Pathian Zirtirna Ropui Bikzia
Pathian Zirtirna Ropui Bikzia
“Krista Isua hriatna ropui bîkzia avângin thil engkim pawh chânnaah ka ruat a ni.”—PHIL. 3:8.
1, 2. Kristian ṭhenkhatte’n eng duhthlanna nge an siam a, engvângin nge?
ROBERT-A chu school a kal ṭan aṭangin zirlai thiam thei tak a ni a. Kum riat mi lek a nihin, a zirtîrtute zînga pakhat chuan an ina va tlawh ngatin, engpawh a ni thei dâwn tih a hrilh a. Zirtîrtunu chuan engtik nîah emaw chuan, damdawi lam thiam doctor a nih a beisei thu a sawi chhuak hial a ni. High-school-a a tih ṭhat êm avângin, an rama university ṭha berte zînga a duhna apianga kal tûrin a tling a. Mahse, Robert-a chuan mi tam takte’n dam chhûnga neih tawh ngai loh tûr hun remchâng ṭha tak anga an ngaih chu chân a, regular pioneer thawh chu a thlang ta zâwk a ni.
2 Robert-a ang bawkin, Kristian a pui a pang tam takte chuan he khawvêlah hian hmasâwn theihna hun remchângte an nei hlawm a. Ṭhenkhat chuan thlarau lam thiltum an ûm theihna tûrin, chûng hun remchângte hman zawh vek loh chu an thlang a ni. (1 Kor. 7:29-31) Robert-a ang Kristiante chu thu hrilhnaa inhmang tûrin engin nge chêttîr? Pathian Jehova an hmangaihna bâkah, Pathian zirtîrna ropui bîkzia an hriatthiamna chuan a chêttîr a ni. Thutak hre lo ni ta la, i awm dân tûr chu tûn hnaiah i ngaihtuah em? Pathian Jehova zirtîra kan awm avânga kan neih malsâwmna ropui tak ṭhenkhat ngaihtuahna chuan chanchin ṭha kan hlutna leh mi dangte hnêna hrilh tûra kan ṭhahnemngaihna chu vawng tûrin min ṭanpui ang.
Pathian Zirtîr Nih Chu Chanvo Ropui Tak A Ni
3. Pathian Jehova chuan mi ṭha famkim lote zirtîr a duh tih engvângin nge kan chian theih?
3 Pathian Jehova chuan a ṭhatna avângin mi ṭha famkim lote zirtîr chu a duh a. Hriak thih Kristiante chungchâng sawi lâwkin, Isaia 54:13 chuan: “I fate zawng zawng chu LALPA zirtîrin an awm ang a, i fate thlamuanna chu nasa tak a ni ang,” a ti. Chûng thua thu bulte chu Krista “berâm dang” tân pawh a hman theih bawk. (Joh. 10:16) Chu chu kan hun laia thleng famkim mêk hrilh lâwkna aṭangin a lang chiang a ni. Isaia chuan hnam zawng zawng zînga mite biakna dik lam pana an kal nguah nguah lai chu inlârnaah a hmu a. Ani chuan anni chu: “LALPA tlângah, Jakoba Pathian inah chuan i chho ang u; tichuan ani’n a kawng chanchinte chu min zirtîr ang a, a kalkawngahte chuan kan kal ang,” tia inbe tawn angin a târ lang a ni. (Is. 2:1-3) Pathian zirtîr nih chu chanvo ropui a va ni êm!
4. Pathian Jehova’n a zirtîra awmte lakah eng nge a phût?
4 Pathian zirtîrna dawng tûrin eng nge kan tih ngai? Thil ngai ber chu thuhnuairawlh leh zirtîr nuam tak nih hi a ni. Fakna hla phuahtu Davida chuan: “LALPA chu a ṭhain a dik a ni. . . . Thuhnuairawhte chu Ama kawng chanchin a zirtîr bawk ang,” tiin a ziak a. (Sâm 25:8, 9) Tin, Isua chuan: “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che,” tiin a sawi a ni. (Lk. 10:21) ‘Inngaitlâwmte hnêna khawngaihna petu’ Pathian lama hîpin i awm a ni lâwm ni?—1 Pet. 5:5.
