An Nakakalabing Halaga kan Pagtotokdo nin Dios
An Nakakalabing Halaga kan Pagtotokdo nin Dios
“Tunay nanggad na an gabos na bagay ibinibilang ko man na kawaran huli sa nakakalabing halaga kan kaaraman manongod ki Cristo Jesus.”—FIL. 3:8.
1, 2. Anong desisyon an ginibo nin nagkapirang Kristiano, asin taano?
SI Robert matali poon kan aki pa. Kan sia otso anyos pa sana, an saro sa mga maestra nia nagbisita sa harong ninda asin nagsabi sa saiya na puede niang maabot an ano man na gusto nia. Sinabi kan maestra na naglalaom siang magigin doktor si Robert pag-abot nin panahon. Huli sa haralangkaw na grado nia sa haiskul, kualipikado sia na mag-eskuela sa arin man sa pinakamarahay na mga unibersidad sa nasyon ninda. Alagad tangani na maabot ni Robert an saiyang pasohan na magregular payunir, nagdesisyon sia na palampason an oportunidad na ibinibilang nin dakol na saro sanang beses na nangyayari sa bilog na buhay.
2 Arog ni Robert, dakol na Kristiano—hoben asin gurang—an igwa nin mga oportunidad na umasenso sa presenteng sistema nin mga bagay. May mga nagdesisyon na dai pag-aprobetsaran nin lubos an mga oportunidad na iyan tanganing maabot ninda an saindang espirituwal na mga pasohan. (1 Cor. 7:29-31) Ano an nagmomotibar sa mga Kristianong arog ni Robert na gamiton an saindang panahon asin kosog sa paghuhulit? Apuera sa saindang pagkamoot ki Jehova, na iyo an pangenot na dahelan, inaapresyar ninda an nakakalabing halaga kan pagtotokdo nin Dios. Napag-isip-isip pa sana daw nindo kun ano kutana an nagin buhay nindo kun dai nindo naaraman an katotoohan? Paagi sa paghorophorop sa nagkapira sa marahayon na mga bendisyon na nakamtan niato bilang resulta kan pagigin tinokdoan ni Jehova, mapapagdanay niato an satong pagpapahalaga sa maogmang bareta asin magigin maigot kita sa pagsabi kaiyan sa iba.
May Pribilehio Kitang Matokdoan nin Dios
3. Taano ta makakasierto kita na andam si Jehova na tokdoan an bakong sangkap na mga tawo?
3 Nin huli sa karahayan ni Jehova, andam sia na tokdoan an bakong sangkap na mga tawo. Manongod sa linahidan na mga Kristiano, an Isaias 54:13 naghula: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.” An mga tataramon na iyan sa pundamental minaaplikar man sa “ibang mga karnero” ni Cristo. (Juan 10:16) Ini maheheling nin malinaw sa hula na naootob sa satong panahon. Naheling ni Isaias sa sarong bisyon an mga tawo hale sa gabos na nasyon na nagbuburunyog sa tunay na pagsamba. Ilinaladawan nia sinda na nagsasabi sa lambang saro: “Tumukad kita sa bukid ni Jehova, sa harong kan Dios ni Jacob; asin totokdoan nia kita manongod sa saiyang mga dalan, asin kita maglalakaw sa saiyang mga dana.” (Isa. 2:1-3) Kanigoan na pribilehio na matokdoan nin Dios!
4. Ano an kahagadan ni Jehova sa mga tinotokdoan nia?
4 Paano kita magigin kualipikado na makinabang sa pagtotokdo nin Dios? An sarong pangenot na kahagadan iyo na an saro magin mahoyo asin andam na tokdoan. Si salmista David nagsurat: “Marahay asin tanos si Jehova. . . . Itotokdo nia sa mga mahoyo an saiyang dalan.” (Sal. 25:8, 9) Asin si Jesus nagsabi: “Hayag takang inoomaw, Ama, Kagurangnan kan langit asin daga, huli ta maingat mong itinago an mga bagay na ini sa mga madonong asin intelektuwal, asin ihinayag iyan sa mga omboy.” (Luc. 10:21) Dai daw kamo napaparani sa Dios na ‘nagtatao nin dai na kutana maninigong kabootan sa mga mapakumbaba’?—1 Ped. 5:5.
