Buya Bwinebwine Bwa Bufundiji Bwa Leza

“I binebine, byo ntela bintu byonso ke byakubudidilwamo bitupu, mwanda wa buya bwine bulumbuluke bwa ñeni ya Kidishitu Yesu Mfumwami.”—FID. 3:8.

1, 2. Lelo Bene Kidishitu bamo i batonge kulonga bika ne mwanda waka?

 ROBERT wadi na ñeni ku masomo pa bwanuke. Paadi na myaka 8, mwadimu umo wakamunangile kwabo ne kumulombola’mba i kutupu kyakakomenwa mu būmi. Wamukulupija’mba difuku dimo ukokeja kukekala dokitele. Byobya byaalongele ku masomo a peulu byamupele mukenga wabwanya kukafunda ku inivelesite yo-yonso mitumbe ya mu yabo ntanda. Inoko Robert walekele kino kyadi kimonwa na bavule bu dyese mu būmi, mwanda wa kulondalonda kitungo kyandi kya kwingila bupania wa lonso.

² Bene Kidishitu bavule, pamo bwa Robert—bakulu ne banuke—badi na mikenga ya kupeta mu ino ngikadilo ya bintu. Bamo balekele kumwena mu ino mikenga amba balondelonde bitungo bya ku mushipiditu. (1 Kod. 7:29-31) I bika bitononanga Bene Kidishitu bepāne mu mwingilo wa busapudi pamo bwa Robert? Kutentekela pa buswe bobaswele Yehova, bwine bwibatonona, basangelanga buya bwinebwine bwa bufundiji bwa Leza. Lelo uvulukile mwadi mwa kwikadila būmi bobe shi wadi kutambwilepo buyuki bwa binebine? Kulangulukila pa madyese amo a kutendelwa adi mu kufundijibwa na Yehova kuketukwasha twendelele kufwija’ko pangala pa myanda miyampe ne kwisapwila’yo bakwabo na bupyasakane.

Dyese dya Kufundijibwa na Leza

3. Mwanda waka tukokeja kukulupila amba Yehova udi na mutyima wa kufundija bantu bampikwa kubwaninina?

³ Yehova, mu buyampe bwandi, udi na mutyima wa kufundija bantu bampikwa kubwaninina. Isaya 54:13 wisambila mu bupolofeto pa Bene Kidishitu bashingwe māni amba: “Bāna bobe bonsololo bakalombojibwa na Yehova, ne ndoe ya bāna bobe ikekala mikatampe.” Inoko bino binenwa bitalanga kadi ne “mikōko mikwabo” ya Kidishitu. (Yoa. 10:16) Kino i kimweke mu bupolofeto bufikidila mu ano etu mafuku. Isaya wāmwene mu kimonwa bantu ba mizo yonso bepungulwila mu mutōtelo wa bine. Wēbamwene beita abo bene amba: “Iyai tukande ku lūlu lwa Yehova, ku njibo ya Leza wa Yakoba, amba etulombole mashinda andi, kadi amba tunange mu tumashinda twandi.” (Is. 2:1-3) Bine kufundijibwa na Leza, i dyese’po kashā!

4. Lelo i bika bisaka Yehova ku boba bafundija?

⁴ Le tukalonga namani pa kusaka tufwaninwe kufundijibwa na Leza? Kisakibwa kikatampe i muntu mwine ekale mwityepeje kadi witabija bufundiji. Davida, kaimba wa Mitōto wālembele amba: “Yehova i muyampe, moloke swā! . . . Kadi bakikōkeji nabo ukebafundijanga dishinda dyandi.” (Mit. 25:8, 9) Yesu nandi wālombele amba: “Nakufwijapo abe Tata, Mwine wa mūlu ne panshi, ubafuko byo wafile byobya ku bakudyumuka, ne ku bañeni, nanshi ku twana-twa-lukeke ubasokola’byo.” (Luka 10:21) Le kwivwenepo buya bwa kufwena Leza mwine “upana buntu kudi babumvubumvu.”—1 Pet. 5:5.

