Tijing We God i Givim i Beswan Edukesen
Tijing We God i Givim i Beswan Edukesen
“Mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes.”—FIL. 3:8.
1, 2. ?Sam Kristin oli jusum wanem rod long laef? ?From wanem?
ROBERT i wan nambawan studen long skul, stat taem hem i smol nomo. Hem i gat eit yia blong hem taem tija i go luk hem long haos blong hem, i talem long hem se hem i naf blong mekem eni samting we hem i wantem mekem long laef blong hem, nating se samting ya i bigwan olsem wanem. Tija ya i talem se hem i wantem tumas we wan dei Robert i kam wan dokta. Long haeskul, Robert i kasem ol nambawan mak bakegen, mekem se hem i naf blong go long eniwan long ol beswan yunivesiti long kantri blong hem. Be boe ya i no wantem. Hem i lego janis ya we plante man oli ting se i beswan janis we wan yangfala i save kasem long laef blong hem. Robert i folem defren rod, hem i mekem wok blong fultaem paenia.
2 Plante Kristin, ol yangfala mo ol olfala tu, oli gat janis olsem Robert, blong kasem wan hae mak long wol ya. Samfala oli no yusum fulwan ol janis ya we oli gat, from we oli wantem mekem moa long wok blong God. (1 Kor. 7:29-31) ?Wanem tingting i pusum ol Kristin olsem Robert, blong oli wok had blong talemaot gud nius? Faswan samting se oli lavem Jeova. Antap long hemia, oli gat tangkiu from tijing we God i stap givim, oli luksave se tijing ya i moagud i bitim ol narafala edukesen long wol. ?Olsem wanem? ?Yu yu stap tingbaot se laef blong yu bambae i olsem wanem sipos yu no bin kasem save long trutok? I gud yumi tingting long sam long ol nambawan blesing we yumi stap kasem from tijing we Jeova i givim long yumi. Samting ya bambae i halpem yumi blong neva fogetem se gud nius we yumi talemaot i wan samting we i gud tumas, mo bambae i halpem yumi tu blong wok strong blong serem gud nius ya wetem ol narafala.
Bigfala Ona Blong Kasem Tijing We God i Givim
3. ?Olsem wanem yumi save se Jeova i glad blong tijim ol sinman?
3 Jeova i gud tumas, mo from samting ya, hem i glad blong tijim ol sinman. Long Aesea 54:13, yumi ridim wan profet tok long saed blong ol Kristin we tabu spirit i makemaot olgeta. Jeova i talem long olgeta se: “Mi nomo bambae mi tijim yufala, mi mekem we yufala i gat pis, mo yufala i gat gudfala laef.” Tok ya i stret tu long “ol narafala sipsip” blong Kraes. (Jon 10:16) Yumi save samting ya from profet tok blong Aesea we i stap kamtru long taem blong yumi. Aesea i luk wan vison blong fulap man blong olgeta neson we oli stap wokbaot i go blong joen long trufala wosip. Ol man ya oli stap taltalem long olgeta se: “Yumi go antap long hil ya blong hem [“Jeova,” NW]. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.” (Aes. 2:1-3) !Tru ya, i wan bigfala ona blong kasem tijing we God i givim!
4. ?Yumi mas gat wanem fasin, blong Jeova i glad blong tijim yumi?
4 ?Yumi mas gat wanem fasin blong God i glad blong tijim yumi? Wan bigfala samting se, yumi mas gat tingting daon mo yumi mas wantem we hem i tijim yumi. Deved i raetem wan Sam we i talem se: “Hae God i stret, mo hem i stap mekem i gud long man . . . Ol man we tingting blong olgeta i stap daon, hem i stap . . . tijim olgeta long ol samting we hem nomo i wantem.” (Sam 25:8, 9) Mo Jisas i talem se: “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo.” (Luk 10:21) ?Fasin blong God blong ‘givhan long gladhat blong hem long olgeta we tingting blong olgeta i stap daon,’ i pulum yu blong lavem hem?—1 Pita 5:5.
