Yehowa Tsɔsemɔ Lɛ Nɔ Bɛ
Yehowa Tsɔsemɔ Lɛ Nɔ Bɛ
“Mibuɔ fɛɛ laajemɔ nii yɛ Kristo Yesu . . . he nilee ni fe fɛɛ lɛ hewɔ.”—FILI. 3:8.
1, 2. Mɛni Kristofoi komɛi ehala, ni mɛni hewɔ?
BENI Robert bɔi skul yaa lɛ, ele nii waa. Beni eye afii kpaanyɔ pɛ lɛ, etsɔɔlɔi lɛ ateŋ mɔ kome yasara lɛ yɛ shĩa ni ekɛɛ lɛ akɛ ebaanyɛ eye omanye yɛ nɔ fɛɛ nɔ mli. Tsɔɔlɔ lɛ wie akɛ, eheɔ eyeɔ akɛ Robert baatsɔ datrɛfonyo wɔsɛɛ. Mɔdɛŋ ni etee nɔ ebɔ yɛ skul lɛ ha ená hegbɛ akɛ eya univɛsiti kpakpai ni yɔɔ emaŋ lɛ ateŋ eko fɛɛ eko ni esumɔɔ. Shi Robert kpoo hegbɛ ni mɛi krokomɛi baasusu akɛ enɔ bɛ kwraa nɛɛ bɔni afee ni enyɛ eshɛ oti ni ekɛma ehiɛ akɛ ebaatsɔ daa gbɛgbalɔ lɛ he.
2 Taakɛ eji yɛ Robert gbɛfaŋ lɛ, Kristofoi babaoo hu náa hegbɛi ni baaha amɛya amɛhiɛ yɛ nibii agbɛjianɔtoo nɛɛ mli. Amɛteŋ mɛi komɛi halaa akɛ amɛkɛ hegbɛi nɛɛ tsuŋ nii kɛmɔŋ shi, bɔni afee ni amɛshɛ mumɔŋ otii ni amɛkɛmamɔ amɛhiɛ lɛ ahe. (1 Kor. 7:29-31) Mɛni tsirɛɔ Kristofoi tamɔ Robert koni amɛjɛ amɛtsuiaŋ amɛfee babaoo yɛ shiɛmɔ nitsumɔ lɛ mli? Suɔmɔ ni amɛyɔɔ kɛha Yehowa lɛ ji nɔ titri hewɔ, ni agbɛnɛ hu amɛhiɛ sɔɔ tsɔsemɔ ni nɔ bɛ ni jɛ Nyɔŋmɔ ŋɔɔ lɛ. Ani obi ohe yɛ bei nɛɛ amli akɛ, eji mibaleko anɔkwale lɛ kulɛ te mishihilɛ baaji aha tɛŋŋ? Kɛ́ wɔsusu jɔɔmɔi ni ekaaa ni wɔnáa kɛjɛɔ Yehowa tsɔsemɔ mli lɛ ateŋ ekomɛi ahe lɛ, ebaaye ebua wɔ ni wɔhiɛ ahi sɛɛnamɔ ni yɔɔ sanekpakpa lɛ he koni wɔkɛ hiɛdɔɔ ashiɛ wɔha mɛi krokomɛi.
