Kuyiisyigwa A Leza Ncintu Cibotu Kwiinda
Kuyiisyigwa A Leza Ncintu Cibotu Kwiinda
“Zintu zyoonse ndaziyeeya mbuli zintu zyabuyo nkaambo kacintu eci ciinda loko kubota cakuziba Jesu Kristo.”—FLP. 3:8.
1, 2. Ino ncinzi Banakristo bamwi ncobasala kucita, alimwi ino nkaambo nzi ncobasalila boobo?
KUZWA ciindi Robert naakatalika cikolo, wakali musongo kapati. Naakali amyaka yakuzyalwa iili lusele, bayi bakwe bakamuswaya kuŋanda akumwaambila kuti ulakonzya kucita cintu cili coonse mubuumi bwakwe. Bakali kusyoma kuti bumwi buzuba uyooba dokotela. Akaambo kakuti wakali musongo, wakapasa cakuti wakali kukonzya kwiiya kucikolo cipati cili coonse mucisi cabo. Pele Robert tanaakasala kuunka kucikolo cipati ibanji ncobabona kuti ncoolwe ncobatakonzyi kwiindwa, aboobo wakasala kuzuzikizya mbaakani yakwe yakucita mulimo wabupainiya.
2 Mbubwenya mbuli Robert, Banakristo banji, ibana abapati balakonzya kucita kabotu muzyintu zyakumubili mazuba aano. Ibanji basala kuliimya kuzyintu eezyi kutegwa bacite kabotu kumuuya. (1 Kor. 7:29-31) Ino ncinzi cipa kuti Banakristo bali mbuli Robert kababeleka canguzu mumulimo wakukambauka? Kaambo kapati nkakuti balamuyanda Jehova alimwi balizyi mbocili cibotu kuyiisyigwa a Leza. Sena caino-ino kuli nomwakayeeyede kuti buumi bwanu nobwali buti ikuti nomwatakaiya kasimpe? Ikuyeeya zilongezyo nzyotujana akaambo kakuyiisyigwa a Jehova kulakonzya kutugwasya kuti lyoonse katwaabikkila maano makani mabotu aa Bwami akuba basungu mukuyiisya bamwi.
Ncoolwe Cipati Kuyiisyigwa a Leza
3. Ino nkaambo nzi ncotuli masimpe kuti Jehova ulilisungwide kuyiisya bantu batalondokede?
3 Akaambo kalubomba lwakwe, Jehova ulilisungwide kuyiisya bantu batalondokede. Lugwalo lwa Isaya 54:13 lusinsima boobu kujatikizya Banakristo bananike: “Bana bako boonse bayooiyisigwa Jehova. Ncobeni bana bako bayooba acoolwe cipati.” Majwi aaya aelede kuti alabikkilizya “[aba]mbelele zimwi.” (Joh. 10:16) Eeci cilalibonya mubusinsimi buli mukuzuzikizigwa lino. Mucilengaano, Isaya wakabona bantu bazwa kumisyobo yoonse kabaya kubukombi bwakasimpe. Waamba kuti balaambilana kuti: “Atwiinke, tukaye kucilundu ca-Jehova, kuŋanda ya-Leza wa-Jakobo, elyo uyootwiisya inzila zyakwe, nkabela tuyooenda muziyanza zyakwe.” (Is. 2:1-3) Eelyo kaka eeci ncoolwe cipati kuyiisyigwa a Leza!
4. Ino Leza uyanda kuti aabo mbayiisya kabali buti?
4 Ino ncinzi ncotweelede kucita kutegwa tuyiisyigwe a Jehova? Iciyandika kapati ncakuti muntu weelede kuba mubombe alimwi uulaabuyiisye. Sintembauzyo Davida wakalemba kuti: “Jehova mubotu, uliluleme. . . . Ulaiisya babombemyoyo inzila yakwe.” (Int. 25:8, 9) Awalo Jesu wakati: “Ndakulumba, Taata, Omwami wejulu enyika, nkaambo makani aya wakabasisa basongo abaabo abaziba, waayubulwida bana.” (Lk. 10:21) Ikuzyiba kuti Leza ulabafwida luzyalo “batete-myoyo” kutupa kumuyanda kapati.—1 Pet. 5:5.
5. Ino ncinzi cilike icakapa kuti tumuzyibe Leza?
5 Mbotuli babelesi ba Jehova, sena twakakajana kasimpe akaambo kabusongo bwesu? Peepe. Mubwini, iswe tobeni notwatakakonzya kumuzyiba Leza. Jesu wakaamba kuti: “Takukwe muntu uukonzya kuza kulindime Taata uwakandituma atamukwela.” (Joh. 6:44) Kwiinda mumulimo wakukambauka akubelesya muuya uusalala, Jehova ulabakwela aabo bali mbuli mbelele, “[i]zintu ziyandisi zyazisi zyoonse.” (Hag. 2:7) Sena mulamulumba Jehova akaambo kakuti wakamukwelela ku Mwanaakwe?—Amubale Jeremiya 9:23, 24.
