Epanọ Ewuhrẹ Ọghẹnẹ O Ghare te
Epanọ Ewuhrẹ Ọghẹnẹ O Ghare te
“Me ghine rri eware kpobi fihọ ivrẹvru fiki aghare ologbo ọrọ eriariẹ kpahe Kristi Jesu.”—FIL. 3:8.
1, 2. Iroro vẹ Ileleikristi jọ a jẹ no, kọ fikieme?
ROBERT ọ riobe gaga no emaha riẹ ze. Okenọ ọ jọ ikpe eree ọvo, iticha riẹ jọ o te weze bru ei kpobọ uwou jẹ ta kẹe inọ ọ te nyaharo gaga evaọ akpọ na. Ọ ta inọ ẹdẹjọ Robert ọ te jọ edọkita. Ọ riobe te epanọ ọ rẹ sai ro kpohọ yunivasiti nọ e mai woma evaọ orẹwho riẹ. Rekọ Robert ọ kpairoro vrẹ uvẹ nana nọ ahwo buobu a rri inọ o rẹ kaki te ohwo obọ họ na re ọ sai ru iruo ọkobaro oke-kpobi.
2 Wọhọ Robert, Ileleikristi buobu, te emaha te ekpako, a wo uvẹ nọ a rẹ rọ nyaharo evaọ uyerakpọ nana. Ahwo jọ a salọ inọ a rẹ rehọ oke rai kpobi le efe he re a sai wo uvẹ kẹ eware abọ-ẹzi. (1 Kọr. 7:29-31) Eme o be lẹliẹ Ileleikristi nọ e wọhọ Robert rehọ oke rai kpobi be rọ ta usiuwoma? U te no uyoyou rai kẹ Jihova no, onọ o rrọ ẹjiroro ọsosuọ, a rri ewuhrẹ Ọghẹnẹ ghare gaga. Kọ who roro no kẹle na oghẹrẹ nọ uzuazọ ra o hae jọ ababọ eriariẹ Ọghẹnẹ? Nọ ma te roro kpahe eghale nọ ma wo no fikinọ Jihova o bi wuhrẹ omai u re fi obọ họ kẹ omai rri emamọ usi na ghaghae re ma jẹ rehọ ọwhọ whowho ei kẹ amọfa.
O Rrọ Uvẹ-Ọghọ Re Ọghẹnẹ O Wuhrẹ Omai
3. Ẹvẹ u ro mu omai ẹro inọ u no Jihova eva ze re o wuhrẹ ahwo-akpọ nọ e gba ha?
3 U no Jihova eva ze re o wuhrẹ ahwo-akpọ nọ e gba ha. Aizaya 54:13 ọ ruẹaro kpahe Ileleikristi nọ a rọ ẹzi wholo na nọ: “ỌNOWO na o veti wuhrẹ emọ ra kpobi, [udhedhẹ] nọ emọ ra i reti wo ọ rẹte jọ ruaro.” Eme yena i kie kpahe “igodẹ efa” erọ Kristi na re. (Jọn 10:16) Ma sae ruẹ onana vevẹ evaọ eruẹaruẹ jọ nọ i bi rugba nẹnẹ. Evaọ eruẹaruẹ, Aizaya ọ ruẹ ahwo nọ i bi zurie no erẹwho kpobi ziọ egagọ uzẹme. Ọ ta nọ ahwo nana a be ta kẹ ohwohwo nọ: “Wha nyaze ma kpohọ ugbehru ỌNOWO na, kpobọ uwou Ọghẹnẹ Jekọp, re o wuhrẹ omai edhere riẹ, re ma nya evaọ idhere riẹ.” (Aiz. 2:1-3) Ọghọ riẹ o rro kẹhẹ re Ọghẹnẹ o wuhrẹ omai!
4. Eme Jihova ọ gwọlọ mi omai re ma sae jọ enọ o re wuhrẹ?
4 Uruemu vẹ o gwọlọ mi omai re ma sai wo erere no ewuhrẹ Ọghẹnẹ ze? O gwọlọ omaurokpotọ. Devidi ọso-ilezi na o kere nọ: ‘ỌNOWO họ ọrọ aruoriwo gbe ẹrẹreokie. Enọ e rọ oma kpotọ eye o re ti wuhrẹ edhere riẹ.’ (Ol. 25:8, 9) Yọ Jesu ọ ta nọ: “Ọsẹ Ọnowo Odhiwu gbe akpọ, me yere owhẹ epanọ who ku eware enana dhere iwoareghẹ gbe erieriariẹ, whọ tẹ rehọ ae via kẹ emọ-efofa.” (Luk 10:21) Kọ eva e gbẹ were owhẹ inọ Ọghẹnẹ ọ rẹ “rọ aruoriwo kẹ enọ e roma-kpotọ”?—1 Pita 5:5.
