Te Meitaki Maata o te Apiianga a te Atua
Te Meitaki Maata o te Apiianga a te Atua
“E mea puapinga kore te au mea ravarai nei iaku i te meitaki maata ra i to kite i taku Atu ra ia Iesu Mesia.”—PHILI. 3:8.
1, 2. Eaa te ikianga ta tetai au Kerititiano i rave, e eaa te tumu?
MEI te taime mai i akamata ai a Robert i te aere ki te apii e mea umere tikai tona kite i te apii. I te taime e varu rai ona mataiti, kua aere atu tetai o tona au puapii ki tona kainga, kua akakite kiaia e ka puapingaia aia i roto i tetai ua atu apii tana ka rave. Kua akakite aia i tona manakonakoanga e, a tetai ra, ka riro mai aia ei taote rapakau maki. No te mea e meitaki tana apii aketemia i roto i te apii tuarua, ka tau aia kia aere ki tetai ua atu o te au apii teitei i tona enua. Inara kua iki a Robert eiaa e ariki i ta te manganui e manako ra e e tikaanga ngateitei takake, penei e kare rava e tupu akaou, kia rauka iaia i te aruaru i tona akakoroanga kia tavini ei painia tamou.
2 Mei ia Robert rai, e maata te au Kerititiano—mapu e te pakari—tei rauka te au tikaanga kia akameitaki atu i to ratou turanga i roto i teia akatereanga o te au mea nei. Kua iki tetai papaki eiaa e akapou maata i te taime ki taua au akakoroanga ra, kia rauka ia ratou i te aruaru i te au akakoroanga pae vaerua. (1 Kori. 7:29-31) Eaa te akakeu ra i te au Kerititiano mei ia Robert rai kia inangaro puareinga ua i te angaanga pakari i roto i te angaanga tutu aere? No to ratou inangaro ia Iehova, ko te tumu maata roa atu ia, tetai kua marama ratou i te meitaki maata o te apiianga a te Atua. Kare koe i akamanako ana i nga taime ua akenei e, mei teaa ra te tu o toou oraanga naringa koe kare i kite i te tuatua mou? Na te akamanako anga i tetai au akameitakianga takake rava ta tatou e rekareka nei no tei apiiia e Iehova, e tauturu ia tatou kia akamaara mari i te puapinga maata o te tuatua meitaki, e kia maroiroi i te tutu aere i te reira ki etai ke.
Tikaanga Ngateitei kia Apiiia e te Atua
3. Eaa te tumu i papu ei ia tatou e te inangaro puareinga ua ra a Iehova i te apii i te au tangata ara ua?
3 No tona tu meitaki, te inangaro puareinga ua ra a Iehova i te apii i te au tangata ara ua. I te tuatua anga na roto i te totou no runga i te au Kerititiano akatainuia te karanga ra a Isaia 54:13 e: “E te au tamariki katoa naau ra e apiiia e Iehova; e ei au nuingangare to te au tamariki naau ra.” Te tau katoa ra rai te kaveinga o taua au tuatua ra ki te au “mamoe ke atu” a Karaiti. (Ioa. 10:16) Te taka meitaki ua ra teia mei tetai totou ke mai e akatupuia ra i to tatou nei tuatau. Kua kite a Isaia i roto i te orama, i te au iti tangata e aere maira ki te akamorianga mou mei te au pa enua ravarai. Te akataka maira aia e te tuatua ra ratou tetai ki tetai i te na ko anga e: “Aere mai, ka aere tatou ki runga i te maunga o Iehova, ki te are o te Atua o Iakoba; e nana e apii mai ia tatou i tona au aerenga.” (Isa. 2:1-3) E tikaanga ngateitei tikai kia apiiia e te Atua!
4. Eaa ta Iehova e umuumu maira mei te aronga tana e apii ra?
4 Eaa te ka anoanoia tatou kia rave e rauka ai te puapinga mei te apiianga a te Atua? Tetai umuumuanga maata roa atu koia oki kia riro ei tangata ngakau maru e te inangaro ngoie ua kia apiiia. Kua tata a Davida e e: “Meitaki to Iehova e te tiratiratu. . . . e apii mai aia i te aronga ngakau maru i tona uaorai arataa.” (Sala. 25:8, 9) E kua tuatua a Iesu e: “E akameitaki au ia koe, e taku Metua, te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” (Luka 10:21) Kare ainei koe e inangaro ana i te akavaitata atu ki te Atua ko ‘tei oronga i te aroa takinga meitaki ua ki te aronga akaaka’?—1 Pete. 5:5.