5. Engtin chauh nge Pathian hriatna kan neih theih?
5 Pathian Jehova chhiahhlawhte kan nih angin, mahni theihna emaw, finna emaw avânga thutak hmuah kan insawi thei ang em? Thei lo vang. Dik takin, keimahni hma lâkna aṭang chuan Pathian hriatna chu kan nei thei ngai lo vang. Isua chuan: “Pa mi tîrtuin a hîp loh chuan tumah ka hnênah an lo kal thei lo vang,” a ti. (Joh. 6:44) Thu hrilhna leh thlarau thianghlim hmangin, Pathian Jehova chuan berâm ang mi, “hnam tinrêng thil duhzâwngte” chu a lamah a hîp a ni. (Hag. 2:7) Pathian Jehova’n a Fapa lama a hîpte zînga mi nih chu a va lâwmawm êm!—Jeremia 9:23, 24 chhiar rawh.
Pathian Zirtîrna Chuan Nun A Siam Ṭha Thei
6. ‘LALPA hriatna’ neihna chuan mite chungah eng nghawng chhinchhiah tlâk tak nge a neih theih?
6 Isaia hrilh lâwkna chuan mithlaa hmuh theih tûr ṭawngkam hmangin kan huna thleng mêk mihringte mize siam ṭhatna chu a sawi a. A hmaa tharum thawh hmangte pawh inremna duh tak an lo ni ta. (Isaia 11:6-9 chhiar rawh.) Hnam leh chi inan loh vâng, a nih loh leh pian leh mûrna inan loh vânga lo inhmêlmâk ṭhînte pawhin inlungrual taka awm dân an zir a ni. Anni chuan an “khandaihte chu leilehna hmâwr zumahte an chher” a tih theih a ni. (Is. 2:4) Chûng insiam ṭhatna chhinchhiah tlâk tak a thlen chhan chu eng nge ni? Mite chuan ‘LALPA hriatna’ an neih a, an nunpui vâng a ni. Pathian chhiahhlawhte chu ṭha famkim lo mah se, anni chuan khawvêl puma inunauna dik tak an nei a. Hmun tina mite hîptu chanchin ṭha leh chu miin rah ṭha a chhuahna chuan Pathian zirtîrna ropui bîkzia a finfiah a ni.—Mt. 11:19.
7, 8. (a) Pathian zirtîrnain mite a chhuah zalênna “kulhpui nghet takte” zînga ṭhenkhat chu engte nge ni? (b) Pathian Jehova zirtîrnain Amah a chawimawi tih engin nge târ lang?
7 Tirhkoh Paula chuan Pathian chhiahhlawhte thu hrilhna chu thlarau lama indona nên a tehkhin a. Ani chuan: “Keini inrâlthuamnate chu tisaa mi a ni si lo va, kulhpui nghet takte ṭhiatna tûra Pathian zârah thil ti thei tak a ni zâwk, hnialnate leh thil sâng tinrêng Pathian hriatna dâl tûra sâng taka siamte chu ṭhiatin,” tiin a ziak a ni. (2 Kor. 10:4, 5) Pathian zirtîrnain mite a chhuah zalênna “kulhpui nghet takte” zînga ṭhenkhat chu engte nge ni? Phur rit tak, zirtîrna dik lo te, puithuna âtthlâk te, mihring finna te chu entîrna ṭhenkhat a ni. (Kol. 2:8) Pathian zirtîrna chuan mite chu thil chîn ṭha lo bân thei tûr leh Pathian duhzâwng miziate nei tûrin a ṭanpui a ni. (1 Kor. 6:9-11) Chu chuan chhûngkaw nun a siam ṭha a. Tin, beiseina nei lote chu nuna thiltum dik tak a pe bawk. Chu chu a ni, tûn laia kan mamawh zirtîrna chu.
