Ang Labaw Gid nga Balor sang Edukasyon Gikan sa Dios
Ang Labaw Gid nga Balor sang Edukasyon Gikan sa Dios
“Ginakabig ko gid nga kadulaan ang tanan nga butang tungod sa labaw gid nga balor sang ihibalo tuhoy kay Cristo Jesus.”—FIL. 3:8.
1, 2. Ano nga desisyon ang ginhimo sang pila ka Cristiano, kag ngaa?
HALIN sang bata pa si Robert, sia na ang nagapanguna sa ila klase. Sang otso anyos sia, ginkadtuan sia sang iya maestra sa ila balay kag ginsilingan nga maayo gid ang iya madangatan. Nagsiling pa ang iya maestra nga nagalaum sia nga mangin doktor si Robert sa ulihi. Bangod sang iya mataas nga grado sa hayskul, kalipikado gid sia nga makaeskwela sa bisan diin nga pinakamaayo nga unibersidad sa ila pungsod. Sa baylo nga hingalitan ining kahigayunan nga ginatamod sang madamo nga tumalagsahon, ginpili ni Robert nga tulumuron ang pag-alagad subong regular payunir.
2 Kaangay ni Robert, madamo nga mga Cristiano, bata man ukon tigulang, ang may kahigayunan kuntani nga mag-uswag sa sining sistema sang mga butang. Apang may mga Cristiano nga wala nagasapak sa sini nga mga kahigayunan agod indi sila matublag sa paglab-ot sang ila espirituwal nga mga tulumuron. (1 Cor. 7:29-31) Ano ang nagpahulag sa mga Cristiano kaangay ni Robert nga gamiton sing bug-os ang ila tion para sa pagbantala nga hilikuton? Ang panguna nga rason amo ang ila gugma kay Jehova. Apang luwas sa sini, ginaapresyar nila ang labaw gid nga balor sang edukasyon gikan sa Dios. Nahunahuna mo bala sining karon lang kon ano ayhan ang kabuhi mo kon wala ka nakatuon sang kamatuoran? Kon pamalandungan naton ang pila ka tumalagsahon nga mga pagpakamaayo nga natigayon naton subong resulta sang pagtudlo ni Jehova, mabuligan kita nga mahuptan ang aton apresasyon sa maayong balita kag mangin makugi sa pagpaambit sini sa iban.
Pribilehiyo Gid Naton nga Matudluan sang Dios
3. Ngaa makapat-od kita nga handa si Jehova nga tudluan ang di-himpit nga katawhan?
3 Bangod sa iya kaayo, handa si Jehova nga tudluan ang di-himpit nga mga tawo. Ang tagna sa Isaias 54:13 nagasiling tuhoy sa hinaplas nga mga Cristiano: “Ang tanan mo nga anak tudloan sang GINOO, kag mangindaku ang paghidait sang imo mga anak.” Ini nga mga pulong naaplikar man sa “iban nga mga karnero” ni Cristo. (Juan 10:16) Ini nga tagna maathag nga nagakatuman sa aton adlaw. Nakita ni Isaias sa palanan-awon nga ang mga tawo gikan sa tanan nga pungsod nagadugok sa matuod nga pagsimba. Ginlaragway niya sila nga nagasiling sa isa kag isa: “Magataklad kita sa bukid sang GINOO, sa balay sang Dios ni Jacob; kag tudloan niya kita sang iya mga dalanon kag magalakat kita sa iya mga banas.” (Isa. 2:1-3) Isa gid ka daku nga pribilehiyo nga matudluan sang Dios!
4. Ano ang kinahanglan sang isa agod matudluan sia ni Jehova?
4 Paano kita mangin kalipikado sa pagbaton sang edukasyon gikan sa Dios? Importante gid nga ang isa mangin mapainubuson kag handa magpatudlo. Ang salmista nga si David nagsulat: “Maayo kag matadlong ang GINOO; . . . Tudloan niya sang iya dalanon ang mga mapainubuson.” (Sal. 25:8, 9) Nagsiling man si Jesus: “Nagadayaw ako sing dayag sa imo, Amay, Ginuo sang langit kag duta, bangod gintago mo sing maayo ini nga mga butang gikan sa mga maalam kag mga intelihente, kag ginpahayag ini sa gamay nga mga bata.” (Luc. 10:21) Indi ka bala mapahulag nga mangin suod sa isa ka Dios nga ‘nagahatag sang wala tupong nga kaayo sa mga mapainubuson’?—1 Ped. 5:5.
