“E liluut el kmal mo omdasu a rokuil tekoi el kmo ngsong er ngak, el sel ngarbab el klungiolel a klemedengei el medengelii a Kristus Jesus.”​—FILIPI 3:8.

1, 2. A rebebil el Kristiano te melilt el mo mekerang, e ngera uchul?

 A ROBERT a kmal mle mellomes a rengul er a lekekerei. A ta er a resensei er ngii a mlo er a blil er a dirk lecheai a rekil e dilu er ngii el kmo ngsebechem el mo er a ngii di el ureor el soam sel bo mklou el chad. Ngika el sensei a millatk el kmo a Robert a sebechel el mo toktang er a ta er a klebesei. A rokui el teng er ngii er a high skuul a kmal mle ungil me ngmle sebechel el mo soiseb er a ngii di el ngar er a bab el skuul er a belual. Me nguaisei, engdi a Robert a millilt el mo soiseb er a mui el taem el omesiou, e bai dimlak el kengei el mo er a ngar er a bab el skuul, el ngii a lulemes er ngii a rebetok el kmo ngkmal ileakl el techall.

² A rebetok el Kristiano el meklou me a remekekerei a ua Robert el ngar er ngii a techellir el mo er a ungil el ureor er a chelsel tia el blekeradel er a beluulechad. A rebebil a kongei el chemoit aika el techall me bo el sebechir el oltaut a turrekong er tir er a klereng. (1 Korinth 7:29-31) Ngerang a rullii a Kristiano el mo ua Robert el kongei el mo meringel el oureor el kirel a berkel a klumech? A bltkil a rengrir el mo er a Jehovah me tir el mla mo medengelii a ngar er a bab el klungiolel a osisecheklel a uchul, me te meruul el uaisei. Kau ke mla ta el molatk el kmo ngmo ua ngerang a klengar er kau oleko ngdimlak bo modengelii a klemerang? Sel dolatk aike el betok el klengeltengat el doldeu a rengud er ngii e le kid el mlosisechakl er a Jehovah, e ngngosukid el mo melemolem el oba omereng el saul el kirel tia el ungil el chais e dirrek el mo blak a rengud el ouchais er ngii el mo er a rebebil.

Ngkmal Mekreos el Tekoi Sel Demosisechakl er a Dios

3. Ngera me ngulterekokl a rengud el kmo a Jehovah a kongei el olsisechakl er a rediak el mecherrungel el chad?

³ A ungil el blekerdelel a Jehovah a uchul me ngkongei el mo olisechakl er a rediak el mecherrungel el chad. A Isaia 54:13 a ulemlaoch el kirir a rengellitel el Kristiano el kmo: “Ngdi ngak [el Jehovah a] mo olisechakl er a re chedam, e mesterir a klengeltengat ma budech.” Aika el tekoi a dirrek el melutk er tirke el ‘ngodech el chermel’ a Kristus el sib. (Johanes 10:16) Tiang a kmal bleketakl er a ulaoch el toutang er a taem er kid. El ngar er a ues, e a Isaia a milsterir a rechad er a rokui el renged el merael el mo soiseb er a mera el omengull. Ngmelekoi el kmo te chadecheduch er a delongelir el kmo: “Bo dengasech er a bukl er a RUBAK, el mor a Templo er a Dios er a Israel. Kede mo mesuub er sel soal a doruul er ngii; kede mo merael er a ikel rael el bla lengilt.” (Isaia 2:1-3) Ngkmal mekreos el techall a demosisechakl er a Dios!

4. Ngera kired el meruul me bo el sebeched el ngmai a osisechakl er a Jehovah?

⁴ Ngera kired el meruul me bo el sebeched el ngmai a osisechakl er a Jehovah? Ngkmal kirel a chad el mo ngar er a eou a rengul. A David a milluches er a Psalm el kmo: “A RUBAK a ungil e melemalt; . . . Ng omekrael er a re ngariou a rengrir er a llemalt, e olisechakl er tir er a rolel.” (Psalm 25:8, 9) Me a Jesus a dilu el kmo: “Chedam, el Rubak ra eanged ma chutem, ak uldanges er kau, le ke milart a ikal tekoi rar mellomes a rengrir mar bekudasu, e ulecholt rar tolechoi.” (Lukas 10:21) Sel dodengei el kmo a Dios a “omsterir a grazia ar ngariou a rengrir,” e  ngrullid el mengal mo betik a rengud er ngii.​—1 Petrus 5:5.