Eji Hegbɛ Kpele akɛ Nyɔŋmɔ Aaatsɔɔ Wɔ Nii
3. Mɛni hewɔ wɔbaanyɛ wɔná nɔmimaa akɛ Yehowa miisumɔ ni etsɔɔ adesai ni yeee emuu lɛ anii lɛ?
3 Akɛni Yehowa hi hewɔ lɛ, eesumɔ akɛ etsɔɔ adesai ni yeee emuu lɛ anii. Yesaia 54:13 lɛ gba kɛkɔ Kristofoi ni afɔ amɛ mu lɛ ahe akɛ: “Obii lɛ fɛɛ aaafee Yehowa kaselɔi, ni maha obii lɛ hejɔlɛ babaoo.” Ŋmalɛ nɛɛ baanyɛ akɔ Kristo “tooi krokomɛi” lɛ hu ahe. (Yoh. 10:16) Gbalɛ ko ni miiba mli ŋmɛnɛ lɛ feɔ enɛ faŋŋ. Ajie ninaa ko atsɔɔ Yesaia ni ena mɛi ni jɛ jeŋmaji fɛɛ amli miike yuu kɛmiiba anɔkwa jamɔ mli. Etsɔɔ mli akɛ, amɛmiikɛɛkɛɛ amɛhe akɛ: “Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ!” (Yes. 2:1-3) Eji hegbɛ kpele diɛŋtsɛ akɛ Nyɔŋmɔ aaatsɔɔ wɔ nii!
4. Mɛni Yehowa taoɔ yɛ mɛi ni etsɔɔ amɛ nii lɛ adɛŋ?
4 Mɛni ebiɔ ni wɔfee koni Yehowa atsɔɔ wɔ nii? Nɔ titri ni he hiaa ji, esa akɛ mɔ lɛ afee mɔ ni he jɔ ni ekpɛlɛɔ ni atsɔɔ lɛ nii. Lalatsɛ David ŋma akɛ: “Yehowa hi ni jalɔ ji lɛ, . . . etsɔɔ mɛi ni he jɔ lɛ egbɛ lɛ.” (Lala 25:8, 9, Ga Biblia hee lɛ) Yesu kɛɛ akɛ: “Miijie oyi, Ataa, ŋwɛi kɛ shikpɔŋ Nuŋtsɔ, akɛ oŋɔ nii nɛɛ otee nilelɔi kɛ ŋaalelɔi, ni ojie otsɔɔ abifabii.” (Luka 10:21) Aso le ni wɔle akɛ Nyɔŋmɔ ‘duroɔ heshibalɔi’ lɛ tsirɛɛɛ wɔ ni wɔbɛŋkɛ lɛ?—1 Pet. 5:5.
5. Mɛni ha wɔbaná Nyɔŋmɔ he nilee?
5 Ákɛ Yehowa tsuji lɛ, ani wɔ diɛŋtsɛ wɔnyɛmɔ loo wɔnilee naa wɔkɛbale anɔkwale lɛ? Dabi. Kulɛ, wɔnyɛŋ wɔná Nyɔŋmɔ he nilee kɔkɔɔkɔ. Yesu kɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” (Yoh. 6:44) Yehowa miitsɔ shiɛmɔ nitsumɔ lɛ kɛ mumɔ krɔŋkrɔŋ lɛ nɔ eegbala mɛi ni tamɔ tooi lɛ ni ji “jeŋmaji lɛ fɛɛ anii ni jara wa lɛ.” (Hag. 2:7) Aso omii shɛɛɛ ohe akɛ Yehowa egbala bo kɛba e-Bi lɛ ŋɔɔ?—Nyɛkanea Yeremia 9:23, 24.
Nyɔŋmɔ Tsɔsemɔ lɛ Tsakeɔ Mɔ
6. Mɛɛ tsakemɔi ni sa kadimɔ “Yehowa he nilee” ni mɛi aaaná lɛ baanyɛ aha amɛfee?
6 Yesaia kɛ mfonirifeemɔ wiemɔ tsu nii yɛ egbalɛ lɛ mli ni ekɛtsɔɔ bɔ ni adesai komɛi baatsake amɛsu yɛ wɔbe nɛɛ mli lɛ mli. Mɛi ni tsutsu ko lɛ amɛhiɛ yɔɔ laŋlaŋ lɛ ebatsɔmɔ mɛi ni tiuɔ toiŋjɔlɛ. (Nyɛkanea Yesaia 11:6-9.) Mɛi komɛi ni be ko lɛ amɛnyɛ̃ɔ mɛi ni kɛ amɛ ehiɛɛɛ hewolo nɔ su kome, amɛkɛ amɛ jɛɛɛ maŋ kome mli, amɛwieee wiemɔ kome lɛ etsake ni amɛkɛ mɛi nɛɛ miihi shi yɛ ekomefeemɔ mli. Kɛ́ wɔɔkɛɛ lɛ, amɛkɛ ‘amɛklantei lɛ esɔ̃ kɔii.’ (Yes. 2:4) Mɛni ha amɛnyɛ amɛfee tsakemɔi kpelei nɛɛ? Amɛkase “Yehowa he nilee” ni amɛkɛmiitsu nii yɛ amɛshihilɛ mli. Eyɛ mli akɛ Nyɔŋmɔ tsuji yeee emuu moŋ, shi amɛfee ekome akɛ nyɛmimɛi yɛ jeŋ fɛɛ. Bɔ ni mɛi nyaa sanekpakpa lɛ he yɛ jeŋ fɛɛ kɛ yibii kpakpai ni ewoɔ lɛ maa nɔ mi akɛ Yehowa tsɔsemɔ lɛ nɔ bɛ.—Mat. 11:19.
