E Balor Superior di Edukashon Divino

“Mi ta konsiderá tur kos komo pièrdè kompará ku e balor superior di konosé Kristu Hesus.”—FIL. 3:8.

1, 2. Kiko algun kristian a skohe pa hasi, i dikon?

FOR di chikitu, Robert tabata siña bon na skol. Ora e tabatin apénas ocho aña di edat, un di su maestranan a bishit’é na kas i a bis’é ku lo e por logra kiko ku e kier i ku e ta karga speransa ku un dia Robert lo bira un dòkter. Robert tabata siña asina bon na skol sekundario ku lo e por a bai kualke un di e mihó universidatnan den su pais. Pero dor ku Robert kier a bira un pionero regular, el a disidí di renunsiá loke hopi hende ta konsiderá un oportunidat úniko ku kisas nunka mas lo e haña.

² Meskos ku Robert, hopi kristian, tantu hóben komo bieu, tin oportunidat pa bai dilanti den e sistema di kosnan aktual. Algun di nan ta skohe pa no hasi uso kompletamente di e oportunidatnan ei dor ku nan ke logra nan metanan spiritual. (1 Kor. 7:29-31) Kiko ta motivá kristiannan manera Robert pa traha duru den e trabou di prediká? E motibu prinsipal ta ku nan ta stima Yehova i ademas nan ta apresiá e balor superior di edukashon divino. Abo a pensa últimamente riba kon bo bida lo ta si bo no a haña e bèrdat? Loke por yuda nos mantené nos apresio pa e bon nobo i kompartié ku entusiasmo ku otro hende ta ora nos ta reflekshoná riba algun di e bendishonnan sobresaliente ku nos tin dor ku nos a ser siñá pa Yehova.

Ta un Privilegio pa Ser Siñá pa Yehova

3. Dikon nos por ta sigur ku Yehova ta dispuesto pa siña hende imperfekto?

³ Den su bondat, Yehova ta dispuesto pa siña hende imperfekto. Papiando den sentido profétiko tokante kristiannan ungí, Isaias 54:13 ta bisa: “SEÑOR lo siña tur bo yu hòmbernan, i e prosperidat di bo yu hòmbernan lo ta grandi.” E palabranan ei en prinsipio ta apliká tambe na e “otro karnénan” di Kristu. (Juan 10:16) Un profesia ku ta kumpliendo den nos dia ta mustra esaki bon kla. Den un vishon, Isaias a mira hende di tur nashon ta basha bai na adorashon berdadero. Nan tabata papia ku otro, bisando: “Ban, laga nos subi bai na e seru di SEÑOR, na e kas di e Dios di Jakòb, pa e siña nos tokante di su kamindanan, i pa nos kana den su bereanan.” (Isa. 2:1-3) Esta un privilegio pa ser siñá pa Yehova!

4. Kiko Yehova ta rekerí di esnan ku e ta siña?

⁴ Kiko nos mester hasi pa nos por haña edukashon divino? Un rekisito prinsipal ta ku bo mester ta humilde i dispuesto pa siña. E salmista David a skirbi: “SEÑOR ta bon i rekto; . . . E ta siña e humildenan su kaminda.” (Sal. 25:8, 9) I Hesus a bisa: “Mi ta alabá bo, o Tata, Señor di shelu i tera, ku bo a skonde e kosnan akí pa sabínan i inteligentenan i a revelá nan na mucha chikitu.” (Luk. 10:21) Bo no ta sinti bo atraí na un Dios ku “ta duna grasia na e humildenan”?—1 Ped. 5:5.

5. Kon ta e úniko manera ku nos por a haña konosementu di Dios?

⁵ Komo sirbidónan di Yehova, nos por bisa ku nos a konosé e bèrdat debí na nos propio abilidatnan òf sabiduria? Nò. En realidat, riba nos mes, nunka nos lo no a haña konosementu di Dios. Hesus a bisa: “Ni un hende  no por bin serka mi, si no ta e Tata ku a manda mi a hal’é.” (Juan 6:44) Pa medio di e trabou di prediká i mediante spiritu santu, Yehova ta atraé hende semehante di karné, es desir, “e rikesa di tur nashon.” (Hag. 2:7) Bo no ta kontentu di ta un di esnan ku Yehova a atraé na su Yu?—Lesa Jeremias 9:23 i 24.