5. I muswelo’ka umo kete walengeje tubwanye kuyuka Leza?

⁵ Le batwe bengidi ba Yehova tuketendela amba i pa bukomo bwa batwe bene potwasokola buno buyuki bwa bubinebine? Mhm.  Na bubine, ku bukomo bwetu, ketwadipo ba kwikala na buyuki bwa Leza. Yesu wānene amba: “Nansha umo wakwila kwami aye mwine, poso’nka Tata wakuntuma amukokele ko ndi.” (Yoa. 6:44) Yehova ukokanga bantu badi pamo bwa mikōko, ke “bintu bisaka mityima bya mizo yonso” kadi, kupityila ku mwingilo wa busapudi ne ku mushipiditu. (Hak. 2:7) Le kufwijangapo pa kukoka kukukokele Yehova kudi wandi Mwana?—Tanga Yelemia 9:23, 24.

Bukomo Bulumbulula Būmi

6. Lelo “kuyukidija kwa [Yehova]” kudi na bukomo’ka butendelwa pa bantu?

⁶ Bupolofeto bwa Isaya i bwingidije kimfwa kiyampe pa kulombola muswelo walamuka ngikadilo ya muntu mu kino kyetu kitatyi. Bantu badi pa kala ba butapani, pano ke ba ndoe. (Tanga Isaya 11:6-9.) Boba badi befikile pa mwanda wa kwishila kwa lukoba, muzo, musaka, nansha bishiyekulu befundile kwikala pamo mu bumo. Mu muneneno wa kyelekejo, ‘i babunde bipete byabo ke makasu.’ (Is. 2:4) I bika biletele kuno kushinta kukatampe? Mwanda bano bantu i bafike pa “kuyukidija kwa [Yehova]” ne kulonda’ko mu būmi bwabo. Nansha bengidi ba Leza byo kebabwanininepo, i babunde bu bana na bana bwa ntanda yonso. Kukimbwa kukimbwa myanda miyampe ntanda yonso ne kipa kyoilupula, bibingijanga buya bwinebwine bwa bufundiji bwa Leza.—Mat. 11:19.

7, 8. (a) Lelo i bishimikwa’ka bimobimo, “bishimikwa bīne bya bukomo,” bibwenye bantu kututa kupityila ku bufundiji bwa Leza? (b) I kika kilombola’mba bufundiji bwa Leza buletelanga Yehova mitendelo?

⁷ Mutumibwa Polo wādingakenye mwingilo wa bengidi ba Leza na kyabulwi kya ku mushipiditu. Wālembele amba: “(Ke-bintu bilonda bya bulwi bwetu kebidipo bya bu-ngitu mhm, i bya bulobo bukatampe ku meso a Leza bya kututa ne bishimikwa bīne bya bukomo); ne kututa kufwatakanya konso, ne byonso bilampe bitentekwe kūlu byakufutulula ñeni ya Leza.” (2 Kod. 10:4, 5) Lelo i bishimikwa’ka bimobimo, “bishimikwa bīne bya bukomo,” bikūdilwe’ko bantu na bufundiji bwa Leza? I bufundiji bwa bubela bulēmenene bantu, kabutyibutyi, ne mafilozofi a bantu, twimanine bidi pano. (Kol. 2:8) Bufundiji bwa Leza bukwashanga bantu banekenye bibidiji bibi ne kutamija ngikadilo ya bwine Leza. (1 Kod. 6:9-11) Bulumbululanga būmi bwa kisaka. Kadi bupanga ne boba bampikwa lukulupilo, bayuke kine kyobekadile’ko. Buno bo bufundiji bwine botusakilwa dyalelo.

