máaxoʼob ku koonoloʼob yéetel ku maanoʼob teʼeloʼ. Tu walkʼesaj u mesaʼob le máaxoʼob ku kʼexikoʼob taakʼinoʼ, tu walkʼesaj xan u kʼáancheʼob le máaxoʼob ku konikoʼob palomaʼoboʼ» (Mat. 21:12). Ka bin machbil tumen le soldadoʼoboʼ, waʼalaj chúumukeʼ ka tu yaʼalajtiʼob: «Wa teen ka kaxtikeneʼexeʼ, chaʼex u bin leloʼobaʼ» (Juan 18:8). Yéetel ka tu jóoʼsaj u espada Pedroeʼ, tu yaʼalajtiʼ ka u yoks tu kúuchil, beyoʼ tu yeʼesaj jach u kʼubmaj u yóol tiʼ Jéeoba, maʼ tiʼ u nuʼukulil baʼateliʼ (Juan 18:11).
13 Jesuseʼ maʼ tu chʼaʼaj saajkil u yaʼal tiʼ u nuuktakil le judíoʼob maʼ jaajtak le baʼaxoʼob ku kaʼanskoʼoboʼ. Tu yaʼalajtiʼob: «¡Óotsileʼex, u j-kaʼambesajileʼex aʼalmajtʼaan yéetel fariseoʼex j-kaʼapʼéel icheʼex! Tumen ka kʼalikeʼex u jool najil u [reinoi] kaʼan utiaʼal maʼ u yokol uláakʼoʼob[iʼ]». Ka tsʼoʼokeʼ tu yaʼalaj xan: «Ka pʼatikeʼex juntséelil le kaʼansajoʼob [maas kʼaʼanan] tiʼ le aʼalmajtʼaanoʼ, jeʼel bix le toj kuxtaloʼ, le chʼaʼa óotsililoʼ yéetel le oksaj óolaloʼ. [...] Tumen ka pʼoʼikeʼex u paach le vaso yéetel le platooʼ, baʼaleʼ ichiloʼobeʼ chuuptak yéetel baʼax yanteʼex tu yoʼolal a wookoleʼex yéetel a tsʼuʼutileʼex» (Mat. 23:13, 23, 25). U disipuloʼob Jesuseʼ maʼ unaj xan u chʼaʼikoʼob saajkil kaʼachiʼ, tumen yaan xan u kʼuchul u kʼiinil u chʼaʼapachtaʼaloʼob tumen u nuuktakil le judíoʼoboʼ yéetel yanoʼobeʼ yaan tak u kíimsaʼaloʼob (Mat. 23:34; 24:9).
14 Mix le kʼasaʼan angeloʼob beet u chʼaʼik saajkil Jesusoʼ. Utéenjeakileʼ taal tu yiknal utúul máak chukaʼan tumen yaʼab kʼasaʼan angeloʼob, le máakaʼ jach táaj yaan u muukʼ, kex ku kʼaxaʼal tak yéetel cadenaeʼ ku kotsik. Baʼaleʼ Jesuseʼ maʼ tu chʼaʼaj saajkil tiʼiʼ, ka tu jóoʼsaj le yaʼabach kʼasaʼan angeloʼob chukmiloʼ (Mar. 5:1-13). Bejlaʼeʼ, Dioseʼ maʼ u tsʼaamajtoʼon u páajtalil utiaʼal k-beetik le meyajoʼob jeʼex le tu beetaj Jesusoʼ. Baʼaleʼ ken kʼaʼaytajnakoʼon yéetel ken k-kaʼans tiʼ le máakoʼob le baʼax ku yaʼalik le Bibliaoʼ, táan k-táakpajal tiʼ upʼéel baʼateʼel tu contra Satanás, tumen letiʼ pixik u tuukul le máakoʼoboʼ (2 Cor. 4:4). Jeʼex Jesuseʼ, u nuʼukulil k-baʼateleʼ «maʼ yóokʼol kaabiloʼobiʼ, baʼaleʼ u [nuʼukuliloʼob] k-baʼateleʼ yaan u páajtalil Jajal Dios tiʼob utiaʼal u xuʼulsikoʼob nukuch pakʼil najoʼob», wa le baʼaxoʼob ku creertaʼal maʼ jaajtakoʼ (2 Cor. 10:4). ¿Bix jeʼel u meyajtoʼon le u nuʼukuliloʼob baʼatelaʼ? Koʼoneʼex ilik bix meyajnajikoʼob tiʼ Jesús.