5. Na teaa anake ua i rauka ai ia tatou kia kite no runga i te Atua?
5 Ei au tavini no Iehova, no to tatou uaorai ainei kite e te pakari i kite ei tatou i te tuatua mou? Kare. Ko te tika ra, naringa e ko tatou ua, kare rava e rauka ia tatou te kite no runga i te Atua. Kua akakite a Iesu e: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioa. 6:44) Na roto i te angaanga tutu aere e na roto i te vaerua tapu, te akavaitata mai nei a Iehova i te au tangata mei te mamoe to ratou tu, ko “tei inangaroia e te au enua katoa ra.” (Haga. 2:7) Kare ainei koe e mareka ana kia riro mai e ko koe tetai o te aronga ta Iehova e akavaitata maira ki tana Tamaiti?—E tatau ia Ieremia 9:23, 24.
Te Mana kia Akameitaki Atu i te Oraanga
6. Eaa ra te tu umeremere tikai ta te apii anga i “te kite ia Iehova” e akatupu ra ki te tangata?
6 Na roto i te tuatua akatutu, kua akaari mai te totou a Isaia i te tauianga e tupu nei i roto i te au tu o te tangata i to tatou nei tuatau. Kua riro mai te au tangata tu kino ei au tangata akamoeau. (E tatau ia Isaia 11:6-9.) Te aronga tei kaitamaki atu ana tetai ki tetai no te au tu tuketuke o te katiri tangata, te enua, te iti tangata me kore no tetai atu au tumu ke, kua apiiia ratou kia noo kapiti ma te rotai. Mei te mea atura e, kua ‘tupaki ratou i ta ratou au koke ei auri arote.’ (Isa. 2:4) Eaa ra te tumu no teia au tauianga umeremere tikai? Kua ariki te tangata i “te kite ia Iehova” e kua taangaanga i te reira i roto i to ratou oraanga. Noatu e e aronga ara ua te au tavini o te Atua, ko ratou ra te taokotaianga taeake mou tikai i te pa enua katoa nei. Kua riro te tu marekaia o te tuatua meitaki e te ua memeitaki ta te reira e akatupu ra i te pa enua katoa nei, ei akapapu mai i te meitaki maata o te apiianga a te Atua.—Mata. 11:19.
7, 8. (a) Eaa ra tetai pae o te “au punanga ketaketa” ta te apiianga a te Atua e tauturu ra i te tangata kia uri ki raro? (e) Eaa te akaari maira e te apai maira te apiianga a te Atua i te akapaapaaanga kia Iehova?
7 Kua akaaite te apotetoro ko Paulo i te angaanga orometua a te au tavini o te Atua ki te tamaki i te pae vaerua. Kua tata aia e: “Kare oki ta matou taoonga tamaki i ta te kopapa, e mea mana ra i te Atua, i te uri anga i te au punanga ketaketa ki raro: I te uri anga atu i te au eumiumianga ra ki raro, e te au mea teitei katoa ko tei akateitei kia kore e rauka te kite i te Atua.” (2 Kori. 10:4, 5) Eaa ra tetai o “te au punanga ketaketa” koia oki te au irinakianga tarevake tei oonu ki roto i te ngakau, ta te apiianga a te Atua i akamatara mai i te tangata mei roto? Ko te apainga teiaa o te au apiianga pikikaa, te au irinakianga purepure, e te au tuatua pakari a te tangata, kia taiku ua atu i etai o te reira. (Kolo. 2:8) Te tauturu nei te apiianga a te Atua i te tangata kia autu ki rungao i te au angaanga kino, e kia tatanu i te au tu e akarekareka ra i te Atua. (1 Kori. 6:9-11) Te akameitaki roa atura te reira i te oraanga pamiri. E te oronga ra te reira i te manakonakoanga no te aronga kare e akakoroanga tikai i roto i te oraanga. Ko te tu apiianga tikai te reira e anoanoia nei i teia tuatau.