5. Paano nangin posible sa aton nga matigayon ang ihibalo tuhoy sa Dios?
5 Subong mga alagad ni Jehova, masiling bala naton nga natun-an naton ang kamatuoran bangod sa aton kaugalingon nga ikasarang kag kaalam? Indi. Ang matuod, kon sa aton lang panikasog, indi gid naton matigayon ang ihibalo tuhoy sa Dios. Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Paagi sa pagbantala nga hilikuton kag sa balaan nga espiritu, ginabuyok ni Jehova ang tulad-karnero nga mga tawo, “ang bilidhon nga mga butang sang tanan nga pungsud.” (Hag. 2:7) Wala ka bala nalipay nga isa ka sa ginbuyok ni Jehova sa iya Anak?—Basaha ang Jeremias 9:23, 24.
Ang Edukasyon nga Nagapabag-o sang Kabuhi
6. Ano ang talalupangdon nga epekto sa mga tawo sang ‘nakilala nila’ si Jehova?
6 Sa iya tagna, naggamit si Isaias sing matahom nga paglaragway sa nagakatabo nga pagbag-o sa personalidad sang mga tawo sa aton tion. Ang masingki anay nga mga tawo nangin mahidaiton na. (Basaha ang Isaias 11:6-9.) Ang mga magkaaway anay bangod lainlain ang ila rasa, nasyonalidad, tribo, ukon kultura nakatuon na nga magpuyo nga may paghiusa. Sa malaragwayon nga hambal, ‘ang ila mga espada ginsalsal nila nga mga punta sang arado.’ (Isa. 2:4) Ano ang rason sining daku nga mga pagbag-o? Bangod ang katawhan ‘nakakilala sa GINOO’ kag gin-aplikar nila ini nga ihibalo sa ila kabuhi. Bisan ang mga alagad sang Dios di-himpit, nahiusa sila sa matuod nga bug-os kalibutan nga paghiliutod. Ang makagalanyat nga mensahe sang maayong balita kag ang maayo nga mga bunga sini, nagapamatuod nga labaw gid ang balor sang edukasyon gikan sa Dios.—Mat. 11:19.
7, 8. (a) Ano ang pila sa “mga butang nga natukod sing malig-on” nga nalandas sang mga tawo sa bulig sang edukasyon gikan sa Dios? (b) Ano ang nagapakita nga ang edukasyon gikan sa Dios nagahatag sing kadayawan kay Jehova?
7 Ginpaanggid ni apostol Pablo ang pagbantala nga hilikuton sang mga alagad sang Dios sa espirituwal nga pagpakig-away. Sia nagsulat: “Ang mga hinganiban sang amon pagpakig-away indi undanon, kundi gamhanan paagi sa Dios agod pukanon ang mga butang nga natukod sing malig-on. Kay ginapukan namon ang mga pangatarungan kag ang tagsa ka mataas nga butang nga supak sa ihibalo sang Dios.” (2 Cor. 10:4, 5) Ano ang pila sang “mga butang nga natukod sing malig-on” nga sa diin ginhilway sang edukasyon gikan sa Dios ang mga tawo? Ang pila sa sini amo ang butig nga mga panudlo, mga disparatis, kag mga pilosopiya nga nagapabudlay sa mga tawo. (Col. 2:8) Ang edukasyon gikan sa Dios nagabulig sa mga tawo nga malandas ang malain nga mga buhat kag mapalambo ang mga kinaiya nga nagapahamuot sa Dios. (1 Cor. 6:9-11) Nagapauswag ini sa pagkabuhi sang pamilya. Kag nagahatag ini sing paglaum sa mga tawo nga nagabatyag nga wala sing katuyuan ang ila kabuhi. Amo ini nga sahi sang edukasyon ang kinahanglanon gid sa karon.