15. ¿Baʼax áant Jesús utiaʼal maʼ u chʼaʼik saajkil?
15 Jesuseʼ jach tu jaajil maʼ tu chʼaʼaj saajkiliʼ. U fe tiʼ Dios áant utiaʼal maʼ u chʼaʼik saajkil. Toʼoneʼ bey xan unaj k-beetkoʼ (Mar. 4:40). ¿Bix jeʼel u yantaltoʼon fejeʼ? Jesuseʼ ku yeʼesik xan toʼon bixi. Letiʼeʼ jach u kʼaj óol le baʼaxoʼob ku kaʼansik le Kiliʼich Tsʼíiboʼoboʼ yéetel jach ku creertik le baʼaxoʼob ku yaʼalikoʼ. U nuʼukulil u baʼateleʼ maʼ jach upʼéel espadaiʼ, baʼaxeʼ u Tʼaan Dios. Letiʼeʼ yaʼab utéenel tu chʼaʼachiʼitaj utiaʼal u yeʼesik jach jaaj le baʼaxoʼob ku kaʼansikoʼ. Yaʼab utéeneleʼ ken u káajs u kaʼansajeʼ ku yaʼalik: «Le Kiliʼich Tsʼíiboʼ ku yaʼalik», tsʼoʼoleʼ ku chʼaʼachiʼitik le baʼax ku yaʼalik le Kiliʼich Tsʼíiboʼoboʼ. *
16. ¿Bix jeʼel k-muʼukʼankúuntik k-fejeʼ?
16 Utiaʼal ka chúukpajak k-óol k-aktáant le talamiloʼob k-muʼyajtikoʼ, unaj k-xakʼalxoktik le Biblia sáamsamaloʼ yéetel k-bin teʼ muchʼtáambaloʼoboʼ. Wa k-beetik beyoʼ jeʼel u pʼáatal t-tuukul tiʼ le kaʼansajoʼob muʼukʼaʼankúuntik k-fejoʼ (Rom. 10:17). Tsʼoʼoleʼ kʼaʼabéet k-jach tuukul tiʼ le baʼaxoʼob k-xokikoʼ, utiaʼal ka kʼuchkoʼob t-puksiʼikʼal. Chéen wa kuxaʼan k-fejeʼ jeʼel u yáantkoʼon utiaʼal maʼ k-chʼaʼik saajkil ken yanaktoʼon talamiloʼobeʼ (Sant. 2:17). Uláakʼ baʼax jeʼel u yáantkoʼoneʼ letiʼe ka k-kʼáat u kiliʼich muukʼ Diosoʼ, kʼaʼajaktoʼoneʼ le fejoʼ upʼéel tiʼ le modos ku taal tiʼ le kiliʼich muukʼoʼ (Gal. 5:22).
17, 18. ¿Bix úuchik u xuʼulul u chʼaʼik saajkil Kitty u kʼaʼayt le maʼalob péektsiloʼ?
17 Utúul kiik ku kʼaabaʼtik Kittieʼ, tsʼoʼok u yilik u kʼaʼananil u muʼukʼaʼankúuntik u fe máak utiaʼal maʼ u chʼaʼik saajkil. Desde tu chichnileʼ u yojel maʼ unaj u «chʼaʼik subtal» u kʼaʼayt «le maʼalob péektsil» tiʼ u yéet xookoʼoboʼ; le oʼolal ku yuʼubik taak u tsikbaltiktiʼob (Rom. 1:16). Cada jaʼabeʼ ku tuklik u kʼaʼaytajtiʼob, baʼaleʼ ku sajaktal u beete. Ka maas nojochchajeʼ, yanchaj u bin xook táanxelil, letiʼ túuneʼ tu tuklaj: «Bejlaʼeʼ yaan túun in wilik in kʼaʼaytik le maʼalob péektsiloʼ». Ka tu kʼáataj u yáantaj Jéeoba utiaʼal maʼ u chʼaʼik saajkil yéetel ka u yeʼes naʼatil bey xan utiaʼal ka yanak máax chʼenxikintik.
