Ang Pagkalabaw ug Bili sa Balaang Edukasyon
Ang Pagkalabaw ug Bili sa Balaang Edukasyon
“Sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus.”—FILIP. 3:8.
1, 2. Unsang desisyon ang gihimo sa pipila ka Kristohanon, ug ngano?
SUKAD sa pagkabata, si Robert hawod na kaayo sa klase. Sa otso anyos pa lamang siya, ang usa sa iyang mga magtutudlo miadto sa ilang balay ug miingon nga mahimo niyang makab-ot ang bisan unsa nga iyang gusto. Ang magtutudlo naglaom nga si Robert mahimong doktor. Tungod kay tag-as man ang iyang grado sa hayskul, kuwalipikado siyang moeskuyla sa kinamaayohang mga unibersidad sa ilang nasod. Apan nakahukom si Robert nga talikdan ang giisip sa daghan nga talagsaon kaayong kahigayonan aron siya makaalagad ingong regular payunir.
2 Sama kang Robert, daghang Kristohanon—bata ug tigulang—ang may kahigayonan nga moasenso niining presenteng sistema sa mga butang. Ang uban mipili nga dili gamiton sa bug-os ang maong mga kahigayonan aron ilang makab-ot ang ilang espirituwal nga mga tumong. (1 Cor. 7:29-31) Unsay nagtukmod sa mga Kristohanon sama kang Robert sa pagpaningkamot diha sa buluhatong pagsangyaw? Gawas pa sa ilang gugma kang Jehova, nga mao ang pangunang rason, ilang gipabilhan pag-ayo ang balaang edukasyon. Nahunahuna ba nimo kon sama sa unsa ang imong kinabuhi kon wala ka pa makadangat sa kamatuoran? Ang pagpamalandong sa pipila sa dagkong mga panalangin nga atong nadawat gumikan sa atong pagkanatudloan ni Jehova motabang kanato sa pagpabili kanunay sa maayong balita ug sa pagkahimong masiboton sa pagpaambit niana ngadto sa uban.
Usa ka Dakong Pribilehiyo nga Matudloan sa Diyos
3. Nganong makaseguro kita nga si Jehova andam motudlo sa dili-hingpit nga mga tawo?
3 Tungod sa iyang kaayo, si Jehova andam motudlo sa dili-hingpit nga mga tawo. Mahitungod sa dinihogang mga Kristohanon, ang Isaias 54:13 nagtagna: “Ang tanan nimong mga anak mahimong mga tinudloan ni Jehova, ug dagaya unya ang pakigdait sa imong mga anak.” Ang prinsipyo nianang mga pulonga mapadapat usab sa “ubang mga karnero” ni Kristo. (Juan 10:16) Tataw kini diha sa tagna nga nagakatuman sa atong adlaw. Nakita ni Isaias diha sa panan-awon ang mga tawo gikan sa tanang nasod nga nagaganayan ngadto sa matuod nga pagsimba. Iyang gihubit sila ingong nag-ingon sa usag usa: “Manungas kita ngadto sa bukid ni Jehova, ngadto sa balay sa Diyos ni Jacob; ug siya magatudlo kanato bahin sa iyang mga dalan, ug kita magalakaw sa iyang mga alagianan.” (Isa. 2:1-3) Pagkadakong pribilehiyo nga matudloan sa Diyos!
4. Unsay gikinahanglan ni Jehova niadtong iyang tudloan?
4 Sa unsang paagi kita mahimong kuwalipikado nga modawat sa balaang edukasyon? Ang usa ka kinahanglanon mao nga ang usa ka tawo maaghop ug daling tudloan. Si salmistang David misulat: “Maayo ug matul-id si Jehova. . . . Tudloan niya ang mga maaghop sa iyang dalan.” (Sal. 25:8, 9) Ug si Jesus miingon: “Ako nagadayeg kanimo sa dayag, Amahan, Ginoo sa langit ug yuta, tungod kay gitagoan mo nga maampingon kining mga butanga gikan sa mga maalamon ug sa mga makinaadmanon, ug nagbutyag niini ngadto sa mga bata.” (Luc. 10:21) Dili ka ba masuod sa usa ka Diyos nga ‘naghatag ug dili-takos nga kalulot sa mga mapainubsanon’?—1 Ped. 5:5.