8 Pathian Jehova’n mite nei tûra a ṭanpui miziate zînga pakhat chu fel taka awm, a nih loh leh rinawmna a ni a, chu chu a hnuaia thiltawn hian a târ lang a ni. (Heb. 13:18) India rama nu pakhat chuan Bible a zir a, a hnuah chuan baptisma chang lo thuchhuahtu a ni chho va. Ni khat chu Kingdom Hall sakna aṭanga a haw chuan bus chawlh hmun bulah U.S. dollar za riat man lai rangkachak ṭhi chu a chhar a. Rethei hle mah se, police station-ah kalin a neitu zawng tûrin police hnênah a pe a. Chuta police officer chuan mak a ti hle! A hnuah, officer dang chuan, “Engvângin nge he ṭhi hi i rawn pêk kîr leh?” tiin a zâwt a. Ani chuan, “Bible zirtîrna chuan min siam ṭha a, chuvângin mi rinawm ka ni tawh,” tiin a hrilhfiah a ni. A rilru a khawih êm avângin, chu officer chuan station-a kalpuitu Kristian upa hnênah chuan: “He state-ah hian mi maktaduai 38 chuang an awm a. He nu ang ni tûra mi sâwm pawh i ṭanpui theih chuan, chu chu hlawhtlinna nasa tak a ni ngei ang,” a ti a. Pathian zirtîrnain mi maktaduai têlte nun a siam ṭha tih kan ngaihtuah hian, Pathian chawimawi chhan tûr tam tak kan nei a ni lâwm ni?
9. Engtin nge mite’n an nun nasa taka an thlâkthleng theih?
9 Pathian Thuin mite a thlâkthleng theihna leh Pathian Jehova pêk a thlarau thianghlim ṭanpuinain, mite chuan an nun nasa takin an thlâkthleng thei a. (Rom 12:2; Gal. 5:22, 23) Kolossa 3:10 chuan: “Mihring thar chuan in inthuam tawh si a, chu mihring thar chu hriat famkimna nei tûrin, a siamtu anpui anga siam tharin a awm mêk a ni,” tiin a sawi a. Pathian Thu, Bible-a thuchah awm chuan mi chu chhûngrila a nihna tak târ lang tûrin thiltihtheihna a nei a, chu chuan thil engemaw a ngaihtuah dân leh chu mi chungchânga a rilru veizâwng thlengin a thlâkthleng thei a ni. (Hebrai 4:12 chhiar rawh.) Mi chu Pathian Lehkha Thu hriatna dik nei a, Pathian Jehova tehna felte mila nungin, chatuan nun beiseina nei Pathian ṭhian a lo ni thei a ni.
Nakin Hun Atâna Inbuatsaihna
10. (a) Engvângin nge Pathian Jehova chu nakin hun atâna min buatsaih theitu awmchhun a nih? (b) Eng inthlâkthlengna nasa takin nge lei pumpui hi rawn nghawng thuai dâwn?
10 Pathian Jehova chuan nakina thil lo thleng tûrte a hriat theih avângin, amah chauhvin nakin hun atân min buatsaih thei a. Ani chuan mihringte nakin hun beisei tûr chu a siam a ni. (Is. 46:9, 10) Bible hrilh lâwkna chuan “LALPA ni ropui tak chu a hnai” tih a târ lang. (Zep. 1:14) Chu mi nî chungchângah, Thufingte 11:4 thu chu a thleng dik ang: “Thinur nî chuan sum leh paiin ṭangkaina a nei lo vang, felna erawh chuan thihna ata a chhan chhuak ang,” tih chu. Setana khawvêl chunga Pathian Jehova rorêlna a lo thlen huna thil pawimawh ber tûr chu Pathian pawm nihna hi a ni a. Sum leh pai chuan hlutna rêng a nei lo vang. Dik takin, Ezekiela 7:19 (C.L. Re-edited) chuan: “An tangkate chu khawlaiah an paih ang a, an rangkachakte pawh thil bawlhhlawh ang a ni ang,” a ti. Chu mi lo hriat lâwkna chuan tûna fing taka thil ti tûrin min ṭanpui thei a ni.