⁸ Kubulwa budimbidimbi o mwikadila umo bidi upāna Yehova ku bantu, monka mulombwela uno mwanda ulonda’ko. (Bah. 13:18) Mwana-mukaji umo mu India waitabije kifundwa kya Bible kupwa wabwanija bisakibwa bya kwikala musapudi wampikwa kubatyijibwa. Difuku dimo paadi ujokela ku njibo utamba ku mwingilo wa lūbako lwa Njibo ya Bulopwe, waboile muyololo wa olo  wa bei, upotwa na madolala 800, mupone kubwipi na kushīkanga myotoka. Nansha byaadi mulanda, waselele muyololo’wa waenda nao ku bilo ya bampulushi webapa’o amba basokole mwine’o. Komanda wa bampulushi watulumukile bininge! Kupwa, komanda mukwabo waipangula kaka’wa amba, “Mwanda waka ubaiya kujokeja uno muyololo?” Kaka washintulula’mba, “Bufundiji bwa mu Bible kebungalamune, pano nkikidipo na budimbidimbi.” Pa kutulumuka, Komanda wasapwila mukulumpe Mwine Kidishitu waile kushindikila kaka amba: “Mu ino ntanda mudi bantu midiyala 38 ne musubu. Shi bikokejika mukwashe’ko’tu nansha bantu 10 bekale bwa uno mwana-mukaji, nankyo mubaingila.” Potumona bufundiji bwa Leza bulumbulula būmi bwa bantu midiyo ne midiyo, le ketudipo na bubinga bwa kutendela Yehova’ni?

9. Le bantu babwanya namani kushinta binebine mu būmi bwabo?

⁹ Bukomo budi na Kinenwa kya Leza bwa kwalamuna būmi ne bukwashi bwa Yehova bwaleta kupityila ku mushipiditu sandu, bikwashanga bantu bashinte būmi bwabo. (Loma 12:2; Ngat. 5:22, 23) Kolose 3:10 unena’mba: “Umbavwala uno muntu mupya, wenda upangululwa kupya ku kuyūkijibwa, monka mwikadile kyelekejo kya yewa wamupangile.” Musapu utanwa mu Bible, Kinenwa kya Leza, udi na bukomo bwa kusokola mwine mwikadile muntu munda mwandi, kushinta muswelo walanga ne wamona bintu. (Tanga Bahebelu 4:12.) Muntu ukokeja kwikala mulunda na Leza, ne kukulupila kumona būmi bwa nyeke, shi waikala na buyuki bwa bine bwa Bisonekwa ne kukwatañanya būmi bwandi na misoñanya myoloke ya Yehova.

Wituteakanya Mwa Kukekadila

10. (a) Mwanda waka Yehova kete ye ubwanya kwitukwasha twiteakanye? (b) I kushinta’ka kutulumukwa kusa kushinta ntanda yonso panopano?

¹⁰ Yehova kete ye ubwanya kwitukwasha twiteakanye, mwanda uyukile bisa kufika kumeso’ku. Uyukile mukekadila muzo wa muntu kumeso. (Is. 46:9, 10) Bupolofeto bwa mu Bible bunena’mba: “Difuku dikatakata dya Yehova didi pabwipi.” (Zef. 1:14) Pa mwanda utala dino difuku, binenwa bidi mu Nkindi 11:4 ye pobikafikidila, bya amba: “Byabupeta kebidipo ne kamweno mu difuku dya bukalabale: Ino boloke bunyongolola ku lufu.” Kintu kikekala kya mvubu pakafikidila butyibi bwa Yehova pa ino ntanda ya Satana i kwitabijibwa na Leza. Lupeto kelukalongapo kintu. O mwanda Ezekyele 7:19 unena’mba: “Bakēla ndalama yabo mu mikenza, ne nsahabu yabo ikekalanga’nka bwa kintu kya disubi.” Kuyuka kino kumeso kwa kitatyi kwitukwasha tudyumuke tamba’nka pano.