7, 8. (a) Mɛni ji “mɔji wuji” ni Nyɔŋmɔ he nilee lɛ yeɔ ebuaa mɛi ni amɛkumɔɔ lɛ ekomɛi? (b) Mɛni tsɔɔ akɛ tsɔsemɔ ni Yehowa kɛhaa lɛ kɛ yijiemɔ bahaa lɛ?
7 Bɔfo Paulo kɛ Nyɔŋmɔ tsuji lɛ ashiɛmɔ nitsumɔ lɛ to mumɔŋ tawuu he. Eŋma akɛ: “Wɔtawuu nii lɛ jeee helooŋ nii ni, shi moŋ hewalɛ nii ni yɛ Nyɔŋmɔ hiɛ, ni akɛkumɔɔ mɔji wuji; ni wɔkumɔɔ susumɔi kɛ nɔ fɛɛ nɔ ni kwɔ ni woɔ ehe nɔ eshiɔ Nyɔŋmɔ nilee lɛ.” (2 Kor. 10:4, 5) Mɛni ji “mɔji wuji” ni Nyɔŋmɔ tsɔsemɔ haa mɛi yeɔ amɛhe kɛjɛɔ he lɛ ekomɛi? Ekomɛi ji amale tsɔɔmɔi, apasa hemɔkɛyelii, gbɔmɛi atsɔɔmɔi. (Kol. 2:8) Tsɔsemɔ ni Nyɔŋmɔ kɛhaa lɛ yeɔ ebuaa mɛi ni amɛŋmɛɛɔ amɛsui gbohii lɛ ahe ni amɛkaseɔ sui kpakpai ni saa Nyɔŋmɔ hiɛ. (1 Kor. 6:9-11) Esaa wekui. Ni ehaa mɛi ni bɛ hiɛnɔkamɔ yɛ shihilɛ mli lɛ náa hiɛnɔkamɔ diɛŋtsɛ. Tsɔsemɔ nɛɛ ji nɔ ni he hiaa adesai waa ŋmɛnɛ.
8 Sui ni Yehowa yeɔ ebuaa mɛi ni amɛnáa lɛ ateŋ ekome ji anɔkwayeli, taakɛ niiashikpamɔ ni nyiɛ sɛɛ nɛɛ tsɔɔ lɛ. (Heb. 13:18) Yoo ko ni yɔɔ India lɛ kpɛlɛ ni akɛ lɛ akase Biblia lɛ, sɛɛ mli lɛ ebatsɔ shiɛlɔ ni abaptisiko lɛ. Gbi ko lɛ, etee eyaye ebua kɛha Maŋtsɛyeli Asa ko maa, beni ekuɔ esɛɛ kɛbaa ni eshwɛ fioo ni ebaashɛ bɔs daamɔhe lɛ, ena jwine ni akɛ shika tsuru fee ni naa shiɔ (U.S.) dɔlai 800 kã shikpɔŋ. Eyɛ mli akɛ egbojiaŋ bɛ loo moŋ, shi ekɛ jwine lɛ tee polisifoi anitsumɔhe lɛ koni atao mɔ nɔ ni ji. Polisifonyo ni eyana lɛ lɛ naa kpɛ ehe waa diɛŋtsɛ! Sɛɛ mli lɛ, polisifonyo kroko bi lɛ akɛ, “Mɛni hewɔ okɛba?” Nyɛmi yoo lɛ tsɔɔ mli akɛ, “Biblia lɛ ni mikaseɔ lɛ eha mitsake, ni amrɔ nɛɛ miyeɔ anɔkwa.” Polisifonyo lɛ hiɛ sɔ nɔ ni yoo lɛ fee lɛ, ni ekɛɛ asafoŋ onukpa ni fata nyɛmi yoo lɛ he kɛtee polisifoi anitsumɔhe lɛ akɛ: “Mɛi ni fa fe akpekpei 38 yɛ kpokpaa nɛɛ nɔ. Kɛ́ onyɛ oye obua mɛi nyɔŋma ni amɛbatsɔmɔ tamɔ yoo nɛɛ lɛ, kulɛ ebaahi waa diɛŋtsɛ.” Kɛ́ wɔsusu mɛi akpekpei abɔ ni Nyɔŋmɔ he nilee lɛ eha amɛŋmɛɛ sui gbohii ahe ni amɛmiiba amɛjeŋ jogbaŋŋ lɛ ahe lɛ, aso enɛ haaa wɔná yiŋtoi babaoo ni wɔɔdamɔ nɔ wɔjie Yehowa yi?
