Somo ma Jehova Chiwo Kelo Gweth Maduong’ Moloyo
Somo ma Jehova Chiwo Kelo Gweth Maduong’ Moloyo
“Adier, akwano gik moko duto ka gik manono, nikech gueth maduong’ moloyo mar ng’eyo Kristo Yesu.”—FILI. 3:8.
1, 2. Jokristo moko oseyiero mar timo ang’o, to nikech ang’o?
KOCHAKRE e tinne, Robert ne timo maber ahinya e skul. Kane en mana jahigini aboro, achiel kuom jopuonjne nolime dalagi, mowachone ni onyalo chopo e okang’ moro amora modwaro. Japuonjno ne geno ni kinde moro Robert nobed laktar. Robert nokalo penj mar sekondari e rang’iny mamalo ahinya, omiyo koro nonyalo dhi e yunivasiti moro amora maber e pinygi. Kata kamano, Robert noweyo luwo gima ji mang’eny nyalo neno kaka thuolo majaber mabiro ne ng’ato dichiel kende e ngimane, nikech nodwaro chopo gombo mare mar lendo kaka painia mapile.
2 Mana kaka Robert, Jokristo mang’eny—matindo koda madongo—nigi thuolo mag timo dongruok mopogore opogore e piny masani. Moko kuomgi yiero mondo kik giti gi thuologo ahinya, nimar giseketo chenro mag tiyo ne Nyasaye. (1 Kor. 7:29-31) En ang’o mosebedo kachwalo Jokristo machalo kaka Robert mondo gichiwre ahinya e tij lendo? E wi hera ma gin-go kuom Jehova, ma e gima duong’ie moloyo mamiyo gitimo kamano, gin joma bende ohero kendo ong’eyo ber mag puonj mawuok kuom Jehova. Be isepare e kinde machiegni kaka ngimani dikoro chalo dine bed ni ok ing’eyo adiera? Paro matut kuom gweth moko mwasebedogo nikech luwo puonj mag Jehova, biro konyowa siko ka wahero wach maber, kendo bedo joma nigi kinda e landone jomoko wachno.
En Gweth Maduong’ Bedo Joma Nyasaye Puonjo
3. Ang’o momiyo wanyalo bedo gadier ni Jehova oikore mar puonjo dhano monyuol e richo?
3 Nikech ber mare, Jehova oikore mar puonjo dhano ma ne onyuol e richo. Ka okoro wach Jokristo mowal kuom roho, Isaiah 54:13 wacho kama: “Nyithindi duto nopuonjre wach Jehova; mi nyithindi nobedi gi kuwe mang’eny.” Wechego gin puonj matiyo bende kuom ‘rombe mamoko’ mag Kristo. (Joh. 10:16) Mani nenore maler kaluwore gi weche ma ne okor masani chopo e kindewagi. Isaya noneno e fweny kaka ji mowuok e ogendini duto ne dhi rwako lamo madier. Olero kaka ng’ato ka ng’ato kuomgi wachone nyawadgi niya: “Biuru un, wadhiuru god Jehova, nyaka od Nyasach Yakobo; mi nopuonjwa yore, kendo wanawuoth e yorene.” (Isa. 2:1-3) Mano kaka wan gi gweth maduong’ ahinya bedo joma Nyasaye puonjo!
4. Gin kido mage ma Jehova dwaro kuom jogo mopuonjo?
4 Onego watim ang’o mondo eka wabed jogo ma Nyasaye puonjo? Gima duong’ madwarore en bedo ng’at mamuol kendo marwako puonj. Daudi jandik-zaburi nondiko kama: “Jehova ber kendo ochung’ tir. . . . Enochik jo mamuol kuom weche ma bura ong’ado.” (Zab. 25:8, 9) Kendo Yesu nowacho niya: “Agoyoni erokamano, A Wuora, Ruodh polo gi piny, nikech nipando wechegi ni jo mariek kod jo ma ong’eyo wach, to nielogi ni nyithindo matindo.” (Luka 10:21) Donge iwinjo kidwaro sudo machiegni gi Nyasaye mamiyo “jo mamuol ng’wono”?—1 Pet. 5:5.
5. En ang’o ma nomiyo wang’eyo Nyasaye?
5 Wan kaka jotich Jehova, be wanyalo pakore ni wang’eyo adiera gi nyalowa wawegi? Ooyo. Kuom adier, ne dak wang’eyo Nyasaye gi nyalowa wawegi. Yesu nowacho kama: “Onge ng’a ma nyalo biro ira, ma ok Wuoro ma noora e moywaye.” (Joh. 6:44) Kokalo kuom tij lendo koda roho maler, Jehova ywayo jogo ma nigi kido mabeyo kaka mag rombe, ma gin “gigo ma ogendini duto dwaro.” (Hag. 2:7) Donge imor ahinya kuom bedo achiel kuom jogo ma Jehova oseywayo ir Wuode?—Som Yeremia 9:23, 24.