5. ?Wanem i mekem se yumi kasem save long God?
5 Yumi ol man blong Jeova, ?yumi save talem se waes blong yumi nao i lidim yumi blong faenem trutok? Nogat. Sipos i stap long yumi nomo, bambae yumi neva kasem save long God. Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Jeova i stap yusum wok blong prij mo tabu spirit blong hem, blong pulum ol man we oli gat fasin olsem sipsip, olgeta ya oli ‘ol gudgudfala samting blong olgeta kantri.’ (Hag. 2:7) I sua se yu yu gat bigfala tangkiu long Jeova from we hem i pulum yu yu kam long Pikinini blong hem.—Ridim Jeremaea 9:23, 24.
Tijing We i Kam Long God i Mekem Laef Blong Man i Kam Gud Moa
6. ?Taem man i “savegud Hae God” Jeova, hem i naf blong mekem wanem bigfala jenis long laef blong hem?
6 Profet tok blong Aesea i yusum ol gudfala pijatok blong soemaot olsem wanem plante man long taem blong yumi oli stap jenisim fasin blong olgeta. Plante we fastaem oli man blong faet, oli kam man blong mekem pis. (Ridim Aesea 11:6-9.) Samfala we oli no laeklaekem olgeta nating from we oli kamaot long defdefren kala, kantri, laen, no from wan narafala samting olsem, oli lanem blong stap gud tugeta mo joengud. I olsem we oli “hamarem ol naef blong faet blong olgeta, gogo oli kam aean blong digim graon.” (Aes. 2:4) ?Olsem wanem oli save mekem ol bigfala jenis ya? Ol man ya oli lanem blong “savegud Hae God” Jeova, mo oli mekem save ya we oli kasem i wok long laef blong olgeta. Nating se ol man blong God oli sinman, be oli joengud long olgeta ples blong wol, olsem wan kampani blong ol brata nomo. Taem yumi luk we plante man long evri ples oli laekem gud nius, mo yumi luk gudfala frut we i stap kamaot long hem, hemia i pruvum se tijing we God i givim i beswan edukesen.—Mat. 11:19.
7, 8. (a) ?Wanem sam long ol samting we oli olsem “ol strong ples blong haed blong Setan” we tijing blong God i givhan long ol man blong brekemdaon? (b) ?Wanem i soemaot se tijing we Jeova i givim i karem ona i go long hem?
7 Aposol Pol i tokbaot wok blong prij we ol man blong God oli mekem, se i olsem wan faet agensem Setan. Hem i raetem se: “Ol samting ya we mifala i stap yusum blong faet, oli no samting blong faet blong wol ya. Mifala i stap yusum ol samting blong faet blong God, we oli naf blong brekemdaon ol strong ples blong haed blong Setan. Nao mifala i stap brekemdaon ol giaman toktok we ol man oli stap talem blong blokem ol trutok. Mo mifala i stap pulumdaon olgeta samting we ol man oli stap stanemap long flas blong olgeta, we oli blong blokem ol man blong oli no save God.” (2 Kor. 10:4, 5) ?Wanem sam long ol samting we oli olsem “ol strong ples blong haed blong Setan” we tijing blong God i brekemdaon? Hemia ol samting we oli hevi long ol man, olsem ol giaman tijing, ol giaman tingting we oli mekem man i fraet, mo ol waes blong man. (Kol. 2:8) Tijing we God i givim i halpem ol man blong sakemaot ol nogud fasin mo wokem ol fasin we God i glad long olgeta. (1 Kor. 6:9-11) Tijing ya i mekem se ol famle oli kam moa hapi. Mo tu, tijing ya i mekem se ol man we oli no luk wan rod blong kamaot long trabol we oli gat, oli kasem save long mining blong laef. Hemia nao tijing we ol man tede oli nidim.
