Yẹyi Daho He Nuplọnmẹ Jiwheyẹwhe Tọn Tindo
Yẹyi Daho He Nuplọnmẹ Jiwheyẹwhe Tọn Tindo
“Na ehe tọn wutu wẹ yẹn pọ́n onú lẹpo hlan di onú gúgú na yẹyi daho hugan oyọnẹn Klisti Jesu Oklunọ ṣie tọn wutu.”—FLP. 3:8, NW.
1, 2. Nudide tẹwẹ Klistiani delẹ ko basi, podọ etẹwutu?
SỌN ovu whenu gbọ́n wẹ Robert ko nọ tindo kọdetọn dagbe to wehọmẹ. Owhe ṣinatọ̀n poun wẹ e tindo whenue dopo to mẹplọntọ etọn lẹ mẹ wá owhé etọn gbè bo dọna ẹn dọ e tindo nugopipe lọ nado lẹzun nudepope he jlo e to sọgodo. Mẹplọntọ lọ dọna ẹn dọ e ma na paṣa emi eyin e wá lẹzun doto to gbèdopo. Na e nọ wazọ́n ganji to wehọmẹ daho wutu, ewọ pegan nado biọ depope to wehọmẹ alavọ tọn he diyin hugan to otò etọn mẹ lẹ mẹ. Ṣigba Robert de nado jo nuhe mẹsusu nọ pọnhlan taidi dotẹnmẹ hundote he ma yá mimọ do nado jẹ yanwle etọn kọ̀n, enẹ wẹ nado lẹzun gbehosọnalitọ whepoponu tọn.
2 Taidi Robert, Klistiani susu—vlavo jọja kavi mẹho—wẹ dotẹnmẹ delẹ ko hùn dotena nado geze to aihọn ehe mẹ. Mẹdelẹ nọ de ma nado yí dotẹnmẹ hundote enẹlẹ zan to gigọ́ mẹ, na yé nido doafọna yanwle gbigbọmẹ tọn lẹ. (1 Kọl. 7:29-31) Taidi Robert, etẹwẹ nọ whàn Klistiani lẹ nado jo yede na azọ́n yẹwhehodidọ tọn lọ? Gbọnvona owanyi he yé tindo na Jehovah, he yin whẹwhinwhẹ́n tangan lọ, yé nọ yọ́n pinpẹn nuhọakuẹ-yinyin nuplọnmẹ Jiwheyẹwhe tọn taun. To agọe lẹ, be a ko lẹnnupọndo nuhe gbẹzan towe na ko lẹzun ji, eyin a ma ko yọ́n nugbo lọ ya? Eyin mí lẹnnupọndo vude poun to dona mayọnjlẹ he mí nọ duvivi etọn na mí yin pinplọn gbọn Jehovah dali wutu lẹ mẹ ji, enẹ na gọalọna mí nado yí nukun nujọnu tọn do pọ́n wẹndagbe lọ bo nọ lá ẹ po zohunhun po.
Lẹblanulọkẹyi lọ Nado Yin Pinplọn Gbọn Jiwheyẹwhe Dali
3. Naegbọn mí sọgan deji dọ Jehovah do ojlo nado plọnnu gbẹtọvi mapenọ lẹ?
3 Na Jehovah yin dagbenọ wutu, ojlo etọn wẹ nado plọnnu gbẹtọvi mapenọ lẹ. Isaia 54:13 dọ dọdai gando Klistiani yiamisisadode lẹ go dọmọ: “Ovi towe lẹpo nasọ yin pinplọn sọn OKLUNỌ dè, jijọho ovi towe lẹ tọn na sù.” Na taun tọn, hogbe enẹlẹ sọ gando “lẹngbọ devo” Klisti tọn lẹ go ga. (Joh. 10:16) Ehe họnwun to dọdai he to hẹndi mọ to azán mítọn gbè de mẹ. To numimọ de mẹ, Isaia mọ bọ gbẹtọ he wá sọn akọta lẹpo mẹ to wiwọ̀ wá sinsẹ̀n-bibasi nugbo mẹ. E basi zẹẹmẹ dọ yé to didọna ode awetọ dọmọ: “Mì wá na mí ni yì osó OKLUNỌ tọn ji, yì owhé Jiwheyẹwhe Jakobu tọn tọn gbè; ewọ nasọ plọn ali etọn mí, mí nasọ zinzọnlin to omọ́ etọn mẹ.” (Isa. 2:1-3) Lẹblanulọkẹyi nankọ die nado yin pinplọn gbọn Jiwheyẹwhe dali!