11. Le i muswelo’ka umo witukwasha bufundiji bwa Yehova twiteakanye ku bīya kumeso’ku?

¹¹ Muswelo umo wa pa bula witukwasha bufundiji bwa Yehova twiteakanye ku kwiya kwa difuku dya Yehova i wa kwitulombola bintu bya kubadikija mu būmi. Mutumibwa Polo wālembēle Temote amba: “bampeta ba panopantanda wibakome’mba: Kemukikala  ne mutyima wa kwilemeka, ne kukulupila bupeta bwa kubulwa ne mwakukulupidila, poso konka kudi Leza.” Nansha shi ketudipo na lupeto, tubwanya kumwena mu madingi a Leza a ku bukomo bwa mushipiditu. Le kino kilomba bika ne bika? Pa kyaba kya kwibikila bupeta bwa ku ngitu, twielelei’ko ‘kulonga biyampe’ ne kwikala “bampeta ba mu mīngilo milumbuluke.” Shi tutūle tumweno twa ku mushipiditu pa kifuko kibajinji mu būmi bwetu, nabya “ko kwibīkila bupeta bwa ku mwaka wakāyako ke kyalwilo.” (1 Tem. 6:17-19) Būmi bwa kwipāna uno muswelo bulombola tunangu twa bine, ke-pantu Yesu wānene amba, “Shi muntu amune panopantanda ponso ke pandi, ne muya wandi umujimine ponka, lelo nankyo kyāmwenamo i kika le?” (Mat. 16:26, 27) Byafwena difuku dya Yehova, i biyampe umo ne umo eipangule amba: ‘Le ntulanga byabupeta byami kwepi? Le ñingidilanga Leza’ni nansha bupeta?’—Mat. 6:19, 20, 24.

12. Mwanda waka ketufwaninwepo kuzoza shi bamo bapumpunya mwingilo wetu?

¹² Mu “mingilo milumbuluke” inenenwe Bene Kidishitu mu Kinenwa kya Leza kwingila, mukatampe’mo i owa upandija bantu wa kusapula Bulopwe ne kulonga bana ba bwanga. (Mat. 24:14; 28:19, 20) Bamo babwanya kupumpunya mwingilo wetu, pamo na mobyāikadile mu myaka katwa kabajinji. (Tanga 1 Kodinda 1:18-21.) Inoko kino kekishintapo mvubu ya musapu wetu, nansha kutyepeja bulēme bwa kupēla bantu mukenga wa kwikala na lwitabijo mu ao, pano pakidi mema mu manwi. (Loma 10:13, 14) Kitatyi kyonso kyotukwasha bantu bamwene mu bufundiji bwa Leza, twitūlanga mu mulongo wa bantu bakatambula madyese mavule.

Beselwe pa Kwipāna Kwabo

13. Le mutumibwa Polo wēpēne muswelo’ka pangala pa myanda miyampe?

¹³ Mutumibwa Polo kumeso kwa kwikala Mwine Kidishitu, wāfundijibwe mwa kupetela mu ngikadilo ya bintu ya Buyuda. Mobimwekela paākidi kapityije myaka 13, wātambile mu kibundi kyabo kya Tasusa waenda ku Yelusalema kukafundijibwa na Ngamayela, Mufundiji wa bijila mutumbe. (Bil. 22:3) Kitatyi pa kupita’po, Polo washilula kukila bakwabo ba kisense kyabo, waendelela bininge, ye uno wātamijibwe mwa kutumbila mu Bwine Yudea. (Ngat. 1:13, 14) Pāitabije myanda miyampe ne kushilula kusapula, wāshile byonso. Le Polo wēalakenye pa butongi bwandi? Mhm. Wāsonekele amba: “I binebine, byo ntela bintu byonso ke byakubudidilwamo bitupu, mwanda wa buya bwine bulumbuluke bwa ñeni ya Kidishitu Yesu Mfumwami, yewa nabudidilwamo bintu byonsololo’tu fututu, ne kwibitela bu-bintya na’mba: Nkamwenamo Kidishitu.”—Fid. 3:8.