5. Sa unsang paagi kita nahibalo bahin sa Diyos?
5 Ingong mga alagad ni Jehova, tungod ba sa atong kaugalingong katakos o kaalam nga kita nakadangat sa kamatuoran? Dili. Sa pagkatinuod, kon sa ato lang kaugalingon, dili gayod kita mahibalo bahin sa Diyos. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Pinaagi sa buluhatong pagsangyaw ug sa balaang espiritu, ginakabig ni Jehova ang mga tawong karnerohon, “ang tilinguhaong mga butang sa tanang kanasoran.” (Hag. 2:7) Dili ka ba mapasalamaton nga usa ka niadtong gikabig ni Jehova ngadto sa iyang Anak?—Basaha ang Jeremias 9:23, 24.
Ang Gahom nga Makapausab sa Kinabuhi
6. Unsa ang talagsaong epekto sa “kahibalo kang Jehova” diha sa mga tawo?
6 Ginamit ang maanindot nga ilustrasyon, ang tagna ni Isaias naghulagway sa kausaban sa kinaiya sa tawo nga nagakahitabo sa atong adlaw. Ang kanhing mapintas nga mga tawo nahimong makigdaiton. (Basaha ang Isaias 11:6-9.) Ang kanhing magkaaway tungod sa kalainan sa rasa, nasyonalidad, tribo, o kultura nakakat-on sa pagpuyo nga may panaghiusa. Sa mahulagwayong pagkasulti, ilang ‘gisalsal ang ilang mga espada [aron mahimong] mga punta sa daro.’ (Isa. 2:4) Unsay hinungdan niining talagsaong mga kausaban? Ang mga tawo midawat sa “kahibalo kang Jehova” ug nagpadapat niana sa ilang kinabuhi. Bisan pag ang mga alagad sa Diyos dili hingpit, ilang napatungha ang tinuod nga tibuok-kalibotang panag-igsoonay. Ang epekto sa maayong balita nganha sa mga tawo sa lainlaing nasod ug ang maayong bunga nga gipatungha niini nagpamatuod sa pagkabililhon gayod sa balaang edukasyon.—Mat. 11:19.
7, 8. (a) Unsa ang pipila sa “lig-ong pagkatarok nga mga butang” nga napukan sa mga tawo gumikan sa balaang edukasyon? (b) Unsay nagpakita nga ang balaang edukasyon maghatag kadayeganan kang Jehova?
7 Gipakasama ni apostol Pablo sa espirituwal nga pakiggubat ang buluhatong pagsangyaw sa mga alagad sa Diyos. Siya misulat: “Ang mga hinagiban sa among pagpakiggubat dili unodnon, kondili gamhanan tungod sa Diyos aron sa pagpukan sa lig-ong pagkatarok nga mga butang. Kay among gipukan ang mga pangatarongan ug ang tanang hataas nga butang nga gibangon batok sa kahibalo sa Diyos.” (2 Cor. 10:4, 5) Unsa ang pipila sa “lig-ong pagkatarok nga mga butang” nga gikan niana ang mga tawo mahigawas tungod sa balaang edukasyon? Ang kabug-at sa bakak nga mga pagtulon-an, mga patuotuo, ug tawhanong mga pilosopiya, sa paghisgot lamag pipila. (Col. 2:8) Ang balaang edukasyon motabang sa mga tawo sa pagbuntog sa daotang mga batasan ug sa pag-ugmad sa diyosnong mga hiyas. (1 Cor. 6:9-11) Kini maghimo sa pamilyahanong kinabuhi nga mas malipayon. Ug kini maghatag niadtong nawad-ag paglaom ug tinuod nga katuyoan sa kinabuhi. Mao kini ang matang sa edukasyon nga gikinahanglan karon.