4. Etẹwẹ Jehovah nọ biọ to mẹhe nọ mọ anademẹ etọn yí lẹ si?
4 Nawẹ mí sọgan mọaleyi sọn anademẹ Jiwheyẹwhe tọn lẹ mẹ gbọn? E biọ dọ mí ni yin whiwhẹnọ bosọ tindo ojlo nado plọnnu. Psalm-kàntọ Davidi wlan dọmọ: “Yinyọ́n podọ tenọglinọ wẹ OKLUNỌ. . . . Homẹmimiọnnọ wẹ e nasọ plọn ali etọn.” (Ps. 25:8, 9) Podọ Jesu dọmọ: “Yẹn dopẹna we, Otọ́, Oklunọ olọn po aihọn po tọn, na hiẹ ko yí onú helẹ whlá sọn nuyọnẹntọ lẹ, po zinzintọ lẹ po dè, bosọ do yé hia hlan ovivu lẹ.” (Luku 10:21) Be hiẹ ma tindo numọtolanmẹ lọ dọ a ko dọnsẹpọ Jiwheyẹwhe he nọ “na ojọmiọn ayiha whiwhẹnọ lẹ” ya?—1 Pita 5:5.
5. Etẹ na taun tọn wẹ hẹn ẹn yọnbasi na mí nado yọ́n Jiwheyẹwhe?
5 Taidi devizọnwatọ Jehovah tọn lẹ, be mí sọgan sọalọakọ́n dọ nugopipe kavi nuyọnẹn mítọn wẹ zọ́n bọ mí do mọ nugbo ya? Lala. Na nugbo tọn, mí ma na ko pegan nado yọ́n Jiwheyẹwhe gbede, eyin huhlọn mítọn titi go wẹ mí ganjẹ. Jesu dọmọ: “Mẹdepope ma sọgan wá dè e, adavo Otọ́ he do mi hlan dọ̀n ẹn.” (Joh. 6:44) Jehovah nọ yí azọ́n yẹwhehodidọ tọn lọ po gbigbọ wiwe po zan nado dọ̀n omẹ taidi lẹngbọ lẹ, yèdọ “ojlo akọta lẹpo tọn” wá ede dè. (Hag. 2:7) Be homẹ ma hùn we nado yin dopo to mẹhe Jehovah ko dọ̀n wá Ovi etọn dè lẹ mẹ ya?—Hia Jẹlemia 9:23, 24.
Anademẹ Jiwheyẹwhe Tọn Tindo Huhlọn Nado Hẹn Gbẹzan Gbẹtọ Tọn Pọnte
6. Nuyiwadomẹji ayidego tọn tẹwẹ ‘oyọnẹn Jehovah tọn’ pinplọn sọgan tindo do gbẹtọ lẹ ji?
6 Isaia yí hogbe yẹdenanu tọn lẹ zan nado basi zẹẹmẹ diọdo he nọ wá aimẹ gando jijọ gbẹtọvi tọn go to ojlẹ mítọn mẹ. Danuwatọ dai tọn lẹ ko lẹzun jijọho-dintọ. (Hia Isaia 11:6-9.) Mẹhe ko nọ̀ okẹ̀n hẹ ode awetọ dai na vogbingbọn sinmẹ agbasa tọn, otò, akọ̀, kavi aṣa delẹ tọn wutu lẹ ko plọn nado nọ tin to kọndopọ mẹ. To yẹhiadonu-liho, yé ko “yí ohí yetọn do tùn agbogọdọẹ.” (Isa. 2:4) Etẹwẹ hẹn diọdo ayidego tọn ehelẹ yọnbasi? Gbẹtọvi lẹ ko plọn ‘oyọnẹn Jehovah tọn’ bo yí i do yizan mẹ to gbẹzan yetọn mẹ. Mahopọnna dọ devizọnwatọ Jehovah tọn lẹ yin mapenọ, yé wleawuna pipli mẹmẹsunnu lẹdo aihọn pé tọn de. Lehe wẹndagbe lọ nọ dọ̀n mẹlẹpo dogo do po sinsẹ́n dagbe he e nọ detọ́n po, yin kunnudenu de dọ nuplọnmẹ Jiwheyẹwhe tọn họakuẹ taun.—Mat. 11:19.