8 Wan gudfala fasin we Jeova i halpem ol man blong wokem, hemia fasin blong no giaman mo no stil. Stori we i kam biaen i soemaot samting ya. (Hib. 13:18) Wan woman long India i stadi Baebol, mo afta we sam taem i pas, hem i kasem mak we hem i naf blong kam wan pablisa we i no baptaes. Wan dei, taem woman ya i stap gohom afta we i givhan long wok ya blong bildim wan Haos Kingdom, hem i faenem wan gol jen long graon, klosap long wan ples we bas i stap stop long hem. Praes blong jen ya i samwe long 94,000 vatu. Nating se woman ya i pua, hem i no karem jen ya i blong hem, be hem i tekem i go long polis stesen. !Polis we i toktok wetem woman ya i sek long samting we hem i mekem! Biaen, wan narafala polis i askem long hem se: “?From wanem yu karem jen ya i kam long mifala? ?From wanem yu yu no kipim i blong yu?” Woman ya i eksplenem se: “Ol tijing blong Baebol oli jenisim fasin blong mi, naoia mi no moa save giaman mo stil.” Polis ya i sapraes tumas, mo i talem long Kristin elda we i tekem woman ya i kam long polis stesen, se: “I gat 38 milian man long provins ya. Sipos yu save givhan long ten man nomo blong oli gat fasin olsem woman ya, bambae hemia i wan nambawan samting.” Yes, tijing we God i givim i halpem plante milian man blong oli mekem laef blong olgeta i kamgud moa. ?Taem yu tingbaot samting ya, yu yu luksave se yumi gat plante risen blong presem Jeova?
9. ?Wanem i save mekem ol bigfala jenis long laef blong man?
9 Paoa we Tok blong God i gat blong jenisim fasin blong man, mo tabu spirit we Jeova i yusum blong halpem man, tufala samting ya i givhan long ol man blong oli mekem ol bigfala jenis long laef blong olgeta. (Rom 12:2; Gal. 5:22, 23) Kolosi 3:10 i talem se: “Putum niufala laef ya blong yufala, olsem prapa klos blong yufala. Niufala laef ya, God nomo i stamba blong hem. Mo oltaem, hem i stap mekem laef ya i kam niuwan bakegen, blong mekem yufala i savegud hem, mo blong mekem yufala i kam moa olsem hem.” Ol tok insaed long Baebol i gat paoa blong mekem man i luksave se hem i rili wanem kaen man, mo i save jenisim tingting blong hem mo filing blong hem tu long plante samting. (Ridim Hibrus 4:12.) Sipos wan man i kasem stret save long Baebol, mo i mekem ol fasin blong hem oli laenap wetem tingting blong Jeova, hem i save kam wan fren blong God, mo i save gat janis blong laef olwe.
Jeova i Rerem Yumi From Fiuja
10. (a) ?From wanem Jeova nomo i save rerem yumi from fiuja? (b) ?Wanem ol bigfala samting we bambae oli kamaot long fulwol i no longtaem?
10 Jeova nomo i save rerem yumi from fiuja. Hemia from we hem nomo i save ol samting we bambae oli hapen i no longtaem. Hem nao i mekem desisen se fiuja blong ol man bambae i olsem wanem. (Aes. 46:9, 10) Profet tok blong Baebol i talem se “bigfala dei blong Jeova i klosap.” (Sef. 1:14, NW) Tok blong Ol Proveb 11:4 long saed blong dei ya, bambae i kamtru: “Long dei we Hae God bambae i jajem yumi, ol samting we rijman i gat bambae oli no save givhan long hem, be sipos fasin blong man i stret, hemia i save sevem laef blong hem.” Taem jajmen blong Jeova i kamtru long wol blong Setan, samting we bambae i impoten moa, hemia se God i glad long yumi. Mane bambae i no halpem yumi nating. Esikel 7:19 i tokbaot mane i se: “Bambae olgeta oli luk ol silva mo ol gol blong olgeta olsem samting we i nogud we i nogud, mo bambae oli sakem olgeta olbaot long ol rod long taon.” From we yumi kasem save finis long samting ya we i no hapen yet, yumi save mekem ol waes desisen naoia.