5. Ngera ngilsukid el mo medengelii a Dios?

⁵ Kid a dimlak di loeak a duch me a llomeserreng er kid e bo dodengelii a klemerang e bo demesiungel a Jehovah. Me ngkmal dimlak el sebechel di klemedengei er kid e bo dodengelii a Dios. A Jesus a dilu el kmo: “Ngdiak a chad el sebechel mer ngak a lak le ngikel ulderchak el Chedam a kursii.” (Johanes 6:44) Ngoeak a berkel a klumech me a chedaol el reng er a Jehovah e ngmengurs er tirke el sib er ngii, el tir a “mekreos el klalo er a rokui el beluu.” (Hagai 2:7) Me kede mereng a sulel a Jehovah el milengurs er kid el mo kmeed er a Ngelekel.​—Monguiu er a Jeremia 9:23, 24.

A Osisecheklel a Dios a Ngar er Ngii a Klisichel el Melodech a Klengar

6. Ngera el klungiaol a sebechir a rechad el ngmai sel lenguu a “klemedengei er a RUBAK”?

⁶ A ulochel a Isaia a ousbech a ungil el okesiu el mesaod el kirel a blekerdelir a rechad el mla mengodech er a chelecha el taem. A remle mekngit el chad er a ngar er a mong a mla mo chad er a budech. (Monguiu er a Isaia 11:6-9.) Tirke el mle kaucheraro e le te mla er a kakerous el beluu me a kebliil me a siukang a mla mo dmak el kiei el ngar er a budech. Me ngsebeched el melekoi er tir el kmo te mla “remot a saider er tir el mo osib.” (Isaia 2:4) Ngera uchul tia el klou el omeldechel a klengar? A rechad a mla ngmai a “klemedengei er a RUBAK” e dirrek el oltaut er a chelsel a klengar er tir. Me alta e a remesiungel a Dios a diak el mecherrungel el chad, engdi te toketekii a mera el klodam el meliuekl er a beluulechad. Tia el ungil el chais el kmal olechau a reng, me a ungil el rodech el loltobed, a meketeklii a ngar er a bab el klungiolel a osisechakl el dengai er a Dios.​—Matteus 11:19.

7, 8. (a) Ngera bebil er a “cheuatel” el sebechel a osisecheklel a Dios el mo ngubeteterir a rechad er ngii? (b) Ngera olecholt el kmo a osisecheklel a Jehovah a mo uchul a omengebkall el mo er ngii?

⁷ A apostol el Paulus a ulemekesiu er a urerir a remesiungel a Dios el berkel a klumech el ua loumekemad er a Satan. Ngdilu el kmo: “Le klekedall er kemam ra mekemad a diak le klalo ra klechad, e ngbai ngarngii a klisichel er medal a Dios el toruud cheuatel. Ma ki toruud a ikel klaititekangel er chomesaod ma bek el kldidai lomtok ra klemedengei ra Dios.” (2 Korinth 10:4, 5) Ngerang a bebil er a “cheuatel” el sebechel a osisecheklel a Dios el ngubeteterir a rechad er ngii? A bebil er ngii a klsuul el osisechakl me a uldedelid el tekoi el mo uchul a kerior me a klungiaol me a uldesuir a rechad. (Kolose 2:8) A osisecheklel a Dios a ngosuterir a rechad el mo melodech aike el mekngit el blekerdelir e mo omekeroul aike el blekeradel el odeuir a rengul a Dios. (1 Korinth 6:9-11) Ngtoketek a ungil el klengar er a telungalek, e dirrek el mesterir tirke el dikea omeltkir a omelatk er a mera el klengar. Me kede mera el ousbech er a osisecheklel a Dios er a chelecha el taem.