7, 8. (a) Etẹwẹ yin delẹ to “figángán” he nuplọnmẹ Jiwheyẹwhe tọn nọ gọalọna gbẹtọ lẹ nado họliai lẹ mẹ? (b) Etẹwẹ dohia dọ nuplọnmẹ Jiwheyẹwhe tọn nọ hẹn pipà wá na ẹn?
7 Apọsteli Paulu yí lizọnyizọn devizọnwatọ Jiwheyẹwhe tọn lẹ tọn jlẹdo awhànfunfun gbigbọmẹ tọn go. E wlan dọmọ: “Gbaja awhànfun mítọn tọn lẹ mayin agbasanọ gba, ṣigba huhlọnnọ gbọn Jiwheyẹwhe dali hlan hihọliai figángán lẹ tọn; bo to linlẹn lẹ họliai, po nuhe yiaga lẹ po ehe to ede zedaga do oyọnẹn Jiwheyẹwhe tọn ji.” (2 Kọl. 10:4, 5) Etẹwẹ yin delẹ to “figángán” he si nuplọnmẹ Jiwheyẹwhe tọn nọ tún gbẹtọ lẹ dote sọn lẹ mẹ? E de mí sọn agbàn pinpẹn nuplọnmẹ lalo lẹ, otangblo lẹ, po tamẹnuplọnmẹ gbẹtọvi tọn lẹ po glọ. (Kọl. 2:8) Nuplọnmẹ Jiwheyẹwhe tọn nọ gọalọna gbẹtọvi lẹ nado duto walọ ylankan lẹ ji bo wleawuna jẹhẹnu he nọ hẹn homẹhun Jiwheyẹwhe lẹ. (1 Kọl. 6:9-11) E nọ hẹn gbẹzan whẹndo tọn pọnte dogọ. Podọ e nọ zọ́n bọ mẹhe ma tindo todido depope lẹ nọ tindo lẹndai nujọnu tọn de to gbẹ̀mẹ. Nuhudo nuplọnmẹ enẹ tọn wẹ gbẹtọvi lẹ tindo to egbehe.
8 Dopo to jẹhẹnu he Jehovah nọ gọalọna gbẹtọvi lẹ nado wleawuna lẹ mẹ wẹ nugbodidọ, dile numimọ he bọdego ehe dohia do. (Heb. 13:18) To Inde, nawe de kẹalọyi plọnmẹ Biblu, podọ to nukọn mẹ pegan taidi wẹnlatọ he ma ko yí baptẹm. To gbèdopo he e yì gọalọ to azọ́n Plitẹnhọ Ahọluduta tọn de gbigbá tọn mẹ bo lẹkọ jei whé, e mọ aṣọ́donu sika tọn he họakuẹ sọ dọla Amelika tọn 800 (enẹ wẹ 393575 F CFA) de to kọmẹ to húnglintẹn de. Dile etlẹ yindọ wamọnọ de wẹ e yin, e ze aṣọ́donu lọ yì ponọ-pámẹ. E paṣa ponọ lẹ taun! Enẹgodo, dopo to ponọ lọ lẹ mẹ kanse e dọ, “Naegbọn a do ze aṣọ́donu lọ wá?” E dọmọ: “Nuplọnmẹ Biblu tọn lẹ ko diọ mi, bọ nugbodidọ wá lẹzun apadewhe gbẹzan ṣie tọn.” Ehe yinuwado ponọ lọ ji sọmọ bọ e dọna mẹho agun tọn he hodo mẹmẹyọnnu lọ yì ponọ-pámẹ dọ: “Gbẹtọ he hugan livi 38 wẹ to ayimatẹn ehe mẹ. Eyin mì sọgan gọalọna gbẹtọ ao nado taidi nawe ehe, e na yọ́n taun.” Eyin mí lẹnnupọndo gbẹtọ livi susu he nuplọnmẹ Jiwheyẹwhe tọn ko hẹn gbẹzan yetọn pọnte lẹ ji, be enẹ ma na mí whẹwhinwhẹ́n susu nado pagigona Jehovah ya?