11. ?Tijing we God i givim i halpem yumi long wanem fasin, we i save mekem yumi rere from fiuja?
11 Tijing we God i givim i halpem yumi long wan spesel fasin, we i save mekem yumi rere from dei blong Jeova. Tijing ya i givhan long yumi blong putum ol samting we oli impoten moa oli stap long fasples long laef blong yumi. Long leta we aposol Pol i raetem long Timoti, hem i talem se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo.” Maet yumi no gat mane, be advaes ya we i kamaot long God i save givhan long yumi yet. ?Advaes ya i talem wanem? Yumi no mas hivimap ol sas samting, be yumi mas traehad blong “mekem ol gudfala fasin” mo ‘ol gudfala wok, mo yumi mas kam rij long fasin ya.’ Sipos yumi putum wok blong Jeova i stap long fasples long laef blong yumi, yumi ‘stap putumgud plante gudgudfala samting blong yumi, we i olsem fandesen blong laef blong yumi.’ (1 Tim. 6:17-19) Taem yumi rere blong lego sam samting we maet oli save mekem laef blong yumi i isi moa, yumi soemaot se yumi rili waes. Jisas i talem from wanem fasin ya i waes, i se: “?Sipos wan man i kasem olgeta samting blong wol, be i lusum laef blong hem, hem bambae i save winim wanem?” (Mat. 16:26, 27) From we dei blong Jeova i klosap, i gud we yumi wanwan i tingbaot se: ‘?Mi mi stap hivimap ol gudgudfala samting long weples? ?Mi mi stap wok olsem wan slef blong God, no mi stap wok olsem wan slef, blong mi mi kam rijman?’—Mat. 6:19, 20, 24.
12. ?From wanem yumi no mas kam slak sipos samfala oli daonem wok blong prij blong yumi?
12 Wan long “ol gudfala wok” we Tok blong God i talem se i impoten moa blong ol Kristin oli mekem, hemia wok blong talemaot Kingdom mo pulum ol man oli kam disaepol. Wok ya i save sevem laef blong ol man. (Mat. 24:14; 28:19, 20) Maet sam man oli daonem wok blong prij blong yumi, olsem we samfala oli mekem long faswan handred yia. (Ridim 1 Korin 1:18-21.) Be hemia i no mekem se tok we yumi talemaot i no impoten, mo i no mas mekem yumi ting se i no nid blong wok had long smol taem we i stap, blong givim janis long olgeta man blong oli save bilif. (Rom 10:13, 14) Taem yumi halpem ol narafala blong kasem tijing we God i givim, yumi tu yumi kasem plante blesing.
Kasem Blesing From We Yumi Lego Samting We Yumi Wantem
13. ?Aposol Pol i lego wanem samting from gud nius?
13 Bifo we aposol Pol i kam wan Kristin, hem i stap kasem trening blong kam wan impoten man long wol blong ol man Jiu bifo. Ating hem i gat samwe long 13 yia nomo taem hem i lego ples blong hem, Tasas, blong go skul long Jerusalem. Hem i skul long tija ya blong Loa we ol man oli tinghae long hem, nem blong hem Gamaliel. (Wok 22:3) Sloslo, Pol i stap winim ol narafala studen, mo sipos hem i bin gohed blong skul, ating hem i save kam wan impoten man long jos blong ol man Jiu. (Gal. 1:13, 14) Taem Pol i bilif long gud nius mo i stat blong prij, hem i lego ol samting ya. ?Olsem wanem? ?Pol i harem nogud biaen? ?Hem i sore we hem i bin jusum rod ya? Nogat. Hem i raetem se: “Mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo.”—Fil. 3:8.