Malailile aa Leza Alabacinca Bantu
6. Ino ncinzi cikonzya kucitika ikuti bantu baiya akumuzyiba Jehova?
6 Businsimi bwa Isaya bulapandulula mbuli bantu mbobaya bucinca mazuba aano. Bantu ibakali basinkondo lino bakaba basiluumuno. (Amubale Isaya 11:6-9.) Aabo bakali kulwana akaambo kakwiindana musyobo, cisi nkobazwa, mulaka naa zilengwa, baiya kukkala antoomwe muluumuno. Munzila yacikozyanyo, ‘bafwula mapanga aabo kuba maamba aakulimya.’ (Is. 2:4) Ino ncinzi capa bantu kucinca? Bamuzyiba Jehova akuzibelesya zyintu nzyobaiya mubuumi bwabo. Nokuba kuti babelesi ba Leza tabalondokede, bapanga bunyina bwini-bwini bwanyika yoonse. Bantu munyika yoonse mbobaatambula makani mabotu alimwi ambwaacinca bukkale bwabo, cipa bumboni bwakuti kuyiisyigwa a Leza ncintu ciinda kubota.—Mt. 11:19.
7, 8. (a) Ino “mampangala [nzi] mayumu” ooko kuyiisyigwa a Leza nkokwaangununa bantu? (b) Ino ncinzi citondezya kuti kuyiisyigwa a Jehova kupa kuti atembaulwe?
7 Mwaapostolo Paulo wakakozyanisya mulimo wakukambauka ngobacita babelesi ba Leza kunkondo yakumuuya. Wakalemba kuti: “Zintu zyesu zyakulwisya tazyeensi zyabantu buyo, nzyanguzu zya-Leza zyakumwaisya mampangala mayumu. Tulamwaisya miyeeyo yoonse azintu zyoonse zili buti zilisumpula cakulwisya luzibo lwa-Leza.” (2 Kor. 10:4, 5) Ino “mampangala [nzi] mayumu” ooko kuyiisyigwa a Leza nkokwaangununa bantu? Ninjiisyo zyakubeja, kusyoma mizimo alimwi abusongo bwanyika azimwi zili boobu. (Kol. 2:8) Kuyiisyigwa a Leza kulabagwasya bantu kuleka micito mibi akuba abube bumukkomanisya Leza. (1 Kor. 6:9-11) Kupa kukkala kabotu mumukwasyi. Alimwi kupa bantu kuba abulangizi bwini-bwini mubuumi. Oolu ndolwiiyo luyandika mazuba aano.
8 Bube bumwi Jehova mbwagwasya bantu kuba ambubo mbwakusyomeka, mbuli cakuluula citobela mbocitondezya. (Heb. 13:18) Umwi mukaintu mucisi ca India wakaiya Bbaibbele akweelela kuba sikumwaya uutabbapatizyidwe. Bumwi buzuba naakali kupiluka kuzwa kukuyaka Ŋanda ya Bwami, wakabwezela ninga yangolida aacitisyini cabbaasi iyuulwa mali aainda ku K4,000,000 (U.S.$800). Nokuba kuti wakali mucete, wakaitola kuofesi yabamapulisa kutegwa bamuyandaule mukamwini. Mupulisa wakagambwa kapati. Kumane mupulisa umbi wakamubuzya kuti: “Ino walekela nzi kwiibweza buyo?” Mukaintu ooyu wakaamba kuti: “Ikwiiya Bbaibbele kwakandipa kucinca, lino ndilasyomeka.” Mupulisa wakakkomana, amane wakaambila mwaalu Munakristo wakasindikila mukaintu ooyu kuti: “Kuli bantu bainda kutuulunzuma tuli 38 mucooko cino. Ikuti mwagwasya bantu bali kkumi kuba mbuli mukaintu ooyu, inga mwabeleka kapati.” Notuyeeya tuulunzuma twabantu ibakacinca akaambo kakuyiisyigwa a Leza, tulamutembaula Jehova.
9. Ino ncinzi cipa kuti bantu kabacinca kapati mubuumi bwabo?
9 Nguzu zya Jwi lya Leza, antoomwe alugwasyo Jehova ndwapa kwiinda mumuuya uusalala, zipa kuti bantu bacince kapati mubuumi bwabo. (Rom. 12:2; Gal. 5:22, 23) Lugwalo lwa Ba-Kolose 3:10 lwaamba kuti: “[Amulisamike] buntu bupya bulengulwidwe caluzibo mbuli cikozyano cayooyo iwakabulenga.” Makani aali mu Jwi lya Leza, Ibbaibbele, alijisi nguzu zyakutondezya zili mumoyo wamuntu, alimwi alakonzya kuncinca mbwayeeya ambwazibona zyintu. (Amubale Ba-Hebrayo 4:12.) Ikuti muntu waazyiba kabotu Magwalo alimwi akupona kweelana azyeelelo zya Jehova, ulakonzya kuba mulongwe wa Leza akuba abulangizi bwabuumi butamani.