18 Le yáax kʼiin ka bin xookoʼ, u yéet xookoʼobeʼ joʼopʼ u yaʼalikoʼob bix u kʼaabaʼob yéetel tuʼux u taaloʼob. Yanoʼobeʼ tu yaʼaloʼob yaan u religionoʼob, baʼaleʼ tu yaʼaloʼob maʼatech u jach táakpajloʼob tiʼ le baʼaxoʼob ku beetaʼaloʼ. Kitty túuneʼ tu yileʼ letiʼe súutukil táan u páaʼtik kaʼach utiaʼal u kʼaʼaytajoʼ. Ka horachaj u máan tʼaaneʼ, letiʼeʼ tu yaʼalaj: «Teneʼ u j-jaajkunajen Jéeoba yéetel kin wilik in beetik mantatsʼ baʼax ku yaʼalik le Bibliaoʼ». Le táan u tʼaanoʼ, yaan tiʼ u yéet xookoʼobeʼ joʼopʼ u yeʼeskoʼob bey tsʼoʼok u náakal u yóoloʼobeʼ, baʼaleʼ yanoʼobeʼ tu jach uʼuyoʼob le baʼax tu yaʼaloʼ yéetel ka tsʼoʼokeʼ tu natsʼubaʼob u beetoʼob kʼáatchiʼob tiʼ. Le profesoroʼ tu yaʼaleʼ jach maʼalob le baʼax tu beetaj Kitty le úuchik u tʼaan tiʼ le baʼaxoʼob ku creertikoʼ. Kittieʼ jach kiʼimakchaj u yóol, tumen maʼ tu chʼaʼaj saajkil kʼaʼaytaj jeʼex Jesuseʼ.
Unaj k-muʼukʼaʼankúuntik k-fe yéetel maʼ unaj k-chʼaʼik saajkil jeʼex Jesuseʼ
19. 1) ¿Baʼax u kʼáat u yaʼal u yantal u fe máak? 2) ¿Bix jeʼel k-kiʼimakkúuntik u yóol Jéeobaeʼ?
19 Le apostoloʼoboʼ tu tsʼáajoʼob cuentaeʼ kʼaʼabéet u yantal u fejoʼob utiaʼal maʼ u chʼaʼikoʼob saajkil, le oʼolaleʼ tu yaʼaloʼob tiʼ Jesús: «Yaʼabkunt [k-fe]» (xokaʼak Lucas 17:5, 6). U yantal u fe máakeʼ maʼ chéen u kʼáat yaʼal u creertik yaan Diosiʼ. U kʼáat yaʼal u jach kʼubik u yóol tiʼ letiʼ, u biskuba tu yéetel jeʼex u biskuba utúul chan paal yéetel u taata jach u yaabiltmeʼ. Salomoneʼ tu tsʼíibtaj: «Ken yanak tiʼ teech le ojéelajiloʼ in xibil [paal], maʼ bíin yanak uláakʼ máak [maas] kiʼ u yóol jeʼel bix teneʼ; bíin kiʼimakchajak in wóol ken in wuʼuy a tʼaan jeʼel bix u najmaleʼ» (Pro. 23:15, 16). Jéeobaeʼ jach ku kiʼimaktal u yóol ken u yil maʼatech k-chʼaʼik saajkil tʼaan tiʼ letiʼ, k-ojéeltik lelaʼ maas ku yáantkoʼon utiaʼal maʼ k-chʼaʼik saajkil. Bey túunoʼ, koʼoneʼex beetik jeʼex Jesuseʼ yéetel maʼ k-chʼaʼik saajkil tʼaan tiʼ baʼax maʼalob.
[Tsolajiloʼob]
^ xóot’ol 15 Teʼ tekstoʼobaʼ jeʼel a wilik jujumpʼéel tiʼ le baʼaxoʼob tu yaʼalaj Jesusoʼ: Mateo 4:4, 7, 10; 11:10; 21:13; 26:31; Marcos 9:13; 14:27; Lucas 24:46, yéetel Juan 6:45; 8:17.
¿Jeʼel wa u páajtal a tsolkeʼ?
• ¿Baʼax jeʼel u yáantkoʼon k-uʼuy tʼaan kex kʼeban wíinkoʼoneʼ?
• ¿Baʼax jeʼel u yáantkoʼon utiaʼal ka yanaktoʼon fejeʼ, yéetel bix jeʼel u yáantkoʼon utiaʼal maʼ k-chʼaʼik saajkileʼ?
• ¿Baʼax utsiloʼob jeʼel k-kʼamik wa k-uʼuyik tʼaan yéetel maʼ k-chʼaʼik saajkil jeʼex Jesuseʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
¿Táan wa a muʼukʼaʼankúuntik a fe utiaʼal maʼ lúubul tiʼ baʼax kʼaas?
[U tsolajil le oochel teʼ táan juʼun 15]
U fe Jesús tiʼ Dioseʼ le áant utiaʼal maʼ u chʼaʼik saajkil. Toʼoneʼ bey xan jeʼel u yáantkoʼon le fejoʼ