8 Ang isa sa mga kinaiya nga ginabuligan ni Jehova ang mga tawo nga mapalambo amo ang pagkabunayag, subong sang makita naton sa masunod nga eksperiensia. (Heb. 13:18) Ang isa ka babayi sa India nagbaton sang pagtuon sa Biblia kag sang ulihi nakalipikar subong di-bawtismado nga manugbantala. Isa ka adlaw, sang nagapauli sia halin sa pagboluntaryo sa pagtukod sang Kingdom Hall, nakit-an niya sa duta malapit sa estasyon sang bus ang isa ka bulawan nga alahas nga nagabalor sing walo ka gatos ka dolyar (U.S.). Bisan pa pigado sia, gindala niya ini sa estasyon sang mga pulis agod mauli sa tag-iya. Indi gid makapati ang pulis! Sang ulihi, ginpamangkot sia sang isa pa ka pulis, “Ngaa wala mo na lang ina gintago?” Nagsiling ang babayi, “Ang akon natun-an sa Biblia amo ang nagpabag-o sa akon, bunayag na ako subong.” Bangod sini, nagdayaw gid ang pulis kag ginsilingan ang Cristianong gulang nga gin-upod sining babayi sa estasyon: “Kapin sa 38 milyones ang pumuluyo sa sining estado, bisan napulo lang ka tawo ang mabuligan n’yo nga mangin pareho sining babayi, daku gid ang mabulig sini.” Ano pa gid kon binagbinagon naton nga minilyon ka tawo ang nagbag-o bangod sa edukasyon gikan sa Dios, indi bala nga madamo gid kita sing rason nga dayawon si Jehova?
9. Paano nangin posible sa mga tawo ang paghimo sing dalagku nga mga pagbag-o sa ila kabuhi?
9 Ang gahom sang Pulong sang Dios, upod ang bulig nga ginahatag ni Jehova paagi sa iya balaan nga espiritu, amo ang nagabulig sa mga tawo nga maghimo sing dalagku nga mga pagbag-o sa ila kabuhi. (Roma 12:2; Gal. 5:22, 23) Ang Colosas 3:10 nagasiling: “Magpanapot kamo sang bag-o nga personalidad, nga paagi sa sibu nga ihibalo ginabag-o suno sa larawan sang Isa nga nagtuga sini.” Ang mensahe nga masapwan sa Pulong sang Dios may gahom sa pagpadayag sang matuod nga pagkatawo sang isa, kag makapabag-o man ini sang iya pagtamod kag balatyagon tuhoy sa mga butang. (Basaha ang Hebreo 4:12.) Paagi sa pagkuha sing sibu nga ihibalo sa Kasulatan kag sa pagpahisuno sang iya kabuhi sa matarong nga talaksan ni Jehova, ang isa mahimo mangin abyan sang Dios kag makatigayon sing paglaum nga magkabuhi sing dayon.
Ginahanda Kita sa Palaabuton
10. (a) Ngaa si Jehova lamang ang makabulig sa aton sa paghanda para sa palaabuton? (b) Anong daku nga mga pagbag-o ang mahanabo sa bug-os nga duta sa indi madugay?
10 Si Jehova lamang ang makabulig sa aton nga maghanda para sa palaabuton bangod nahibaluan niya kon ano ang mahanabo sa dili madugay. Nahibaluan niya kon ano ang palaabuton sang mga tawo sa kabilugan. (Isa. 46:9, 10) Ginapakita sang tagna sa Biblia nga “malapit na ang dakung adlaw sang GINOO.” (Sof. 1:14) Tuhoy sa sina nga adlaw, mangin matuod ang ginasiling sang Hulubaton 11:4: “Ang manggad walay kapuslanan sa adlaw sang kasingkal, apang ang pagkamatarung nagaluwas sa kamatayon.” Kon mag-abot na ang tion sang paghukom ni Jehova sa kalibutan ni Satanas, ang aton tindog sa atubangan sang Dios amo ang labing importante. Wala na sing pulos ang kuarta. Sa pagkamatuod, ang Ezequiel 7:19 nagasiling: “Ihaboy nila sa mga dalan ang ila pilak, kag ang ila bulawan manginsubong sang dimatinlo nga butang.” Ang paghibalo sini sing abanse makabulig sa aton sa paghimo sing maalamon nga mga desisyon karon.