14, 15. ?Wanem ol blesing we yumi kasem taem yumi “joen wetem God blong mekem wok blong hem”?
14 Ol Kristin tede oli lego plante samting from gud nius, olsem Pol. (Mak 10:29, 30) ?Taem yumi mekem olsem, yu ting se yumi sot long sam samting? Robert, we yumi tokbaot long stat blong stadi ya, i talemaot tingting blong hem, we i sem mak long plante narafala tu. Hem i se: “Mi mi no harem nogud nating long desisen we mi mekem. Wok blong prij fultaem i givim bigfala glad long mi mo i mekem mi mi haremgud. Wok ya i givim janis long mi blong ‘trastem Jeova mo luk we hem i gud.’ Evri taem we mi mi lego samting long saed blong bodi blong mekem moa long wok blong God, Jeova i blesem mi wetem plante moa samting, i bitim wanem we mi mi lego. I olsem we mi no lego wan samting nating. !Mi mi kasem moa!”—Sam 34:8; Prov. 10:22.
15 Sipos yu bin joen longtaem lelebet long wok blong prij mo blong tijim ol man, i sua se yu yu bin gat janis tu blong trastem Jeova mo luk we hem i gud. ?Olsem wanem? ?Long wok blong talemaot gud nius, i gat sam taem we yu yu haremsave se spirit blong God i givhan long yu? ?Yu yu luk ae blong sam man i saen taem Jeova i openem hat blong olgeta blong oli bilif long gud nius? (Wok 16:14) ?Jeova i halpem yu blong winim sam samting we oli stap blokem yu, maet taem hem i openem rod blong yu yu save mekem moa long wok blong prij? ?Jeova i bin givhan long yu blong gohed long wok blong hem, taem yu kasem sam trabol we oli mekem yu yu harem se paoa blong yu i finis finis? (Fil. 4:13, NW) Taem yu wan yu haremsave se han blong Jeova i stap halpem yu long wok blong prij, yu filim se Jeova i rili laef i stap mo se yu yu stap klosap nomo long hem. (Aes. 41:10) Tru ya, i wan bigfala blesing blong “joen wetem God blong mekem wok blong hem,” hemia bigfala wok ya blong karem tijing we hem i givim i go long ol man.—1 Kor. 3:9.
16. ?Wanem tingting blong yu long saed blong bigfala traehad blong yu mo ol samting we yu lego, blong givim tijing we i kamaot long Jeova long ol man?
16 Plante man oli wantem mekem wan bigfala samting long laef blong olgeta, we bambae ol man oli tingbaot blong longtaem. Sore tumas, long wol tede, plante taem yumi luk se nating we man i mekem wan nambawan samting, be ol man oli fogetem samting ya hareap. I no olsem long saed blong ol bigfala wok we Jeova i stap mekem tede blong leftemap nem blong hem mo mekem i tabu. I sua se bambae ol wok ya oli stap olwe, olsem wan haf blong histri blong ol man blong Jeova. Bambae ol man blong Jeova oli tingbaot ol wok ya gogo i no save finis. (Prov. 10:7; Hib. 6:10) I gud yumi tinghae long bigfala ona we yumi gat blong tijim ol man long saed blong Jeova, wan wok we bambae oli raetemdaon long histri.
?Bambae Yu Yu Ansa Olsem Wanem?
• ?Olgeta we Jeova i glad blong tijim, oli mas gat wanem fasin?
• ?Olsem wanem tijing we God i givim i mekem laef blong man i kamgud moa?
• ?Wanem ol blesing we yumi kasem taem yumi givhan long ol narafala blong kasem tijing we God i givim?
[Kwestin]
[Tok blong pija long pej 25]
Ol man we Jeova i tijim olgeta, oli joengud long olgeta ples blong wol, olsem wan kampani blong ol brata nomo
[Tok blong pija long pej 26]
I wan bigfala ona blong “joen wetem God blong mekem wok blong hem”