⁸ A Jehovah a ngosuterir a rechad el mo meruul a llemalt, el ua lolecholt tia el tekoi el dilubech. (Hebru 13:18) A ta er a redil er a  India a kilengei el mo mesuub er a Biblia e mlo ta er a dirkak el metecholb el mla mo omerk er a klumech. A uriul er a lemereko el olengeseu er a ureor er a okedecherul a Kingdom Hall, e ngmirrael el mo remei e miltik er a kolt el olbiungel el bekord el eai el dart a cheral el udoud er a Merikel, er a bita er a blil a bas. Me alta e ngmle chebuul engdi ngngiluu tia el klalo el mo er a blil a bulis, el mlo uchul e ngkmal mlo mechas a rengul a bulis! Me a uriul e a kuk ta er a bulis a uleker er ngii el kmo, “Ngera uchul me ke mirruul er tia el tekoi?” Me ngii el dil a dilu el kmo, “Ngomesubek er a Biblia a uchul me ngsoak el meruul a llemalt er a chelechang.” Me ngika el bulis a dilu er ngike el odam el ulebengkel ngika el redil el mong el kmo: “Tia el beluu a ngar er ngii a 38 el milliol el chad er ngii. A lsekum e ngsebechem el ngosuterir a reteruich el chad el mo uai ngika el redil e ngkmal mo uchul a klou el ungil el tekoi.” Me sel dolatk a betok el klengar er a rechad el mla mengodech el tiaikid el osisecheklel a Dios a uchul, e ngmera el ngar er ngii a ungil el uchul e kede mengebkall er a Jehovah.

9. Ngmekerang e sebechir a rechad el ngmodech a klengar er tir?

⁹ Tia el klisichel a Tekingel a Jehovah, el uldimukl er a ngelsuil a chedaol el reng er ngii, a ngosuterir a rechad el mo ngmodech a blekerdelel a klengar er tir. (Rom 12:2; Galatia 5:22, 23) A Kolose 3:10 a kmo: “Me ko mla mukbeches el oltirakl a teletelel ngikel ulemeob er ngikel beches el chad, me ko mla oubail er ngikel beches el chad el mora meral klemedengei.” Tia el klumech el debetik er ngii er a Tekingel a Dios el Biblia, a sebechel el ochotii a mera el blekerdelel a chad, e dirrek el sebechel el ngodechii a uldesuel me a osengel el kirel a tekoi. (Monguiu er a Hebru 4:12.) A chad a sebechel el mo sechelil a Dios e mo er ngii a omeltkel el kiei el diak a ulebengelel er tia el chutem, sel bo lodengei a omellach er a Biblia e lengedechii a klengar er ngii el mo oltirakl er a Jehovah.

A Jehovah a Ngosukid el Kutmeklid el Kirel a Ngar er a Medad el Taem

10. (a) Ngera uchul me ngdi ta el Jehovah a sebechel el ngosukid el kutmeklid el kirel a ngar er a medad el taem? (b) Ngera el klou el omelodech a kmedu el mo er ngii er tia el beluulechad?

¹⁰ Ngdi ta el Jehovah a sebechel el ngosukid el kutmeklid el kirel a ngar er a medad el taem, e le ngdi ngii el tang a medengei aike el mo duubech el kirel a klechad. (Isaia 46:9, 10) A ulaoch er a Biblia a meketeklii el kmo a “kloul sils er a RUBAK a kmedang.” (Sefania 1:14) A Osisechakl 11:4 a melekoi el kirel sel sils el kmo: “A kerruul a diak a ngeral le rellii er a sils er a cheldechuderreng, ngdi llemalt a olsobel er a kodall.” Ngkmal klou a ultutelel el denguu a kengei er a Jehovah er a uchei er a lemei sel temel el mo oukerrekeriil er tia el beluulechad er a Satan. A udoud a mo diak a belkul el ua losaod a Esekiel 7:19 el kmo: “Te mo mengoit a kolt ma silber er tir er a rael.” Me a klemedengei er kid el kirel tiang a sebechel el ngosukid el mo ungil el melilt a tekoi.