E Poder pa Mehorá Bida

6. Ki efekto remarkabel ‘konosementu di Yehova’ por tin riba hende?

⁶ Usando idioma figurativo, Isaias su profesia ta deskribí den un manera masha bunita e transformashon di hende su personalidat ku ta tuma lugá den nos tempu. Hende ku tabata violento a bira pasífiko. (Lesa Isaias 11:6-9.) Personanan ku un tempu tabata enemigu di otro pa motibu di rasa, nashonalidat, tribu òf kualke otro diferensia kultural a siña biba huntu den armonia. Na moda di papia, “nan a bati nan spadanan traha plug ku nan.” (Isa. 2:4) Kon bin e kambionan remarkabel akí ta tuma lugá? Esei ta dor ku hende ta atkerí ‘konosementu di Yehova’ i ta aplik’é den nan bida. Maske Dios su sirbidónan ta imperfekto, huntu nan ta forma un berdadero hermandat internashonal. Loke ta proba klaramente ku edukashon divino tin un balor superior ta e echo ku e bon nobo ta atraé hende rònt mundu i ta produsí bon fruta.—Mat. 11:19.

7, 8. (a) Kiko ta algun di “e kosnan fuertemente ankrá” ku edukashon divino a yuda hende basha abou? (b) Kiko ta mustra ku edukashon divino ta trese alabansa pa Yehova?

⁷ Apòstel Pablo a kompará e ministerio di Dios su sirbidónan ku un guera spiritual. El a skirbi: “E armanan ku nos ta batayá kuné no ta karnal, ma poderoso den Dios pa basha [“e kosnan fuertemente ankrá,” NW] abou, i pa destruí spekulashonnan i tur arogansia ku ta wòrdu lantá kontra e konosementu di Dios.” (2 Kor. 10:4, 5) Kiko ta algun di “e kosnan fuertemente ankrá” ku edukashon divino ta libra hende di dje? Siñansa falsu, superstishon i filosofia di hende, pa menshoná djis algun di nan. (Kol. 2:8) Edukashon divino ta yuda hende stòp di hasi loke ta malu i kultivá kualidatnan ku ta agradá Dios. (1 Kor. 6:9-11) E ta mehorá bida di famia. I e ta duna hende sin speransa un berdadero propósito den bida. Esaki ta e tipo di edukashon ku hende tin mester di dje awendia.

⁸ Un di e kualidatnan ku Yehova ta yuda hende desaroyá ta onestidat, manera e siguiente eksperensia ta mustra. (Heb. 13:18) Un señora na India a aseptá un estudio di Beibel i ku tempu el a bira un publikadó no-batisá. Un dia ora e tabata bai kas despues di a traha riba un Salòn di Reino ku tabata den konstrukshon, el a mira un kadena di oro ku tabata bal ocho shen dòler bentá abou den bisindario di un terminal di bùs. Maske e tabata pober, el a hiba e kadena warda di polis. E agente polisial no por a kere su bista! Despues, un otro polis a puntr’é, “Dikon bo a disidí di trese e kadena?” El a splika e polis, “Loke mi a siña for di Beibel a hasi mi bira un hende onesto awor.” Impreshoná, e polis a bisa e ansiano kristian ku a kompañá e publikadó: “Tin mas ku 38 mion hende ta biba den e Estado akí. Si boso por yuda dies hende bira manera e señora akí, esei lo ta un logro grandi.” E echo ku edukashon divino a mehorá miónes di bida, no ta duna nos sufisiente motibu pa alabá Yehova?