9. Mɛni yeɔ ebuaa mɛi ni amɛfeɔ tsakemɔi ni sa kadimɔ waa yɛ amɛshihilɛ mli?
9 Hewalɛ ni Nyɔŋmɔ Wiemɔ lɛ yɔɔ ni ekɛtsakeɔ mɔ kɛ yelikɛbuamɔ ni Yehowa kɛhaa kɛtsɔ emumɔ krɔŋkrɔŋ lɛ nɔ lɛ yeɔ ebuaa mɛi ni amɛfeɔ tsakemɔi ni sa waa yɛ amɛshihilɛ mli. (Rom. 12:2; Gal. 5:22, 23) Kolosebii 3:10 lɛ kɛɔ akɛ: ‘Nyɛwoa gbɔmɔ hee ní tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa.’ Shɛɛ sane ni yɔɔ Nyɔŋmɔ Wiemɔ ni ji Biblia lɛ mli lɛ nyɛɔ ejieɔ gbɔmɔ tsuiŋ susumɔi akpo, ni ebaanyɛ etsake mɔ susumɔ kɛ ejwɛŋmɔ yɛ nibii ahe. (Nyɛkanea Hebribii 4:12.) Kɛ́ mɔ ko ná anɔkwa nilee ni damɔ Ŋmalɛ nɔ ni ehi shi yɛ Yehowa shishitoo mlai lɛ anaa lɛ, ebaanyɛ ebatsɔ Nyɔŋmɔ naanyo ni ebaanyɛ ekpa naanɔ wala gbɛ.
Yehowa Miisaa Wɔ Eto Wɔsɛɛ
10. (a) Mɛni hewɔ Yehowa pɛ ji mɔ ni baanyɛ asaa wɔ kɛha wɔsɛɛ lɛ? (b) Mɛɛ tsakemɔi ni sa kadimɔ etsɛŋ kwraa akɛbaaba shikpɔŋ muu lɛ fɛɛ nɔ?
10 Yehowa pɛ ji mɔ ni baanyɛ aye abua wɔ ni wɔsaa wɔhe wɔto wɔsɛɛ ejaakɛ ele nɔ ni kã wɔhiɛ. Ele bɔ ni adesai ashihilɛ baaji aha wɔsɛɛ. (Yes. 46:9, 10) Biblia gbalɛ ko tsɔɔ akɛ, “Yehowa gbi wulu lɛ ebɛŋkɛ.” (Zef. 1:14) Wiemɔi ni yɔɔ Abɛi 11:4 lɛ baafee anɔkwale yɛ nakai gbi lɛ nɔ akɛ: “Mlifu gbi lɛ nɔ lɛ, nii [loo ninamɔ] he bɛ sɛɛnamɔ ko; shi jalɛ jieɔ mɔ yɛ gbele dɛŋ.” Kɛ́ beni Yehowa baakojo Satan je lɛ shɛ lɛ, nɔ ni he baahia titri ji ni naanyobɔɔ kpakpa ahi wɔ kɛ Yehowa teŋ. Shika he baŋ sɛɛnamɔ. Ezekiel 7:19 lɛ kɛɔ akɛ: “Amɛjwiɛtɛi lɛ amɛaashɛrɛ amɛshwie blohui lɛ amli, ni amɛaabu amɛshika lɛ akɛ nɔ ko ní anyaŋeɔ.” Esa akɛ enɛ ni atsɔ hiɛ aha wɔle lɛ aye abua wɔ ni wɔkɛ nilee atsu nii bianɛ.