14, 15. Lelo i bika byotukamona mu kwikala “bakwingila mīngilo pamo na Leza”?

¹⁴ Pamo bwa Polo, Bene Kidishitu dyalelo bepānanga pa mwanda wa myanda miyampe. (Mako 10:29, 30) Lelo kudi kintu kyotubulwanga pa mwanda wa myanda miyampe? Robert utelelwe kūlu i mwiimvwane mwiimvwaninanga bavule panena’mba: “Nkialakanyangapo nansha dimo. Mwingilo wa kitatyi kyonso umpele nsangaji ne kuloelelwa, kadi unkweshe ‘ntompe ne kumona’mba Yehova i muyampe.’ Kitatyi kyonso kyonadi mpāna bya ku ngitu mwanda wa kulondalonda bitungo bya ku mushipiditu, Yehova wadi ungesela nyeke kupita ne byonapēne. Nkendi pamo enka bwa ami kapēnepo kintu. Bine, namwena’mo’nka kumwena’mo!”—Mit. 34:8; Nk. 10:22.

 ¹⁵ Shi pano ke mafuku usapula’nka kusapula ne kufundija, bine nobe wasokwele mikenga ya kutompa ne kumona amba Yehova i muyampe. Le kudi’po ne kitatyi kyowaimvwene bukwashi bwa mushipiditu wandi po wadi usapula myanda miyampe? Lelo wamwene nsangaji ya bantu pashitwile Yehova mityima yabo amba bateje musapu? (Bil. 16:14) Lelo Yehova wakukweshe unekenye bijika, padi na kukupa mukenga wa kutandabula mwingilo wetu? Le wakukwatakenye mu kitatyi kya makambakano, wakupa bukomo bwa kwendelela na mwingilo wandi powaivwene amba bukomo bubakutyepa? (Fid. 4:13) Kitatyi kyotumona amba Yehova wetukwasha potuvuija mwingilo wetu, tumumonanga bu udi’ko binebine ne twabila kumufwena. (Is. 41:10) Lelo dino ke dyesepo’ni dya kwikala “bakwingila mīngilo pamo na Leza,” mu uno mwingilo mukatampe wa bufundiji bwa Leza?—1 Kod. 3:9.

16. Le ubetenena namani pa bukomo ne kwipāna kowipāna mu bufundiji bwa Leza?

¹⁶ Bantu bavule basakanga kulonga bintu bivulukwa nyeke mu būmi bwabo. Bintu bitulumukwa byotumona balonga mu ino ntanda kebijangapo kuvulaminibwa. Inoko, na bubine, bintu bilonga Yehova mu ano mafuku bitala pa buujila bwa dijina dyandi bikalamwa nyeke mu ñeni ke kipindi kya mu mānga ya bantu ba Leza. Bikavulukwanga mafuku onso. (Nk. 10:7; Bah. 6:10) Nanshi tusangelei dyese dyetu dya kwingila mwingilo wa kupāna bufundiji bwa Leza ukavulukwa mu mānga ya muntu.

Usa Kulondolola Namani?

• Lelo i bika bisaka Yehova ku boba bafundija?

• Lelo bufundiji bwa Leza bulumbululanga namani būmi bwa bantu?

• I mu miswelo’ka motweselwa pa kukwasha kotukwasha bakwabo bamwene mu bufundiji bwa Leza?

[Bipangujo bya Kifundwa]

[Kifwatulo pa paje 25]

Boba bafundijibwe na Yehova i babunde bu bana na bana bwa bine ntanda yonso

[Kifwatulo pa paje 26]

Lelo dino ke dyesepo’ni dya kwikala “bakwingila mīngilo pamo na Leza”?