9. Kiko por yuda hende hasi kambionan grandi den nan bida?

⁹ E poder di e Palabra di Dios, huntu ku e yudansa ku Yehova ta proveé mediante su spiritu santu, ta yuda hende hasi kambionan grandi den nan bida. (Rom. 12:2; Gal. 5:22, 23) Kolosensenan 3:10 ta bisa: “Bisti e hende nobo ku ta wòrdu renobá den un konosementu berdadero segun e imágen di Esun ku a kre’é.” E mensahe den  Beibel tin poder pa revelá kon un hende ta realmente di paden, i e por kambia e hende su manera di pensa i asta kon e ta sinti tokante kosnan. (Lesa Hebreonan 4:12.) Un hende ku atkerí konosementu eksakto di e Skritura i biba na armonia ku Yehova su normanan hustu por bira amigu di Dios, ku e ekspektativa di biba pa semper.

Yehova Ta Prepará Nos pa Futuro

10. (a) Dikon Yehova ta e úniko persona ku por yuda nos prepará pa futuro? (b) Ki kambionan drástiko lo afektá henter mundu pronto?

¹⁰ Yehova ta e úniko persona ku por yuda nos prepará pa futuro pasobra e sa kiko ta bai sosodé. E sa kon futuro di humanidat en general lo ta. (Isa. 46:9, 10) Profesia di Beibel ta revelá ku “e gran dia di SEÑOR ta serka.” (Sof. 1:14) Relashoná ku e dia ei, e palabranan di Proverbionan 11:4 lo resultá di ta sierto: “Rikesa no ta di probecho den e dia di rabia, ma hustisia ta libra for di morto.” Ora e tempu yega pa Yehova ehekutá su huisio riba Satanas su mundu, e kos mas importante lo ta pa nos tin Dios su aprobashon. Plaka lo no tin balor. De echo, Ezekiel 7:19 ta bisa: “Nan lo tira nan plata riba kaya, i nan oro lo bira un kos di horor.” E echo ku nos sa esaki por yuda nos aktua na un manera sabí for di awor.

11. Kua ta un manera ku edukashon divino ta yuda nos prepará pa futuro?

¹¹ Un manera spesífiko ku edukashon divino ta prepará nos pa e dia di Yehova ta dor di yuda nos pone prioridatnan apropiá. Apòstel Pablo a skirbi Timoteo: “Instruí esnan ku ta riku den e mundu aktual pa nan no ta sobèrbè i pa nan no fiha nan speransa riba e insiguridat di rikesa, ma riba Dios.” Asta si nos no ta riku, nos por benefisiá di e konseho divino akí. Kon asina? En bes di akumulá kosnan material, nos mester hasi esfuerso “pa hasi bon” i ‘pa ta riku den bon obra.’ Ora nos ta pone kosnan spiritual na promé lugá den nos bida, nos ta ‘montoná pa nos mes e tesoro di un bon fundeshi pa futuro.’ (1 Tim. 6:17-19) Un bida di sakrifisio propio asina ta reflehá sabiduria práktiko, pasobra manera Hesus a bisa, “ki probecho un hende lo tin si e gana henter mundu, ma pèrdè su alma?” (Mat. 16:26, 27) En bista ku e dia di Yehova ta serka, ta bon pa kada un di nos puntra su mes: ‘Na unda mi ta montoná tesoro? Mi ta sirbi Dios òf Rikesa?’—Mat. 6:19, 20, 24.

12. Dikon nos no mester laga e echo ku algun hende ta menospresiá nos ministerio desanimá nos?

¹² Un di e ‘bon obranan’ di mas importante ku e Palabra di Dios ta bisa ku kristiannan mester hasi ta e trabou di prediká e Reino i hasi disipel, ya ku e ta un trabou di salba bida. (Mat. 24:14; 28:19, 20) Meskos ku den promé siglo, algun  hende kisas ta menospresiá nos ministerio. (Lesa 1 Korintionan 1:18-21.) Pero esei no ta kambia e balor di nos mensahe, ni e no ta minimisá e importansia di duna tur hende e oportunidat di pone fe den e mensahe miéntras tin tempu ainda. (Rom. 10:13, 14) Segun ku nos ta yuda otro hende benefisiá di edukashon divino, nos lo risibí hopi bendishon.