5. Paano sana nagin posible na kita nagkaigwa nin kaaraman dapit sa Dios?
5 Bilang mga lingkod ni Jehova, huli daw sa satong mga abilidad o kadonongan kaya naaraman niato an katotoohan? Dai. Sa katunayan, kun sa sadiri sana niato, nungka kitang magkakaigwa nin kaaraman dapit sa Dios. Si Jesus nagsabi: “Dai nin makakadolok sa sako kun dai sia dagkahon kan Ama na nagsugo sa sako.” (Juan 6:44) Paagi sa paghuhulit asin banal na espiritu, dinadagka ni Jehova an mga indibiduwal na arog-karnero, “an kawiliwiling mga bagay kan gabos na nasyon.” (Hag. 2:7) Dai daw kamo nagpapasalamat na saro kamo sa mga dinagka ni Jehova sa saiyang Aki?—Basahon an Jeremias 9:23, 24.
An Kapangyarihan na Magpakarhay nin Buhay
6. Ano an puedeng magin pambihirang epekto sa mga tawo kan pagkua nin “kaaraman dapit ki Jehova”?
6 Paagi sa paggamit nin magayon na paglaladawan, ipinapaheling kan hula ni Isaias an pagbabago nin personalidad nin mga tawo na nangyayari sa panahon niato. An dating madahas na mga tawo nagin mapagpatoninong. (Basahon an Isaias 11:6-9.) An mga dating magkaiwal huli sa pagkakalaen nin rasa, nasyonalidad, tribo, o kultura nakanood na mag-erok na magkairiba na may pagkasararo. Sa piguratibong pagtaram, ‘pinulpog ninda an saindang mga espada na magin mga tarom nin arado.’ (Isa. 2:4) Ano an dahelan kan pambihirang mga pagbabagong ini? An mga tawo nagkua nin “kaaraman dapit ki Jehova” asin iinaplikar iyan sa buhay ninda. Minsan ngani an mga lingkod nin Dios bakong sangkap, sinda sarong tunay na internasyonal na kasararoan nin magturugang. An bagay na an maogmang bareta nakakaakit sa gabos na klase nin tawo asin an marahayon na ibinubunga kaiyan nagpapatunay sa nakakalabing halaga kan pagtotokdo nin Dios.—Mat. 11:19.
7, 8. (a) Ano an nagkapira sa “mga bagay na marigonon an pagkaestablisar” na ikinakatumba nin mga tawo sa tabang kan pagtotokdo nin Dios? (b) Ano an nagpapaheling na an pagtotokdo nin Dios nagtatao nin kaomawan ki Jehova?
7 An ministeryo kan mga lingkod nin Dios iinagid ni apostol Pablo sa espirituwal na pakikilaban. Sia nagsurat: “An mga armas kan samong pakikilaban bakong sa laman, kundi makapangyarihan paagi sa Dios sa pagtumba sa mga bagay na marigonon an pagkaestablisar. Huli ta itinutumba niamo an mga pangangatanosan asin lambang halangkaw na bagay na pinapatindog tumang sa kaaraman nin Dios.” (2 Cor. 10:4, 5) Ano an nagkapira sa “mga bagay na marigonon an pagkaestablisar” na dian pinapatalingkas an mga tawo paagi sa pagtotokdo nin Dios? Bilang pira sanang halimbawa, yaon an nakakapagabat na falsong mga katokdoan, mga superstisyon, asin mga pilosopiya nin tawo. (Col. 2:8) An pagtotokdo nin Dios nagtatabang sa mga tawo na mahale an maraot na mga gibo asin mapatalubo an diosnon na mga kualidad. (1 Cor. 6:9-11) Pinapakarhay kaiyan an buhay pampamilya. Asin tinatawan kaiyan nin tunay na katuyohan sa buhay an mga mayo nin paglaom. Ini an klase nin pagtotokdo na kaipuhan ngonyan.