8 Si Jehova motabang sa mga tawo sa pag-ugmad sa mga hiyas sama sa pagkamatinud-anon, ingon sa gipakita sa mosunod nga eksperyensiya. (Heb. 13:18) Usa ka babaye sa India ang midawat ug pagtuon sa Bibliya ug sa ngadtongadto nahimong di-bawtismadong magmamantala. Usa ka adlaw niana, samtang mopauli na siya gikan sa pagboluntaryo sa pagtukod ug Kingdom Hall, siya nakakita ug bulawan nga alahas nga nagkantidad ug 800 dolyares (U.S.). Bisan tuod siya kabos, iya kadtong gidala sa presinto. Dili makatuo ang polis sa iyang gibuhat! Sa ulahi, laing polis ang nangutana kaniya: “Nganong giuli pa man ni nimo?” Siya mitubag, “Ako nausab tungod sa akong pagtuon sa Bibliya, mao nga karon matinud-anon na ko.” Kay nakadayeg kaniya, ang polis miingon sa ansiyano nga miuban sa babaye: “Adunay kapin sa 38 ka milyong tawo niining dapita. Kon makatabang ka pag napulo ka tawo nga magbag-o sama kaniya, dako gayod kana nga kalamposan.” Kon atong tan-awon ang minilyong kinabuhi nga nausab tungod sa balaang edukasyon, kita adunay daghang rason nga modayeg kang Jehova.
9. Sa unsang paagi ang mga tawo makahimog dagkong mga kausaban sa ilang kinabuhi?
9 Ang makapabag-o nga gahom sa Pulong sa Diyos, lakip na sa tabang nga gitagana ni Jehova pinaagi sa iyang balaang espiritu, nagtabang sa mga tawo sa paghimog dagkong mga kausaban sa ilang kinabuhi. (Roma 12:2; Gal. 5:22, 23) Ang Colosas 3:10 nag-ingon: “Isul-ob ang bag-ong pagkatawo, nga pinaagi sa tukmang kahibalo gibag-o sumala sa larawan sa Usa nga naglalang niini.” Ang mensahe nga makita sa Pulong sa Diyos, ang Bibliya, makahimo sa pagpadayag kon unsay anaa sa kasingkasing sa tawo, ug kini makapabag-o sa iyang paagi sa paghunahuna ug bisan sa iyang pagbati sa mga butang. (Basaha ang Hebreohanon 4:12.) Pinaagi sa pagbaton ug tukmang kahibalo sa Kasulatan ug sa pagpahiuyon sa iyang kinabuhi sa matarong nga mga sukdanan ni Jehova, ang usa mahimong higala sa Diyos, nga may paglaom nga mabuhi hangtod sa hangtod.
Pagpangandam Alang sa Umaabot
10. (a) Nganong si Jehova lamang ang makatabang kanato sa pagpangandam alang sa umaabot? (b) Unsang dagkong mga kausaban ang hapit nang mahitabo sa tibuok yuta?
10 Si Jehova lamang ang makatabang kanato sa pagpangandam alang sa umaabot tungod kay siya nahibalo kon unsa unyay mahitabo. Siya ang nagtino kon unsa ang umaabot sa katawhan. (Isa. 46:9, 10) Gipadayag diha sa tagna sa Bibliya nga “ang dakong adlaw ni Jehova haduol na.” (Sof. 1:14) Maylabot nianang adlawa, matuman ang giingon sa Proverbio 11:4: “Ang bililhong mga butang wala unyay kapuslanan sa adlaw sa mabangis nga kasuko, apan ang pagkamatarong magaluwas gikan sa kamatayon.” Sa dihang moabot na ang panahon nga ipahamtang ni Jehova ang iyang paghukom sa kalibotan ni Satanas, ang labing hinungdanong butang mao ang atong maayong baroganan atubangan sa Diyos. Wala na unyay kapuslanan ang salapi. Sa pagkatinuod, ang Ezequiel 7:19 nag-ingon: “Ilang isalibay ang ilang salapi sa kadalanan, ug ang ilang bulawan mahimong butang nga kasilagan.” Ang pagkahibalo niana makatabang kanato sa paglihok nga maalamon karon.