8 Tetai o te au tu ta Iehova e tauturu nei i te tangata kia akatupu koia oki ko te tuatua tika, mei ta te au tupuanga e aru mai nei ka akaari mai. (Ebe. 13:18) Tetai vaine i Initia kua ariki aia i te apii Pipiria e i te tuatau i aereia kua riro mai ei papuritia kare i papetitoia. Tetai ra iaia e oki ra ki te kainga mei te angaanga patu Are Uipaanga Patireia, kua kite aia i tetai ei vivi auro mei te $1,292 (N.Z.) i runga i te one vaitata atu ki te ngai tapuanga bus. Noatu tona turanga putaua, kua apai rai aia i te ei vivi ki ko i te opati o te akava. Kua umere tikai te akava! I muri mai kua ui atu tetai akava ke mai kiaia e, “Eaa koe i kore ei i apai i te ei vivi noou?” Kua akamarama atu aia e, “Kua riro te apiianga a te Pipiria ei taui i toku tu, e e vaine tuatua tika au i teianei.” No tona umere, kua karanga atu aia ki te tangata pakari tei aru mai i taua vaine ra ki te opati o te akava e: “Kua tere atu i te 38 mirioni tangata i roto i teia tuanga o te enua. Me ka rauka ia koe te tauturu e tai ngauru tangata kia taui mei teia vaine rai, e aka puapinga maata tikai ta te reira ka akatupu.” Me akamanako tatou no runga i te mirioni ua atu o te oraanga ta te apiianga a te Atua i akatuke, e manganui ua atu te au tumu no tatou kia akapaapaa ia Iehova?
9. Akapeea ra e rauka ai i te tangata kia rave i tetai au tauianga puapinga tikai i roto i to ratou oraanga?
9 Kua riro te mana o te Tuatua a te Atua kia taui i te tu o te tangata, pera katoa te tauturu e oronga maira te Atua na roto i te vaerua tapu, ei tauturu i te tangata kia rave i te au tauianga puapinga tikai i roto i to ratou oraanga. (Roma 12:2; Gala. 5:22, 23) Te na ko maira a Kolosa 3:10 e: “E kua akatangata ou [ia kotou], ko tei akaouia i te kite mei te tu katoa o Tei anga iaia ra.” E mana ririnui to te karere ka kiteaia i roto i te Tuatua a te Atua i te Pipiria, kia akakite mai e mei teaa tikai te tu o te tangata i roto i tona ngakau, e ka rauka i te reira i te taui i tona aerenga manako e pera katoa te tu tikai o tona manako ngakau. (E tatau ia Ebera 4:12.) Na te rauka mai anga te kite tika tikai o te au Tuatua Tapu, e na te akaau anga i tona oraanga ki to Iehova au turanga tuatua tika, ka rauka i tetai kia riro mai ei oa no te Atua, ma te manakonakoanga o te ora atu anga e tuatau ua atu.
Akateateamamao no te Tuatau ki Mua
10. (a) No teaa ra i riro ei e ko Iehova anake ua rai te ka rauka i te tauturu ia tatou kia akateateamamao no te tuatau ki mua? (e) Eaa ra te au tauianga maata te ka tupu ki te enua katoa nei, kare e roa atu ana?
10 Ko Iehova anake ua rai te ka rauka i te tauturu ia tatou kia akateateamamao no te tuatau ki mua, no te mea kua kite aia e eaa te ka tupu. Nana e akataka mai e mei teaa te tu o te tuatau ki mua no te tangata. (Isa. 46:9, 10) Te akaari maira te totou a te Pipiria e “kua vaitata te rā maata o Iehova.” (Zepha. 1:14) No runga i taua ra ra, ka tupu rai te au tuatua a Maseli 11:4 e akakite maira e: “Kare e puapinga to te apinga i te rā e riri ei ra: kareka te tuatua-tika ra, e akaora ïa no te mate maira.” Me tae ki te tuatau e rave ei a Iehova i tana akavaanga ki runga i te ao o Satani, ko te apinga puapinga maata roa atu koia oki ko te akaperepereanga a te Atua. Kare takiri o te moni puapinga. Ko te tika ra, te karanga ra a Ezekiela 7:19 e: “E akaruke ratou i ta ratou ario ki roto i te arataa, e riro oki ta ratou auro mei te mea viivii ra.” Ka riro te kite anga na mua i teia tika, ei tauturu ia tatou kia rave i te au ikianga tau i teianei.