Kulibambila Zyakumbele
10. (a) Ino nkaambo nzi Jehova ncali nguwe alikke uukonzya kutugwasya kulibambila zyakumbele? (b) Ino nkucinca kuli buti kuyoocitika ino-ino munyika?
10 Jehova alikke nguukonzya kutugwasya kulibambila zyakumbele nkaambo nguuzyi zyintu zili afwaafwi kucitika. Ulizyi buumi bwabantu mbobuya kuba kumbele. (Is. 46:9, 10) Businsimi bwamu Bbaibbele butondezya kuti “buzuba bupati bwa-Jehova buli kufwaafwi.” (Zef. 1:14) Mubuzuba oobo, imajwi aali kulugwalo lwa Tusimpi 11:4 aakuti: “Imbono tazigwasyi mubuzuba bwabukali, pele bululami bulavuna kulufu,” ayoozuzikizyigwa. Caakusika ciindi Jehova nayoobeteka nyika ya Saatani, ibululami mbobuyoopa kuti tufwutuke. Mali taakatugwasyi pe. Inzya, ilugwalo lwa Ezekiele 7:19 lwaamba kuti: “Bayoosowa insiliva yabo mumigwagwa, ayalo ingolida yabo iyooba mbuli cintu cisofweede.” Ikuzyibila limwi ziyoocitika kulatugwasya kubweza ntaamu zyeelede lino.
11. Ino ninzila nzi yomwe mpati ikuyiisyigwa a Leza mbokutugwasya kulibambila zyakumbele?
11 Inzila yomwe mpati ikuyiisyigwa a Leza mbokutupa kuti tulibambile buzuba bwa Jehova njakuti kulatugwasya kubika zyintu ziyandika mubusena bwakusaanguna. Imwaapostolo Paulo wakalembela Timoteo kuti: “Kolailila boonse abo bavubide ecino ciindi, kuti batalinuniki nokuba kusyoma buvubi butasyomeki, pele kusyoma Leza.” Nokuba kuti tatujisi mali manji, tulakonzya kugwasyigwa alulayo oolu luzwa kuli Jehova. Ino lulayo oolu lubikkilizya nzi? Muciindi cakulangaula lubono, tweelede ‘kucita milimo iiluzi’ ‘akuba bavubi mukumana milimo mibotu.’ Kwiinda mukubikka zyintu zyakumuuya kusaanguna mubuumi bwesu, ‘tulaliyobweda intalisyo mbotu yaciindi ciboola.’ (1 Tim. 6:17-19) Kuliimya kuli boobu kutondezya kuti tuli basongo nkaambo Jesu wakati, ino “nimpindunzi njajana muntu nikuba kuti wavuba nyika yoonse anukuti wanyanzigwa buumi bwakwe?” (Mt. 16:26, 27) Akaambo kakuti buzuba bwa Jehova buli afwaafwi, aumwi weelede kulibuzya kuti: ‘Ino nkuuli nkondiyobweda lubono? Sena ndibelekela Leza naa Lubono?’—Mt. 6:19, 20, 24.
12. Ino nkaambo nzi ncotuteelede kutyompwa ikuti bamwi kabatauyandi mulumbe ngotukambauka?
12 Mulimo uuyandika kapati akati ‘kamilimo mibotu’ yaambwa mu Jwi lya Leza njobeelede kucita Banakristo, ngwakukambauka makani mabotu aa Bwami akugwasya bantu kuba basikwiiya. (Mt. 24:14; 28:19, 20) Mbubwenya mbocakabede mumwaanda wamyaka wakusaanguna, bantu bamwi tabauyandi mulimo ngotucita wakukambauka. (Amubale 1 Ba-Korinto 1:18-21.) Pele eeci tacaambi kuti mulumbe ngotuyiisya unyina mpindu alimwi taceelede kutupa kuti tuleke kubakambaukila bantu nokucili ciindi. (Rom. 10:13, 14) Notugwasya bantu kuti bayiisyigwe a Leza, andiswe tulalongezyegwa.