11. Unsa ang usa ka paagi nga ang balaang edukasyon motabang kanato sa pagpangandam alang sa umaabot?
11 Ang balaang edukasyon mag-andam kanato sa pag-abot sa adlaw ni Jehova pinaagi sa pagtabang kanato sa pag-una sa mas hinungdanong mga butang. Si apostol Pablo misulat kang Timoteo: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos.” Bisan pag kita kabos, kita makabenepisyo gikan niining tambag ni Jehova. Unsay nalangkit niini? Imbes magtigom ug materyal nga mga bahandi, kita angayng maningkamot ‘sa pagbuhat ug maayo’ ug “magmadato sa maayong mga buhat.” Kon atong unahon ang pag-alagad kang Jehova diha sa atong kinabuhi, kita ‘magtipig alang sa atong kaugalingon ug usa ka maayong patukoranan.’ (1 Tim. 6:17-19) Ang maong pagsakripisyo-sa-kaugalingon nagbanaag ug maayong panghukom, kay sama sa giingon ni Jesus, “unsay kapuslanan alang sa usa ka tawo kon maangkon niya ang tibuok kalibotan apan mawad-an sa iyang kalag?” (Mat. 16:26, 27) Tungod sa pagkaduol na sa adlaw ni Jehova, angay natong suknaon ang atong kaugalingon: ‘Asa man ko nagtigom ug bahandi? Nagpaulipon ba ako sa Diyos o sa Bahandi?’—Mat. 6:19, 20, 24.
12. Nganong dili kita angayng maluya kon dunay motamay sa atong ministeryo?
12 Ang labing hinungdanon sa “maayong mga buhat” nga gihisgotan sa Pulong sa Diyos alang sa mga Kristohanon mao ang nagaluwas-ug-kinabuhi nga buluhatong pagsangyaw sa Gingharian ug paghimog mga tinun-an. (Mat. 24:14; 28:19, 20) Sama sa kahimtang sa unang siglo, ang pipila mahimong motamay sa atong ministeryo. (Basaha ang 1 Corinto 1:18-21.) Apan wala kana makapamenos sa bili sa atong mensahe ug sa kahinungdanon sa paghatag ug kahigayonan sa tanan nga motuo niana samtang dunay pay panahon. (Roma 10:13, 14) Samtang nagatabang kita sa uban nga makabenepisyo gikan sa balaang edukasyon, kita makadawat usab ug mga panalangin.
Si Jehova Magapanalangin sa Atong Pagsakripisyo
13. Unsang mga pagsakripisyo ang gihimo ni apostol Pablo alang sa maayong balita?
13 Sa wala pa siya mahimong Kristohanon, si apostol Pablo gibansay aron molampos diha sa Hudiyong sistema sa mga butang. Sa dihang siya nag-edad ug mga 13 anyos, siya mibalhin gikan iyang siyudad nga natawhan sa Tarso ngadto sa Jerusalem aron magtuon ilalom sa tinamod kaayo nga magtutudlo sa Balaod nga si Gamaliel. (Buh. 22:3) Paglabay sa panahon, si Pablo nahimong mas inila kay sa iyang mga katalirongan, ug kon nagpadayon pa siya niana, lagmit nahimo siyang prominente sa Judaismo. (Gal. 1:13, 14) Sa dihang iyang gidawat ang maayong balita ug misugod na siya sa buluhatong pagsangyaw, iyang gibiyaan kanang tanan. Nagmahay ba si Pablo sa iyang desisyon? Wala. Gani, siya misulat: “Sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus nga akong Ginoo. Tungod kaniya nadawat ko ang kapildihan sa tanang butang ug giisip kini nga mga basura.”—Filip. 3:8.