Puonj mag Nyasaye Miyo Ji Bedo gi Ngima Maber Moloyo
6. “Ng’eyo Jehova” miyo ji timo lokruok mage madongo?
6 Kotiyo gi weche mamiyo wayudo picha maler e pachwa, Isaya koro kaka dhano ne dhi timo lokruok e kitgi e ndalowagi. Jogo machon ne gin jo mohero lweny oselokore mobedo jo mohero kuwe. (Som Isaiah 11:6-9.) Jogo machon ne nigi sigu e kindgi nikech giwuok e piny kata oganda mopogore, kata wacho dhok mopogore opogore, osepuonjore dak kanyachiel. E yor ranyisi, ‘gisekawo ligengini ma gin-go mi gilosogo leu kwer.’ (Isa. 2:4) En ang’o mosekonyogi timo lokruok madongo kamano? Ji osepuonjore mi ‘ging’eyo Jehova’ kendo gisetiyo e ngimagi kod gigo ma gisepuonjore. Kata obedo ni jotich Nyasaye gin joma orem, giseloso riwruok maduong’ mar owete e piny mangima. Wach maber milando e piny mangima koda nyak mabeyo mokelo, nyiso ratiro kaka puonj ma Nyasaye chiwo ber miwuoro.—Math. 11:19.
7, 8. (a) Moko kuom gik machalo kaka “ut lweny” ma puonj mag Nyasaye konyo ji muko gin mage? (b) Ang’o manyiso ni puonj moa kuom Nyasaye kelo pak ne Jehova?
7 Jaote Paulo ne oporo tich ma jotich Nyasaye timo gi lweny maok mar ringruok. Nondiko niya: “Nikech gi lwenje mwakedogo ok gin mag ringruok, to kuom Nyasaye gin gi teko mar muko ut lweny, kwaketho mbaka kod gik moko ma ting’ore malo ma mon kod ng’eyo Nyasaye.” (2 Kor. 10:4, 5) Moko kuom gik machalo kaka “ut lweny” ma puonj mag Nyasaye gonyoe ji gin mage? Gin gik moko kaka puonj mag miriambo, wuond manono kiluwo timbe mag anyuola, koda riekni mag dhano. (Kol. 2:8) Puonj mawuok kuom Nyasaye konyo ji loyo timbe maricho, kendo miyo ginyago kido kaka mag Nyasaye. (1 Kor. 6:9-11) Puonjgo miyo ngima joot medo bedo maber. Bende omiyo jogo maok nigi geno ong’e gimomiyo Nyasaye nochweyogi. Mani e kit puonj madwarore ahinya ndalogi.
8 Achiel kuom kido ma Jehova konyo ji mondo onyag en bedo joratiro mana kaka ranyisi maluwoni lero. (Hib. 13:18) Dhako moro e piny India ne oyie puonjore Muma, mi bang’ kinde nobedo jalendo mapok obatisi. Chieng’ moro kodok ot kowuok e tij gero Od Romo, nokwanyo thiwini molos gi dhahabu ma nengone dirom dola mia aboro mag Amerka. Kata obedo ni ne en jachan, notero thiwinino nyaka e stesen mar polis mondo omany wuon-go. Ofisa mar polis ma ne oyudo kanyo nobwok kane oneno gigo! Bang’e polis machielo nopenje gimomiyo nokelo thiwinino kanyo. Nolero niya, “Gik ma asepuonjra e Muma osemiya abedo gi lokruok, ma koro sani an ng’at ma jaratiro.” Ka en gi mor kuom gima ne otimoreno, polis nowachone jaduong’-kanyakla ma Jakristo ma noyudo okowo nyaminwano nyaka e stesen mar polis niya: “Nitie ji milion 38 motelne gi sirkal man kae. Ka inyalo konyo ji apar mondo obed kaka miyoni, mano nyalo bedo gima maduong’ ahinya.” Ka wang’iyo dhano tara mang’eny mosetimo lokruok mabeyo e ngimagi nikech puonj moa kuom Nyasaye, donge wabedo gi gik mogundho mamiyo wadwaro pako Jehova?