11. Pathian zirtîrnain nakin hun atâna min buatsaih dân kawng khat chu eng nge ni?
11 Pathian Jehova ni ropui atâna Pathian zirtîrnain min buatsaih dân kawng danglam bîk tak pakhat chu, kan thil ngaih pawimawh tûrte indawt dân siam tûra min ṭanpui hi a ni. Tirhkoh Paula chuan Timothea hnênah: ‘He mi khawvêla hausate hi chapo lo tûr leh sum rinawm lovah hian an beiseina nghat lo . . . tûrin zilh rawh,’ tiin lehkha a ziak a. Hausa lo mah ila, Pathian thâwk khum he zilhna thu hi kan hlâwkpui thei tho a ni. Chutah chuan eng nge tel? Khawvêl sum leh paite khâwlkhâwm ai chuan, ‘thil ṭha tih’ leh “thil ṭha tih ngah” chu kan tum tlat tûr a ni. Kan nuna thlarau lam thil kan dah hmasak chuan, ‘hun lo thleng tûr atâna lungphûm ṭha tak kan tâna khâwl khâwm’ kan ni ang. (1 Tim. 6:17-19) Chutianga mahni inphatna nun kawng chuan finna kan neihzia a târ lang a ni; Isua chuan: “Miin khawvêl hi a pumin nei sela, a nun chân si sela, a tân engnge sâwt ang?” a ti si a. (Mt. 16:26, 27) Jehova nî hnaih tawhzia han ngaihtuah hian: ‘Khawiah nge ro ka khâwl khâwm? Pathian rawng nge ka bâwl a, Sum rawng?’ tiin kan ngaihtuah ṭheuh tûr a ni.—Mt. 6:19, 20, 24.
12. Mi ṭhenkhatin kan rawngbâwlna an hmuhsit pawhin engvângin nge kan lunghnual loh vang?
12 Pathian Thuin Kristiante tih atâna a târ lan ‘thil ṭha tihte’ zînga pawimawh ber chu nun chhanhim thei Lalram thu hrilhna leh zirtîra siamna hi a ni a. (Mt. 24:14; 28:19, 20) Kum zabi khatna ang bawkin, ṭhenkhat chuan kan rawngbâwlna chu an hmusit mai thei. (1 Korinth 1:18-21 chhiar rawh.) Mahse, chu chuan kan thuchah ken hlutna chu a tidanglam lo va, hun a la awm laia mi zawng zawng hnêna rinna neih theihna hun remchâng pêk a pawimawhna pawh a tinêp chuang hek lo. (Rom 10:13, 14) Pathian zirtîrna hlâwkpui tûra mi dangte kan ṭanpui chuan, malsâwmna tam tak kan dawng ang.
Inpêkna Avânga Malsâwmna
13. Tirhkoh Paula chuan chanchin ṭha avângin eng thilte nge a chân?
13 Kristian a nih hma khân, tirhkoh Paula chuan Juda kal hmanga mi hlawhtling tak ni tûrin zirtîrna a dawng a. Kum 13 vêl a nih hma pawhin, Dân lama zirtîrtu ngaihsân hlawh tak Gamaliela hnuaia zir tûrin a khua Tarsa aṭangin Jerusalem a pan a ni. (Tirh. 22:3) A hnuah chuan, Paula chu a dam rualpuite zîngah a lo langsâr ta a, chu nun kawng chu zawh zêl sela chuan Juda sakhuaa mi challang tak pawh a ni ve ngei ang. (Gal. 1:13, 14) Chanchin ṭha pawma thu a han hrilh ṭan chuan, chûng zawng zawng chu a kalsan vek a ni. Paula chu a thu tlûkna siam avângin a inchhîr em? Inchhîr lo. Heti hian a ziak zâwk a ni: “Ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah avângin thil zawng zawng ka chân ta vek a, chûng chu hnâwmhneah lek ka ngai,” tiin.—Phil. 3:8.