11. Eaa tetai mataara e tauturu nei te apiianga a te Atua ia tatou no te tuatau ki mua?
11 Tetai mataara takake rava ta te apiianga a te Atua e akateateamamao nei ia tatou no te ra o Iehova e vaitata maira koia oki, na te tauturu anga ia tatou kia akanoo meitaki i te au mea puapinga maata roa atu. Kua tata te apotetoro ko Paulo kia Timoteo e: “E ako atu i te aronga apinga maata i teianei ao, eiaa ei ngakau teitei, eiaa oki e irinaki i te apinga maata mou kore, ei te Atua ora ra.” Noatu e kare e maata ana ta tatou moni, ka puapingaia rai tatou mei teia akoanga akauruia mei ko mai ia Iehova. Eaa ra te o maira? Eiaa tatou e akaputu i te au apinga materia, mari ra e tauta tatou ‘kia takinga-meitaki’ e ‘kia apingaia i te angaanga meitaki.’ Na te tuku anga i te angaanga a Iehova na mua i roto i to tatou oraanga, te ‘akaputu marie ra tatou i te meitaki tumu no tatou uaorai a muri atu.’ (1 Timo. 6:17-19) Te akaari maira taua arataa no te akaatinga ia tatou uaorai i te tu pakari, no te mea mei ta Iesu i akakite e, “eaa ta te tangata puapinga, kia rauka iaia to teianei ao katoatoa, e riro atura tona vaerua?” (Mata. 16:26, 27) No te mea te vaitata maira te ra o Iehova, e mea tau no tatou tataki tai kia akamanako e me: ‘Te akaputu nei ra oki au i te apinga kiea? Te tavini ra ainei au i te Atua, me i te Mamona?’—Mata. 6:19, 20, 24.
12. Eaa tatou ka kore ei e taitaia me akavaavaa mai tetai aronga i ta tatou angaanga orometua?
12 Tei puapinga maata roa atu i roto i te au “angaanga meitaki” tei akatakaia mai i roto i te Tuatua a te Atua no te au Kerititiano, koia oki ko te angaanga akaora o te tutu anga i te Patireia e te akariro anga i te tangata ei pipi. (Mata. 24:14; 28:19, 20) Mei tei tupu ana i te anere mataiti mua, penei ka akavaavaa tetai aronga i ta tatou angaanga orometua. (E tatau ia 1 Korinetia 1:18-21.) Inara kare te reira e taui i te puapinga o ta tatou karere, e kare e akaiti mai i te puapinga maata o te oronga anga i tetai tuatau no te tangata kia tuku i to ratou akarongo ki roto i te reira, koi vai ei te tuatau. (Roma 10:13, 14) Ia tatou e tauturu ra i etai ke kia puapingaia mei te apiianga a te Atua, ka rauka ia tatou te au akameitakianga e manganui.
Ka Akameitakiia no te Akaatinga Anga
13. Eaa te au akaatingaanga ta te apotetoro ko Paulo i rave no te tuatua meitaki?
13 I mua ake ka riro mai ei aia ei Kerititiano, te tereniia ra te apotetoro ko Paulo kia rauka iaia tetai turanga puapinga i roto i te akatereanga ngati Iuda no te au mea katoa. Iaia e 13 rai mataiti, kua neke atu aia mei tona oire anau ko Tareso ki Ierusalema, kia apiiia e te puapii rongonui o te Ture, ko Gamaliela. (Anga. 22:3) I te tuatau i aereia, kua akamata a Paulo i te kiteaia ei tangata kite i te apii i rotopu i te au tangata o tona uki, e kua akapera ua atu rai aia i roto i taua turanga ra, penei e kua papanunui rai aia i roto i te akonoanga ngati Iuda. (Gala. 1:13, 14) I tona ariki anga i te tuatua meitaki e te akamata anga i te rave i te angaanga tutu aere, kua akaruke puareinga ua aia i taua au mea pouroa ra. Kua tataraara ainei a Paulo no tei rave aia i taua ikianga ra? Kare. Ko te tika ra, kua tata aia e: “Koia tikai, e mea puapinga kore te au mea ravarai nei iaku i te meitaki maata ra i to kite i taku Atu ra ia Iesu Mesia: i akaruke ei au i te au mea katoa ra, e kua riro ïa ei teita iaku.”—Phili. 3:8.