5. Eme ru rie lọhọ nọ ma sai ro wo eriariẹ Ọghẹnẹ?
5 Kọ mai idibo Jihova ma re roro nọ fiki areghẹ obọ mai ma rọ riẹ uzẹme na? Ijo. Evaọ uzẹme, orọnọ fiki areghẹ obọ mai, ma hẹ sai wo eriariẹ Ọghẹnẹ hẹ. Jesu ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.” (Jọn 6:44) Jihova ọ be rọ iruo usiuwoma ota na gbe ẹzi ọfuafo riẹ se ahwo omaurokpotọ, koyehọ “efe erẹwho na kpobi,” ziọ ukoko riẹ. (Hag. 2:7) Kọ eva e gbẹ were owhẹ nọ Jihova o si owhẹ se ọmọ riẹ?—Se Jerimaya 9:23, 24.
Ewuhrẹ Ọghẹnẹ U re ru Uzuazọ Ohwo Woma
6. Oghẹrẹ vẹ eriariẹ Jihova u bi ro kpomahọ uzuazọ ahwo?
6 Aizaya ọ rehọ obọdẹ edhere jọ dhesẹ oghẹrẹ nọ uruemu ahwo u bi ro nwene evaọ oke mai nana. Ahwo nọ e jẹ hai ru ozighi a zihe ruọ ahwo dhedhẹ no. (Se Aizaya 11:6-9.) Ahwo nọ a je lele amọfa jẹ egrẹ vẹre fiki ovioma rai, orẹwho rai, uyẹ rai hayo uruemu ẹwho rai a be rria kugbe dhedhẹ enẹna. O wọhọ ẹsenọ a “duwu egbọdọ rai zihe ruọ etọẹkpẹ” no. (Aiz. 2:4) Ẹvẹ inwene nana e sae rọ roma via? Keme ahwo a wo eriariẹ Jihova no je bi fi ai họ iruo evaọ uzuazọ rai. Dede nọ idibo Ọghẹnẹ a gba ha, a zihe ruọ inievo akpọ-soso no. Oghẹrẹ nọ ahwo a bi ro dede emamọ usi na rehọ eva akpọ soso gbe epanọ onana u bi ro ru uzuazọ rai woma u dhesẹ nnọ ewuhrẹ Ọghẹnẹ o ghare gaga. —Mat. 11:19.
7, 8. (a) Eme họ eware jọ “nọ egae” nọ ewuhrẹ Ọghẹnẹ o fi obọ họ kẹ ahwo nya seba no? (b) Eme o dhesẹ inọ ewuhrẹ Ọghẹnẹ o rẹ wha ajiri se Jihova?
7 Pọl ukọ na ọ rehọ usiuwoma nọ idibo Ọghẹnẹ a be ta ro dhesẹ ẹmuofio abọ-ẹzi. O kere nọ: “Ekuakua ẹmo mai erọ erọ akpọ na ha, rekọ orọ ogaga Ọghẹnẹ nọ a rẹ rọ raha eria nọ egae. Ma rẹ whaha avro oyoma, je gbe koware koware nọ umukpahe eriariẹ Ọghẹnẹ.” (2 Kọr. 10:4, 5) Kọ eware vẹ “nọ egae” ewuhrẹ Ọghẹnẹ u bi fi obọ họ kẹ ahwo nya seba? Ejọ rai họ iwuhrẹ erue, ugbẹrọwọ gbe eriariẹ-ikpehru erọ ahwo-akpọ. (Kọl. 2:8) Ewuhrẹ Ọghẹnẹ u re fi obọ họ kẹ ahwo siobọno ekpehre uruemu je ru oware nọ o rẹ were Ọghẹnẹ. (1 Kọr. 6:9-11) U re ru uzuazọ uviuwou jọ kpatiẹ. Yọ o rẹ jẹ lẹliẹ ahwo nọ e kare ẹruore wo uvi ẹjiroro evaọ uzuazọ. Oghẹrẹ ewuhrẹ nana oye ahwo a gwọlọ nẹnẹ.