11. Ngerang a ta el rolel e a osisecheklel a Jehovah a ngosukid el mo kltmokl el kirel a ngar er a medad el taem?

¹¹ A ta el ileakl el rolel a osisecheklel a Jehovah a ngosukid el mo kltmokl el kirel a sils er ngii, a sel doterekokl aike el meklou a ultutelel el tekoi er a klengar er kid. A apostol el Paulus a milluches el mo er a Timoteus el kmo: “Mongelechel rar  merau er tial belulechad, me lak le borbab a rengrir, ma ka lulsirs chomeltkir ra diak lulterekokl kerruul, e bai lolsirs chomeltkir ra Dios.” Me alta e ngdiak el betok a ududed, engdi ngsebeched el ngmai a klungioled er a uleklatk er a Jehovah. Me tiang a uldimukl er a ‘doruul a ungil’ e bo ‘demerau ra ungil lurreor’ er a bai dongudel a kerruul er kid. Me a denguu a omesiunged el mo er a Jehovah el mo kot er a klengar er kid, e kede sumecheklii a ungil el omekedecheraol el kirel a ngar er a medad el taem. (1 Timoteus 6:17-19) A choua tia el omeruul a olecholt er a ungil el omelilt er kid el ua lolekoi a Jesus el kmo, “le ngera blkul ra chad a le kerekerengii a belulechad el rokir e loridii a klengar er ngii?” (Matteus 16:26, 27) Me sel domes er tia el sils er a Jehovah el olekedang, e a derta er kid a kired el di kid el oker el kmo: ‘Ngak ak mengudel a kerruul er ker? Ngak ak mesiou er a Dios me a lechub e ngkerruul?’​—Matteus 6:19, 20, 24.

12. Ngera uchul me ngdiak el kired el mo mechitechut a rengud a lsekum a rechad a diak el semeriar er tia el urered el berkel a klumech?

¹² A kot el klou a ultutelel el “ungil lurreor” el medung er a Tekingel a Dios el kirir a Rekristiano, a ureor er a berkel a klumech me a omeruul el disaiplo. (Matteus 24:14; 28:19, 20) A rebebil er a chelecha el taem a diak el semeriar er tia el klumech, el di ua rebebil el chad er a irechar. (Monguiu er a 1 Korinth 1:18-21.) Ngdi tiang a diak el ngedechii a belkul tia el klumech, me a lechub el rellii el mo diak a ultutelel sel techellir a rebek el chad, el mo oumerang er a chelechang el dirk ngar er ngii a taem. (Rom 10:13, 14) Kede ulterekokl el mo ngmai a betok el klengeltengat sel dengesuterir a rebebil el mo medengelii a osisecheklel a Dios.

A Jehovah a Omekngeltengat er a Remesiungel Sel Lolenget Aike el Ngar er Ngii er Tir

13. A Paulus ngchiloit a ngera el tekoi el kirel a ungil el chais?

¹³ A Paulus er a uchei er a bo le Kristiano, e ngmilsuub a ngar er a bab el osisecheklir a Rechijudea. Ngmillukl er a belual er a Tarsus el mo er a Jerusalem el mlo mesuub a osisecheklel a chad er a llach, el Gamaliel, er a leteruich me a edei a rekil. (Rellir 22:3) Omerollel a taem, e a Paulus a mlo chemolt el ileakl el mellomes a rengul er a delongelir tirke el kldemel, e oleko nglilemelemii a skulel e ngmlo ta er a ngar er a bab el chad er a Judea. (Galatia 1:13, 14) Ngchiloit aika el rokui el tekoi er sera lekengei er a ungil el chais e bo lomerk er a klumech. Me nguluuchel er a rengul er a tekoi el lullilt el mo meruul? Ngkmal dimlak, ngbai milluches el kmo: “E liluut el kmal mo omdasu a rokuil tekoi el kmo ngsong er ngak, el sel ngarbab el klungiolel a klemedengei el medengelii a Kristus Jesus el Rubak er ngak a uchul. El ngii a uchul e ak urriid a rokuil tekoi, e omdasu er ngiil tekoi el kmo ngua besbas, el tia kirel me knguu a Kristus.”​—Filipi 3:8.