Jehova Ulabalongezya Babelesi Bakwe Ibalyaaba
13. Ino nkulyaaba kuli buti Paulo nkwaakacita akaambo kamakani mabotu?
13 Katanaba Munakristo, imwaapostolo Paulo wakayiisyigwa mbwaakali kukonzya kuzwidilila kweelana abukkale bwabama Juda. Naakali buyo amyaka iili 13, wakalonga kuzwa ku Tarso nkwaakazyalilwa akuunka ku Jerusalemu kuya kwiiya Mulawo kumwiiyi mupati Gamaliyeli. (Inc. 22:3) Mukuya kwaciindi, Paulo wakatalika kucita kabotu mumulimo ooyu alimwi naakazumanana naakaba ampuwo kapati akati kabama Juda. (Gal. 1:13, 14) Naakaba Munakristo, wakatalika mulimo wakukambauka alimwi wakauleka mulimo wakwe wakumubili ngwaakali kucita. Sena Paulo wakausa akaambo kakusala nkwaakacita? Peepe. Wakalemba kuti: “Zintu zyoonse ndaziyeeya mbuli zintu zyabuyo nkaambo kacintu eci ciinda loko kubota cakuziba Jesu Kristo Mwami wangu. Nkaambo kanguwe nkindakalekela zintu zyoonse, ndaziyeeya kuti masifwisifwi buyo.”—Flp. 3:8.
14, 15. Ino ncoolwe nzi ncotujisi mbotuli “basimilimonyina Leza”?
14 Mbubwenya mbuli Paulo, Banakristo mazuba aano balalyaaba kutegwa bakambauke makani mabotu. (Mk. 10:29, 30) Sena kuli nzyotubula akaambo kakulyaaba ooku? Robert iwaambwa kumatalikilo aacibalo ulimvwa mbobalimvwa banji, naamba kuti: “Tanduuside akaambo kukusala kwangu. Mulimo wabupainiya undipa kukkomana akukkutila alimwi wapa kuti ‘ndilabile akubona kuti Jehova mubotu.’ Lyoonse nondiliimya kuzyintu zyakumubili kutegwa ndicite kabotu zyintu zyakumuuya, Jehova ulandilongezya kuti ndijane zyintu nzyondiyandika mane akwiinda ali zeezyo nzyondasweekelwa. Cili mbuli kuti kunyina anindakaliimya munzila iili yoonse.”—Int. 34:8; Tus. 10:22.
15 Ikuti naa mwali kutola lubazu mumulimo wakukambauka akuyiisya bantu Bbaibbele kwaciindi cili mbocibede, cakutadooneka andinywe mwakabona kale kuti Jehova mubotu. Sena nomuyiisya bantu makani mabotu, kuli nomwakabona kale kuti mwagwasyigwa amuuya uusalala? Sena mwakababona bantu kabakkomana akaambo kakuti Jehova wabagwasya kuzimvwisya zyintu nzyomubayiisya? (Inc. 16:14) Sena Jehova wamugwasya kwaazunda mapenzi aakonzya kumulesya kucita kabotu mumulimo wakukambauka, ambweni akumujalwida nzila yakuti muyungizye mulimo wanu? Sena wakamugwasya muziindi zikatazya, kumupa kuti muzumanane kumubelekela aciindi nomwakalimvwa kuti nguzu ziyabumana? (Flp. 4:13) Ciindi notulimvwa kuti Jehova watugwasya notucita mulimo, tumubona kuba muntu mwini-mwini kuli ndiswe alimwi tulaba acilongwe ciyumu anguwe. (Is. 41:10) Eelyo kaka eeci ncoolwe cipati ikuba “similimonyina Leza” mumulimo mupati wakugwasya bantu kuyiisyigwa a Leza!—1 Kor. 3:9.
16. Ino mbuti mbomulimvwa kujatikizya kulyaaba kwanu mumulimo wakuyiisya bantu kumuzyiba Jehova?
16 Bantu banji bayanda kucita cintu cimwi cilibedelede mubuumi bwabo. Twabona kuti noziba zyintu zili ampuwo nzyobacita munyika zilalubwa kwainda buyo ciindi cisyoonto. Pele milimo njobacita bantu ba Jehova mazuba aano iijatikizya kusalazigwa kwazyina lyakwe taikalubwi. Milimo eeyi, inooyeeyegwa lyoonse. (Tus. 10:7; Heb. 6:10) Atutondezye kuti tulalumba kuba acoolwe eeci cakuyiisya bantu kujatikizya Jehova, imulimo uutakalubwi.
Ino Inga Mwaingula Buti?
• Ino Leza uyanda kuti aabo mbayiisya kabali buti?
• Ino kuyiisyigwa a Leza kusumpula buti buumi bwabantu?
• Ino muunzila nzi motulongezyegwa akaambo kakugwasya bantu kuyiisyigwa a Leza?
[Mibuzyo yaciiyo]
[Cifwanikiso icili apeeji 23]
Aabo ibayiisyigwa a Jehova bapanga bunyina bwanyika yoonse
[Cifwanikiso icili apeeji 24]
Sena tacili coolwe cipati kuba “basimilimonyina Leza”?