8 Uruemu ezi jọ nọ Jihova o bi fi obọ họ kẹ ahwo wo nẹnẹ họ oruọzewọ, wọhọ epanọ oriruo nọ ọ rrọ obotọ na o dhesẹ. (Hib. 13:18) Aye jọ evaọ obọ India ọ rọwo inọ a wuhrẹ Ebaibol kugbei, uwhremu na o te ti te owhowho-uvie nọ ọ re họ-ame he. Ẹdẹjọ nọ o je no iruo ebabọ Ọgwa Uvie kpo, ọ tẹ jọ otọ ruẹ ufiare igoru jọ nọ o ghare te oware wọhọ isiso egba ezeza (N120,000, ugho nọ o rẹ sai te ebasikoro ekpokpọ ikpe dẹ). Dede nọ eware e rrọ gaga kẹe, ọ tẹ rehọ ufiare na se iporisi. Akpọ u gbe iporisi unu! Uwhremu na iporisi ọfa ọ tẹ nọe inọ, “Eme o lẹliẹ owhẹ sai zihe ufiare na ze?” Ọ tẹ kuyo nọ, “Ewuhrẹ Ebaibol o lẹliẹ omẹ zihe ruọ ohwo oruọzewọ no.” Avọ evawere iporisi na ọ tẹ ta kẹ ọkpako ukoko nọ o su aye na ziọ ogba iporisi na nọ: “Ahwo nọ a rrọ ubrotọ mai na a bu te ima 38. Whọ tẹ sai fi obọ họ kẹ imakpe re a jọ wọhọ aye nana, yọ okolo iruo who ru hu.” Ma te roro kpahe ima ahwo buobu nọ uzuazọ rai u nwene no fiki ewuhrẹ Ọghẹnẹ, kọ ma gbe wo ẹjiroro buobu nọ ma re ro jiri Jihova?
9. Ẹvẹ o sae rọ lọhọ re ohwo o ru inwene ilogbo evaọ uzuazọ riẹ?
9 Ẹgba nọ Ebaibol na o re ro nwene ahwo gbe ẹzi ọfuafo nọ Jihova o bi ro fi obọ họ kẹ omai o be lẹliẹ ahwo ru inwene ilogbo evaọ uzuazọ rai. (Rom 12:2; Gal. 5:22, 23) Ahwo Kọlọsi 3:10 o ta nọ: “Wha whẹ uruemu okpokpọ họ oma onọ Ọghẹnẹ ọ jọ eva ẹriẹ dhesẹ uwoho emama riẹ.” Ovuẹ nọ o rrọ Ebaibol na o wo ẹgba nọ o re ro dhesẹ oware nọ o rrọ udu ohwo via, yọ o rẹ sai kpomahọ eware nọ ohwo o re roro kpahe, makọ oghẹrẹ nọ o bi rri eware. (Se Ahwo Hibru 4:12.) Ohwo o te wo eriariẹ egbagba ọrọ Ikereakere na je nwene uzuazọ riẹ re o koko izi Jihova, ọ rẹ sae jọ ogbẹnyusu Ọghẹnẹ, avọ irẹro uzuazọ ebẹdẹ bẹdẹ.
Oma Oruẹrẹhọ kẹ Obaro
10. (a) Fikieme Jihova ọvo ọ rọ rrọ ọnọ o re fi obọ họ kẹ omai ruẹrẹ oma họ kẹ obaro? (b) Eme ọ te via kẹ akpọ na soso kẹle?
10 Jihova họ ọnọ ọ rẹ sai fi obọ họ kẹ omai ruẹrẹ oma họ kẹ obaro keme ọ riẹ eware nọ e te jọ obaro via. Ọye ọ rẹ ma omaa oghẹrẹ nọ obaro ahwo-akpọ o te jọ. (Aiz. 46:9, 10) Eruẹaruẹ Ebaibol i dhesẹ inọ “ẹdẹ ologbo ỌNOWO na ọ kẹle i no.” (Zef. 1:14) Eme nọ e rrọ Itẹ 11:4 i ti rugba evaọ ẹdẹ ọyena: “Efe ọ rẹ [kẹ] erere evaọ ẹdẹ ofu hu, rekọ ẹrẹriokie o re si ohwo no uwhu.” Okenọ Jihova o ti bruoziẹ akpọ Setan, ọjẹrehọ Ọghẹnẹ họ oware nọ o te mai wuzou. Igho i ti fioka ha. Evaọ uzẹme, Izikiẹl 7:19 o ta nọ: “A re ti gbolo siliva rai fihọ orere, idọlọ-oro rai e vẹte jọ wọhọ eware igbegbe.” Nọ ma riẹ onana no na, kọ ma re ru oware nọ u fo.