11. Ano ang isa ka paagi nga ginabuligan kita sang edukasyon gikan sa Dios nga maghanda para sa palaabuton?
11 Ang isa ka espesipiko nga paagi nga ginahanda kita sang edukasyon gikan sa Dios para sa pag-abot sang adlaw ni Jehova amo ang pagbulig sa aton nga magpahamtang sing nagakaigo nga mga prioridad. Si apostol Pablo nagsulat kay Timoteo: “Sugua ang mga manggaranon sa karon nga sistema sang mga butang nga indi mangin matinaastaason, kag ipahamtang ang ila paglaum, indi sa wala kapat-uran nga manggad, kundi sa Dios.” Bisan indi kita manggaranon, makabenepisyo kita sa sini nga laygay. Ano ang nadalahig sa sini? Sa baylo nga magtipon sang madamo nga pagkabutang, dapat kita magpanikasog “nga maghimo sang maayo” kag “mangin manggaranon sa maayong mga buhat.” Kon ginauna naton sa aton kabuhi ang pag-alagad kay Jehova, ‘nagatipon kita para sa aton kaugalingon sang maayo nga sadsaran para sa palaabuton subong aton bahandi.’ (1 Tim. 6:17-19) Ining masinakripisyuhon nga dalanon isa ka maalamon nga desisyon, kay subong sang ginsiling ni Jesus, “ano ang mabenepisyo sang isa ka tawo kon maangkon niya ang bug-os nga kalibutan apang madula ang iya kalag?” (Mat. 16:26, 27) Bangod malapit na ang adlaw ni Jehova, ang kada isa sa aton dapat mamangkot: ‘Sa diin ako nagatipon sang bahandi? Nagapaulipon bala ako sa Dios ukon sa Manggad?’—Mat. 6:19, 20, 24.
12. Ngaa indi kita dapat maluyahan sing buot kon tamayon sang iban ang aton ministeryo?
12 Ang pinakaimportante nga ‘maayong buhat’ nga ginapahimo sang Pulong sang Dios sa mga Cristiano amo ang nagaluwas-kabuhi nga pagbantala sang Ginharian kag paghimo-disipulo nga hilikuton. (Mat. 24:14; 28:19, 20) Subong sang natabo sang unang siglo, mahimo man tamayon sang iban ang aton ministeryo. (Basaha ang 1 Corinto 1:18-21.) Apang wala ina nagapabag-o sa balor sang aton mensahe, kag indi dapat magpaugdaw sang aton pagbatyag sing pagkahilingagawon nga isugid ini sa tanan para magtuo sila samtang may tion pa. (Roma 10:13, 14) Samtang ginabuligan naton ang iban nga makabenepisyo sa edukasyon gikan sa Dios, makatigayon kita sing madamo nga pagpakamaayo.
Ginapakamaayo ang mga Nagasakripisyo
13. Ano nga mga sakripisyo para sa maayong balita ang ginhimo ni apostol Pablo?
13 Antes sia nangin Cristiano, nakabaton si apostol Pablo sing paghanas para mangin madinalag-on sa Judiyong sistema sang mga butang. Mahimo nga sang 13 anyos pa lang sia, nagsaylo sia sa Jerusalem halin sa ila lugar nga Tarsus agod magpatudlo sa ginatahod gid nga manunudlo sang Kasuguan nga si Gamaliel. (Binu. 22:3) Sang ulihi, nalabawan ni Pablo ang iya mga kaupod, kag kon nagpadayon sia sa Judaismo, mahimo nga nangin prominente gid sia sa sini. (Gal. 1:13, 14) Apang sang ginbaton niya ang maayong balita kag nagsugod sa pagbantala, ginbiyaan niya ina tanan. Ginhinulsulan bala ni Pablo ang iya desisyon? Wala. Ang matuod, nagsulat sia: “Ginakabig ko gid nga kadulaan ang tanan nga butang tungod sa labaw gid nga balor sang ihibalo tuhoy kay Cristo Jesus nga akon Ginuo. Tungod sa iya ginbaton ko ang kadulaan sang tanan nga butang kag ginakabig ko ini nga mga basura.”—Fil. 3:8.