11. Mɛni ji gbɛ kome ni Nyɔŋmɔ tsɔsemɔ yeɔ ebuaa wɔ ní wɔsaa wɔhe wɔto wɔsɛɛ?
11 Nyɔŋmɔ tsɔsemɔ lɛ yeɔ ebuaa wɔ koni wɔkɛ otii kpakpai amamɔ wɔhiɛ, ni enɛ ji gbɛ kome ni sa kadimɔ waa ni Yehowa tsɔɔ nɔ esaa wɔ etoɔ egbi ni baa lɛ. Bɔfo Paulo ŋma eyaha Timoteo akɛ: “Niiatsɛmɛi ni yɔɔ je nɛŋ lɛ, wo amɛ kitã ni amɛkajwɛŋ nii wuji, ni amɛkaŋɔ amɛhiɛ hu amɛfɔ̃ nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ.” Kɛ́ ohiafoi ji wɔ po lɛ, wɔbaanyɛ wɔná ŋaawoo ni jɛ Nyɔŋmɔ ŋɔɔ nɛɛ he sɛɛ. Mɛni ebiɔ ni wɔfee? Yɛ nɔ najiaŋ ni wɔɔbua heloonaa nibii anaa wɔto lɛ, esa akɛ wɔbɔ mɔdɛŋ ‘ni wɔfee ejurɔ, ni wɔtsɔmɔ niiatsɛmɛi yɛ nitsumɔi kpakpai agbɛfaŋ.’ Kɛ́ wɔkɛ Yehowa jamɔ ye klɛŋklɛŋ gbɛhe yɛ wɔshihilɛ mli lɛ, belɛ ‘wɔmiibɔ jwetri wɔha wɔhe, ni efee shishitoo kpakpa eha be ni baaba lɛ.’ (1 Tim. 6:17-19) Kɛ́ wɔkɛ wɔhe ha yɛ nɛkɛ gbɛ nɔ lɛ etsɔɔ akɛ nilelɔi ji wɔ ejaakɛ Yesu wie akɛ: “Mɛɛ sɛɛ gbɔmɔ náa, kɛji enine shɛ jeŋ muu lɛ fɛɛ nɔ, shi elaaje esusuma lɛ?” (Mat. 16:26, 27) Akɛni Yehowa gbi lɛ ebɛŋkɛ kpaakpa hewɔ lɛ, esa akɛ wɔteŋ mɔ fɛɛ mɔ abi ehe akɛ: ‘Nɛgbɛ mibɔɔ jwetri yɛ? Ani miisɔmɔ Nyɔŋmɔ loo Ninamɔ?’—Mat. 6:19, 20, 24.