9. En ang’o manyalo konyo ji mondo otim lokruok madongo e ngimagi?
9 Teko ma Wach Nyasaye nigo mar kelo lokruok, kaachiel gi kony ma Jehova chiwo kokalo kuom roho mare maler, konyo ji timo lokruok madongo e ngimagi. (Rumi 12:2; Gal. 5:22, 23) Jo Kolosai 3:10 wacho kama: ‘Rwakuru dhano manyien miloso manyien e kit jachuechne, kuom ng’eyo Nyasaye chuth.’ Weche mayudore e Muma ma en Wach Nyasaye, nigi teko mar elo kit ng’ato ma iye, kendo onyalo loko paro ma ng’ato nigo koda yo ma ng’ato neno godo gik moko. (Som Jo Hibrania 4:12.) Kuom bedo gi ng’eyo makare kuom Ndiko, kendo kuom timo lokruok e ngimane kaluwore gi chike makare mag Jehova, ng’ato nyalo bedo osiep Nyasaye, mi obed gi geno mar dak nyaka chieng’.
Jehova Ikowa ne Kinde Mabiro
10. (a) Ang’o momiyo Jehova ema nigi nyalo mar konyowa waikre ne kinde mabiro? (b) Gin lokruok mage madongo machiegni timore e piny mangima?
10 Jehova kende ema nigi nyalo mar ikowa ne kinde mabiro nikech ong’eyo gima oritowa nyime. En ema ong’ado kaka ngima dhano biro bedo e kinde mabiro. (Isa. 46:9, 10) Weche mokor ei Muma nyiso ni ‘ndalo maduong’no mar Jehova chiegni.’ (Zef. 1:14) Kuom wach odiechieng’no, weche mag Ngeche 11:4 biro chopo kare: “Mwandu ok kony chieng’ mineno masira; to tim makare oreso kuom tho.” Ka kinde ochopo ma Jehova biro kethoe piny ma Satan oteloeni, gima duong’ mabiro resowa en winjruokwa maber gi Nyasaye. Pesa biro bedo gima nono. Kuom adier, Ezekiel 7:19 wacho kama: “Giniwit fedha ma gingo e yore, kendo dhahabu margi nobedi ka gi ma ok ler.” Ng’eyo wachni chon kama nyalo konyowa watim gik moko sani e yor rieko.
11. Yo achiel ma puonj mag Nyasaye konyowago mondo waikore ne ndalo mabiro en mane?
11 Yo achiel makende ma puonj mag Nyasaye konyowago e ikruok ne odiechieng’no mar Jehova, en konyowa wang’e gigo monego waket motelo. Jaote Paulo nondiko ne Timotheo niya: “Chik jomwandu mag pinyni mondo kik gibed jong’ayi, kendo kik gigen mwandu ma onge kore, to gigen Nyasaye.” Kata kapo ni ok wan jomwandu, pod wanyalo yudo kony kuom siem ma wach Nyasaye ochiwoni. Puonjno jiwowa watim ang’o? Kar choko mwandu mag ringruok, onego wabed “jo ma timo maber” kendo wabed “jomwandu mag timbe mabeyo.” Kuom keto yore mag Nyasaye ema mondo obed mokwongo e ngimawa, wabiro ‘kano mwandu ma nobed mise maber e ndalo ma biro.’ (1 Tim. 6:17-19) Chiwruok machalo kamano nyiso rieko mabiro konyowa, nimar mana kaka Yesu nowacho, ‘ere ohala ma ng’ato yudo konwang’o piny ngima, to ngimane lalne?’ (Math. 16:26, 27) To nikech odiechieng’no mar Jehova chiegni, ng’ato ka ng’ato kuomwa onego openjre niya: ‘An akano mwanduna kanye? An misumba Nyasaye koso misumba Mwandu?’—Math. 6:19, 20, 24.
12. Ang’o momiyo ok onego chunywa ool ka jomoko nyiso tijwa mar lendo achaye?
12 Tich maduong’ kuom “tije mabeyo” ma Wach Nyasaye chiko Jokristo mondo otim, en tij lando Pinyruoth kod timo ji jopuonjre. (Math. 24:14; 28:19, 20) Mana kaka ne timore ne Jokristo mokwongo, moko kuom joma walendonegi nyalo chayo tijwa mar lendo. (Som 1 Jo Korintho 1:18-21.) Kata kamano, mano ok nyis ni ote mwalando ok en ote madwarore, kendo mano ok nyis ni koro ok onego wami ng’ato ka ng’ato thuolo mar keto yie kuom wachno ka thuolo pod nitie. (Rumi 10:13, 14) Kaka wamedo konyo jomoko ong’e puonj mag Nyasaye, wan bende wabiro yudo gweth mang’eny.