9. Etẹwẹ sọgan gọalọna gbẹtọ lẹ nado basi diọdo ayidego tọn lẹ to gbẹzan yetọn mẹ?
9 Huhlọn he Ohó Jiwheyẹwhe tọn tindo nado diọ gbẹzan gbẹtọ tọn, po alọgọ he Jehovah nọ wleawuna gbọn gbigbọ wiwe etọn gblamẹ po, wẹ nọ hẹn gbẹtọ lẹ nado basi diọdo ayidego tọn lẹ to gbẹzan yetọn mẹ. (Lom. 12:2; Gal. 5:22, 23) Kọlọsinu lẹ 3:10 dọmọ: “[Mì ze gbẹtọ] yọyọ nẹ dogo, ehe yè diọzun yọyọ jẹ oyọnẹn mẹ kẹdẹdi apajlẹ mẹhe dá ẹ tọn.” Owẹ̀n he tin to Ohó Jiwheyẹwhe tọn he yin Biblu mẹ, tindo huhlọn nado do nuhe mẹde yin to homẹ hia, podọ e sọgan diọ nulẹnpọn etọn, yèdọ kakajẹ pọndohlan etọn lẹ ji. (Hia Heblu lẹ 4:12.) Eyin mẹde tindo oyọnẹn he pegan Owe-wiwe tọn bo hẹn gbẹzan etọn sọgbe hẹ nujinọtedo dodo Jehovah tọn lẹ, enẹ sọgan zọ́n bọ e na lẹzun họntọn Jiwheyẹwhe tọn bo tindo todido lọ nado nọgbẹ̀ kakadoi.
Jehovah Wleawu Mítọn Dai Na Sọgodo
10. (a) Naegbọn e do yindọ Jehovah kẹdẹ wẹ to otẹn dagbe mẹ nado wleawu mítọn dai na sọgodo? (b) Diọdo ayidego tọn tẹwẹ na gando aigba pete go to madẹnmẹ?
10 Jehovah kẹdẹ wẹ tin to otẹn dagbe mẹ nado gọalọna mí nado wleawu mítọn dai na sọgodo na ewọ wẹ yọ́n nuhe to nukọn ja lẹ wutu. Ewọ wẹ mọdona nuhe sọgodo gbẹtọvi lẹ tọn bẹhẹn. (Isa. 46:9, 10) Dọdai Biblu tọn dohia dọ “azán daho [Jehovah] tọn tin sẹpọ.” (Zẹf. 1:14) Gando azán enẹ go, hogbe Howhinwhẹn lẹ 11:4 tọn lẹ na mọ hẹndi, he dọmọ: “Adọkun ma doale to azán homẹgble tọn gbè: ṣigba dodo wẹ nọ whlẹn omẹ sọn okú si.” Whenue ojlẹ na sọ̀ na Jehovah nado hẹn whẹdida ṣẹ do aihọn Satani tọn ji, haṣinṣan mítọn hẹ Jiwheyẹwhe kẹdẹ wẹ na whlẹn mí gán. Akuẹ na lẹzun nuvọ́. Na nugbo tọn, Ezekiẹli 7:19 dọmọ: “Yé na ze fataka yetọn dlan to alihogbó lẹ mẹ, podọ sika yetọn nasọ yin onú mawé de.” Ehe yinyọnẹn jẹnukọn na gọalọna mí nado yinuwa po nuyọnẹn po todin.
11. Etẹwẹ yin dopo to aliho he mẹ nuplọnmẹ Jiwheyẹwhe tọn nọ wleawu mítọn dai na sọgodo te lẹ mẹ?
11 Dopo to aliho tangan he mẹ nuplọnmẹ Jiwheyẹwhe tọn nọ wleawu mítọn dai na azán Jehovah tọn te lẹ mẹ wẹ yindọ e nọ gọalọna mí nado ze yanwle he sọgbe lẹ donukọnna míde. Apọsteli Paulu wlanwe hlan Timoti dọmọ: “Naṣẹ mẹhe yin adọkunnọ to aihọn he mẹ lẹ, dọ yé yigo blo, dọ yé sọ dotudo adọkun he ma nọte go blo, adavo do Jiwheyẹwhe ogbẹ̀nọ go.” Eyin mí ma tlẹ yin adọkunnọ, mí sọgan mọaleyi sọn ayinamẹ gbọdo ehe mẹ. Etẹwẹ ehe zẹẹmẹdo? Kakati nado bẹ agbasanu lẹ pli, mí dona dovivẹnu nado “nọ wà dagbe” bo “sù to azọ́n dagbe lẹ mẹ.” Eyin mí nọ dike gbigbọnu lẹ ni tin to otẹn tintan mẹ to gbẹzan mítọn mẹ, mí na ‘bẹpli do agbànhọ mẹ na míde dòdó dagbe de pọ́n ojlẹ he ja.’ (1 Tim. 6:17-19) Gbẹzan mẹde-yido-sanvọ́ tọn mọnkọtọn zinzan nọ dohia dọ mí tindo lẹnpọn dagbe. Abajọ Jesu do dọ dọ, ‘etẹwẹ gbẹtọ de na do yin alenọ, eyin e duale aihọn pete tọn, bo hẹn alindọn etọn bu?’ (Mat. 16:26, 27) Na azán Jehovah tọn to sisẹpọ wutu, dopodopo mítọn na wà dagbe nado kanse ede dọ: ‘Fie wẹ n’to adọkunnu ṣie lẹ bẹpli do? Be Jiwheyẹwhe sẹ̀n wẹ n’te ya, kavi Adọkunnu lẹ?—Mat. 6:19, 20, 24.