14, 15. Ano nga mga pagpakamaayo ang aton maeksperiensiahan subong “masigkamanugpangabudlay sang Dios”?
14 Kaangay ni Pablo, ang mga Cristiano karon nagasakripisyo man para sa maayong balita. (Mar. 10:29, 30) May nawasi bala kita bangod sa sini? Si Robert nga ginsambit kaina, nagpabutyag sang pareho nga balatyagon nga nabatyagan man sang madamo: “Wala gid ako sing may ginahinulsulan. Ang bug-os tion nga ministeryo naghatag sa akon sing kalipay kag kaayawan, kag bangod sa sini ‘natilawan ko kag nakita’ nga maayo si Jehova. Sa kada tion nga may ginasakripisyo ako nga materyal para malab-ot ang espirituwal nga mga tulumuron, pirme ako ginapakamaayo ni Jehova sing kapin pa sangsa akon ginsakripisyo. Daw pareho lang nga wala ako sing may ginsakripisyo, kundi nakabenepisyo pa gani ako!”—Sal. 34:8; Hulu. 10:22.
15 Kon madugay ka na nga nagapakigbahin sa pagbantala kag pagpanudlo nga hilikuton, walay duhaduha nga natilawan mo na kag nakita nga si Jehova maayo. May mga tion bala nga samtang ginapaambit mo ang maayong balita nabatyagan mo ang bulig sang iya espiritu? Nakita mo bala ang kalipay sa mata sang iban sang ginbuksan ni Jehova ang ila tagipusuon agod batunon ang mensahe? (Binu. 16:14) Nabuligan ka bala ni Jehova sa paglandas sang mga balagbag agod mapasangkad mo ang imo ministeryo? Nasakdag ka bala niya sa tion sang kabudlayan, amo nga nakapadayon ka sa pag-alagad sa iya bisan pa nagbatyag ka nga nadulaan ka na sing kusog? (Fil. 4:13) Kon maeksperiensiahan naton ang bulig ni Jehova samtang ginatuman naton ang aton ministeryo, mangin matuod pa gid sia sa aton kag magasuod pa gid kita sa iya. (Isa. 41:10) Indi bala nga isa gid ka pagpakamaayo nga mangin “masigkamanugpangabudlay sang Dios” sa daku nga hilikuton sang pagpanudlo?—1 Cor. 3:9.
16. Ano ang ginabatyag mo tuhoy sa imo mga panikasog kag mga sakripisyo may kaangtanan sa edukasyon gikan sa Dios?
16 Madamo nga tawo ang nagahandum nga makahimo sing butang nga may daku kag nagapabilin nga kapuslanan sa bug-os nila nga kabuhi. Nakita naton nga bisan gani ang talalupangdon nga mga hinimuan sa kalibutan subong, masami nga madali lang malipatan. Apang, ang mga ginahimo subong ni Jehova may kaangtanan sa pagpakabalaan sang iya ngalan wala sing duhaduha nga mangin permanente gid nga bahin sang kasaysayan sang katawhan ni Jehova. Ini nga mga hinimuan dumdumon gid sing walay katubtuban. (Hulu. 10:7; Heb. 6:10) Kabay nga pakabahandion naton ang aton pribilehiyo nga makigbahin sa sining indi gid malipatan nga hilikuton—ang pagpaambit sa iban sang edukasyon gikan sa Dios.
Paano Mo Sabton?
• Ano ang kinahanglan sang isa agod matudluan sia ni Jehova?
• Paano ang edukasyon gikan sa Dios nagapabag-o sa kabuhi sang mga tawo?
• Paano kita ginapakamaayo bangod sa pagbulig sa iban nga makabenepisyo sa edukasyon gikan sa Dios?
[Mga Pamangkot sa Pagtinuon]
[Retrato sa pahina 23]
Ang mga gintudluan ni Jehova nahiusa sa matuod nga bug-os kalibutan nga paghiliutod
[Retrato sa pahina 24]
Indi bala nga isa gid ka pagpakamaayo nga mangin “masigkamanugpangabudlay sang Dios”?