12. Mɛni hewɔ esaaa akɛ wɔnijiaŋ jeɔ wui kɛ́ mɛi gbe wɔsɔɔmɔ lɛ he guɔ?
12 ‘Nitsumɔi kpakpai,’ ni Nyɔŋmɔ Wiemɔ lɛ tsɔɔ akɛ esa akɛ Kristofoi atsu lɛ ateŋ nɔ ni fe fɛɛ ji Maŋtsɛyeli shiɛmɔ kɛ kaselɔfeemɔ nitsumɔ ni akɛhereɔ mɛi ayiwala lɛ. (Mat. 24:14; 28:19, 20) Mɛi komɛi baagbe wɔsɔɔmɔ lɛ he guɔ taakɛ afee yɛ klɛŋklɛŋ afii 100 lɛ mli lɛ. (Nyɛkanea 1 Korintobii 1:18-21.) Shi wɔshɛɛ sane lɛ kã he ehe yɛ sɛɛnamɔ, ni asaŋ ehe miihia lolo ni aha mɛi fɛɛ anu shɛɛ sane lɛ beni be yɔɔ lolo lɛ akɛ aleenɔ amɛaahe amɛye lo. (Rom. 10:13, 14) Beaŋ ni wɔyeɔ wɔbuaa mɛi krokomɛi ni amɛná Nyɔŋmɔ tsɔsemɔ lɛ he sɛɛ lɛ, wɔ hu wɔnáa jɔɔmɔi babaoo.
Yehowa Jɔɔ Etsuji ni Kɛ Nibii Shãa Afɔle Lɛ
13. Mɛɛ nibii bɔfo Paulo kɛsha afɔle yɛ sanekpakpa lɛ hewɔ?
13 Dani bɔfo Paulo batsɔ Kristofonyo lɛ, no mli lɛ aatsɔse lɛ ni ebatsɔ gbɔmɔ agbo yɛ Yudafoi agbɛjianɔtoo lɛ mli. Eeenyɛ efee akɛ eyeko afii 13 ni aha eshi Tarso ni ji maŋ nɔ ni afɔ lɛ yɛ lɛ kɛtee Yerusalem koni Mlatsɔɔlɔ ni ehe gbɛi waa ni atsɛɔ lɛ Gamaliel lɛ atsɔɔ lɛ nii. (Bɔf. 22:3) Paulo babɔ mɔdɛŋ waa yɛ eyinɔbii lɛ ateŋ, ni eji etee nɔ nakai kulɛ ebaaná hegbɛ wulu yɛ Yudafoi ajamɔ lɛ mli. (Gal. 1:13, 14) Beni ekpɛlɛ sanekpakpa lɛ nɔ ni ebɔi shiɛmɔ lɛ, ekpoo nakai nibii lɛ fɛɛ. Ani Paulo shwa ehe akɛ ekpoo nakai nibii lɛ? Dabi. Lɛ diɛŋtsɛ po eŋma akɛ: “Shi lɛɛlɛŋ akɛ mibuɔ fɛɛ laajemɔ nii yɛ Kristo Yesu, mi-Nuŋtsɔ lɛ, he nilee ni fe fɛɛ lɛ hewɔ, lɛ ehewɔ ni nii fɛɛ ebɔ mi, ni mibuɔ amɛ akɛ tumu nɔ nii” lɛ.—Fili. 3:8.
14, 15. Ákɛ “Nyɔŋmɔ hefatalɔi nitsulɔi” lɛ, mɛɛ jɔɔmɔi wɔnáa?
14 Ŋmɛnɛ lɛ, Kristofoi kɛ nibii komɛi shãa afɔle taakɛ Paulo fee lɛ. (Mar. 10:29, 30) Ani nibii ni wɔkɛshãa afɔle lɛ haa wɔhe fiɔ wɔ? Robert ni atsi etã yɛ nikasemɔ nɛɛ shishijee lɛ kɛɛ akɛ: “Mishwako mihe kwraa. Be fɛɛ sɔɔmɔ nitsumɔ lɛ eha miná miishɛɛ ni mitsui hu enyɔ mimli, ni eha minyɛ ‘misa minaa ni mina akɛ Yehowa hi.’ Be fɛɛ be ni mikɛ heloonaa nibii baashã afɔle bɔni afee ni matiu mumɔŋ otii asɛɛ lɛ, Yehowa jɔɔ mi kɛ nibii ni fe nɔ ni mikɛshã afɔle lɛ. Oookɛɛ nɔ ni mikɛ nɔ ko eshãko afɔle. Sɛɛ moŋ mináa daa!” Mɛi babaoo nuɔ he nakai nɔŋŋ.—Lala 34:9; Abɛi 10:22.