8 An saro sa mga kualidad na napapatalubo nin mga tawo huli sa tabang ni Jehova iyo an pagkaonesto, siring sa ipinapaheling kan minasunod na eksperyensia. (Heb. 13:18) Sarong babae sa India an nag-ako nin pag-adal sa Biblia asin pag-abot nin panahon nakualipikar bilang dai pa bautisadong parahayag. Sarong aldaw mantang papuli sia hale sa pagtrabaho sa proyektong pagtogdok nin Kingdom Hall, nakapurot sia harani sa estasyon nin bus nin bulawan na alahas na an kantidad otso sientos na dolyar (E.U.A.). Minsan ngani sia dukha, dinara nia an alahas sa presinto tanganing hanapon an kagsadiri kaiyan. Dai makapaniwala an pulis duman! Aroatyan, hinapot sia kan saro pang pulis, “Taano ta nagdesisyon kang iuli an alahas?” Sia nagpaliwanag, “Binago ako kan katokdoan kan Biblia, kaya onesto na ako ngonyan.” Huling napahanga, an pulis nagsabi sa Kristianong magurang sa kongregasyon na uminiba sa babae sa presinto: “Igwa nin labing 38 milyones na tawo sa lugar na ini. Kun matatabangan nindo an sampulong tawo na magin arog kan babaeng ini, dakulaon nang bagay iyan.” Kun hehelingon niato an buhay nin minilyon na tawo na napakarhay huli sa pagtotokdo nin Dios, bako daw na igwa kita nin dakol na dahelan na omawon si Jehova?
9. Paano posible na an mga tawo makagibo nin dakulang mga pagbabago sa saindang buhay?
9 An nakakapabagong puersa kan Tataramon nin Dios, kaiba an tabang na itinatao ni Jehova paagi sa saiyang banal na espiritu, nagpapangyari sa mga tawo na gumibo nin dakulang mga pagbabago sa saindang buhay. (Roma 12:2; Gal. 5:22, 23) An Colosas 3:10 nagsasabi: “Isulot nindo an bagong personalidad, na binabago paagi sa tamang kaaraman segun sa ladawan kan Saro na naglalang kaiyan.” An mensahe na yaon sa Tataramon nin Dios, an Biblia, igwa nin puersa na ihayag kun ano talaga an pagkatawo nin saro, asin kayang bagohon kaiyan an saiyang pag-iisip asin pati an saboot nia sa mga bagay-bagay. (Basahon an Hebreo 4:12.) Paagi sa pagkaigwa nin tamang kaaraman sa Kasuratan asin paagi sa pag-oyon kan saiyang buhay sa matanos na mga pamantayan ni Jehova, an saro puedeng magin katood nin Dios, na may oportunidad na mabuhay sagkod lamang.
Pag-andam Para sa Ngapit
10. (a) Taano ta si Jehova sana an makakatabang sa sato na makapag-andam para sa ngapit? (b) Anong pambihirang mga pagbabago an madali nang makaapektar sa bilog na daga?
10 Si Jehova sana an makakatabang sa sato na makapag-andam para sa ngapit huling aram nia kun ano an mangyayari sa ngapit. Sia an nagdedeterminar kun ano an magigin ngapit kan katawohan. (Isa. 46:9, 10) Ihinahayag kan hula sa Biblia na “an dakulang aldaw ni Jehova harani na.” (Sof. 1:14) Mapadapit sa aldaw na iyan, an mga tataramon sa Talinhaga 11:4 magigin totoo: “An mahahalagang bagay magigin daing kamanungdanan sa aldaw nin kabangisan, alagad an katanosan mismo magliligtas hale sa kagadanan.” Kun umabot na an panahon na gibohon na an paghokom ni Jehova sa kinaban ni Satanas, an magigin pinakamahalaga iyo an kamugtakan niato sa atubangan nin Dios. An kuarta magigin daing halaga. Sa katunayan, an Ezequiel 7:19 nagsasabi: “Sa mga lansangan iaapon ninda an sainda mismong pirak, asin an saindang sadiring bulawan magigin bagay na makasusurang nin makuri.” An patienot na pakaaram niato kaiyan makakatabang sa sato na humirong may kadonongan ngonyan.