11. Edhere jọ vẹ ewuhrẹ Ọghẹnẹ o bi ro fi obọ họ ruẹrẹ omai họ kẹ obaro?
11 Obọdẹ edhere jọ nọ ewuhrẹ Ọghẹnẹ ọ rẹ rọ ruẹrẹ omai kpahe kẹ ẹdẹ Jihova họ o re fi obọ họ kẹ omai rehọ eware nọ i wuzou karo. Pọl ukọ na o kere se Timoti nọ: “Enọ e jọ akpọ fe, vẹvẹ ai unu re a siọ oma ba ẹvia, a siọ ẹro ba ẹrọkpahọ efe nọ o muẹro ho, rekọ a rẹro kpahe Ọghẹnẹ.” Ma gbẹ maki fe he, ma rẹ sai wo erere no ohrẹ Ọghẹnẹ nana ze. Eme u fo inọ ma re ru? Ukpenọ ma re koko efe họ, ma rẹ daoma “ru ewoma” je “fe eva iruo iwoma.” Ma tẹ be rehọ eware abọ-ẹzi karo, yọ ma bi “fi otọhotọ uwoma họ kẹ oma [mai] be hẹrẹ obaro.” (1 Tim. 6:17-19) Ohwo nọ o bi yeri oghẹrẹ uzuazọ utioye na o bi dhesẹ nnọ o gine wo areghẹ, keme wọhọ epanọ Jesu ọ ta, “didi erere ọ rẹ ruọ ohwo, otẹrọnọ o wo akpọ na kpobi re uzuazọ riẹ u te vru?” (Mat. 16:26, 27) Nọ ẹdẹ Jihova o kẹle gaga no na, u fo re ma nọ oma mai nọ: ‘Diẹse me bi koko efe mẹ họ? Kọ Ọghẹnẹ mẹ be gbodibo kẹ manikọ efe?’—Mat. 6:19, 20, 24.
12. Fikieme oma o gbẹ rọ lọhọ omai hi nọ ahwo a te bi rri odibọgba mai vo?
12 Onọ o mai wuzou evaọ usu “iruo iwoma” nọ Ebaibol e ta nọ Ileleikristi a re ru họ usiuwoma ota gbe ilele-iruo na. (Mat. 24:14; 28:19, 20) Wọhọ epanọ o jọ evaọ ikpe-udhusoi ọsosuọ, ahwo jọ a rẹ sai rri odibọgba mai vo. (Se 1 Ahwo Kọrint 1:18-21.) Ghele onana kpobi, ovuẹ mai o gbẹ rrọ ghaghae, yọ o gbẹ roja inọ ma kẹ ahwo kpobi uvẹ nọ a re ro fi ẹrọwọ họ ovuẹ na nọ oke o gbẹ riẹ na. (Rom 10:13, 14) Nọ ma bi fi obọ họ kẹ amọfa wo erere no ewuhrẹ Ọghẹnẹ ze na, ma ti wo eghale buobu.
Oghale O re te Enọ E rọ Iruo Uvie na Karo
13. Eware vẹ Pọl ukọ na o siobọno fiki emamọ usi na?
13 Taure Pọl ukọ na o te ti kurẹriẹ, a je wuhrẹ iẹe re ọ jọ ohwo ologbo evaọ egagọ ahwo Ju. Ẹsejọhọ ọ kpako vrẹ ikpe 13 ha nọ o no Tasọs otẹwho riẹ kpobọ Jerusalẹm re Gamaliẹl, ọriẹ-izi nọ a riẹ gaga na, o wuhrẹ iẹe. (Iruẹru 22:3) Pọl ọ riobe vi otu riẹ kpobi, yọ ọ hai le uzuazọ yena, ọ hae jọ ohwo ologbo evaọ egagọ ahwo Ju. (Gal. 1:13, 14) Nọ o kurẹriẹ je mu usiuwoma họ ẹta, ọ tẹ nya siọ eware eyena kpobi ba. Kọ Pọl ọ vioja inọ o yeri uzuazọ thọ? Ijo. O tube kere nọ: “Eva uzẹme me roro eware kpobi gbe odẹ-oware ovo ho, keme ute mẹ o mai ro epanọ mẹ riẹ Kristi Jesu Ọnowo mẹ. Fiki riẹ mẹ ruẹ uye ku eware kpobi fiẹ, me te kele ai wọhọ eware uzuahọ.”—Fil. 3:8.