12. Naegbọn mí ma dona gbọjọ eyin mẹdelẹ yí nukun pẹvi do pọ́n lizọnyizọn mítọn?
12 Dile Ohó Jiwheyẹwhe tọn dọ do, dehe yin titengbe hugan to “azọ́n dagbe” he yin didena Klistiani lẹ mẹ wẹ azọ́n yẹwheho Ahọluduta lọ tọn didọ po mẹhẹnzun devi tọn po, yèdọ azọ́n gbẹwhlẹngán tọn lọ. (Mat. 24:14; 28:19, 20) Dile e yin do to owhe kanweko tintan whenu, mẹdelẹ sọgan yí nukun pẹvi do pọ́n lizọnyizọn mítọn. (Hia 1 Kọlintinu lẹ 1:18-21.) Ṣigba enẹ ma de yẹyi owẹ̀n he lá mí te tọn pò gba, podọ enẹ ma nọ dekanpona zohunhun mítọn nado lá owẹ̀n lọ na mẹdepope he jlo na tindo yise to e mẹ todin whẹpo whenu nido fẹ́. (Lom. 10:13, 14) Eyin mí nọ gọalọna mẹdevo lẹ nado mọaleyi sọn nuplọnmẹ Jiwheyẹwhe tọn mẹ, mí na mọ dona susu yí.
Dona He Avọ́sinsan Mítọn Nọ Hẹnwa Lẹ
13. Avọ́sinsan tẹlẹ wẹ apọsteli Paulu basi na wẹndagbe lọ tọn wutu?
13 Whẹpo apọsteli Paulu do lẹzun Klistiani, e mọ nuplọnmẹ he na hẹn ẹn tindo kọdetọn dagbe to Juvi hatọ etọn lẹ ṣẹnṣẹn yí. To whenue e tindo nudi owhe 13, e sẹtẹn sọn tòdaho he mẹ e yin jiji te, yèdọ Talsu, yì Jelusalẹm nado plọnnu to Gamalieli Osẹ́n-plọnmẹtọ he gbẹtọ lẹ nọ na sisi taun dè. (Owalọ 22:3) To nukọn mẹ, Paulu jẹ kọdetọn dagbe tindo ji to hagbẹ etọn lẹ ṣẹnṣẹn, podọ eyin e ko zindonukọn domọ wẹ, e na ko diyin to sinsẹ̀n Ju lẹ tọn mẹ. (Gal. 1:13, 14) Whenue e kẹalọyi wẹndagbe lọ bo jẹ yẹwhehodọ ji, e gbẹkọ onú enẹ lẹpo go. Be dide he Paulu basi vẹna ẹn wẹ ya? Paali. Na nugbo tọn, e dọmọ: “Na ehe tọn wutu wẹ yẹn pọ́n onú lẹpo hlan di onú gúgú na yẹyi daho hugan oyọnẹn Klisti Jesu Oklunọ ṣie tọn wutu. Na ewọ tọn wutu wẹ yẹn ko gbẹkọ onú lẹpo go podọ yẹn pọ́n yé hlan taidi ogbó lẹ.”—Flp. 3:8, NW.
14, 15. Dona tẹlẹ wẹ mí nọ duvivi etọn taidi “azọ́nyiwahẹmẹtọ dopọ hẹ Jiwheyẹwhe”?