11. Ano an sarong paagi na an pagtotokdo nin Dios nagtatabang sa sato na makapag-andam para sa ngapit?
11 An sarong risang-risang paagi na iinaandam kita kan pagtotokdo nin Dios para sa pag-abot kan aldaw ni Jehova iyo an pagtabang sa sato na magkaigwa nin tamang mga prioridad. Si apostol Pablo nagsurat ki Timoteo: “Pagbotan mo an mga mayaman sa presenteng sistema nin mga bagay na dai magin mapalangkaw, asin ibugtak an saindang paglaom, bakong sa kayamanan na bakong segurado, kundi sa Dios.” Dawa bako kitang mayaman, makikinabang kita sa hatol na ini na ipinasabong nin Dios. Ano an kalabot dian? Imbes na magtipon nin materyal na kayamanan, maninigo kitang magmaigot na “maggibo nin marahay” asin “magin mayaman sa marahay na mga gibo.” Paagi sa pag-enot sa espirituwal na mga bagay sa satong buhay, kita ‘nagririmpos para sa sato man sana nin marahay na pundasyon para sa ngapit.’ (1 Tim. 6:17-19) An siring na pagsasakripisyo nagpapaheling nin praktikal na kadonongan, huli ta arog kan sabi ni Jesus, “ano an pakikinabangon nin sarong tawo kun makamtan nia an bilog na kinaban alagad mawara man an saiyang kalag?” (Mat. 16:26, 27) Huli sa kaharanihan kan aldaw ni Jehova, marahay na isip-isipon kan lambang saro sa sato: ‘Saen ako nagtitipon nin kayamanan? Ako daw naglilingkod sa Dios o sa Kayamanan?’—Mat. 6:19, 20, 24.
12. Taano ta dai kita maninigong madesganar kun minemenos nin nagkapira an satong ministeryo?
12 An pangenot sa “marahay na mga gibo” na sinasabi sa Tataramon nin Dios para sa mga Kristiano iyo an nagliligtas-buhay na gibohon na paghuhulit kan Kahadean asin paggibo nin mga disipulo. (Mat. 24:14; 28:19, 20) Siring kan nangyari kan enot na siglo, tibaad minemenos kan nagkapira an satong ministeryo. (Basahon an 1 Corinto 1:18-21.) Alagad dai kaiyan naliliwat an halaga kan satong mensahe, asin dai kaiyan naiinaan an importansia kan pagtao nin oportunidad sa gabos na magtubod dian mantang may panahon pa. (Roma 10:13, 14) Mantang tinatabangan niato an iba na makinabang sa pagtotokdo nin Dios, mag-aako kita nin dakol na bendisyon.
Binendisyonan Huli sa Pagsasakripisyo
13. Anong mga sakripisyo an ginibo ni apostol Pablo para sa maogmang bareta?
13 Bago nagin Kristiano si apostol Pablo, sia sinasanay na magin mapanggana sa Judiong sistema nin mga bagay. Kan sia tibaad mga 13 anyos pa sana, sia naghale sa tinuboan niang siudad nin Tarso asin nagbalyo sa Jerusalem tanganing tokdoan kan iginagalang na marhay na paratokdo sa Ley na si Gamaliel. (Gibo 22:3) Pag-abot nin panahon, si Pablo nagin midbid sa tahaw kan mga katemporanyo nia, asin kun sia nagpadagos dian, sia puedeng nagin prominente sa Judaismo. (Gal. 1:13, 14) Kan akoon nia an maogmang bareta asin ponan an paghuhulit, binayaan nia an gabos na iyan. Pinagbasolan daw ni Pablo an desisyon niang iyan? Dai. Sa katunayan, sia nagsurat: “Tunay nanggad na an gabos na bagay ibinibilang ko man na kawaran huli sa nakakalabing halaga kan kaaraman manongod ki Cristo Jesus na sakong Kagurangnan. Huli sa saiya inako ko an pagkawara kan gabos na bagay asin ibinibilang ko iyan na dakol na tapok.”—Fil. 3:8.