14, 15. “Pathian hnathawhpuite” kan nih angin eng malsâwmna nge kan dawn?
14 Paula ang bawkin, tûn laia Kristiante chuan chanchin ṭha avângin thil tam tak an chân a. (Mk. 10:29, 30) Chutianga kan tih avângin kan tlâkchham phah em? Atîra kan târ lan tâk, Robert-a chuan: “Engti kawng mahin ka inchhîr ngai lo. Hunbi kima rawngbâwlna chuan hlimna leh lungawina min pe a; tin, chu chuan ‘Jehova ṭhatzia min temtîr a ni.’ Thlarau lam thiltumte ûm tûra khawvêl lam thil ka hawisan apiangin, Pathian Jehova chuan ka chân aia tam min pe ṭhîn a. Chân nei miah lo ang ka ni. Ka neih belh zâwk ṭhîn si a!” a tih hian, mi tam tak tân thu a sawi a ni.—Sâm 34:8; Thuf. 10:22.
15 Thu hrilh leh zirtîr siamnaah hun engemawti chhûng i lo tel tawh a nih chuan, nang pawhin Pathian Jehova ṭhatzia tem chhin theihna hun remchâng i nei ang tih chu rinhlelh rual a ni lo. Mi dangte hnêna chanchin ṭha i hrilh laia thlarau ṭanpuina dawng nia inhriat châng i nei em? Chanchin ṭha pawm tûra Pathian Jehova’n an thinlung a tihvârsak avânga mite hmêla hlimna lo lang chu i hmu tawh ngai em? (Tirh. 16:14) I rawngbâwlna zauh thei tûra kawng hawnsak emaw chein, Pathian Jehova’n harsatna hmachhawn thei tûrin a ṭanpui che em? Harsatna i tawh hunah a ṭanpui chein, i chauh hle lai pawhin a rawngbâwl zawm zêl tûrin a tichak che em? (Phil. 4:13) Kan rawngbâwlnaa Pathian Jehova ṭanpuina a mi mal taka kan dawn hian, amah chu kan tân a tak zualin, hnaih lehzual nia inhriatna kan nei a ni. (Is. 41:10) Pathian zirtîrna hna ropui taka “Pathian hnathawhpuite” zînga mi nih theih chu malsâwmna a ni lâwm ni?—1 Kor. 3:9.
16. Pathian zirtîrna nêna inkûngkaiha i thawhrimna leh i inpêkna chu engtin nge i ngaih?
16 Mi tam tak chuan an dam chhûngin thil engemaw lian tham tak hlen chhuah an inbeisei a. Tûn lai khawvêla hlawhtlinna langsâr tak takte pawh a hnu lawkah chuan theihnghilh leh mai a ni ṭhîn tih kan hria. Amaherawhchu, Pathian Jehova’n a hming tihthianghlimna nêna inkûngkaih tûn laia hna a hlen chhuah chu theocratic thilthleng chanchin zînga mi anga kumkhuaa vawn ṭhat a ni ang tih rinhlelh rual a ni lo. Chûng chu chatuana hriat reng a ni ang. (Thuf. 10:7; Heb. 6:10) Chuvângin, kumkhuaa theihnghilh tawh loh tûr Pathian zirtîrna hnaa tel theihna chanvo chu i hlut hle ang u. (w09 9/15)
Engtin Nge Kan Chhân Ang?
• Pathian Jehova chuan a zirtîra awmte lakah eng nge a phût?
• Engtin nge Pathian zirtîrna chuan mite nun a siam ṭhat?
• Pathian zirtîrna hlâwkpui tûra mi dangte kan ṭanpuina aṭangin eng ang malsâwmnate nge kan dawn?
[Zirlai Atâna Zawhnate]
[Phêk 26-naa milem]
Pathian zirtîra awmte chuan khawvêl puma inunauna dik tak an siam
[Phêk 27-naa milem]
“Pathian hnathawhpuite” zînga mi nih theih chu malsâwmna a ni lâwm ni?