Yehova Ta Bendishoná Esnan Ku Hasi Sakrifisio

13. Ki sakrifisio apòstel Pablo a hasi pa e bon nobo?

¹³ Promé ku el a bira kristian, apòstel Pablo a haña preparashon p’e bira un persona eksitoso den e sistema di kosnan hudiu. Probablemente e no tabatin mas ku 13 aña ora el a muda for di su stat natal Tarso pa bai biba na Yerusalèm p’e haña edukashon for di Gamaliel, un maestro di Lei sumamente respetá. (Echo. 22:3) Ku tempu, Pablo a kuminsá destaká entre su kontemporáneonan, i si el a sigui den e rumbo ei, lo el a bira un persona prominente den hudaismo. (Gal. 1:13, 14) Ora el a aseptá e bon nobo i a kuminsá prediká, e tabata dispuesto pa bandoná tur esei. Pablo a lamentá ku el a tuma e desishon ei? Nò. De echo, el a skirbi: “Mi ta konsiderá tur kos komo pièrdè kompará ku e balor superior di konosé Kristu Hesus mi Señor, pa kende mi a sufri pièrdè di tur kos, i ta konsiderá nan komo basura.”—Fil. 3:8.

14, 15. Ki bendishonnan nos ta haña komo “Dios su kolaboradónan”?

¹⁴ Meskos ku Pablo, kristiannan di awendia ta hasi sakrifisio pa nan kompartí e bon nobo. (Mar. 10:29, 30) Nos ta pèrdè algu hasiendo esei? Robert, kende nos a menshoná na prinsipio, tin e mesun opinion ku hopi otro kristian. El a bisa: “Mi no tin niun tiki duele. E sirbishi di tempu kompletu a duna mi hopi goso i satisfakshon, i el a laga mi ‘purba i mira ku Yehova ta bon.’ Ki ora ku mi a hasi sakrifisionan material pa logra metanan spiritual, Yehova a bendishoná mi mas di loke mi a sakrifiká. Ta komo si fuera mi no a hasi sakrifisio. Ta gana so mi a gana!”—Sal. 34:8; Pro. 10:22.

¹⁵ Si bo ta partisipá den e trabou di prediká i siña hende pa algun tempu kaba, sin duda abo tambe a haña e oportunidat di purba i mira ku Yehova ta bon. Bo a yega di sinti yudansa di su spiritu santu ora bo tabata prediká e bon nobo? Bo a yega di mira  hende su kara kuminsá bria segun ku Yehova a habri nan kurason pa nan presta atenshon na e mensahe? (Echo. 16:14) Yehova a yuda bo vense opstákulo, kisas dor di habri kaminda pa bo por hasi mas den sirbishi? El a sostené bo den tempunan difísil pa bo por a sigui sirbié ora bo tabata sinti ku bo no tabata por mas? (Fil. 4:13, NW) Ora ku personalmente nos ta eksperensiá Yehova su yudansa na momento ku nos ta kumpli ku nos ministerio, e ta bira mas real pa nos i nos ta hala mas serka dje. (Isa. 41:10) No ta un bendishon pa ta un di “Dios su kolaboradónan” den e gran trabou di edukashon divino?—1 Kor. 3:9.

16. Kiko bo ta pensa di e esfuerso i sakrifisionan ku bo ta hasi en konekshon ku edukashon divino?

¹⁶ Hopi hende ta spera di logra algu di balor duradero den nan bida. Nos ta nota ku hende ta lubidá masha lihé asta riba logronan sobresaliente den e mundu di awendia. Sinembargo, e trabou di tempu moderno ku Yehova ta logrando pa santifiká su nòmber lo keda permanentemente registrá den historia teokrátiko di su pueblo. E obranan akí lo no pasa pa olvido. (Pro. 10:7; Heb. 6:10) Laga nos balorá nos privilegio di por partisipá den e trabou di edukashon divino ku nunka lo no ser lubidá.

Kon Lo Bo Kontestá?

• Kiko Yehova ta rekerí di esnan ku e ta siña?

• Kon edukashon divino ta mehorá bida di hende?

• Ki bendishon nos ta haña ora nos yuda otro hende benefisiá di edukashon divino?

[Preguntanan di Estudio]

[Plachi na página 26]

Tur esnan ku Yehova a siña ta forma un berdadero hermandat internashonal

[Plachi na página 27]

No ta un bendishon pa ta un di “Dios su kolaboradónan”?