14, 15. Nakakaeksperyensia kita nin anong mga bendisyon bilang “mga kapwa trabahador nin Dios”?
14 Arog ni Pablo, an mga Kristiano ngonyan naggigibo nin mga sakripisyo para sa maogmang bareta. (Mar. 10:29, 30) May nawawara daw sa sato huli sa paggibo kaiyan? Si Robert, na nasambitan sa kapinonan, nagpapahayag kan saboot nin dakol kan sia magsabi: “Mayo lamang akong pinagbabasolan. An bilog na panahon na ministeryo nagtao sa sako nin kagayagayahan asin pagkakontento, asin huli kaiyan ‘nanamitan asin naheling ko na si Jehova marahay.’ Kun naggigibo ako nin materyal na mga sakripisyo tanganing maabot an espirituwal na mga pasohan, pirme akong binebendisyonan ni Jehova nin labi pa sa isinakripisyo ko. Garo man sana mayo akong isinakripisyo. Ako pa ngani an may nakua!”—Sal. 34:8; Tal. 10:22.
15 Kun kamo harohalawig na ngonyan na nakikikabtang sa paghuhulit asin pagtotokdo, daing duda na kamo nagkaigwa na man nin mga oportunidad na namitan asin helingon na si Jehova marahay. May mga beses daw na namatean nindo an tabang kan saiyang espiritu mantang ipinapakipag-olay nindo an maogmang bareta? Naheling na daw nindo an kaogmahan nin iba mantang binubukasan ni Jehova an saindang puso tanganing magtao nin atension sa mensaheng iyan? (Gibo 16:14) Tinabangan na daw kamo ni Jehova na mapangganahan an mga olang, na tibaad pinapagin posible na mapahiwas nindo an saindong ministeryo? Sinuportaran na daw nia kamo sa mga panahon nin kadepisilan, na tinatabangan kamo na makapagpadagos sa paglilingkod sa saiya kan mamatean nindo na kamo nangluluya na? (Fil. 4:13) Kun personal niatong naeeksperyensiahan an tabang ni Jehova mantang ginigibo niato an satong ministeryo, sia nagigin mas totoo sa sato asin kita nagigin mas dayupot sa saiya. (Isa. 41:10) Bako daw na sarong bendisyon na magin saro sa “mga kapwa trabahador nin Dios” sa saiyang dakulang gibohon na pagtotokdo?—1 Cor. 3:9.
16. Ano an namamatean nindo manongod sa mga paghihingoa asin sakripisyo nindo may koneksion sa pagtotokdo nin Dios?
16 Dakol na tawo an naglalaom na makagibo nin sarong bagay na igwa nin nagdadanay na halaga sa panahon na sinda nabubuhay. Naheling niato na dawa an pambihirang mga nagibo sa kinaban ngonyan sa parate tolos na nalilingawan. Minsan siring, an mga ginigibo ni Jehova sa presenteng panahon may koneksion sa pagpakangbanal kan saiyang ngaran daing duda na maiingatan sa sarong permanenteng rekord bilang kabtang kan teokratikong kasaysayan. Magigirumdoman iyan sagkod lamang. (Tal. 10:7; Heb. 6:10) Logod na pakamahalon niato an satong pribilehio na makikabtang sa dai noarin man malilingawan na gibohon na pagtotokdo nin Dios.
Ano an Isisimbag Nindo?
• Ano an kahagadan ni Jehova sa mga tinotokdoan nia?
• Paano napapakarhay an buhay nin mga tawo huli sa pagtotokdo nin Dios?
• Sa anong mga paagi kita nagkakamit nin mga bendisyon huli sa pagtabang sa iba na makinabang sa pagtotokdo nin Dios?
[Mga Hapot Para sa Pag-adal]
[Ritrato sa pahina 23]
An mga tinokdoan ni Jehova sarong tunay na internasyonal na kasararoan nin magturugang
[Ritrato sa pahina 24]
Bako daw na sarong bendisyon na magin saro sa “mga kapwa trabahador nin Dios”?