15 Kɛ́ okɛ ohe ewo shiɛmɔ nitsumɔ lɛ mli be saŋŋ nɛ lɛ, ŋwanejee ko bɛ he akɛ bo hu oná hegbɛ osa onaa ni ona akɛ Yehowa hi. Kɛ́ ooshiɛ sanekpakpa lɛ ooha mɛi krokomɛi lɛ, ani bei komɛi lɛ onuɔ he akɛ Yehowa mumɔ lɛ miiye eebua bo? Ani ona pɛŋ ni mɔ ko mii eshɛ ehe akɛni Yehowa gbele etsui naa ni ebo sane kpakpa lɛ toi lɛ hewɔ? (Bɔf. 16:14) Ani Yehowa eye ebua bo pɛŋ ni oye gbɛtsĩi nii komɛi anɔ, ni ekolɛ no eha onyɛ olɛɛ osɔɔmɔ nitsumɔ lɛ mli? Ani ewa bo yɛ fimɔ beaŋ, ni no eha otee nɔ osɔmɔ be mli ni onuɔ he po akɛ ohewalɛ etã? (Fili. 4:13) Kɛ́ wɔna akɛ Yehowa miiye eebua wɔ ni wɔnyɛ wɔtsu wɔsɔɔmɔ nitsumɔ lɛ, wɔnuɔ he akɛ Yehowa yɛ diɛŋtsɛ ni ebɛŋkɛ wɔ kpaakpa. (Yes. 41:10) Ani ejeee hegbɛ kpele akɛ oji “Nyɔŋmɔ hefatalɔi nitsulɔi” lɛ ateŋ mɔ kome yɛ Nyɔŋmɔ tsɔsemɔ ni ji nitsumɔ ni fe fɛɛ nɛɛ mli?—1 Kor. 3:9.
16. Te esa akɛ onu mɔdɛŋ ni obɔɔ kɛ afɔlei ni oshãa kɛtsɔɔ mɛi Yehowa he nii lɛ ahe oha tɛŋŋ?
16 Mɛi pii ashwelɛ ji akɛ amɛfee nɔ ko ni sa kadimɔ waa ni hiɛ kpaŋ nɔ yɛ amɛwala beaŋ. Wɔyɔse akɛ bei pii lɛ etsɛɛɛ ni hiɛ kpaa nibii ni sa kadimɔ waa ni mɛi efee yɛ je lɛŋ lɛ po anɔ. Shi ŋwanejee ko bɛ he akɛ hiɛ kpaŋ nitsumɔi ni Yehowa webii tsuɔ ŋmɛnɛ kɛtseɔ egbɛi lɛ he lɛ anɔ kɔkɔɔkɔ yɛ teokrase yinɔsane mli. Abaakai nitsumɔi nɛɛ kɛya naanɔ. (Abɛi 10:7; Heb. 6:10) Nyɛhaa wɔhiɛ asɔa hegbɛ kpele ni wɔná akɛ wɔɔtsɔɔ mɛi Yehowa he nii, ni ji nitsumɔ ni hiɛ kpaŋ nɔ kɔkɔɔkɔ lɛ.
Te Obaaha Hetoo Oha Tɛŋŋ?
• Mɛni Yehowa taoɔ yɛ mɛi ni etsɔɔ amɛ nii lɛ adɛŋ?
• Mɛɛ gbɛ nɔ Yehowa tsɔsemɔ haa mɛi feɔ tsakemɔi ni sa yɛ amɛshihilɛ mli?
• Mɛɛ jɔɔmɔi wɔnáa kɛ́ wɔye wɔbua mɛi ni amɛkase Yehowa he nii lɛ?
[Nikasemɔ lɛ he Sanebimɔi]
[Mfoniri ni yɔɔ baafa 23]
Mɛi ni Yehowa tsɔɔ amɛ nii lɛ hiɔ shi akɛ nyɛmimɛi yɛ jeŋ fɛɛ
[Mfoniri ni yɔɔ baafa 24]
Ani ejeee hegbɛ kpele akɛ oji “Nyɔŋmɔ hefatalɔi nitsulɔi” lɛ ateŋ mɔ kome?