14 To egbehe, Klistiani lẹ nọ yí onú delẹ do sanvọ́ na wẹndagbe lọ tọn wutu, dile Paulu wà do. (Malku 10:29, 30) Be nude nọ gbọ mí go na mí wàmọ wutu wẹ ya? Robert, he yin nùdego to bẹjẹeji tindo numọtolanmẹ he nkọ mẹsusu nọ tindo to whenue e dọmọ: “Nudepope ma vẹna mi. Lizọnyizọn whenu-gigọ́ tọn ko hẹn ayajẹ po pekọ po wá na mi bosọ hẹn ẹn yọnbasi na mi nado dọ́ Jehovah pọ́n, bosọ mọdọ ewọ yọ́n. Whedepopenu he n’yí agbasanu lẹ do sanvọ́ nado sọgan doafọna yanwle gbigbọmẹ tọn lẹ, Jehovah nọ dona mi zẹ̀ nuhe n’yí do sanvọ́ lẹ go. E nọ taidi dọ n’ma yí nudepope do sanvọ́ wẹ nkọ. N’tlẹ sọ mọ dona susu yí hugan nuhe n’lẹn!”—Ps. 34:8; Howh. 10:22.
15 Eyin hiẹ ko to mahẹ tindo to azọ́n yẹwhehodidọ po mẹpinplọn tọn lọ po mẹ na ojlẹ de, matin ayihaawe hiẹ lọsu na ko dọ́ Jehovah pọ́n bosọ mọdọ ewọ yọ́n. Be ojlẹ de ko tin bọ hiẹ mọdọ gbigbọ wiwe etọn gọalọna we dile a to wẹndagbe lọ lá ya? Be hiẹ ko doayi ayajẹ mẹdevo lẹ tọn go dile Jehovah hùn ahun yetọn nado na ayidonugo owẹ̀n lọ ya? (Owalọ 16:14) Be Jehovah ko gọalọna we nado duto aliglọnnamẹnu lẹ ji, vlavo na e hùn aliho dotena we nado gbloada na lizọnyizọn towe wutu ya? Be e ko nọgodona we to nuhahun lẹ whenu, bọ enẹ hẹn we penugo nado zindonukọn to sinsẹ̀nzọn etọn mẹ titengbe whenue a mọdọ huhlọn towe to didepo ya? (Flp. 4:13, NW) Eyin mí mọ alọgọ Jehovah tọn dile mí to lizọnyizọn mítọn hẹndi, mí nọ ganjẹ e go hugan gbede pọ́n bosọ nọ dọnsẹpọ ẹ dogọ. (Isa. 41:10) Be e ma yin dona de wẹ nado yin “azọ́nyiwahẹmẹtọ dopọ hẹ Jiwheyẹwhe” to azọ́n daho yẹwheho wẹndagbe lọ tọn didọ tọn mẹ ya?—1 Kọl. 3:9.
16. Nukun tẹwẹ a do nọ pọ́n avọ́sinsan po vivẹnu he a nọ do nado plọn anademẹ Jiwheyẹwhe tọn mẹdevo lẹ po?
16 Mẹsusu wẹ nọ jlo nado wà nude to gbẹwhenu yetọn he ma na yin winwọn gbede. To aihọn egbehe tọn mẹ, mí ko mọdọ nuwadotana ayidego tọn susu wẹ nọ saba yawu yin winwọn. Ṣigba matin ayihaawe, azọ́n he Jehovah to wiwà to egbehe he tindo kanṣiṣa hẹ klandowiwe oyín etọn tọn ma na busẹ gbede. Yé na nọ yin finflin kakadoi. (Howh. 10:7; Heb. 6:10) Mì gbọ mí ni wlebòna lẹblanulọkẹyi mítọn he yin nado tindo mahẹ to azọ́n mẹpinplọn tọn he ma na yin winwọn gbede lọ mẹ, yèdọ nado plọn ojlo Jehovah tọn mẹdevo lẹ.
Nawẹ Hiẹ Na Na Gblọndo Gbọn?
• Etẹwẹ Jehovah nọ biọ to mẹhe nọ mọ anademẹ etọn yí lẹ si?
• Nawẹ nuplọnmẹ Jiwheyẹwhe tọn nọ hẹn gbẹzan gbẹtọ lẹ tọn pọnte dogọ gbọn?
• Aliho tẹlẹ mẹ wẹ mí yin didona nado gọalọna mẹdevo lẹ nado mọaleyi sọn nuplọnmẹ Jiwheyẹwhe tọn mẹ te?
[Kanbiọ Oplọn tọn lẹ]
[Yẹdide to weda 23]
Mẹhe Jehovah nọ plọn lẹ wẹ wleawuna pipli mẹmẹsunnu lẹdo aihọn pé tọn de
[Yẹdide to weda 24]
Be e ma yin dona de wẹ nado yin dopo to “azọ́nyiwahẹmẹtọ dopọ hẹ Jiwheyẹwhe” lẹ mẹ ya?