14, 15. Didi eghale ma bi wo wọhọ ‘ibe iruiruo Ọghẹnẹ’?
14 Wọhọ Pọl, Ileleikristi nẹnẹ a bi siobọno eware buobu fiki emamọ usi na. (Mak 10:29, 30) Kọ eware jọ i bi vru mi omai fiki onana? Robert, ọnọ ma jọ obọ emuhọ fodẹ na, ọ ta oware nọ o rrọ iroro ahwo buobu nọ ọ ta nọ: “Mẹ be vioja vievie he. Iruo odibọgba oke-kpobi na o kẹ omẹ evawere gbe evevọwẹ no, yọ u fi obọ họ kẹ omẹ ‘dawo jẹ ruẹ no inọ ỌNOWO o woma.’ Oke kpobi nọ me siobọno ekwakwa efe re mẹ ruẹsi le eware abọ-ẹzi, Jihova ọ rẹ rehọ eware nọ i vi enọ me siobọno ghale omẹ. O wọhọ ẹsenọ me siobọno oware ovo ho. Irere ọvo me wo no!”—Ol. 34:8; Itẹ 10:22.
15 Otẹrọnọ u kri no nọ whọ be rọ ta usiuwoma, ababọ avro who wo uvẹ no nọ whọ rọ dawo jẹ ruẹ nnọ Jihova o woma. Kọ ẹzi Ọghẹnẹ o fi obọ họ kẹ owhẹ no ẹdẹjọ nọ whọ jẹ ta usiuwoma? Kọ whọ ruẹ ahwo jọ nọ eva e were no nọ Jihova o bi rovie udu rai re a gaviezọ kẹ ovuẹ na? (Iruẹru 16:14) Kọ Jihova o fi obọ họ kẹ owhẹ fi ezadhe jọ kparobọ no, ẹsejọhọ o ru rie lọhọ kẹ owhẹ re who wo obọ vọvọ evaọ iruo usiuwoma ota na? Kọ o fi obọ họ kẹ owhẹ no evaọ oke ẹbẹbẹ, onọ u ru rie lọhọ re who thihakọ evaọ iruo na evaọ okenọ who roro nọ whọ sae gbẹ nyaharo ho? (Fil. 4:13) Nọ ma te muẹrohọ obufihọ Jihova evaọ odibọgba na, ọ vẹ te jọ wọhọ ohwo nọ ma be ruẹ, ma vẹ jẹ kẹle iẹe viere. (Aiz. 41:10) Oghale ulogbo o rrọ nọ ma rọ rrọ ‘ibe iruiruo Ọghẹnẹ’ evaọ iruo usiuwoma ota na.—1 Kọr. 3:9.
16. Ẹvẹ who rri oma nọ whọ be dawo evaọ ewhowho emamọ usi na?
16 Ahwo buobu a rẹ gwọlọ ru oware jọ nọ a rẹ rọ riẹ ae odẹ. Ma ruẹ no inọ ikpeware nọ ahwo jọ a ru evaọ akpọ nana e rẹ thẹro no. Rekọ iruo nọ Jihova o bi ru nẹnẹ re ọ sai ru odẹ riẹ fo e te thẹro vievie he. A te kareghẹhọ ae bẹdẹ bẹdẹ. (Itẹ 10:7; Hib. 6:10) Joma rri iruo ewhowho emamọ usi onọ o te thẹro ho na ghaghae.
Ẹvẹ Whọ te k’Uyo?
• Eme Jihova ọ gwọlọ mi enọ o bi wuhrẹ?
• Ẹvẹ ewuhrẹ Ọghẹnẹ o re ro ru uzuazọ ahwo woma?
• Eghale vẹ ma bi wo fikinọ ma bi fi obọ họ kẹ amọfa wo erere no ewuhrẹ Ọghẹnẹ ze?
[Enọ Uwuhrẹ]
[Uwoho nọ o rrọ ẹwẹ-obe avọ 23]
Enọ Jihova o wuhrẹ a ginẹ rrọ uvi inievo akpọ soso
[Uwoho nọ o rrọ ẹwẹ-obe avọ 24]
Kọ o gbẹ rrọ oghale re ohwo ọ jọ ‘ibe oruiruo Ọghẹnẹ’?