14, 15. Eaa te au akameitakianga ta tatou e kite nei ei au ‘oa rave angaanga no te Atua’?
14 Mei ia Paulo, te rave nei te au Kerititiano i te au akaatingaanga kia rauka ia ratou i te tutu aere i te tuatua meitaki. (Mare. 10:29, 30) Te ngere ra ainei tatou i tetai ua atu au apinga no te rave ra tatou i te reira? Ko Robert, tei taikuia i te akamataanga, kua aite rai tona manako ki to te manganui i te karanga anga aia e: “Kare rava oku manako tataraara. Kua akatupu te angaanga orometua i te mataora e te merengo maata kiaku, e kua oronga mai i tetai tikaanga noku kia ‘tongi e kia kite i te meitaki o Iehova.’ I te au taime ravarai ka rave au i te au akaatingaanga i te pae materia kia rauka iaku i te aruaru i te au akakoroanga pae vaerua, e oronga ua mai ana a Iehova i te au akameitakianga tei maata roa atu i taku i akaatinga. Mei te mea atura e kare takiri au i akaatinga ana i tetai apinga. E maata ua atu tei rauka iaku!”—Sala. 34:8; Mase. 10:22.
15 Me i piri ana koe ki roto i te angaanga tutu aere e te apii aere anga no tetai tuatau i teianei, kare e ekoko e kua rauka katoa ana ia koe tetai au atianga kia tongi e kia kite i te meitaki o Iehova. E au taime ainei tetai tei kite ana koe i te tauturu a tona vaerua, ia koe e akakite aere ra i te tuatua meitaki ki etai ke? I kite ana ainei koe i te rekareka i roto i te mata o etai ke, ia Iehova e akatuera ra i to ratou ngakau kia akarongo mai ki te karere? (Anga. 16:14) I tauturu ana rai a Iehova ia koe kia autu i te au arairaianga, penei i te akatuera atu anga i te mataara kia akamaata atu i taau angaanga orometua? I turuturu ana rai aia ia koe i te au tuatau ngata, i te tauturu anga ia koe kia tavini ua atu rai iaia, ia koe e kite ra i te tu apikepike? (Phili. 4:13) Me kite tikai tatou uaorai i ta Iehova tauturu, ia tatou e rave ra i ta tatou angaanga orometua, ka riro mai aia ei peretana tika tikai kia tatou e ka piri vaitata roa atu tatou kiaia. (Isa. 41:10) Kare ainei i te akameitakianga maata kia riro ei ‘oa rave angaanga no te Atua’ i roto i teia angaanga ngateitei o te apiianga a te Atua?—1 Kori. 3:9.
16. Eaa ra toou manako no runga i te au tautaanga e te au akaatingaanga e rave ra koe i roto i te apiianga a te Atua?
16 E maata te tangata e manakonako ana kia rauka tetai apinga mou tikai i roto i to ratou oraanga. Kua kite ua tatou e ko te au angaanga rongonui e raveia ana i roto i te ao i teia tuatau kare te reira e roa ana, kua ngaropoina. Kareka ra te au angaanga ta Iehova e akatupu nei i teia tuatau, tei piri atu ki te akatapuanga o tona ingoa, kare roa e ekoko e ka vai rai te reira i roto i tetai rekoti tinamou ei tuanga no te tuatua enua o te iti tangata o Iehova. Ka akamaara uaia rai taua au angaanga ra e tuatau ua atu. (Mase. 10:7; Ebe. 6:10) No reira kia akaperepere ua atu rai tatou i to tatou tikaanga ngateitei kia apii i etai ke no runga ia Iehova, e angaanga, kare roa e ngaropoina.
Akapeea Koe me Pau?
• Eaa ta Iehova e umuumu maira mei te aronga tana e apii ra?
• Akapeea te apiianga a te Atua i te akameitaki roa atu anga i te oraanga o te tangata?
• Na roto i teea au mataara i akameitakiia ai tatou no te tauturu anga i etai ke kia puapingaia mei te apiianga a te Atua?
[Au Uianga Apii]
[Tutu i te kapi 23]
Ko te aronga tei apiiia e Iehova te taokotaianga taeake mou tikai
[Tutu i te kapi 24]
Kare ainei i te akameitakianga kia riro ei ‘oa rave angaanga no te Atua’?