14, 15. Unsang mga panalangin ang atong matagamtam ingong “mga isigkamagbubuhat sa Diyos”?
14 Sama kang Pablo, ang mga Kristohanon karon naghimog mga sakripisyo aron isangyaw ang maayong balita. (Mar. 10:29, 30) May nawala ba kanato sa pagbuhat niana? Si Robert nga gihisgotan sa sinugdan, mibati usab sama sa daghan pa. Siya miingon: “Wala gyod ko magmahay. Ang bug-os-panahong ministeryo nakahatag kanakog kalipay ug katagbawan, ug pinaagi niana akong ‘natilawan ug nakita nga si Jehova maayo.’ Sa dihang ako mohimog materyal nga mga sakripisyo aron makab-ot ang espirituwal nga mga tumong, si Jehova kanunayng nagapanalangin kanako ug labaw pa kay sa akong gisakripisyo. Morag wala akoy gisakripisyo. Nadugangan pa hinuon ko!”—Sal. 34:8; Prov. 10:22.
15 Kon taudtaod ka nang nakigbahin sa buluhatong pagsangyaw ug pagpanudlo, sa walay duhaduha dihay mga higayon nga imong natilawan ug nakita nga si Jehova maayo. Diha bay mga panahon nga imong gibati nga gitabangan ka sa iyang espiritu samtang imong gipaambit sa uban ang maayong balita? Nakita ba nimo ang kalipay sa uban sa dihang gibuksan ni Jehova ang ilang kasingkasing aron mamati sa mensahe? (Buh. 16:14) Natabangan ka ba ni Jehova nga mabuntog ang kababagan, tingali nabuksan ang dalan aron mouswag ang imong ministeryo? Natabangan ka ba niya panahon sa kalisdanan, nga nakapaarang kanimo sa pagpadayon sa pag-alagad kaniya sa dihang imong gibati nga hapit ka nang maluya? (Filip. 4:13) Sa dihang atong nasinati ang tabang ni Jehova samtang atong gituman ang atong ministeryo, siya mahimong mas tinuod alang kanato ug mas masuod pa kita kaniya. (Isa. 41:10) Dili ba usa ka panalangin nga mahimong usa sa “mga isigkamagbubuhat sa Diyos” diha sa dakong buluhaton nga pagpaambit ug balaang edukasyon?—1 Cor. 3:9.
16. Unsay imong pagbati sa mga paghago ug mga sakripisyo nga imong gihimo maylabot sa pagpaambit sa balaang edukasyon?
16 Daghan ang naglaom nga makabuhat ug usa ka butang nga dili makalimtan sa mga tawo. Atong nakita nga bisan ang talagsaong mga kalamposan sa kalibotan karon sagad makalimtan ra. Apan, ang buluhaton nga gipalampos ni Jehova karon maylabot sa pagbalaan sa iyang ngalan mahimong permanenteng bahin sa kasaysayan sa katawhan ni Jehova. Kanunay gayod kining mahinumdoman. (Prov. 10:7; Heb. 6:10) Hinaot nga atong mahalon ang atong pribilehiyo nga makigbahin sa pagpaambit sa balaang edukasyon, usa ka buluhaton nga dili gayod makalimtan.
Unsay Imong Tubag?
• Unsay gikinahanglan ni Jehova niadtong iyang tudloan?
• Sa unsang paagi ang balaang edukasyon makapausab sa kinabuhi sa mga tawo?
• Sa unsang mga paagi nga kita gipanalanginan tungod sa pagtabang sa uban nga makabatog kaayohan gikan sa balaang edukasyon?
[Mga Pangutana sa Pagtuon]
[Hulagway sa panid 23]
Kadtong natudloan ni Jehova nagpatungha ug tinuod nga tibuok-kalibotang panag-igsoonay
[Hulagway sa panid 24]
Dili ba usa ka panalangin nga mahimong usa sa “mga isigkamagbubuhat sa Diyos”?