14, 15. Ngera el klengeltengat a dengai e le kid el “choureor el kldemel a Dios”?

¹⁴ A Rekristiano er a chelechang a ua Paulus el chemoit a betok el tekoi me bo el sebechir el omerk er a ungil el chais. (Markus 10:29, 30) Kede ouuchel er a rengud el kirel a omelilt er kid? A Robert el dulsaod er ngii er a uchei, a ua uldesuir a rebetok sel ledu el kmo: “Ngkmal diak kuuchel er a renguk, tia el ureor er a mui el taem el omesiou a mla meskak a klou el deurreng e dirrek el mla meskak a techellek el mo ‘osiik el kmo ng ua ngeral ungil a RUBAK.’ Sel kunglou er a omesiungek el mo er a Jehovah, e ngblechoel el omekngeltengat er ngak el kuk betok er aike el kchiloit el tekoi. Me ngkora sebechek el omes er ngii el kmo ngdimlak a ngera el kuriid, ak bai melai a kmal betok el klengeltengat.”​—Psalm 34:8; Osisechakl 10:22.

 ¹⁵ Kau me ke ulterekokl el dirrek el mla chormii el kmo ngua ngera el ungil a Jehovah, e le kau el teloi er tia el ureor er a berkel a klumech me a omeruul el disaiplo. Ngmla ta el bo molechesuar a ngelsuil a chedaol el reng er a Jehovah er a taem el mulemerk er a klumech? Ke mla mesterir a rebebil el mlo dmeu a rengrir er sera lesuubii a klemerang er a klemechel a Jehovah? (Rellir 16:14) A Jehovah ngmla ngosukau el mo outekangel a mondai er kau, e dirrek el mla meskau a techall el mo menglou er a omesiungem? Ngmelisiich er kau el mo outekangel a ringel, e ngosukau el mo melemolem el mesiou er ngii, el mo lmuut er a taem el molechesukau el mechitechetong? (Filipi 4:13) Ngsebeched el mo kmeed er a Jehovah e omes er ngii el ua mera el chad sel bo dolechesuar el kmo ngolengeseu er kid el kirel a omesiunged. (Isaia 41:10) Ngkmal klou el klengeltengat tia el techall el mo “choureor el kldemel a Dios,” el meruul er tia el mekreos el ureor el denguu el okiu a osisecheklel.​—1 Korinth 3:9.

16. Ngua ngera uldesuem el kirel aike el tekoi el mchiloit me bo el sebechem el meruul er tia el ureor er a osisechakl el mla er a Dios el mei?

¹⁶ A rebetok el chad a melatk el mo remuul a tekoi el mo uchul e a rechad a diak el obes er tir. Kede mla mesterir a rebetok el remuul tekoi el mo uchul e ngmerael a chisir el di kirel a tedeb el taem. Me nguaisei, engdi tia el ureor el loruul er ngii a Jehovah el uchul a omengebkall el kirel a ngklel, a di melemolem el ngar er ngii, me a rechedal a diak el obes er ngii. (Osisechakl 10:7; Hebru 6:10) Mada me dolemolem el omes er tia el techelled el meruul er tia el ureor er a osisechakl el mla er a Dios, el ngii a kmal mekreos el tekoi.

Ke Mekerang a Omonger?

• Ngera kired el mo meruul me bo el sebeched el ngmai a osisechakl er a Jehovah?

• Ngmekerang a osisecheklel a Dios e ngmodech a klengar er a rechad?

• Ngoeak a ngera el rolel e kede mukngeltengat e le kid el olengeseu er a rebebil el mo ngmai a klungiolir er a osisecheklel a Dios?

[Aike el Ker er a Suobel]

[Siasing er a 25 el llel]

Tirke el mosisechakl er a Jehovah a toketekii a mera el klodam el meliuekl er a beluulechad

[Siasing er a 26 el llel]

Ngkmal klou el klengeltengat sel bo doureor “el kldemel a Dios”