Wayudo Gweth Kuom Chiwruok
13. Paulo nochiwore moweyo gik mage nikech wach maber?
13 Kane pok obedo Jakristo, jaote Paulo ne en ng’at ma itiego mondo obi obed gi huma e piny Jo-Yahudi. Kane en jahigini 13 kama, ne odar owuok e dala mar Tarso modhi Jerusalem mondo oyud puonjruok e tiend Gamaliel ma ne en japuonj mang’ula e weche Chik. (Tich 22:3) Bang’ kinde, Paulo nochako bedo gi huma e kind jo tieng’ne, to dine bed ni odhi nyime kamano dine ochopo e rang’iny mamalo ahinya. (Gal. 1:13, 14) Kane orwako wach maber mochako tij lendo, noweyo gik moko duto ma ne oyudo oluwo. Be Paulo noywago ang’e kuom yiero ma ne otimono? Ooyo. Kuom adier, nondiko niya: “Adier, akwano gik moko duto ka gik manono, nikech gueth maduong’ moloyo mar ng’eyo Kristo Yesu Ruodha. Gik moko duto ne olalna nikech en, to akwanogi duto ka gik miwito oko.”—Fili. 3:8.
14, 15. Gin gweth mage mwayudo kuom bedo “jotich kaachiel kod Nyasaye”?
14 Mana kaka Paulo, Jokristo ndalogi weyo gik mang’eny nikech wach maber. (Mari. 10:29, 30) Be waywago ang’e nikech timo kamano? Robert, ma ne owuo kuome motelo, chiwo paro ma ji mang’eny nigo kowacho niya: “Ok aywag ang’e kata matin. Tiyo tij lendo kuom thuolona duto osekelona mor koda ilo mogundho, kendo osemiya thuolo mar ‘rango kendo neno kaka Jehova ber.’ Kinde ka kinde ma ne aweyo manyo gige ringruok, mondo achop chenro maketo mar tiyone Nyasaye, kinde duto Jehova ne gwedha e yo momedore maloyo gik ma ne aweyogo. Chal ka gima onge gima ne aweyo. An ema asebedo ka ayudo gweth moloyo!”—Zab. 34:8; Nge. 10:22.
15 Kapo ni isebedo kilendo kendo puonjo jomoko kuom ndalo mogwaro, onge kiawa ni in bende isebedo gi thuolo mang’eny mag rango kendo neno kaka Jehova ber. Be nitie kinde moko miseneno kaka roho mar Nyasaye konyi seche ma ilando wach maber? Be iseneno kaka jomoko bedo moil sama Jehova yawo chunygi mondo gichik itgi kuom ote mwalando? (Tich 16:14) Be Jehova osekonyi loyo pek moko ma noyudo chandi, ka seche moko oyawoni thuolo mar tiyo tij lendo e okang’ momedore? Be osekonyi e kinde ma in-gi chandruok, komiyi teko mar dhi nyime tiyone kata sama ne iwinjo ka chunyi ool? (Fili. 4:13) Sama wan wawegi waneno kaka lwet Jehova konyowa sama watiyo tij lendo, obedonwa osiepwa madier kendo wamedo sudo machiegni kode ahinya. (Isa. 41:10) Donge en gweth maduong’ ahinya bedo achiel kuom “jotich kaachiel kod Nyasaye” e tich maduong’ mar konyo ji yudo puonj mag Nyasaye?—1 Kor. 3:9.
16. Iwinjo nade e chunyi kuom kinda mitimo koda gige ringruok miseweyo luwo mondo ipuonj ji wach Nyasaye?
16 Ji mathoth nigi geno mar timo gimoro makende e ngimagi. Waseneno kaka wi dhano wil mapiyo kod tije madongo ma jowetegi timo e piny masani. Kata kamano, onge kiawa ni tije ma Jehova timo motudore gi wach pwodho nyinge obed maler, biro siko e sigand gigo ma Jehova osetimo. Ibiro par tijego nyaka chieng’. (Nge. 10:7; Hib. 6:10) Mad wadhi nyime mako kendo hero tich majaber mar konyo ji yudo puonj mag Nyasaye.
Inyalo Dwoko Nade?
• En ang’o ma Jehova dwaro kuom jogo ma opuonjo?
• Ere kaka puonj moa kuom Nyasaye konyo ji omed bedo gi ngima maber moloyo?
• Wayudo gweth e yore mage sama wakonyo jomoko yudo puonj moa kuom Nyasaye?
[Penjo mag Puonjruok]
[Picha manie ite mar 25]
Jogo ma Jehova opuonjo loso riwruok madier mar owete e piny mangima
[Picha manie ite mar 26]
Donge en gweth maduong’ bedo achiel kuom “jotich kaachiel kod Nyasaye”?